لـيـالــي مـصـريـــة

اين انا ؟؟ "الحلقه الخامسه و العشرون"

2011-01-22T21:42:00.001+02:00

الحلقه الخامسه والعشرون

بقلم : شيرين سامي

شريف كان خارج مع واحد صاحبه اسمه طارق متجوز و بقاله في الكويت سنتين بس لسه معندوش أطفال هو لاحظ ان شريف عنده اكتآب من الغربه فحاول يخرج معاه بين وقت و التاني عشان يرفه عنه هما قاعدين في مطعم شيك بياكلوا سمك و جمبري و راح طارق يلمّح لشريف ان سبب اكتآبه هو وحدته و انه ياحبذا يتجوز و يعيش هنا مع مراته

شريف افتكر عاليه بس طرد صورتها بسرعه عشان مبقاش من حقه يفكر فيها و اتفاجئ بطارق بيطلعله صوره لبنت في العشرينات عاديه ان مكانتش ضحكتها هبله شويه و قاله:

ايه رأيك في أمنيه؟

أمنيه مين؟

صاحبة مراتي عندها عشرين سنه و بتدرس في كلية تجاره.

طب ايه علاقة ده بكلامنا.

ماتفتح مُخك بقى يا ريس أنا جايبلك حل لكل مشاكلك....عروسه زي الفل.

و يا ترى صاحبة الصورة تعرف انكم بتستخدموها كده عادي.

لأ طبعاً متعرفش دي بنت خجوله و محترمه...مراتي بتشكر فيها أوي.

بس أنا محبش أتجوز عن طريق صورة.

ليه يا عم طب ما أنا شوفت صورة مراتي الأول و بعدين نزلت في أجازة خطبتها و في الأجازة التانية اتجوزتها عادي هي الدنيا ماشيه كده.

شريف اكتأب أكتر و بقى نفسه ينهي الخروجه و يرّوح بسرعه يعني ايه المسافر ده مينفعش يحب و مطلوب منه يقضي فترة الخطوبه اللي هي من أحلى فترات الحياه لوحده و يبتدي يتعرف عليها لما يتجوزوا لأ أكيد هو مش بيتمنى كده خالص فاق من السرحان على طارق و هو بيقول: خلي الصورة معاك و فكر يمكن تغيّر رأيك...

لأ معلش رجعها لمراتك لأنها لو أختي مرضالهاش ان صورتها تبقى مع واحد غريب و بالنسبه لجواز التيك أواي ده أفتكر انه مش مناسب ليه...اعذرني يا صاحبي.

الموقف ده فضل مسيطر على شريف خايف يبقى ده مصيره بعد ما كان بيحلم انه يقتحم قلب بنت جميله و يعيش معاها أجمل أيام يخرجوا مع بعض و يضحكوا و يتخانقوا و يختاروا كل حاجه في بيتهم مع بعض و ده طبعاً مش ممكن يحصل بطريقة طارق...مفيش كام يوم واحد زميله تاني في الشغل لكن أكبر منه شويه اسمه حسام عزمه عنده في البيت من غير مناسبه و هو ماصدق ياكل أكل بيتي فاتشيك و راح.

حسام كان مرحب بيه أوي زياده عن اللزوم هو و مراته بس كل ما مراة صاحبه تدخل جوه يسمعها زي ماتكون بتتخانق مع حد و بعد شويه خرجت بنت مكشره و فضلت قاعده على جنب مش بتتكلم و لا حتى بتبص لحد و حسام عرفه عليها على انها أخت مراته اسمها شيرين و بتشتغل مصممة جرافيك في مجلة أطفال في مصر و انها بتقضي عندهم أجازة شهر كل سنه, فضل حسام و مراته يجروها عشان تتكلم و هي مبتتكلمش غير بالعافيه و عامله نفسها مشغوله في قراءة كتاب, شريف فهم انهم عزموه عشان يشوفها و يتعرف عليها يمكن...بس هو مفهمش هي ليه متحفزه كده و مش طايقه نفسها.

اتغدى أحلى غدوه من ساعة ما سافر محشي ورق عنب و شوربة عدس و ملوخيه و أرانب كان مبسوط جداً و وجود شيرين معاهم رغم تكشيرتها و نرفزتها كان بسطه أكتر, كل شوية يبصلها بطرف عنيه و يلاقيها هتنفجر يبقى عايز يضحك و يمسك نفسه...لحد ما مراة حسام سحبته بأي حجه للمطبخ و سابوهم لوحدهم هو كان مُحرج شوية راح قالها:

تسلم ايدك الأكل رائع.

متشكرنيش أنا أشكر دعاء هي اللي طبخت.

و يا ترى بتفضلي العيشه في مصر و لا هنا؟

مصر طبعاً و هي دي عايزه كلام.

بس هنا الدنيا أهدى و الجو أنقى ...

و الدخل أكبر مفهوم...أنا مش بفكر في الأمور بطريقة ماديه.

شريف اتفاجئ بردها و بقى عايز ينكشها أكتر:

و شغلك في مصر مستريحه فيه؟

جداً و مش هسيبه أبداً.

انت ليه عصبيه هو أنا مضايقك فحاجه؟

بصراحه أنا مبفكرش في أني أسيب مصر و شغلي و أعيش هنا كمان مبحبش الجواز التقليدي و اني أتعرض على حد زي ما أكون بضاعه...دعاء و حسام ضغطوا عليه عشان أقابلك انهارده بس أنا مبفكرش زيهم.

أنا كمان مبحبش الجواز التقليدي و مش جي هنا عشان أتجوز أنا جيت عشان نفسي أقعد مع ناس من بلدي و آكل معاهم.

شيرين حست انها كانت بايخه و لأول مره تبصله راح كيوبيد ابن اللذينا ضارب سهمين في قلوبهم, قالتله بلهجه مختلفه: أنا مقصدتش أضايقك أنا آسفه ساعات ببقى زي المدب كل اللي بطلبه منك لو حسام رشحني ليك كعروسه ترفض بأي حجّه.

غريبه كنت فاهم البنات عايزه تتجوز...الا اذا كنتي مرتبطه؟

لأ مش مرتبطه لكن مش عايزه أعيش هنا و أسيب أهلي و شغلي كمان أنا مش عايزه أتجوز و خلاص لازم يكون فيه مشاعر...اوعى تكون زعلت؟

أنا مزعلتش أنا بس مستغرب ليه يضغطوا عليكي كده؟

عشان عندي سبعه و عشرين سنه و اتخطبت قبل كده مرتين...و راحت ضاحكه و كملت...دعاء لو عرفت اني قلتلك هتقتلني محرجين عليه اني أقول كده لحد ههههه

راح ضاحك هو كمان و حسام و دعاء دخلوا لقوهم بيضحكوا افتكروا الأمور ماشيه زي ما هما عايزين بقيت الزياره كانت منتهى الروعه شيرين فكت من توترها و هو كمان محسش انه غريب عنهم لقاها مختلفه عن أي بنت عرفها بتتكلم فكل حاجه السياسه الرياضه الفن مثقفه مرحه و صريحه بشكل كبير عامله زي الفرس الجامح في طموحها رجع البيت و هو منتشي و سعيد و تاني يوم راح يفاتح أبو عبد الله في أنه ياخد أجازة عشان ينزل مصر يحضر فرح باسم اللي هيبقى في العيد, أبو عبد الله قاله انهم بيفكروا يفتحوا فرع للشركه في مصر و سأله: ايه رأيك لو تدرس الموضوع على الواقع...منفسكش تحضر رمضان في مصر؟

******************************************

هيام كانت حاسه بتأنيب ضمير من ساعة ما فرجت هاني على مدونة رانيا و عملت مشكله ما بينهم و خصوصاً لما كانت بتقابل رانيا أيام مرض هاني و تلاقيها بتعاملها بمنتهى الود و شايله هاني و مامتها في عنيها, كانت مره سهرانه مع جوزها منهكه كالعاده بعد ما نيمت العيال و قررت انها تحكيله اللي حصل عشان تريح نفسها من الضيق و تفضفض معاه...لقت نفسها بتكلمه كمان عن ضيقها من حياتها مش كزوجه و أم لأ كهيام... هي مش لاقيه نفسها.

هيام كانت بتشتغل في مكان حكومي بعد تخرجها و سابته بعد كام سنه عشان تتفرغ لتربية الأولاد و كمان عشان كان مُمل و مافيهوش عائد مادي كبير عمر أقنعها تسيبه و تريح نفسها...بس هي زهقت مبقتش عارفه هي ممكن تكون متفوقه فإيه... ما ناس كتير بتتجوز و تخلف هي بقى (هيام) ايه اللي بيميزها...لا بتعرف تكتب خواطر أو ترسم زي رانيا و لا ليها هوايه أو حتى شئ يشغلها غير البيت و طلباته.

عمر لأنه زوج محترم قدر ضيقها و حاول يحتويها بحنان و حكمه كان بياكل كيكه هي عاملاها راح يمدح فيها : الله تسلم ايدك يا هيام دي كيكه بعين الجمل مش كده.

أيوه يا عمر الكب كيك بالزبيب و الكريمه خلص...أهو بتسلى من زهقي.

انت مش بتدوري على حاجه تكوني مُميزه فيها...مفيش أحلى من كده...الحلويات بتاعتك ميختلفش عليها اتنين.

تقصد ايه يا عمر؟!

أقصد لو جربتي تبتدي تعرفي الناس بحلوياتك أنا متأكد ان هيبقى فيه اقبال عليك ده كفايه التورت بتاعتك و الكحك انت موهوبه يا هيام.

هيام سمعت كلمة موهوبه حست انها لاقت اللي كانت بتدور عليه و ابتديت تفكر في كلام عمر ليل نهار مش بس كده دي راحت كلمت رانيا تاخد رأيها و تسألها تعمل ايه, رانيا كانت جدعه جداً و عرضت عليها تعملها مدونه لوصفات الأكل و صفحة على الفيس بوك تعرض فيها صور حلوياتها عشان الناس تعرفها...هيام اتفتحت زي الورده و حست انها بقت بتحب الحياة و كل الناس أكتر من الأول بكتير خصوصاً رانيا.

*******************************************

رانيا كمان الدنيا مش سيعاها اليومين دول مش بس عشان اتأكدت من موضوع الحمل اللي ربنا أكرمهم بيه عشان كمان مسؤل من ساقية الصاوي كلمها و بلغها انهم وافقوا يعملولها معرض بعد العيد...ياااه أول معرض ليها...هي كانت سايبه سي دي فيه رسومتها عندهم و مكانتش مصدقه انهم هيوافقوا يعملولها المعرض فعلاً, فضلت مستنيه هاني عشان تفرحه بالخبر اللي كانت بتحلم بيه و أول ما رجع اترمت عليه و قالتله و كلها فرحه رد عليها ببرود: مبروك...

رانيا مبقتش فاهمه هو لسه زعلان منها و لا دي غيره من نجاح صغير حققته و لا ايه...بس هو معقول يبقى فيه غيره بين زوجين بيحبوا بعض...فضلت محتاره و الظنون توديها و تجبها كل يوم و هو صمته و ضيقه بيزيد من غير ما يتكلم...هاني كانت حالته النفسيه سيئه جداً لكن مرضيش يقولها و يزعلها في عز فرحتها فضّل انه يكتم مشاعره.

الشركه مشت موظفين كتير استغنت عن خدمتهم كده بمنتهى البساطه بحجة الأزمه الماليه العالميه و انهم ميقدروش يدفعوا المرتبات دي كلها, واحد من اللي مشيوا كان صاحبه و حذره ان الدور جي عليه, عشان هاني من فترة مديرة طلب منه ياخد عميل و يسهره في فندق خمس نجوم( بشرط يكون فيه رقاصه و شرب) كنوع من الرشوه عشان يمشي الشغل و هاني رفض بحسم...المدير قاله: انت فاكر نفسك مين ده انت اللي زيك كتير و يتمنوا الشغل ده...هاني بقى مستغرب يعني ممكن يمشوه هو و يسيبوا مديره!

*****************************************

رانيا قامت مفزوعه على خبط الباب لقيته باسم في حاله يرثى لها دخّلته و سألته بخوف:

مالك يا باسم خير؟!

مش خير يا رانيا مامة سمر عايزه تأجل الجوازة...شكلها عايزه تفشكل.

ليه بس لا حول ولا قوة الا بالله....

عشان أمك صممت انهم يشاركونا الفرح و هم ايمكانيتهم متسمحش بالفرح اللي هي عايزه....ده غير انها أجبرتهم يجيبوا سجاده(شنواه) للصالون و اتريقت عل الستاير اللي جابوها...ليه دائماً عايزه تحسسهم اننا أحسن؟

اهدى يا باسم ماما أكيد متقصدش دي كانت فرحانه أوي انك اتغيرت و هتتجوز البنت اللي بتحبها.

ما هوباين انها فرحانه...

باسم ماما عايزه كل حاجه تبقى حلوه و ذوقها حلو و لايقه بيك مش حكاية فلوس...و بعدين حتى لو اختلفوا مش مبرر ان مامة سمر تأجل الجواز.

رانيا لازم تعرفوا كلكم ان مهما حصل مش هتجوز غير سمر!

الى اللقاء فى الحلقه القادمه

بقلم : خواطر شابه

الحلقة 24 ..اين انا ؟؟

2011-01-20T02:02:00.003+02:00

الحلقة 24.... اين أنا ؟؟

بقلم : ندى الياسمين

.......................

هاني نفسيته هديت شويه من ناحية رانيا .. لكن برضه مش عارف يرجع فى كلامه وثورته ازاي واصلا هو برضه ما زال شايف انها غلطانه وما كانش يصح تعمل كده .. روح هاني وعدى على مامته طبعا الى فضلت تشتكيله من حاجات كتير اوي تعباها وهو بيسمعها بس مش مركز اوي بس فى النهايه قالها يا ماما انا مرهق اوي ويظهر كده داخل عليا دور برد وهاقوم اطلع عشان انام

وطلع ومازال محتار ........

رانيا كان قدامها حلين

يا اما ترضخ لكلام هاني وتسيب كل حاجه بتحبها عشان ترضيه يا تعمل مشكله وتتحداه وهى عارفه انها لو دخلت فى دور عند دلوقتي مع هاني المشكله هاتكبر ...فضلت تفكر كمان هو صحيح هاني عارف المدونه بس ما كانش بيدخل عليها ولا حتى يعرف مكانها ولا اسمها

طب امال ايه خلاه فجأه يشوف ويعرف.... وفجأه نورت فى دماغها حاجه ... معقوله؟؟؟!!! معقوله تكون هيام ؟؟؟

ايوه انا ما قلتش لحد غير هيام انى عندي مدونه اصلا ما حدش فاهم اوي يعنى ايه مدونه هى مره كانت قاعده مع العيله تحت وجابوا برنامج مستضيف مدونين ورانيا قالت انها تعرف مدونتهم لانها عندها مدونه

طب برضه هى هاتعرف منين مدونتي ما انا ما قلتلهاش على اسمها ولا حاجه ؟؟!!!

قطع تفكيرها صوت باب الشقه وهاني الى دخل اوضته بعد ما بص على رانيا لقاها بتنيم جنا

هاني غير هدومه ودخل سريره على طوله ...... رانيا بعد ما جنا نامت راحت لهاني بهدوء وبوش مافيهوش لا زعل ولا فرح ... وسألته اجيبلك تتعشى ؟؟ رد هاني وقالها بنفس طريقتها .... لا مش جعان

رانيا قالتله براحتك وهى كمان راحت خلصت الى وراها ودخلت فى سريرها جمبه وعملت نفسها هاتنام بس فى الحقيقه هى كانت بتفكر وتفكر فى حاجات كتير وسنريوهات كتير للموقف خطرت على بالها ..... بعد شويه حست بهاني بيرتعش فندهت عليه : هاني فى ايه بتعمل كده ليه مالك ؟؟؟

هاني طلعت حرارته مرتفعه جدا جدا وطلع اخد برد جامد جدا جريت رانيا وجابتله ادويه وعملتله كمادات لحد ما الحراره نزلت شويه وعلى الصبح جابتله دكتور كان دور جامد جدا والحاجه كوثر طلعت له وقالت ما اسبوووووووش ابدا وهو عيان

وطبعا رانيا قعدت 3 ايام مش بتنام خالص يادوب على ما تخدم هاني وتمرضه وجنا وطلباتها وكمان الحاجه كوثر الى قاعده هى كمان اقامه كامله وضيوف والدنيا اتقلبت ما الحاجه كوثر كلمت الدنيا كلها وقالت هاني تعبان

طبعا توقف الكلام خلال الايام دي عن كل حاجه فى خلافاتهم ويظهر ده كان احسن لهم لان نفسيتهم هديت من ناحية بعض كتير وبقت الامور اسهل للكلام فيها

بعد ما هاني اتحسن والحاجه كوثر نزلت شقتها ورانيا من تعبها نامت وهى قاعده جمب هاني فى السرير بعد ما اعطته الادويه بتاعته

هاني بص لها وهى نايمه وصعبت عليه اوي وحس انها مرهقه اوي فاخد اديها باسها وعدلها فى السرير زي البيبى بحنيه وهى حست به بس كانت مش قادره تدي اي رد فعل وغطاها وطبطب عليها ونامت

رانيا صحيت الصبح لقت هاني نايم وسايب التلفزيون مفتوح كالعاده ولما فاقت افتكرت الى حصل امبارح انها نامت وان هاني هو الى عدلها وغطاها وطبطب عليها بصت له وابتسمت وباسته من جبينه وهو نايم بس هاني نومه تقيل ولا حس بحاجه J

فضلوا على كده كام يوم هاني رجع شغله وبقى احسن وبدأ يتعامل مع رانيا عادي وطبيعى فى الكام يوم دول

طبيعى رانيا فى الكام يوم دول ما كانتش فاضيه للنت ولا للرسم فهاني اعتقد انه كده هى خلاص نفذت رغبته وانتهى الموضوع على كده ... وقال يبقى احسن برضه انها ما عادتش تدخل النت تاني وخلاص

وبيحاول يكلم رانيا عادي لكن رانيا بصراحه من جواها ما كانش كده كانت مضايقه ونفسها تاخد موقف وبعد تفكير قررت انها تفتح الموضوع مع هاني وتكلمه

باسم ماشي فى موضوع الخطوبه عادي بس ايه مامته مطلعه عينه ومجنناهم هى صحيح وافقت وفرحت بباسم انه اخيرا هايتجوز وهى ما صدقت

انما برضه يعنى مش ناسيه ومش هاتنسى وفى كل مناسبه بتدي لباسم كلمتين ولما تجمعها الصدف مع اهل سمر وهما بيتفقوا على حاجه لازم برضه تسمعهم كلمتين وتكلمهم من ترتوفة مناخيرها اه احسن يفتكروا انه راسهم براسها ولا حاجه

وراحوا اخيرا يشتروا الشبكه : اهل سمر ما حددوش باباها قال لباسم يا ابنى الشبكه دي هديه من العريس للعروسه فى حد يحدد الهديه بكام

وفى النهايه هى هاتيجى لحد عندك بشبكتها فانت هات الى ربنا يقدرك عليه

طبعا مدام نجاة ردت وقالت طبعا احنا لازم نجيب شبكه كويسه لان كل واحد برضه بيجيب قيمته

راح لحقها جوزها قبل ما تضرب فى العلالي وقالهم طب يا جماعه ما دام كده مش هانختلف ان شاء الله واحنا عنينا لسمر دي بنتنا

وهما فى محل الدهب باسم ومامته وباباه وسمر طبعا ومامتها واختها وابوها

باسم طبعا مش معاه حاجه اصلا ابوه هو الى دافع فلوس الشبكه ومتفقين انهم هايجيبوا شبكه بعشر الاف جنيه وهما بينقوا

سمر اختارت على ذوقها طبعا وواقفه بتاخد راي اختها وامها وبعدين لقت مامة باسم واقفه وشكلها مش عاجبها فراحت لها وقالت لها بود ايه رايك يا طنط فى ذوقي

راحت باصلها كده بصه رخمه وقالت لها لا رايي ايه بقى ما انتى بتنقي انتى ومامتك انا بقى لزمتي ايه ؟؟

راحت سمر غمزت مامتها وكلهم قالولها فى نفس واحد ازاااااي ده انتى الكل فى الكل راحت بصت كده للحاجات الى نقوها وقالت لسمر ايه ده بصراحه كده الحاجات دي ذوقها بلدي اوي

غوايش ؟؟ لسه فى حد بيلبس غوايش

وراحت نقت حاجات تانيه طبعا وسمر قالت بينها وبين نفسها مش مشكله اي حاجه كله محصل بعضه المهم ما تزعلش مامة باسم هى نفسها تبقى زي مامتها

بس ام سمر بقى الى بقت واقفه مش طايقه نفسها ولا طايقه نجاة

ووشوشت سمر فى ودنها : من اولها يابت بتكسري كلامي وتسمعي كلامها ؟؟

سمر : انتى بتقولي ايه بس يا ماما برضه الحاجات الى هى نقتها عجباني والله

قالت لها : طيب يا اختي ربنا يهني سعيد بسعيده بكره هاتركبك وتهز رجليها

وباسم كان فرحان اوي بالى عملته سمر وكان نفسه يشيلها من على الارض شيل وكان بيغروش على كلام مامته الى مش ولا بد

ولما رجع البيت غلط غلطة عمره

وقال لمامته: يا ماما ابقى خفي شويه على سمر دي طيبه وبنت حلال وبتحبك اوي

نجاة : بقى هى طيبه وبنت حلال وانا يعنى الى وحشه بقى

ليه وانا يعنى كنت قلتلها ايه

فيها ايه لما اوجهها عشان ما تجيبش حاجه بلدي

ولا يعنى احنا نحط فلوسنا كده واحنا كاتمين بؤنا وخلاص

واتفتحت زي الرشاش فى وش باسم

الى خد الكلمتين فى عضمه وبصراحه وجعوه

وقالها ماشي يا ماما شكرا اوي يا ستى وعموما انا مش عايز حاجه من حد ولو عايزه ترجعي الشبكه وتاخدي فلوسكم انا ما عنديش مانع

وانا وسمر هانعيش على ادنا وهانتجوز على ادنا مش عايزين منكم حاجه

ودخل وقفل عليه اوضته

بصلها الحاج كارم : وقالها ارتاحتي دلوقتي ؟؟؟

نكدتي عليه وعلينا يا وش ال ..... السسسسسسسسعد

ونرجع لرانيا وهاني

رانيا ما بتعرفش تنسى بسهوله ومش عايزه كمان الحكايه تخلص على كده ومش عايزه تعمل حاجه من ورا هاني زي ما كتير بيعملوا وبيدخلوا النت ويكتبوا ويكلموا ناس بدون علم اجوازهم واهاليهم

فقررت انها لازم تتكلم مع هاني

وفعلا فى يوم بعد ما هاني جه واتعشى وجنا نامت والامور استقرت راحت رانيا قالتله هاني انا عايزه اتكلم معاك شويه ممكن ؟

هاني فهم على طول من لهجتها الجاده انها عايزه تتكلم فى نفس الموضوع فقال لها بغلاسه لو كنتى هاتتكلمي فى موضوع المدونه الموضوع ده انتهى خلاص

فردت رانيا بهدوء: انتهى يعنى ايه وانتهى عند مين .... هاني لو سمحت اسمعني بهدوء

هاني قال بزهق : ماشي اتكلمي انا منعتك

رانيا قالتله : الاول انا معترفه انى غلطت واسفه على الغلط ده ... لانه ما كانش المفروض فعلا اكتب تفاصيل عن حياتي على الملأ كده ..... لكن كمان انت لازم تعذرني انت يا هاني كنت سايبنى لوحدي خالص حتى مرواحي عند ماما كان بالقطاره وشريف اخويا الى كان بيود عليا سافر وانت ما كنتش باشوفك الا تحت فى وجود مامتك وانا باغديكم ولا اعيشيكم ومش لاقيه حد اتكلم معاه اتجنن يعني

هاني : بصي بقى ولا تفاصيل حياتنا ولا غيره عجبك يعنى الخفيف الى كان مستحلي نفسه وبيرد عليكى ازاي

رانيا : جرى ايه يا هاني اولا الحكايه دي باالذات مالكش حق فيها ده بيرد عليا قدام الناس كلها وانا كمان رديت عليه بكل ادب وصديت حتى مجاملاته ..... وضيقت عنيها بقى بتلميحه لحكاية عاليا ولا يعنى خرجت معاه ولا تليفونات وقصص زي ناس

هاني اتعفرت وقالها : قصدك ايه لا يا ماما تفرق ... انا راجل يعنى من حقي حتى اتجوزها .... وبعدين احنا مش خلصنا من الموضوع ده ولا ايه

رانيا : ماشي اتجوزها حاجه والى انت كنت بتعمله حاجه تانيه ويكون فى علمك لما تتجوزها انا كمان من حقي اقولك مش عايزه اعيش معاك وانت متجوز عليا وبعدين ماشي بلاش الموضوع ده خلينا فى موضوعنا

ورجعت تاني رانيا لهدوءها الى قررت انه يكون معاهاا طول المناقشه دي

وقالتله : يا هاني عشان خاطري ما تخنقنيش سبنى اعمل حاجه انا حباها انا بالاقي نفسي فى الرسم والكتابه وبالاقي ليا جمهور لا يعرفوني ولا شافوني حتى لو كان جمهور صغير وانما بالاقي نفسي وسطهم وبعدين يا هاني هو انت ايه مش واثق فيا ؟؟؟

هاني : لا طبعا لو ما كنتش واثق فيكى ما كنتش اسيبك فى بيتى ثانيه واحده بس انا خايف عليكى وباغير عليكى

رانيا : يا حبيبى ربنا يخليك ليا بس مافيش حاجه تخوف يا سيدى من هنا ورايح ابقى اقرا كل يوم انا باكتب ايه واديك عرفت المدونه وبعدين انا ما حدش يعرفني اصلا من الناس دي كلها

عشان خاطري يا هاني انا مش عايزه اعمل حاجه من وراك وفى نفس الوقت مش عايزه اسيب حاجه لقيت فيها نفسي .... ويكون فى علمك رغم ان المدونه والرسم انا باحبهم ولاقيه فيهم نفسي الا انهم مش اهم منك عندي ولا اهم من بيتى وبنتى يعنى لو انت اصريت وخيرتنى بينك وبين المدونه انا هاختارك انت طبعا يا حبيبى

بس انا باقولك عشان خاطري بلاش تحرمني من حاجه باحبها ومش باعمل حاجه غلط عشان خاطري

هاني بصراحه قدام كلام رانيا ما قدرش يغلطها ولا قدر يقولها لا بصلها بكل حنيه وخدها فى حضنه وقالها اعمل فيكى ايه

باحبك ومش عايز ازعلك

رانيا نطت من مكانها وقالتله بجد يا هاني خلاص اقتنعت

هاني : اممممممممممم شويه بس على شرط الواد الرخم ده الى بيقولك قمر ده تقوليله ما عادش يقولك يا قمر تاني الله امال انا اقولك ايهJ

رانيا : وهى بتضحك حاضر يا حبيبى هاقوله والله ولو تحب اقتلهولك مافييش مشكله واعلقلك راسه على باب المدونه عادي..... بس تعالى هنا انت ازاي عرفت مكان المدونه اصلا ؟؟؟؟؟

هاني : عرفت وخلاص بس بقى خلااااص خلصنا من الفيلم ده

رانيا : لا ممكن ابدا لازم اعرف

هاني :طب تعالى بقى فى حضنى بلاش رخامه

ويطبطب عليها ويقولها مش هاسيبك وحدك تاني

رانيا بامتعاض : ايه ده ؟؟؟؟

هاني : ايه فى ايه ؟؟؟

رانيا: انت ريحتك ايه؟؟؟!!!!

هاني : ايه ده البرفان الى كانت هيام جايباهولي هديه ماله ؟؟؟

رانيا : اوف لا لا مش قادره استحمل ريحته دي فظيعه

هاني وهو بيضحك : ايه ده انتى حامل ولا ايه ؟!!!!!

رانيا وهى بتبص فى السقف وبتفكر : ايه ده ؟؟؟؟تصدق ممكن !!!!

.....................

الى اللقاء فى الحلقة القادمة

بقلم : شيرين سامى

أين انا ؟؟ الحلقه الثالثه والعشرون

2011-01-16T23:11:00.001+02:00

الحلقة الثالثة والعشرون

بقلم : محمد رميح

رانيا حست انها لازم تدافع عن نفسها .. وبعد لحظات تفكير مع نفسها قدرت تاخد قرار انها لازم تعدل من حياتها الزوجيه وبما انها موهوبه في الرسم قررت ترسم لوحه حياتها اللي كانت بتحلم بيها .. بس ازااي والمشكله ان هااني جزء في شخصيته انااني برغم الطيبه اللي جوااه..

دموعها كانت بتشاورها في النزول بس هي قالت لنفسها هافضل لحد امته كل ما تحصلي مشكله اخد جنب وافضل اعيط واسيبها عايمه من غير اي حل ..

الفتره اللي عدت من حياتها خلتها انضج من الاول واقدر على استيعاب الامور ..وخلتها كمان تفهم حاجات ومعاني كانت بتسمعها زمان.. بس عمرها ما قررت تستعمل الحس الانثوي زي ما بيقولوا

وعلى رأي المثل كيد النسا غلب كيد الرجال. هي قررت تستخدم حسها الانثوي وقررت ان حيااتها لازم تتغير ومفيش حد هيهدها ابدا وانها لازم هتحافظ على كيانها ومملكتها الصغيره لانها حست انها زهقت من كتر المشااكل اللي كل شويه تحصل لها افتكرت البرنامج اللي كان جاي على التلفزيون اللي كان بيتكلم عن الاسر والعلاقات الزوجيه وازااي ان الزوج والزوجه مسئولين هم الاتنين عن سلامه الكيان الاسري وانه لازم كل واحد يفهم التاني ويوصل شعوره للتاني علشان تظل العلاقه مستمره والا هيبدا التفكك الاسري .... وهنا فااقت من تفكيرها العميق على صوت جنى ..

طبعا جنى كبرت وبدات تزحف وتلاغي ولما رانيا شافت ضحكتها الحلوة ده حفزها اكتر واكتر انها هتنفذ خطتها علشان تحافظ على حياتها وبيتها...

_______________________________________________________

باسم بعد ماروح عبدالله وسمر كان حاسس ان الدنيا كلها مش سايعه فرحته يااااااااااه اخيرا دق قلبك من تاني يا بااسم وانا اللي كنت فاكر عمرك ما هتحب يا قلبي تاني بعد اللي شوفته من الحب وسرح في كلام سمر

-لو حبيتك هتحافظ عليه هتحمي قلبي؟

-أنا حاسه بحاجه عمري ما حسيتها قبل كده...لكن خايفه.

وافتكر الوعد اللي اخده على نفسه لانها تستحق الواحد يرمي نفسه في النار علشان خاطرها

لانها انسانه صادقه وبنت ناس ومتربيه..

طبعا هو اتلسع قبل كده من شخصيه ماكنتش تستاهله ولا تستاهل حبه علشان كده عارف قيمه سمر وعلشان كده هو متمسك بيها لاخر العمر ..

ولما وصل لقى مامته وباباه قاعدين دخل عليهم وسلم وقعد معاهم وفتح موضوع سمر مع امه قدام ابوه هو حس ان ابوه هيساعده في اقناع امه ان المظهر احنا اللي بنصنعه وان الاصل هو الاهم وياااماا في مظاااهر بس الحقيقة انه المحتوى فاضي وعلى راي المثل من بره هالله هالله ومن جوه يعلم الله ابوه وافقه الرأي تماماا على كلامه وايده .. باسم قال لامه وانا مااقدرش اعمل حاجه في حياتي من غير رضاكي ومن غير ماتكوني مقتنعه بيها لا انتي ولا بابا..

امه بصيت له بفرحه وعنيها دمعت واخدته في حضنها كانت دي دموع الفرح انها شايفه ابنها البكري اول فرحتها الحمدلله ربنا كرمه وطلع من عزلته وبقى انسان تاني عرفت من جواها ان البنت اللي تقدر تعمل كده في ابنها تستحق انها توافق عليها وانها تبقى بنتها قالت له الف مليون مبروك عليك يا حبيبي سمر ربنا يتم لك على خير ويسعدك ويهنيك معاها...

___________________________________________________

شريف بقى حاله كان متغير ومقريف وموده مش ولا بد من بعد ما شاف عاليه هي وجوزها

كان جواه احاسيس كتير وده اللي ملخبط كيانه وقالب حاله ومحسسه بالتوهان وانه مش عارف يفكر ويقرر.. الرجل اللي كان بيشتغل معاه شريف لاحظ ان شريف مش زي عوايده هو كان بيحب شريف لانه شاف فيه الطموح والامانه والاخلاق العاليه وفوق ده كله خفه الدم المصريه

شافه حزين ومش على بعضه ففي اخر اليوم بعت لشريف ..

شريف : خير يا ابو عبدالله حضرتك بعت لي

ابو عبدالله : اتفضل يا شريف

شريف قعد ومستغرب هو حصل حاجه منه ..دماغه عماله بتودي وتجيب

صوت ابو عبدالله قطع عليه افكاره..

ابو عبدالله : ازيك يا شريف يا بني

شريف : والله الحمدلله بخير يا ابو عبدالله

ابو عبدالله : بس انا شايفك اليومين دول مش مظبوط وزي ما تكون حزين وفيه حاجه شاغله بالك..

شريف اتحرج وحس انه مقصر في شغله..

شريف : هو انا قصرت في شغلي ولا حاجه ؟؟

ابو عبدالله : بالعكس يا بني انت انسان كفء وامين وطموح.. علشان كده انا بحبك زي عبدالله ابني.. فيه حاجه يا بني في الشغل تعباك قولي؟؟ محتاج فلوس؟؟ عندك مشكله ؟؟

انا باعتبرك زي ابني واعتبرني زي والدك؟؟

صراحه شريف بيحب او عبدالله جدا وبيرتاح له نفسيا .. لقى نفسه بيحكي له على قصه حياته

واللي حصل له لحد ما قابل عاليه هي وزوجها من فتره..وانه بيفكر ينزل مصر..

ابو عبدالله ابتسم وبص لشريف بحنان وقاله: انت عارف يا شريف يا بني ان كل قدر ربنا خير لنا بس احنا اللي ما بنعرفش ده وما بنقدروش .. بتحصل لنا حاجات في حيااتنا وبنعدي بمراحل هي مراحل انتقاليه مش مراحل مستديمه بس علشان نتعلم منها ونقدر نختار صح بعد كده .

وانت يا بني ربنا كرمك وهي راحت لحالها ونصيبها ربنا يوفقها .. بص يا بني لحياتك ومستقبلك واحمد ربنا ..عموما يا بني انت عارف الايام دي ايام موسم عندنا في الشغل يخلص الموسم الشهر ده وانا هاديك اجازه 3 شهور تنزل مصر فيها تغير جو الشغل وتعيد ترتيب اوراقك وحساباتك يا بني.. بس المهم عاوزك تروق كده وترج شريف بتاع زمان اللي الضحكه ما بتفارقهوش... شريف بص له كده وابتسم .. وبعد ما روح قعد يدور كلام ابو عبدالله في دماغه

واقتنع بيه جدا وقرر يرجع شريف بتاع زمااان اللي افتقده بقاله فتره..

_________________________________________________

طبعا هاني خارج من البيت مولع وشايط ازاي يحصل ده كله وهو العيب مني انا ..

انا اللي غلطان من الاول اني سمحت للهانم انها تقعد على النت وترسم وتعيش حياتها..

انا لازم اوريها من هو هاني واوريها العين الحمرا ازاي...

خرج وما حسش بنفسه الا وهو عند محمد صاحبه اللي بيعتبره سره مش صاحبه بس

محمد شاف هاني قام رحب بيه وطلب له واحد شاي بالنعاع ..

محمد: مالك يا هاني فيه ايه ؟

هاني : مفيش حاجه

محمد: مفيش حاجه ازاي يا بني دي سيماهم على وجوههم..

هاني بص لمحمد وقام حكى له كل اللي حصل بينه وبين رانيا...محمد فضل يسمع لصاحبه بكل اهتمام وبعد ما خلص هاني كلامه .. محمد ابتسم لهاني وطلب منه يروق ويشرب الشاي وهي هتتحل وكل مشكله في الدنيا اكيد لها حل... هاني شرب الشاي وهدي شويه

محمد قاله : بص يا هاني انت عارف معزتك عندي قد ايه وعارف غلاوتك عندي..

هاني : اكيد عارف والا ماكنتش حكيت لك

محمد : هو انت بتحب رانيا وبنتك جنى اكتر ولا بتحب نفسك اكتر.؟؟؟

هاني باستغراب شديد وكانه مش متوقع من محمد سؤال غريب زي ده

هاني : مش فاهم قصدك ايه يا محمد ؟

محمد : انت بقالك قد ايه متجوز رانيا؟

هاني : بقالنا متجوزين من يجي 3 سنين

محمد : وقبل 3 سنين مش انت اخدت مراتك عن قصه حب كان بيحوا ويتحاكوا بيها

هاني : وده ماله ومال اللي انا باقولك عليه

محمد : ده هو اساس اللي انت بتقولي عليه.. انا عارف ان بتحب رانيا بس للاسف بتحبها بالطريقه اللي ترضيك انت مش ترضيها هي ...

هاني : ازاي

محمد : يعني حبك ليها مش من اول اولوياتك في الحياه فيه اهتمامات تانيه بتشغلك عنها وده غلط .. لازم تبقي هي من اهم اولوياتك في الحياه وتقدر تنظم اولوياتك ..

ولازم تفهم ان حب الحاجه واجب وكمان حب مراتك واجب وكل واحده المفروض تديها حقها في الحب ده... وبعدين انت ليه مستغرب من اللي هي عملته ..

هاني باستغراب اكتر وعلامات الضيق بدات تبان عليه ..

هاني : امال عاوزني اشوفها بتنشر قصه حياتنا وخصوصياتنا على النت والناس تعرف وترد عليها واقعد ساكت واتفرج..

محمد : لا طبعا هي اكيد غلطانه في انها تنشر حياتكم بالطريقه دي بس هي ماارتكبتش جنايه تستحق عليها الشنق اولا هي كاتبه القصص والمواقف دي باسم مستعار ومحدش عارف اصلا مين صاحبه الاسم ده.. ثانيا حتى ردودها على الناس في النور وقدام الكل وده طبعا احسن ماكانت تضيفهم عندها و تفضل تشيت معاهم ويبقى فيه حاجات انت او غيرك ما ياخدش بالك منها.. ثالثا انت نسيت زمان واللي حصل منك قبل كده انك كنت بتسيبها وتهملها بالساعات وانت على الشات ولا عاليه.. علشان كده عاوزك تراجع نفسك انت كبرت وما بقتش هاني اللي عايش لوحده او لنفسه انت بقيت اب ومسئول عندك بنتك ربنا يخليهالك وعندك مراتك اللي بتحبك .. عاوزك تشوف هي ليه عملت كده مش يمكن انت بعيد عنها ومهملها علشان كده هي عملت ده.. الفراغ يا صاحبي ممكن يقتل حياه البني ادم ويخليها يجرب يمشي في طرق هو في غنى عنها ... ما تردش عليا بس عاوزك تدور الكلام في دماغك وانا واثق ان شاء الله هتلاقي الحل.

انا هاقوم علشان اروح وانت كمان قوم روح وربنا هيسهل الامور ان شاء الله ..

محمد استاذن وساب هاني قاعد هاني فضل يفكر في كلام محمد وافتكر انه فعلا ياما سابها بالليالي وهو قاعد قدام النت يشيت وانه ياماا كان بيخرج مع صحابه يتغدى معاهم او يتعشى ويرجع وحتى ما يهموش انها كانت بتنتظره علشان تاكل معاه وافتكر عاليه وافتكر يوم ما ضربها وافتكر انه اهملها جدا في الفتره الاخيره وافتكر كلمه محمد ان فعلا حب والدته بيختلف عن حب مراته وان الاتنين لازم يكون فعلا فيه توازن.. هاني فجاة قام ودخل السيبر اللي جنب القهوه وقعد على النت ودور على اسم المدونه بتاعه رانيا على جوجل ودخل وقعد يقرا ويشوف

وكل ما يقرا يكتشف قد ايه ان رانيا كانت بتتعذب من بعده عنها ومن اهماله ليها وقد ايه هي من كتر حبها ليه مش عاوز تجرحه او تقوله ...

هاني بص في ساعته لقى الوقت سرقه وماحسش بنفس فقام وخرج بس كان خروجه المره دي اللي يشوفه ما يقولش هو ده هاني اللي كان جااي مولع وهيكسر الدنيا كلها .. هاني قرر يكبر ويحاول يستوعب انه ما بقاش الدلوع المستهتر وافتكر في اللحظه دي ابوه الله يرحمه وانه جه الوقت ان هاني هو اللي هيبقى مسئول عن البيت كله ...

الى اللقاء فى الحلقه القادمه

بقلم : ندى الياسمين

اين أنا ؟؟ الحلقه الثانيه والعشرون

2011-01-14T02:12:00.002+02:00

الحلقه الثانية و العشرون

بقلم: شرين سامي

شريف اتفاجئ بعاليه قدامه مبقاش عارف من كتر الصدمه يعمل ايه هو قاعد في غربه حزين وحيد مرمي كده زي أي حاجه مالهاش لازمه عند حد و مره واحده يشوف حته من مصر قدامه هو مفتكرش ايه اللي كان مضايقه منها مفتكرش ايه اللي كان بيحبه فيها افتكر بس انها هنا بكل الحياه الي فيها و الموت اللي جواه, هو صحيح بيشوف مصريين كتير لكن للأسف معظمهم بقوا بيتكلموا و بيلبسوا زي أهل البلد لكن عاليه شكلها لسه جيه من شوارع مصر و لسه ريحتها زي النيل و الشجر, هي حست بشوقه فسلمت عليه بحراره و بعدين بقت متحفظه قالها:

-أنا عايز نمرة تليفونك و عنوانك هنا ضروري.

-طب مش تسألني الأول أنا هنا بعمل ايه.

-مش مهم المهم اني شوفتك ممكن نقعد في أي كافيه و لا أقولك أنا عازمك على العشا.

-شريف انت اتغيرت أوي...هو ده شريف اللي مكانش بيرد على مكالماتي و رفض انه يقابلني مره واحده.

-مفيش داعي للعتاب يا عاليا الظروف كانت أقوى مني لكن دلوقتي خلاص أنا مش هعمل حساب لحد غير أنا و انت...انت مش متخيله انت كنت دائماً على بالي كان نفسي أكلمك بس خفت من ردة فعلك...لكن دلوقتي ربنا بيحبني اني لاقيتك.

-انت سبتني فعز ما كنت محتجالك محسيتش الدنيا اسودت فوشي ازاي بعد ما كنت خلاص لقيتك و آمنتك عليّ, بعدين بكل بساطه اتخليت عني و عشان ايه عشان حاجه حصلت قبل ما أعرفك...عموماً أنا كمان ربنا بيحبني.

-ندمت يا عليا و بطلب تسامحيني...

و فجأه ظهر راجل أربعيني وسيم و شيك جه و وقف جنب عاليه اللي قالت بثبات:

-تعالى يا هشام أعرفك على الأستاذ شريف اللي جهزلي المحل بتاعي فمصر....الدكتور هشام جوزي...

شريف روّح بيته و هو مفيش فدماغه غير فكره واحده انه يرجع مصر, هو صحيح كان مُشتاق لعاليه و لّا كان عايز أي نفس يشاركه في الأكل و الشرب و الكلام و أي حاجه تفكره بمصر, طب هو كان يتجوزها ازاي و هي كانت تعرف جوز أخته يعني يقاطع أخته عشانها و بعدين هو مكانش حاسس ساعتها انه غلط في حقها لأنه كان مشغول بنفسه و سفره و مستقبله و مفكرش هي حالتها هتبقى عامله ايه و لافكر انه هيجي عليه يوم و يتمنى تكون معاه و تونس وحدته و تدفي أيامه , لكن خلاص هي اتجوزت و حسمت الحكايه.

الكمبيوتر عمّال يتنتن عشان بيكلموه من مصر على السكيبي قام رد بسرعه عشان يطمّن على باسم و الزيارة لقى مامته مكشره و زعلانه أوي زي أيام خطوبة رانيا وبعد السلامات قالتله:

-دول ناس مش من مستوانا هو احنا هنتوكس مرتين.

-ليه بس يا أُمي؟

-تخيل معندهومش صالون و بيقدمولنا العصير في كوبيات مش كاسات...كوبيات يا شريف!!

-ايه يا أمي اللي بتقوليه ده كوبيات ايه...الناس طيبين؟ العروسه مُهذبه؟

هي سكتت و باباه قله: ناس من دهب و العروسه ألماز يا بني...بس انت عارف مامتك.

-مالها مامته هو اللي يقول الحق يكفر كويسين على عيني و راسي لكن ليه مياخدش بنت ناس كويسين بردو و من مستوانا.

-القلب و ما يريد يا أمي.

-مالك يا حبيبي انت مش طبيعي انهارده؟

-مفيش عايز أنزل مصر تعبت أوي.

حاولوا على قد ما يقدروا يهدوه و أقنعوه يصلي استخاره و يفكر كويس بدل ما يتسرع و مامته وعدته انها هتنقيله عروسه جميله (يكون عندها كاسات) تليق بيه و تسعد حياته بدل ما يروح يختار هو و يدّب زي اخواته.

***********************************

باسم قاعد قدام سمر متلخبط و فرحان حاسس انه عايز يخبيها في عنيه قبلها بيوم اتفق مع عبد الله انه يقابله هو و سمر انهارده في المطعم الهادي ده و يتغدوا مع بعض و عبد الله أول ما وصل سلم عليه و سابو مع سمر يتغدوا لوحدهم هو عارف ان باسم نفسه يتكلم معاها لوحدهم و بعدين مكان عام و هو واثق فيهم فسابهم و مشي على انه هيجي ياخدها بعد ساعتين.

سمر فضلت بصّه في الأرض و مره واحده قالتله بكسوف : عايزه أقلك على حاجه.

-حاجه واحده قولي حاجات من ساعة ما قعدنا و أنا بتكلم لوحدي.

-أنا عمري ما عرفت حد و لا حبيت حد (باسم كان هيموت من الفرحه و فضل حاضنها بعنيه) و بصراحه دائماً بسمع عن الحب و بخاف منه أوي لأني حاسه لو قلبي اتكسر هموت.

سمر متربيه تربيه محترمه جداً و مواضيع الارتباط و المصاحبه دي بالنسبه لها خيانه لأهلها و للراجل اللي هترتبط بيه في يوم من الأيام فضلت محافظه على مشاعرها و احتفظت بأول نظرة و أول كلمة و لقاء للراجل اللي يستحق المشاعر دي و يعرف ازاي يدخل قلبها و الحقيقه ان باسم دخل و بهدوء شال السلوفان اللي مغطي قلبها و دوب تحفطها معاه, لكن هي ثقافتها في الحب من الأفلام و البنات اللي حواليها اللي غالباً بيبقوا مكسورين لما حبيبهم يسبهم أو مدارين على نفسهم لما يتخطبوا, و بقت مش عارفه و خايفه تسيب نفسها للحب,

باسم مش قادر يتكلم و مش عايز يقاطعها سكتت شويه و كملت:

-لو حبيتك هتحافظ عليه هتحمي قلبي؟

-هو انت بتحبيني؟

سمر عينيها اتملت دموع و قالت بصوت مش مسموع:

-أنا حاسه بحاجه عمري ما حسيتها قبل كده...لكن خايفه.

باسم مدريش بنفسه غير و هو ماسك ايديها و بيدمع هو كمان كان متأكد ان والدته هتسببله مشاكل و مع ذلك قال لسمر:

-أوعدك اني عمري ما هكسر قلبك و عمري ما هخليكي تخافي و انت جنبي أنا...بحبك.

فضلوا ساكتين و باصين لبعض عنيهم بتقول كلام كتييير أكتر من اللي في القلب.

*******************************

هاني وصل بسرعه عند هيام اللي طلبته في التليفون و قالتله عايزاك ضروري و متجبش سيره لحد و بعد ما قعد و شرب حاجه جابتله اللاب توب قدامه و فتحت مدونة رانيا و راحت تفرجه عليها هو كان شافها قبل كده لكن عمره ما أقرى المواضيع اللي بتكتبها و خواطرها أولاً لأنه مالوش في القرايه و ثانياً لأنها معرضتش عليه يقرى حاجه معينه قبل كده لأنه مشغول و هو اعتبر ان دي حاجه خاصه بيها و هي حره في اللي بتكتبه طالما في ثقه بينهم, لكن هيام خليته يقرى مواضيع رانيا كتباهم عن حياتها معاه و تفاصيل غريبه زي قصة حبهم في الكليه و مشاكلهم في الخطوبه...مشاكلهم كلها تقريباً من أول انشغاله عنها و مشاعرها لما ولدت جنى مروراً بحكاية عاليه و تفاصيل تانيه كتير في شكل خواطر و حكايات.

بس أكتر حاجه نرفزته لما لقى تعليقات مدوّن مُعين كان مزودها أوي في المجامله تكاد تكون غزل و هي بترد عليه بمنتهى البساطه و كأنه شئ عادي...هاني مكدبش خبر و قام و هو مشحون على الآخر و مقرر يحط حد للمهزله دي, و طبعاً شكر هيام عشان فتحت عنيه و قالتله انها مش عايزه حياته مع رانيا تبقى مجال للمناقشه و التعليقات و ان الحياة الزوجيه لازم تبقى سر بين اتنين.

هيام خرجت من حالة الاكتئاب اللي كانت عندها بفضل جوزها و هاني أما رانيا فانشغالها بالرسم و المدونه خلاها تقصّر مع هيام اللي اعتبرت ان رانيا كده اتخلت عنها وقت ما كانت محتجاها و مبقوش صحاب زي زمان و لأن مفيش حد ملاك هيام تصورت انها لما تقول لهاني على اللي قريته و ضايقها في المدونه تبقى كده عملت الصح و فتحت عنين أخوها على عمايل مراته الساذجه و محدش عارف ان هيام كانت غيرانه من رانيا لما شافت نجاح مدونتها و اعجاب الناس بموهبتها.

**************************************

هاني صحيح فيه عيوب كتير لكن هو طيب جداً و مبيعرفش يخطط و يدبر و يستنى دخل بكل عصبيه على رانيا و أمرها تفتح المدونه بتاعتها, رانيا سمعت كلامه بقلق و كانت حاسه انها غلطانه مرتين مره لما اتطورت علاقتها بالمدون السافل و مره لما سمحت لنفسها تفشي بعض أسرار حياتها على سبيل الفضفضه لما كانت مخنوقه منه و مش لاقيه حد تفضفض معاه بس خلاص هي مبقتش بتشات مع حد خالص و كمان بطلت تكتب عن حياتها , طلب منها تفتح موضوع معين كانت كتباه عن هجره ليها و بياته عند والدته لفترة طويله, سألها بعصبيه: ممكن أعرف ايه ده؟ شعر و لّا خواطر و لّا ايه بالضبط؟

-ده واجب طلبته مني مُدونه عن (أكتر شئ يعكر صفو حياتي).

-نعم......واجب ايه يا أبله؟

-في بين المدونين واجبات و كل واحد بيحلها بطريقته.

-و الواجبات دي عشان اللي عايز يحكي قصة حياته.

-لأ عشان نتعرف على بعض أكتر.

-عشان نتفضح و انت الصادقه....و مين المدون الأمور (كوكو) ده؟

-هو تحقيق ولّا ايه يا هاني...ده مدوّن محترم.

-ما شاء الله هو مدون محترم و انت قمراية التدوين و حياتنا بقت على النت و سيرتنا على كل لسان....مش كفايه انشغلتي عني و عن بنتك و طول النهار و الليل عنيكي على اللابتوب.

رانيا حاولت تهديه و تشرحله عالم التدوين حاولت كمان تعتذرله و تفهمه ان ده كان من فترة لكن كل محاولاتها معاه فشلت, حست بغدر بس مش عارفه الضربه جايه منين و قبل ما تعيط قالها بمنتهى العصبيه قبل ما يمشي و يرزع الباب وراه :

-يا تقفلي المدونه دي و ترجعي لعقلك يا اما انت حُره.

الى اللقاء فى الحلقه القادمه

بقلم : محمد رميح 　

اين أنا ؟ الحلقه الحادية والعشرون

2011-01-10T23:10:00.004+02:00

الحلقة 21.... اين أنا ؟؟

بقلم سالى حاجات جوايا

............................

باسم اتفق مع مامته وباباه على ميعاد زيارة اهل سمر .. وبلّغ عبدالله اللى فرح ان الموضوع بدأ ياخد خطوات جدية .. عبد الله اول ما رجع البيت بلغ اهله وقبل ما يكمل كلامه كانت مامته رقعت زغروتة من فرحتها رنت فى الحتة كلها وبصت لجوزها بنظرة انتصار فهمها على طول

الحاجة فاطمة لعبد الله : وقالك هيجوا الخميس الساعة كام ؟

عبد الله : بعد المغرب يا حاجة ان شاء الله

الحاجة فاطمة : طب يا ابنى مش كنت تخليهم ييجوا عالغدا .. نتغدى ونتعرف عشان البساط يبقى احمدى

عبد الله : يا حاجة مش لما نشوفهم الاول ونفهم طباعهم .. مش يمكن ...

الحاجة فاطمة : سكت ليه ؟ يمكن ايه ..؟

عبد الله : ابدا ولا حاجة .. انا قصدى دى ناس اول مرة نعرفها .. صحيح باسم طيب وابن حلال .. بس مستوى عيلته المادى كبير ... و ... يعنى نشوف الاول ولما ربنا يتمم بخير نعمل الغدوة يوم الجمعة

الحاجة فاطمة تبص تانى لجوزها الحاج أحمد .. بس المرة دى بنظرة استفهام .. مش عارفة ابنها ماله .. قلقان من ايه ؟ ... بس الحاج أحمد يفهم .. ويقولها يا حاجة انتى زعلانة ليه .. الناس العليوى دى لها طباع غيرنا .. وابنك ادرى .. المهم شدى حيلك انتى والبنات عشان نظهر قدامهم بالشكل اللى يليق لنا

الحاجة فاطمة تسترد حماسها : انت هتوصينى يا حاج .. دى حاجة محتاجة وصية .. ده احنا هنخليلك البيت قصر

ينفض التجمع .. عبد الله دخل يغير هدومه .. والحاج أحمد قعد فى الانتريه يتفرج على التليفزيون والحاجة فاطمة دخلت مع سمرعالمطبخ عشان يغرفوا الاكل .. وهناء تحضر السفرة

هناء فرحانة اوى لاختها ..هى صحيح اكبر منها ولسه متخطبتش ..بس ايه يعنى لما اختها الصغيرة تتجوز قبلها .. المهم ربنا يتمم بخير وحِمل واحدة فيهم ينزاح من البيت .. ومين عارف ما يمكن هى كمان نصيبها يجيلها قريب ويتجوزوا مع بعض .. هى عندها دايما حسن ظن بالله .. وراضية فى كل الاحوال

.........................

رانيا تعبت من الوحدة ... صحيح هى دلوقت اتغيرت عن الاول وبقى عندها حاجات تشغلها .. ده غير جنى شغلها الشاغل .. لكن هى حاسة انها وحيدة .. وحيـــــــــــدة .. يرضى مين تبقى متجوزة وجوزها بعيد عنها بالشكل ده ...كان ممكن اوى تضعف وتميل لغيره بكلمتين حلوين .. هى بشر برضه مش ملاك ومحتاجه تحس بيه جنبها .. كتير بتتعب ومتلاقيهوش .. كتير بتحتاج تحكيله او تشكيله او تطلب مساندته أو تاخد رأيه وتلاقى قدامها فراااااااااغ قاتل .. هو فين منها ؟... صحيح بيطلع يقعد معاهم ويلاعب جنى .. بس هى فى الوقت ده مش بتكون فاضية تتكلم معاه .. يا بتحضر اكل ليهم او لجنى او بتغيرلها او بتسكتها او ... او ... او ... البيت بيكون فى حالة ضجيج مستمرة .. مفيش فرصة تتكلم فيها .. ده غير التليفونات اللى دايما تختار اهدى الاوقات وتررررن .. فين هو لما جنى بتهدى وتنام ... فييين ؟ .. للاسف مش بيكون موجود .. للاسف بتكون وحيدة !!

رانيا قامت فتحت اللاب توب ودخلت على فولدر الاغانى وشغلت اغنية تعالى ارجع تاني

غصب عنها دمعت وهى بتسمعها ..والدموع كترت وصوتها علي فى بكاء شديد ..... ونامت ... نامت والدموع فى عنيها والأغنية شغالة تخلص وتبتدى من جديد

وهى نايمة حست بحركة جنبها قامت مفزوعة وقلبها بيدق جامد .. لقت ايد هانى بتطبطب عليها عشان تهدى ومتتخضش وبيهمس : انا يا رانيا متخافيش

قلب رانيا بدأ يهدى شوية ..وبعدين بصت له وقالتله : خير فى ايه .. طلعت ليه ؟.. عايز حاجة ؟

هانى : سمعتك بتنادينى طلعت

رانيا بتحاول تفتكر : انا نديتلك ؟.. امتى ده ؟

هانى يبتسم بحنان وهو بيمد ايده على عيونها اللى لسه ظاهر فيها اثار البكاء وكأنه بيمسحها ويقولها : عيونك نادتنى .. وقلبك ندانى

رانيا تبص له باستغراب شديد .. وتقول بينها وبين نفسها : ماله ده ؟

يكمل : انا كنت طالع اصلا الحقيقة .. وانا بلم حاجتى سمعت الاغنية من الشباك .. بص فى عنيها وكمل : فجيت جرى

رانيا اتحرجت شوية .. هى صحيح عايزاه يطلع ويبقى جنبها .. بس اتحرجت لما حست انها تسولته .. بس ايا كان المهم انه طلع

سألته : وكنت طالع اصلا ليه ؟

هانى : انزل يعنى مش عايزانى ويعمل انه هيقوم

رانيا مبتسمة تمسك ايده :انا بتكلم جد كنت طالع ليه .. مش انت بتبات عند مامتك الايام دى .. ولا خلاص بقت كويسة

هانى : لا الحقيقة انا قلت لماما انى هسافر قريب سفرية طويلة ....

رانيا بفزع : ايه ؟؟ هتسافر ... ليه ؟؟ ... وفين ؟؟

هانى : اصبرى بس هقولك .. انا قولتلها انى مسافر بره تبع الشغل وهغيب كام شهر .. هى زعلت فى الاول طبعا بس سلمت فى الاخر ودعتلى ربنا يوفقك

رانيا : وبعدين ......؟

هانى : وبعدين قولتلها انى هطلع بقى عشان مسيبكوش لوحدكوا الايام دى طالما انى مسافر وهبعد .. يعنى اعوضكوا عن غيابى شوية

رانيا الغضب ماليها : ووافقت بسهولة كده على سفرك وطلوعك ..الاتنين ؟ .. سبحان مغير الاحوال ..

وكملت بتهكم ثائر: وانت طالع بقى عشان تثبت حضور شوية قبل ما تودعنا .. كتر خيرك والله

ومسافر فين بقى ....؟

هانى بلهجة شعرية : مُسافرٌ في عَينيكِ

رانيا تبص له باستغراب .. عايزة تقوله ما انت فايق ورايق ومش فى دماغك وطالع تتسلى عليا و ... و...و... بس تسكت وتفضل مستغرباه

و ترجع تسأله تانى بهدوء : مسافر فين ؟؟

هانى : مش مسافر يا حياتى

رانيا نفس النظرة وكأنها امام مجنون :يعنى ايه .. مش فاهمة حاجة ؟

هانى : يعنى مش مسافر .. قلت لماما كده عشان امهد لها انى فى لحظة ممكن اسيبها وامشى .. وممكن كمان مكونش موجود خاالص .. ولقيتها تقبلت

رانيا : وبعدين .. ولما تعرف انك كدبت عليها ؟

هانى : هتعرف منين ؟؟ .. لما ييجى وقت السفر هبقى اقولها اتلغى ولا اتاجل ولا اى حاجة .. متقلقيش .. المهم ان الموضوع اتقفل على كده

رانيا لسه بتفكر فى كلامه

هانى : ايييييه .. لسه هتفكرى ...مش هتنامى ولا ايه .. يلا بقى اطفى النور

..........................

عمر جوز هيام اترقى فى شغله وشغل منصب كبير .. وقرر يعمل حفلة يجمع فيها العيلة عشان يخرجهم من حالة الحزن اللى لسه مسيطرة عليهم بعد الوقت ده كله وخصوصا هيام مراته .. هو مش بيحب ابدا يشوفها حزينة ولا تعيسة .. وحشته ضحكتها وخفة دمها وهزارها .. هى مش مقصرة معاه ولا مع الولاد فى حاجة خالص .. ولا حتى مقصرة فى شغلها .. بس حزنها كاسر قلبها ..وقلبه هو كمان ...

فكر انه يعمل عزومة عالعشا فى مكان هادى .. من زمان اوى متجمعوش كلهم .. من زمان مخرجوش ولا غيروا جو .. الحاجة كوثر لما عرفت من هيام باركتلها على ترقية جوزها واعتذرت عن الحضور .. عمر وهيام أصروا وألحوا عليها وقالولها الحزن فى القلب وخروجهم مش معناه انهم نسيوا الحاج محمد لكن ربنا امر بالترويح عن النفس وحلفوا ما يروحوا الا وهى معاهم .. بعد الالحاح الحاجة كوثر وافقت على استحياء ...

الليلة كانت هادية وجميلة والجو كان حلو .. والمزاج كمان كان حلو .. العيلة كلها كانوا بيكلموا بود وألفة افتقدوه من فترة طويلة .. ترقية عمر وسفر هانى كانوا محل الاهتمام .. وخصوصا سفر هانى .. ورانيا اتقنت الدور بحرفية شديدة و بينت أد ايه هى زعلانة ومتأثرة من الموضوع ده .. مش كفاية ان هانى كان غايب عنهم بقاله كتير .. هيسافر كمان

طبعا الكلام كان للجارة اللى جنبها الحاجة كوثر اللى بدورها ردت باستياء : والله منا عارفة يا بنتى ده مش وقته خالص .. بس هنقول ايه امر الله

رانيا وهانى تبادلوا النظر .. وهيام دخلت فى الكلام وسألت بعفوية : وانت يا هانى متقدرش تعتذر عن السفر ده .. هو ضرورى يعنى .. يعنى مينفعش حد تانى مكانك يكون معندوش مسئوليات

هانى : انتى عارفة يا هيام لما رئيسك فى الشغل يختارك انتى بالذات لكفائتك او لثقته فيكى مينفعش تقوليله لأ مهما كانت المشقة

هيام : مممم عندك حق طبعا .. مين عارف .. يمكن ربنا يحلها من عنده

رانيا والحاجة كوثر وهانى وعمر فى وقت واحد : يارب

..............................

تانى يوم كان اليوم المحدد لزيارة اهل باسم لاهل سمر .. باسم طبعا كان كلم رانيا وهانى وعرفهم بالميعاد من يوم ما اتفق مع عبد الله عشان يستعدوا .. وقبل المغرب بساعة كانوا كلهم متجمعيين فى بيت مدام نجاة ...

مدام نجاة طبعا متتوصاش فى الشياكة .. لبست الماظاتها وظبطت نفسها .. هى هتخطب لاى حد .. ده باسم ابنها حبيبها اللى مصدقت انه يخرج من عزلته ولازم تشرفه قدام عيلة عروسته .. وطبعا الحاج كارم كمان لبس اشيك بدله عنده وكأنه رايح فرح مش رايح تعارف .. مهى الانطباعات الاولى ايه ؟؟؟....... تدوووووووم

رانيا وهانى وجنى كانوا لابسين شيك برضه بس من غير تكلف .. أما باسم العريس مكنش عارف يلبس ايه وفضل يلبس ويقلع ويبدل فى كذا قميص وكذا كرافيت وكذا بدلة .. كان متوتر جدا وقلقان جدا وفرحان جدا .. ومفتقد شريف جدا جدا .. لو كان موجود دلوقت كان زمانه خلصه فى ثوانى من الربكة دى كلها .. بس هانى قام بالواجب وساعده فى اختيار الطقم اللى هيروح بيه ورانيا طبعا شاركت فى الاختيار وقعدوا يضحكوا معاه عشان يخففوا التوتر والقلق اللى ماليه ...

لما المغرب أذن صلوا جماعة ودعوا بالخير وامنوا عالدعاء وتوكلوا على الله ونزلوا عشان يروحوا لبيت سمر .....

............................

شريف كان قاعد متضايق اوى فى اوضته .. زعلان انه مش مع باسم فى يوم زى ده .. هو صحيح مش خطوبة ولا فرح .. بس دى اول مرة باسم يدخل بيت عروسة وكان نفسه اوى يكون جنبه .. اتصل بيه عالموبايل عرف انه فى الطريق لبيت عروسته دعاله ربنا يوفقه للخير ووصاه يكلمه اول ما يخلص عشان يطمنه ..

شريف فتح التليفزيون وقعد يقلب فى القنوات مفيش حاجة شدته .. قعد عالكمبيوتر ودخل عالنت ملقاش حد من اصحابه ولا كان له مزاج يشوف حاجة .. قام لبس ونزل راح مول يضيع فيه الوقت ويشرب حاجة ...

المول كبير قوى .. قوى .. قوى .. فيه كل حاجة واى حاجة وكل محل فيهم بدور كامل لمول مصرى .. حياة تانية خالص .. غريبة قوى بقاله هنا كام شهر اهه بس عمره ما دخل مول ولا حتى فكر ..

قعد يتمشى ويتفرج ولقى كافيه قعد وطلب كابيتشينو .. عدى على سوبر ماركت اشترى كاجو وفسدق ومشى يأزأز بس طبعا بيرمى القشر فى كيس مش فى الارض

كان كل تفكيره متركز على باسم وكل شوية يبص عالموبايل ليكون رن ومسمعوش .. المول زحمة أوى .. ودوشة اوى .. وهو ماشى بيتفرج عالفتارين اتخبط فى كتف حد بص عشان يعتذر ... ولدهشته طلعت ............. عليا

.............................

الى اللقاء فى الحلقة القادمة

بقلم : مصطفى ريان

اين انا ؟؟ الحلقه العشرون

2011-01-08T04:43:00.003+02:00

أين انا ؟؟ الحلقه العشرون

بقلم : البنفسج الحزين

مفيش شك ان رانيا في الفترة الاخيرة شخصيتها اتغيرت كتير عن الاول بقت أقوي وأنضج وكمان ثقتها بنفسها تضاعفت خصوصا بعد ما عملت المدونه الأدبيه والفنيه بتاعتها وسمتها (ما تخطه أناملي ) اللي خلت لها متابعين كتير بيشكروا في الشعر والقصص اللي بتكتبها وكمان في اللوحات اللي بترسمها كانت بتسحبها سكانر وتنشرها علي المدونه واعتبرت المدونه دي هي معرضها الدائم لانتاجها الفني والأدبي شويه شويه المدونه اتعرفت في عالم التدوين وزوارها كتروا وناس كتير فيهم ذوي فكر وثقافه عاليه عرفت كده من متابعتها لمدونتاهم والموضوعات اللي بينشروها........... دايما الانسان محتاج حد في حياته يكون له ودان تسمعه وقلب مفتوح له يحس بيه جاهز في اي وقت يحتاجه يلاقيه من غير حسابات ومواعيد .... ورانيا طول عمرها مفتقده الحد ده في حياتها ....وهي طفله و مراهقه كانت دايما والدتها مشغوله في صيدليتها وشغلها اللي طول عمرة واخد كل وقتها واولادها بالنسبه لها مرتبه تانيه...ياما احتاجتها وملقتهاش فاضيه تسمعها ولا حتي عندها استعداد.... مامتها ست عمليه جدا ورانيا قدرها انها تكون بنت عاطفيه جدا ورومانسيه لما كانت تطلب من مامتها تاخدها في حضنها كانت تستخف بيها وبمشاعرها وتقولها ليه هو انتي عيله صغيرة اكبري بقا واعتمدي علي نفسك وخلي ليكي شخصيه ....ولما قابلت هاني وهما لسه طلبه في الجامعه اللي شدها ليه انه كان بيسمعها وبيقدر مشاعرها وانه كمان رومانسي زيها ....أو علي الأقل أيامها كانت فاكرة كده....وده اللي خلاها حبته وصممت تتجوزة ....بس للأسف هاني اتغير كتير بعد الجواز وبقا هو كمان بيمارس عليها نفس الدوراللي كانت بتعاني منه مع والدتها (الاهمال والتجاهل والاستخفاف بيها وبمشاعرها).....وخصوصا في الفترة الأخيرة بعد وفاه والده واهتمامه المبالغ فيه بوالدته علي حسابها هي وبنتها والفراغ والوحدة والاحساس بالاهمال من شريك الحياة خطر كبير وكانوا سبب لاختبار صعب اتعرضتله رانيا نجحت فيه صحيح بس بصعوبه شديده.....بعد هاني ما نزل شقه مامته ... جريت رانيا وفتحت اللاب توب بتاعها بلهفه وشغف وفتحت الماسنجر لقت رساله أوف لاين مبعوته لها من طارق محمود وبيقولها فيها:

(الي ذات الأنامل الذهبيه سعدت جدا بقبولك اضافتي وده يشجعني أطلب منك نتكلم مع بعض انا هكون اون لاين الساعه 2صباحا بالظبط .....ملحوظه أكيد بتسألي نفسك أنا ليه ماتكلمتش معاكي لما كنت اون لاين المرة اللي فاتت ...الاجابه علي السؤال ده هتعرفيها لما أكلمك الساعه 2 في انتظارك سلام.....)

من غيرتفكير بصت رانيا في الساعه لقيتها واحده ونصف يعني لسه فاضل علي معاده نصف ساعه رانيا قعدت تفكر بينها وبين نفسها يا تري مين طارق محمود ده ؟وايه حكايته ؟وليه مصر يتعرف عليا؟ وعايز مني ايه؟ دي كلها أسئله كانت بتدور في راس رانيا وطريقته معاها دي خلت عندها شغف أكتر تعرف مين الراجل ده .....

واضح انه شخص لطيف طريقته في الكلام بتقول كده لا لا ايه يا رانيا انتي هتمدحي فيه ولا ايه هما كلمتين بس معاه أعرف هو عايز ايه مني وخلاص ...اه... عموما اهي كلها نصف ساعه وهعرف هو مين بالظبط ..........

والساعه 2 بالظبط فعلا دخل طارق اون لاين ....ودار بينهم الحوار التالي.....

طارق:سلام عليكم

رانيا:وعليكم السلام...ممكن أعرف مين حضرتك؟؟

طارق:اولا شكرا علي قبولك اضافتي

رانيا: مش معني اني قبلت اضافتك اني هقبل الكلام معاك انا بس عايزة اعرف مين حضرتك بالظبط وعايز مني ايه؟

طارق:اهدي طيب هتعرفي كل حاجه بس ليه في حده في كلامك عموما لو انا مضايق حضرتك انا ممكن انسحب بهدوء وانا اسف اني ضايقتك....

رانيا:معلش انا اسفه اني احتديت عليك في الكلام ...بس بجد مين حضرتك؟

طارق: انا يا ستي صاحب مدونه عصارة أفكاري واسمي الحقيقي طارق محمود.....بصراحه انا معجب بكتاباتك من اول ما ابتديتي تدوين ودايما بسيب تعليقات عندك في المدونه بس مش دايما بعلق باسمي الحقيقي وحابب اتواصل معاكي عن قرب خصوصا بعد ما قريت البوست اللي كتبتي فيه عن معاناتك مع جوزك وحماتك بجد هو مش مقدر النعمه اللي هو فيها اللي متجوز واحده في رقه حضرتك لازم يصونها وميبعدش عنها لأي سبب ......

رانيا:طب وعرفت منين بقا اني رقيقه؟

من أسلوبك في الكتابه بيقول انك انسانه رقيقه وناعمه قوي...احساسي كمان بيقول كده...وانا احساسي دايما بيكون صح...

سكتت رانيا شويه ...بصراحه عجبها قوي المدح فيها وهي من فترة طويله مسمعتش كلام حلو من حد حتي جوزها هاني بقاله فترة طويله مهملها ومش بيقولها كلام حلو ....

طارق:ايه يا رانيا انا قولت حاجه ضايقتك ولا ايه...

رانيا: لا بالعكس خالص ...

طارق:أمال سكتي ليه؟

رانيا: أبدا.... انا بشكرك علي ذوقك بس بصراحه أنا مش مرتاحه وانا بتكلم معاك دي اول مره في حياتي أكلم راجل علي الشات ... وكمان انت عارف اني ست متجوزة....وبصراحه حاسه اني كده بخون جوزي....

طارق:لا يا رانيا الحكايه مش كده خالص انا بس عندي مشكله ونفسي اتكلم وادردش معاكي ونفسي نكون أصدقاء ولا انتي من اللي بيقولوا مفيش صداقه بين راجل وست...

رانيا:بصراحه مش عارفه ؟تفتكر هينفع؟

طارق: طب متيجي نجرب ؟

رانيا بتردد وقلق شديدواحساس بالذنب ملازم لها .......ماشي....

ودار حديث طويل بين رانيا وطارق امتد لبعد الفجر كان كلام محترم وعادي جدا كل واحد فيهم حكي للتاني عن حياته وعن اللي مضايقه الحديث كان أقرب للدردشه والفضفضه والمواساة والحكايات اللي مر بيها كل واحد فيهم وحكي لها انه متجوز ومش مبسوط في جوازة وان مراته مش فاهماه ومش حاساة وانها ست لا تطاق ونكديه وانه متمسك بيها بس علشان أولاده يتربوا بينهم ورانيا بدورها قعدت تواسيه وتصبرة وتدعيله ...الحديث بينهم كان كتابه مش بالميك هو بعد كام ساعه طلب من رانيا انها تتكلم معاه بالميك بدعوي انه تعب من الكتابه ...وهي طبعا رفضت وقالتله لا معلش خليها كتابه أحسن ...وهو مضغطش عليها ....وفجأه صحيت جني من النوم وعيطت فاستأذنت رانيا من طارق وانتهي اول حوار بينهم بس لسه الكلام مانتهاش فطارق قالها أتعشم نكمل كلامنا بكرة في نفس الميعاد ...رانيا قالت له خليها بظروفها .....

تاني وثالث يوم اتكررت حجج الحاجه كوثر اللي مبتنتهيش وبات هاني عندها وطبعا رانيا سابته يبات عند مامته من غير أي نقاش ..

وكانت فرصه انها تكمل الكلام مع طارق ع الشات .....

الكلام تاني مرة كان مختلف المرة دي رانيا وطارق بقوا تقريبا أصدقاء وفي بينهم حوار سابق وكلام بيكملوة ...وخصوصا ان طارق شخص واثق من نفسه وله أسلوب ساحر بيعرف بسرعه ازاي يكسب ثقه الست اللي بيتكلم معاها وبيتعامل مع كل ست حسب شخصيتها يعني باختصار واضح انه خبير في التعامل مع الستات ....وكل حاجه عنده لها حجه ومنطق ومقنع بدرجه كبيرة ما بال بقا ان رانيا معندهاش أصلا خبرة في التعامل مع الرجاله والراجل الوحيد اللي عرفته في حياتها هو جوزها هاني...فكانت بالنسبه له صيد سهل جدا....

طارق بعد كام محادثه قدر يقنع رانيا انهم يتكلموا بالميك وبلاش موضوع الكتابه ده بدعوي اننا خلاص بقينا أصدقاء والمفروض ان انتي عرفتيني كويس واتبني بينا جسر ثقه وانه كمان حابب يسمع صوتها لأن ده هيوطد الصداقه بينهم أكتر ....في البدايه برضه رفضت بس هو فضل يلح عليها في الموضوع ده لحد ما وافقت وفعلا اتكلموا مع بعض وسمعت صوته وسمع صوتها والغريبه ان رانيا بعد ما سمعت صوته وطريقته في الكلام اللبقه قوي حست انها مشدوده له أكتر واحساسها ده زود الاحساس بالذنب عندها أكتر وأكتر ....

فكلمته ربع ساعه وقفلت علي طول لأنها كانت حاسه بالذنب وضميرها بيعذبها قوي قوي ....

المرة اللي بعدها قالها انا عندي كاميرا علي فكرة لو انتي حابه تشوفيني اشغلها ....رانيا سكتت بصراحه كان عندها شغف كبير قوي تشوف شكله وهوطبعا حس بكده فشغل الكاميرا بتاعته

وفعلا شافته راجل أربعيني وسيم جدا وسألها السؤال اللي كانت خايفه منه ومتوقعاه.......

بالمناسبه هو انتي عندك كاميرا؟؟؟؟

هي عندها فعلا كاميرا بتاعه هاني بس قالتله لأ معنديش ....

واتكلموا مع بعض شويه وفي اخر المحادثه طلب انهم يتقابلوا في مكان عام لأنه نفسه قوي يشوفها وانه بصراحه اتعلق بيها قوي وبيفكر فيها كتير!!!

طبعا رانيا رفضت بشده ووبخته وقالتله ازاي تطلب مني طلب زي ده هو انت فاكرني ايه؟ وقفلت معاه.......

وقررت رانيا بينها وبين نفسها انها مش هتتكلم معاه تاني ....صحيح كانت بتحن ساعات وتدخل اوف لاين في نفس الميعاد وتلاقيه موجود بس كانت بتقفل بسرعه علشان متضعفش وترجع تكلمه ....

رانيا وان كانت سمحت لنفسها تتكلم مع راجل غريب وهي من جواها عارفه ان ده في حد ذاته غلط بس تربيتها وأخلاقها وتدينها مش ممكن هيسمحولها تعمل حاجه أكبر من كده ....

وقالت كفايه ان ربنا ستر لحد كده وهاني معرفش حاجه وقالت لنفسها.....

اعقلي يا رانيا .....ايه اللي انتي بتعمليه ده الراجل ده ماله بيسيطر عليكي بسهوله كده ليه ازاي أسمح لنفسي أتكلم مع راجل غريب لأ وكمان يطلب مني أقابله ...أنا مش كده ومش ممكن هابقي كده و مهما هاني عمل ميستاهلش مني كده أبدا .....استعاذت بالله من الشيطان الرجيم واستغفرت ربنا وقامت اتوضت وصلت ركعتين لله وفتحت اللاب توب وقعدت تشوف البوستات الجديده اللي كتبوها أصدقاءها المدونين اللي متعوده تتابعهم وهي بتقلب ع النت لقت مدونه هي بتابعها من زمان كاتبه بوست بتشتم فيه المدون صاحب مدونه عصارة أفكاري وبتقول انه شخص غير محترم وبتحذر كل البنات والستات المدونات منه وقالت انها كانت قالت فى مدونتها انها بتدور على شغل وهو عرض عليها المساعده وطبعا كلمها كذا مره بدعوى انه جايب لها شغل وبعدين طلب مقابلتها وللاسف انه لما قابلته ساومها على نفسها قصاد الشغل وانها نشرت اسمه علي الملأ علشان كل المدونين والمدونات يعرفوة علي حقيقته وهو كمان رد عليها بتعليقات غايه في الحقارة وبألفاظ سيئه وبذيئه بيشتم بيها المدونه دي وبيقولها وانا كنت ضربتك علي ايدك انتي اللي رضيتي تكلميني وتقابليني كمان.....

اتصدمت رانيا في طارق محمود وحمدت ربنا انها عرفته علي حقيقته في الوقت المناسب قبل ما تتورط معاه أكتر من كده....

الى اللقاء فى الحلقه القادمه

بقلم : احمد سكر

أين انا ؟؟ الحلقه التاسعه عشر

2011-01-05T03:32:00.001+02:00

الحلقة التاسعة عشر

بقلم: ريم

دخلت ام عبد الله المطبخ ومعاها عبد الله وفضل باسم مع سمر اللى ضحكت وقالت : دلوقتى ماما تدي لعبد الله درس في اصول الضيافة

ابتسم باسم وسألها : انتي بتدرسي يا سمر ؟؟

قالت له : لا انا خلصت معهد سياحة وفنادق بس مش لاقيه شغل

او يعنى علشان اكون صريحة مش لاقيه شغل يوافق عليه عبد الله وبابا

ورغم اننا محتاجين للشغل جدا الا انهم رافضين اى شغل والسلام

بيقولوا انهم لازم يكونوا مطمنين عليا وانت عارف الشغل في مجال السياحة والفنادق كله ما يطمنش

وضحكت سمر

وضحك باسم وعجبه خفة دم سمر وبراءتها وعقلها في نفس الوقت

وبعد نص ساعة كان باسم بيتعشى مع عبد الله واسرته

في الاول باسم كان مكسوف جدا ومش عارف ياكل ولا حتى مرتاح وهو قاعد لكن بساطتهم وترحبيهم بيه

حسسوه انه وسط اهله وفي دقايق كان باسم بيتصرف براحته وكأنه يعرفهم من زماااان

قلقت رانيا بعد ساعتين من نومها على صوت جنى اللى كانت بتعيط وعاوزه تشرب

شربتها رانيا وحاولت تنام تاني بس كان خلاص النوم راح

وطبعا كانت متنرفزة جدا بسبب ان هانى بات عند مامته كالعادة

وانه صدق كذبة مامته

فتحت رانيا اللاب توب وحاولت تكتب اى حاجة

وهى في محاولتها وصلها ايميل

واتفاجئت انه من صاحب التعليق اللى لفت نظرها قبل كدا

الايميل كان بيقول :

اشتقنا الى كلمات لها مفعول السحر تخطها ذات الانامل الذهبية

اعذريني لانى سمحت لنفسي ان ابعث لك رسالتي على ايميلك الموجود في بروفايلك

ولكن من هي مثلك تستحق ان اغير قناعاتي واسأل عنها اذا غابت

حتى وان كان غيابها لبعض ساعات فقط

ارتبكت رانيا جدا بعد قراءة الايميل وكأنها امام الرجل الذى كتب تلك الكلمات

حاولت تقفل من غير ما ترد لكن اعتبرت ان دى قلة ذوق

فقررت انها ترد عليه بايميل قصير

وكتبت له شكرا على سؤالك ولا داعي للاعتذار

وحاولت ترجع تكتب في المدونة ولكن كل تفكيرها كان في الراجل دا

وهو عاوز منها ايه؟؟

وليه مهتم بيها اوي كدا ؟؟

الصبح طلع هاني شقته عشان يجهز ويلبس ويروح الشغل

كانت رانيا لسا قاعدة على اللاب توب بتحاول تشغل نفسها باى حاجة

هانى حاول يتكلم معاها شويه

كانت بترد على اد الكلمة من غير ما تبين انها زعلانة ولا تعاتب

وهو حس بس عمل نفسه مش فاهم عشان مش يدخل في نقاش ولا اسئلة ولا لوم بسبب بياته ونومه عند مامته

هانى كان حاسس جدا ان مامته بتدلع مش اكتر

هو اكتر حد فاهم مامته وعارف حركاتها

لكن في نفس الوقت مش قادر يزعلها ولا بتهون عليه

دايما لما كانت تزعل من حد او حتى منه وتعمل انها تعبانة وجسمها بينتفض

ومش قادرة تاخد نفسها

كان بيبقى عارف ان دا مش حقيقي وانها بس عاوزاه يصالحها ويفضل جنبها

وكان فعلا بيصالحها

كل دا هاني كان بيفكر فيه مع نفسه وهو بيلبس للشغل

وكان نفسه يقول لرانيا كدا

ويقولها انه عارف انها على حق في اوقات كتير

وان مامته بتدلع عليهم

بس ماقدرش يقول كدا لرانيا

اعتبر انه كدا بيصغر مامته ادامها

وكمل لبسه وطلع من اودته وسلم بسرعة على رانيا اللى قاعدة باللاب توب في الليفنج وخرج لشغله

قامت رانيا تشوف جنى وتأكلها

وبعدها دخلت المطبخ وجهزت الغدا وخلصت بدري

وكان حاسه بملل وزهق

حاولت ترسم شويه لكن مش عرفت

كانت حاسه بفراغ شديد شغل البيت والاكل بيخلصوا في ساعتين

وهاني لسا على موعد رجوعه كتيييييير اوي

كانت رانيا دايما حاسه ان حياتها فاضية وانها عايشة تقريبا لوحدها وانها مفتقدة حد يسمعها وتسمعه

خدت اللاب توب ودخلت اودتها وقعدت على سريرها وفتحت مواقع للقراءة وللرسم وقعدت تتجول فيها

وبعد نص ساعة تقريبا لقت اضافة على الايميل باسم طارق محمود

طارق محمود اللى كتب لها الايميل والتعليق

على طول كانت هاترفضها خاصة انها قطعت وعد على نفسها لهاني انها مش تكلم رجال

ولكن ضيقها من هاني ومن تصرفاته واهماله

خلاها تعند وتقبل الاضافة

وقبل كل دا

شعورها الشديد بالشغف لمعرفة الشخص اللى اهتم بيها كل هذا الاهتمام

وبالفعل كان ادامها اون لاين

وكانت منتظرة انه يكلمها

بس ما اتكلمش

شريف حتى بعد سفره مش عارف ينسى عليا نهائياً

خاصة انه هناك غريب واصحاب الغربة اصحاب مصالح وشغل وبس

يعنى مفتقد الصديق الحقيقي وكان عايش لوحده تقريبا طول الوقت

كل دا خلاه بدل ما يبعد عن عليا بتفكيره بقى يقرب اكتر

وكل مرة كان يبقى عاوز يكلمها وفعلا يتصل برقمها لكن يرجع في كلامه

وبمرور الوقت حس انها مهمة جدا عنده وانه لما قال ان الموضوع منتهى كان بيضحك على نفسه

ومش بقى عارف هو فعلا بيحبها ولا بيحب جمالها وجاذبيتها

ولا غناها وشخصيتها اللى بيضيفوا لها قوة على الجمال ؟؟

واتصل بيها واتحجج انه بس بيتطمن عليها وبيشوفها اذا كانت محتاجة حاجة ولا ايه ؟؟

لكن عليا ردت على شريف عادى جدا

من غير الترحيب والدلع بتاع كل مرة

باسم طول الليل بيفكر في وش سمر البشوش الطيب

وابتسامتها الحلوة

وجو البيت والعيلة واللمة الحلوة اللى في بيت عبد الله

رغم بساطتهم

وأد ايه حس انه مبسوط ومرتاح لاول مرة من سنين وسط الناس دول

وفعلا اول حاجة عملها باسم اوصل ما صحى من نومه الصبح

انه راح لمامته وقالها انه عاوز يخطب

طبعا مدام نجاة فرحت اوي لان باسم طلع من العزلة اللى كان فارضها على نفسه

وقالت له خلاص يا حبيبي لو عاجباك نخطبها لك

المهم يكونوا اهلها ناس كويسين وطيبين

رد باسم وهو فاكر ان كلمة كويسين اللى قالتها مدام نجاة معناها انهم ناس اصلهم طيب

ومش فهم المعنى الحقيقي اللى كان ورا كلمة كويسين اللى قصدتها مدام نجاة

اللى هى كويسين اجتماعيا وماديا ودا طبعا كان بعيد كل البعد عن عيلة عبد الله وسمر البسيطة

المهم ان باسم استعجل وفرح ولما راح شغله

طلب من عبد الله انه يحدد له مع اهله يوم

علشان يجوا يزوروهم

عبد الله فهم وبانت فرحته وقال لباسم انتوا تشرفونا في اي وقت انتوا تحددوه

واحنا هانكون في انتظاركم باذن الله

لما رجع هاني من الشغل اخر اليوم

طلع على شقته على طول

وكانت رانيا محضرة الغدا كله ومخلصة كل حاجة

اتغدا هاني ودخل نام شويه

ولما صحي كان مهتم انه يقعد مع رانيا ويلاعب جنى شوية

وقال لرانيا ما تزعليش يا حبيبتى لانى الايام دي مع ماما شوية

انتى عارفه ظروفها وعارفه ان الناس الكبار دول زى الاطفال

بيحتاجوا معاملة خاصة

والغريب ان رانيا ولاول مرة كانت هادية بجد

وقالت له عادي يا حبيبي انا مقدرة مش تقلق

وقالت له انزل اقعد وبات معاها

ومش تشيل هم اى حاجة خالص

وكانت رانيا فعلا عاوزه هاني ينزل يبات عند مامته

كانت عاوزه تبقى لوحدها

كانت عاوزه تقعد ادام اللاب توب طول الليل

وتعرف اذا كان بردو طارق محمود هايبقى اون لاين ومش هايكلمها

ولا ناوي على ايه ؟؟؟؟

الى اللقاء فى الحلقه القادمه

بقلم : البنفسج الحزين

اين انا؟؟؟ الحلقه الثامنه عشر

2011-01-02T08:23:00.001+02:00

اين انا ؟؟ الحلقه الثامنة عشر
بقلم: حنعيش يعنى حنعيش
باسم اول ما عينة جات فى عين اخت عبد الله اتلخبط ... مسك كاس الشربات وايدة بتترعش .. وقال شكرا يا سلوى ... ردت اخت عبد لله : العفو بس انا اسمى سمر ... وضحكت ومشت بدلال ... باسم كان حيتجنن ... ممكن فيه حد شبه حد كدة .. نفس العنين .. نفس الشفايف ... نفس طريقة الكلام ... ايه ده ...حلم ولا ايه .؟.... باسم فاق على ايد عبدالله وهوه بيهزه : ايه يابنى ... سرحان فى ايه ... الشربات حيقع ... باسم : ايه لا ابدا ولاحاجة ... الا مين اللى قدمت لى الشربات دى ؟... عبد الله دى سمر اختى الصغيرة .. فى رابعة اداب ... ونظر اليه نظرة ذات معنى واستفهام .وقال : بتسأل ليه ؟ ... باسم وهوه بيهرب من عين عبد الله :لا ابدا ... انا قولت كدة برضة ... اصل فيها شبه منك ... عبد الله وهو يحاول اخراج باسم من حالة الحرج : مش عارف .. انت بتمدحنى ولا بتشتمها ...؟ ... ضحك باسم وعبد الله وجلس كل واحد مع افكارة ... عبد الله قال فى نفسة :ياسلام لو البت سمر تكون عجبت باسم ... بصراحة الواد كويس وابن ناس واخلاق ... والاهم انه يقدر يتجوز ... يعنى ممكن يشيل من على كتفى كتير ... وكدة مايبقاش غير البت هناء ... ربنا يكرم ونزقها ... والحق انا بقى اشوف نفسى واتجوز ... عايز الحق اى حاجة ان شالله بو....... فاق عبد الله على صوت باسم : ايه مش حنروح نسلم على العريس11 والعروسة ونتصور معاهم ؟... عبدالله : اه ايوه ايوه ... اتفضل ...
*************************
ام عبد الله وابوه كانوا قاعدين ملاحظين كل اللى بيحصل حواليهم فى الفرح ... هما بيرحبوا بالمعازيم ويسلموا عليهم ويضحكوا معاهم ... بس كل تركيزهم كان على اهل العريس ... بيدوروا فيهم على عريس ينفع لبنت من البنات ...حاكم العيله مافيهاش حد عدل .. دا كان رأى ام عبد الله ... ابو عبد الله وامه شافوا اللى حصل فى موقعة الشربات ... ابو عبد الله قال لمراته وهوه بيغمز لها ويخبطها فى كتفها : ايه رايك يا وليه ؟ ... ام عبد الله : دا يبقى يوم المنى يا حاج ... ابو عبد الله : انا شايف انه محترم كدة وابن ناس ... ام عبد الله وهى ترفع عينها للسماء( يمكن تكون ابوابها مفتوحة ) : وعنده اللى مكفيه ... ابو عبد الله : بس بتك الوسطانية ؟ ... قالت : مين هناء .. وهية تكره الخير لاختها ... وبعدين كله بياخد نصيبة .. واكيد .. اكيد ربنا شايل لها حاجة كويسة .. دى مابتفوتش فرض ... دى اول من اتحجب فى عيالك ... ابو عبد الله : ماقولناش .. بس خايف لا البت تشيل فى نفسها لما اختها اللى اصغر منها تتجوز قبلها ...ام عبد الله وهية بتخبطة فى ايدة : بس ما تقاطعش .. هو انت شوفته جه يطلب ايدها ؟!! ... ابو عبد الله : الدور والباقى عليكى انت بقى ... يالا كدة ورينا الشطارة وماتخليهوش يطير من ايدينا ...
*************************************
الحاجة كوثر فضلت تنادى ... ياهانى ... ياهانى ... الحقنى يابنى ... نزل هانى ورانيا جرى علشان يشوفوا فيه اية .... فتح الباب لقى الحاجة كوثر قاعدة على كنبة الانتريه فى الصاله وحاطه وشها بين ايدها.. هانى بانزعاج : مالك يا ماما فيه ايه ... خير .. رانيا : فيه ايه يا طنط .. حاسه بحاجة ؟ ... كوثر ماردتش ... وقعدت ترتعش بطريقة مبالغ فيها ... اثرت زيادة على هانى ... بس اكدت لرانيا ان الموضوع استعباط مش اكتر... هانى وهو فى حاله يرثى لها : ايه ياماما والنبى ... كوثر وهيه بتطبطب على هانى : لا يابنى .. ماتضخضش يا ضنايا ... انا كويسة ... خد مراتك واطلعوا شقتكوا ... هانى : ازاى بس اسيبك من غير ما اعرف فيه ايه ؟ ... كوثر : ابدا يا بنى .. دى تهيؤات من الوحدة ... حاكم الوحدة مرة ... بتخلى الواحدة تشوف حاجات وتسمع حاجات ودماغها يفضل يجيب ويودى ... هانى : ايه بس احكى لى ... كوثر : ابوك ....هانى : الله يرحمه .. ماله ؟ ... كوثر : كان طالع من الحمام وحاطط الفوطة على وشه زى عادته ... بص لى وقالى : انت لسه سهرانه يا كوثر ... قومى نامى ... قولت له : ........ رانيا مشت وقفلت وراها الباب وطلعت شقتها ... بصت على جنى وهيه نايمه ... غطتيتها وقالت : تصدقى يا جنى ان امك عبيطة وحتفضل طول عمرها عبيطة ... دخلت رانيا اوديتها ... علقت قميص النوم الاحمر فى الدولاب ... ورمت نفسها على السرير ... كان نفسها تعيط .. بس الغريبة انها ما عيطتش ... ونامت ... هيه مانمتش على طول ... بس نامت ... وطبعا هانى ماطلعش ....
****************************
هيام بعد مانيمت العيال وجوزها ... خرجت وقعدت فى الصالون وطفت النور ... قعدت تجتر ذكرياتها مع ابوها ... تفتكر من ايام ماكان بيشيلها وهية راجعة من المدرسة على ضهرة ويطلع بيها السلم ويقلد صوت الحصان ... لغاية ماكان بيزورها فى بيتها ويجيب لولادها الشيكولاته والشيبسى ... وماينساش يجيب لها العسلية ام سمسم اللى بتحبها ... هيه كانت عارفة انه بيتعب على مايلاقيها ... بس استحاله مايجبهاش ... زاد عياطها وعلى صوتها اللى صحى جوزها وجه قعد جنبها ومسك ايديها وقال : لو الدموع بترجع الميت كنا قعدنا نعيط طول العمر ... رمت هيام راسها على صدر جوزها وقالت : وحشنى .. وحشنى قوى ... قال : اللى بيحب حد يقف حنبه ويساعده ومايسبوش لوحدة ... مش كدة ... قالت : قصدك ايه ؟ ... قال : ابوكى دلوقت عايز مساعدتك مش عايز دموعك ...ولا ايه رايك فى كلام سيدنا محمد : ولد صالح يدعو له ..... قالت عليه الصلاة والسلام ...قال : قومى اتوضى وصلى واقعدى ادعى له ... ادعى له كتير ... كدة احسن له واحسن ليكى ...
*************************************
خلص فرح اخت عبد الله والمعازيم بدأت تمشى ... باسم قال لعبد الله : استأذن انا بقى يا عبدة .... عبد الله : متشكر قوى انك جيت الفرح ... شرفتنا وانستنا ... ام عبد الله من راهم : هوه ايه اللى شرفتنا وانستنا ... وايه هوه اللى استاذن ده يا استاذ باسم يابنى ... انت فى بيت يهود ولا ايه ؟ ويمين المصطفى مانت ماشى الا لما تتعشى معانا ... باسم : بس يا حاجة .. اصل ... ام عبد الله : لا اصل ولا فصل ... ياسمر ... انت يابت يا سمر ... تعالى اعملى للاستاذ باسم فنجان قهوة على مانحضر انا واختك العشا ... وخدى بالك من الاستاذ باسم حاكم اخوكى ماتعلمش يرحب بالناس ... ووجهت كلامها لعبد الله بصوت منخفض ... قدامى يا مايل علشان تناولنى الحاجات اللى على السفرة .....جاتها نيله اللى تقول يا خلفة .....
الى اللقاء فى الحلقه القادمه
بقلم: ريم

اين انا ؟؟ الحلقه السابعه عشر

2010-12-29T22:36:00.002+02:00

اين انا ؟؟...الحلقه السابعه عشر

بقلم : منى ابو السعود

باسم صحي من النوم مبسوط حاسس بأمل و تفاؤل و إن فيه شئ في حياته هايتغير مش عارف ليه ؟ بس احساس .....

في اليوم ده عبدالله صاحبه كان عازمه علي خطوبة اخته .......عبدالله انسان طيب كان مبسوط اوي انه قادر يعمل حفلة الخطوبة وطبعا عزم باسم لانهم بقوا اصحاب قوي و قربوا من بعض الفترة اللي فاتت.

باسم اتشيك و لبس بدلة و خرج من الاودة لقي والده و والدته قاعدين يتفرجواعلي التليفزيون اول ما شافوه استغربوا بقاله كتير مالبسش بدلة و لا اهتم بمظهره كده والدته سألته: خير يا حبيبي متشيك كده ليه ؟

باسم : معزوم في خطوبة .

الحاج والده بإبتسامة: اخيرا خرجت من عزلتك حمدالله علي السلامة .

باسم و هو بيضحك : الحمد لله ربنا رزقني بناس حسسوني بقيمة النعمة اللي انا فيه ، يالا بقي عاوزين مني حاجة انا يمكن اتأخر تصبحوا علي خير .

والده ووالدته : و انت من اهله سهرة سعيدة.

بعد ما باسم قفل الباب والدته قالت : يا رب يا باسم تلاقي بنت الحلال اللي تعوضك خير .

---------------------------------------------------------------------------------------------

رانيا لوحدها مع جنى كالعادة من يوم وفاة والد هاني ، بس هي خلاص بقي فاض بيها شهرين علي الحال ده. رانيا بعد ما جنى نامت دخلت علي النت تشوف المدونة بتاعتها و تشوف التعليقات اللي جات لها علي حكايتها كانت التعليقات كلها من نوعية ربنا يكون في عونك ...... معلش ما هي مامته برضه .......... ايه الراجل ده ازاي يسيب بيته ومراته كل ده ....... الا تعليق واحد كان مختلف عن الباقي كان التعليق بيقول " كيف لرجل يحيا مع تلك الانامل الذهبية ، تلك الانامل التي تخط ارق الكلمات و ترسم اروع اللوحات ، ان يبتعد عنها".

رانيا اتلخبطت اوي مش عارفة ايه ده فرحت بالتعليق و في نفس الوقت اتضايقت.......... فرحت بالكلام الرقيق اللي حسسها بقيمتها و انها مش انسانة تافهة او عديمة القيمة ....... بس برضه مين ده و ازاي يتجرأ يقول لها كده، هو دايما يعلق عندها بس اول مرة يتمادي كده ، رانيا مش عارفة ترد تقوله ايه ....بس لازم ترد و بعد تفكير قررت تحرج الشخص ده فردت عليه : " ليس معني انه يهتم بامر والدته انه لا يدرك قيمة الانامل التي تحدثت عنها ، شكرا علي رأيك" .

و قررت رانيا تزور هيام تاني يوم .

-------------------------------------------------------------------------------------------

هيام من يوم وفاة والدها مش بتخرج تقريبا من البيت كانت في حالة صدمة شديدة و حزنها اكتر من اي حد خصوصا انها كانت مسافرة و ما شافيتش والدها قبل الوفاة ، كانت دايما حزينة ومكسورة حاسة ان حاجة كبيرة اوي ضاعت منها كأن ضهرها اتكسر و ان خلاص الامان و الحنان راحوا منها ،في شرخ جواها عمره ما هايتلم.حتي والدتها مش بتزورها كتير زي الاول شايفه اللي هاني عامله بس مش قادرة تتكلم ، مش عايزه تتكلم ، هي عايزه اللي تتكلم معاه عايزه حضن ابوها اللي يا ما جريت عليه و فضفضتله ،

و تنزل دموعها. تفوق هيام علي صوت الجرس تمسح دموعها و تقوم تفتح تلاقي رانيا و جني تفرح بيهم اوي ، زي ما يكون ربنا بعت رانيا في الوقت المناسب علشان تفضفض معاها. رانيا و هيام اتكلموا كتير اوي عن والد هيام و عن هاني و والدته و الوضع الغريب بتاع هاني ، هيام حست ان هاني زودها اوي فقررت تتكلم معاه بس طبعا اكيد مش في وجود الحاجة كوثر لان كلام هيام مش هايعجبها . هيام اتصلت بهاني و قالتله يعدي عليها علشان عاوزاه ضروري و فعلا هاني راح لها بعد الشغل .

هاني : السلام عليكم ازيك يا ست الهربانة فينك بقي علشان نشوفك لازم ناخد ميعاد.

هيام: و عليكم السلام ادخل و بلاش لماضة .

ازيك يا هاني و ازي رانيا و جنى .

هاني : الحمد لله كويسين بس مش بشوفهم كتير .

هيام : و النبي مش مكسوف من نفسك من اللي بتقوله ، يعني ايه مش بتشوفهم كتير انت لسه بتبات مع ماما ؟!

هاني : ايوه طبعا يعني اسيبها لوحدها ؟

هيام : لوحدها ايه يا هاني دي في الشقة اللي تحتك يعني لو ندهت من علي السرير حتي هتسمعها من الشباك.

هاني : انتي اللي بتقولي كده انتي ايه مش خايفة علي ماما ؟

هيام : اخاف من ايه يا بني هي مريضة بعد الشر عنها و لا فيها حاجة تخلينا نقعد معاها و بعدين بينها و بينك دور فين لوحدها بقي ، امال حماتي دي قاعدة لوحدها ازاي و عمتك وووووو ......... اقولك كام واحدة اعرفها قاعدة لوحدها ، اعقل يا هاني بلاش دلع و ماما لو خايفة عليك كانت قالتلك اطلع لبيتك ومراتك ، بس انت عارف ماما لما تصدق عايزاك لازق جنبها اعقل يا هاني مش كل شوية تعمل مشكلة مع رانيا . هاني سرح في كلام هيام بس يا تري اقتنع ؟

--------------------------------------------------------------------------------------

باسم وصل بيت عبد الله ...بيت في حي شعبي من الاحياء اللي لسه محافظة علي جمال ناسها ، الناس كلها فرحانة و وواقفة مع بعض بيساعدوا بجد و بحب و نية صافية ....باسم كان مبسوط اوي من الجو ده حس قد ايه الناس شبه بعض جدعنة و رجولة نادرة نشوفها بس في حي شعبي زي اللي كان فيه........ طلع باسم لعبدالله اللي فرح بيه اوي و عرفه علي والده ووالدته و بعد شوية جت اخت عبد الله الصغيرة تقدم لباسم الشربات ، كانت بتبتسم و هي بتقدم له الشربات بس اول ما عينيه جت في عينيها .........؟؟؟؟؟؟؟؟؟؟؟

------------------------------------------------------------------------------------

هاني كان قاعد في شقة والدته محتار بيفكر في كلام هيام ، مش عارف يعمل ايه كلام هيام صح بس مامته صعبانة عليه، البيت كمان واحشه و رانيا و جنى صحيح بيشوفهم بس مش كفاية .....مامته حست انه مشغول بحاجة سألته : مالك يا حبيبي بالك مشغول في ايه ؟

هاني : مافيش يا امي عادي " و بينه و بين نفسه اقولها ايه بس ازاي امهد لها الموضوع "

الحاجة كوثر: فيه ايه يا بني هو انا لسه هاعرفك ! قولي بس ......اوعي تكون رانيا ضايقتك انا عارفاها غاوية نكد.

هاني : حرام عليكي يا ماما هي معملتش حاجة .

الحاجة: يا واد يعني مش بتزن عليك علشان تطلع شقتك و تسيبني.

هاني : لا ابدا حتي لو قالت ماهو حقها انا اهملتها هي و جنى و قليل لما اشوفهم .

الحاجة : يا سلام اهملتهم ليه يعني انت مش بتديها الفلوس اللي هي عايزاها ، و بعدين خلاص يا سيدي لو عاوز تطلع عندها إتفضل انا يعني هايجرالي ايه ..... هو دور اللي بيني و بينك.

غلطت الحاجة كوثر بكلامها كانت فاكرة انها بتدلع علي ابنها و انه كده مش هيهون عليه يسيبها ما تعرفش ان هاني هايستغل الكلمتين دول ضدها .

هاني : يا ماما هي فعلا ما قالتش حاجة بس انتي معاكي حق هو دور اللي بين شقتك و شقتي يعني اي وقت هاتندهي عليا هاكون عندك في ثواني ، و انا خلاص اتطمنت عليكي , انا هاطلع بقي عايزه حاجة مني ؟

الحاجة كوثر اتصدمت معرفتش ترد فضلت ساكتة شوية و بعدين قالت لهاني : كده يا هاني اهون عليك تسيبني لوحدي ؟

هاني : اسيبك ايه بس يا جميل دا انتي الخير و البركة وزي ما قلتي هما كام سلمة و اكون عندك ، يالا يا جميل تصبحي علي خير.

هاني قفل الباب وراه و هو بيضحك مش مصدق اللي عمله بس هي ما تجيش غير كده كان لازم يضحك عليها و ما يديهاش فرصة تفكر . الحاجة كوثر كمان فضلت تبص علي الباب مش مصدقة اللي هاني عمله حسيت انه ضحك عليها و اكل بعقلها حلاوة.

هاني اول ما دخل الشقة رانيا استغربت لانه لما بيحتاج حاجة بينده عليها تنزلها ،قالته : خير عاوز حاجة ؟

هاني مسك ايد رانيا و قالها : انا عارف انك زعلانه بس خلاص انا طالع اقعد معاكوا و مش هاسيبكوا تاني ابدا.

رانيا فرحت اوي و حضنت هاني : بجد يا حبيبي انا مبسوطة اوي البيت كان وحش من غيرك .

هاني : انا كمان كنت متضايق اوي و انا بعيد عنك انت و جنى هي فين صحيح ؟

رانيا: نامت من شوية ، اتعشيت و لا نتعشي سوا ؟

هاني : لأ هاتعشي معاكي يا حبيبتي بس الاول تعالي احكيلي كنت عامله ايه من غيري؟

رانيا و هاني كانوا مبسوطين اوي بس طبعا مش معقول الفرحة تكمل اكيد الحاجة كوثر مش هاتسيبهم في حالهم ما هي فاضية بقي

اول ما هاني و رانيا خلصوا عشا ولسه هايدخلوا يناموا سمعوا الحاجة كوثر بتنادي هاني اتخض و نزل يجري .........

يا تري الحاجة كانت عاوزه ايه .............؟؟؟؟؟؟؟؟؟؟؟؟؟؟؟؟؟

الى اللقاء فى الحلقه القادمه

بقلم: حنعيش يعنى حنعيش

أين انا ؟؟ الحلقه السادسه عشر

2010-12-26T23:07:00.000+02:00

اين انا ؟؟ الحلقه السادسة عشر

بقلم: أبو حميد

رانيا إستنت هانى لما رجع من الشغل وكانت محضراله غدا بيحبه.. هى صحيح إتغيرت من ناحيته شوية بس لسه بتحبه وشايفة إنه إنسان كويس محتاج شوية إصلاحات.. طيب ما أنا كمان محتاجة شوية إصلاحات (هى قالت لنفسها كده) المهم إتغدوا وإتبسطوا وشربوا الشاى وبعدين رانيا قررت تفاتح هانى فى الموضوع ده وقالتله مانفسكش فى عيال تانى هانى سكت شوية وماردش رانيا قالتله يبقى مانفسكش هانى إبتسم إبتسامة خفيفة وقالها إنه أكيد نفسه فى عيال تانى بس نفسه أكتر يفوقوا شوية ويقفوا على رجليهم وبعدين إنت مش فاضية دلوقتى وبترسمى رانيا ماكانتش عارفة هو بيتريق عليها ولا بيتكلم بجد فسألته هو موضوع الرسم ده مضايقه فى إيه هانى قالها إنه مش مضايقه بس هو كان مضايقه ليه مش عارف يمكن علشان كان بيحب يشوف رانيا الضعيفة المستسلمة ليه وهو اللى دايما شايف صح وبيتكلم صح وشخصيتها لازم تكون أضعف من شخصيته وبعدين الرسم ده خلى شخصيتها أقوى وليها إهتمامات مع ناس تانية غيره, رانيا فوقته من تفكيره بسؤالها يعنى مش عايز عيال تانى؟ قالها مين قال ده بس عايز بس مش دلوقتى رانيا فهمته إن الموضوع مش حيحصل بين يوم وليلة وممكن يقعدوا سنة ولا إتنين على ما ربنا يرزقهم المهم هانى وافق وهى كانت مبسوطة قوى علشان نفسها فى أطفال تانى وعلشان بقت بتعرف تقنع هانى

--------------------------------------------------------------------------------------------

باسم أخو رانيا الكبير بعد ما إشتغل فى الوظيفة اللى جابهالو أبوه إكتأب زيادة, كان حاسس إن أحلامه كلها بتضع فضل كده أول أربع شهور فى الشغل بس شوية شوية بدأ يكون علاقات داخل الشغل, لقى الناس اللى شغالين معاه إلى حد كبير طيبين كل واحد فيهم بيجرى على أكل عيشه وعندهم هم ما يتلم ومع كده بيهزروا ويضحكوا وبيحاولوا يبقوا سعداء على الرغم من الدخل الحكومى القليل, كان فيهم واحد إسمه عبد الله كان أكتر واحد باسم بيرتاحله... مرة كده الصبح قال لباسم: أجيبلك فطار معايا؟ باسم قاله ماشى بس على حسابى, عبدالله جاب سندوتشات فول ملفوفة فى ورقة جرنال, وفتح الورقة وقال لباسم بسم الله باسم قاله منين الفول ده؟ عبدالله قاله من على العربية اللى قدام الشغل , كل بس وحتدعيلى وهما بياكلوا عبدالله سأل باسم هو ليه على طول مش مبسوط؟ باسم قاله وهو إيه اللى يبسط؟ عبد الله قاله يابنى إنت ولا متجوز ولا وراك حاجة وأبوك ماشاء الله راجل مستريح نفسى أعرف إيه مشكلتك؟ المهم باسم لمح كده إن مشكلته عاطفية فعبدالله ضحك قوى, باسم زعل وكان حيقوم عبدالله مسكه من إيده وقاله طيب إستنى ماتزعلش وحقولك بضحك على إيه,عبد الله حكاله قصته إنه بيصرف على أبوه وأمه وإخواته البنات والولاد اللى لسه بيتعلموا وإنه حب بنت قوى وهو فى الجامعة وكانت أمنية حياته إنه يتجوزها بس ما كانش ينفع لأنه ما عاهوش فلوس والدخل اللى بيجيله يادوب على قد المصاريف وهو بعد الضهر بيشنغل مبيض محارة علشان يحسن دخله.

باسم روح البيت وهو بيفكر فى كلام عبد الله وقد إيه هو عنده نعم كتير ومش حاسس بيها وفضل يفكر طول اليوم إزاى يطلع من الإكتئاب اللى هو معيش نفسه فيه ويبدأ حياته بجد.

-----------------------------------------------------------------------------------------

رانيا كانت متعددة المواهب بس بتخاف تقول لحد.. يعنى غير الرسم كانت بتكتب شعر وروايات على قدها يعنى , بس هى كانت بتحب تكتب جدا وكانت بتتكسف تقول لحد على موهبتها, هى دلوقتى ماشية فى الرسم كويس قوى وهى وهانى ناوين يجيبوا بيبى جديد بس لسه ربنا ما أذنش. هانى برضه إتغير معاها شوية للأحسن وفى عيد ميلادها قرر يجيبلها هدية فجاب لها لاب توب صغنون خالص تعرف تشيله معاها فى أى حتة, رانيا فرحت قوى قوى بالهدية وفرحت أكتر بهانى وبقت النت هوايتها زيها زى الرسم بالظبط.

مرة رانيا كانت على النت وبتدعبس شوية كده لقت مدونة؟؟؟؟ يعنى إيه مدونة؟ هى مش عارفة بس لقت واحدة كاتبة شعر وقصص قصيرة عجبتها جدا, المهم تانى يوم عايزة تدخل لنفس الصفحة عملت بحث عن كلمة مدونة لقت ألاف المدونات طلعت لها, رانيا فضلت تدور يعنى إيه مدونة ومين اللى بيعملها لغاية لما عرفت وفهمت.

رانيا عملت لنفسها مدونة وبدأت فى الأول تنشر لوحها عليها وبعدين بقت تنشر اللوحة مع بيتين شعر صغيرين ليها وحبة حبة بدأت الناس تدخل على مدونتها ويسيبوا تعليقات, رانيا كانت طايرة من الفرحة, هى ماحكتش لهانى على الموضوع ده لأنه ساعات بيستخف بيها وهى مش عايزة أى إحباط.

هانى بدأ ينزعج من إهتمام رانيا المبالغ باللاب لدرجة إنها ساعات بتاخده المطبخ, فسألها هى على النت على طول بتعمل إيه؟ رانيا لأنها بتكره الكدب حكيتله, هانى ضحك وقالها مش كفاية الرسم عايزة تكتبى كمان؟ رانيا قالتله إنها ماكانتش عايزة تحكيله بسبب سخريته دى, هانى قالها ولا سخرية ولا حاجة بس ليا شرط واحد: مافيش كلام مع شباب حتى لو من خلال الشاتينج.

-----------------------------------------------------------------------------------------

باسم اللى كان دايما عابس بدأ يضحك.... تصوروا؟ لأ وإيه ده بقى يروح النادى اللى جنبهم يلعب رياضة, هو بيحاول يعوض اللى فاته بس المشكلة إنه فاته شوية حاجات, يعنى فاته يكون أصحاب بس معلش (هو قال لنفسه) تتعوض...المهم ما أضيعش اللى جاى , بعد ماخلص النادى وخد دش كلم رانيا على الموبايل وسلم عليها وقالها إنه حيعدى عليها, رانيا إستغربت جدا وقالتله خير؟ باسم قالها لو مش عايزانى أجيلك بلاش, رانيا قالتله إنت تأنس وتنور.

المهم باسم راح لرانيا وكان هانى مش موجود, خرج مع أصحابه بعد الشغل, رانيا بتسأل باسم اللى عمره تقريبا ما زارها لوحده عن أحواله وإيه اللى مغيره... مالك؟ بتحب جديد؟ باسم إتنهد وقالها لأ .. أنا بطلت أحب, فضلوا يتكلموا شوية ورانيا كانت مبسوطة جدا لأنها حست إن ليها حد تكلمه بعد سفر شريف.

وهما قاعدين سمعوا خبط ورزع على الباب, رانيا جريت تفتح لقت حماتها واقفة على الباب وبتعيط وتقولها إلحقينى عمك وقع فجأة ومابيردش, جريت رانيا وباسم لقوا حماها ممدد فى الأرض ومابيتحركش, رانيا كلمت هانى على الموبايل وباسم جاب تاكسى بسرعة وشال الراجل مع الجيران وطلعوا على المستشفى, هانى وصل المستشفى لقى باسم ولقف على الباب وبيقوله البقاء لله.

--------------------------------------------------------------------------------------------

فاتت أيام العزا وكان هانى ورانيا قاعدين فى بيت والده وبعد العزا رانيا قالتله إنها طالعة هى وجنى هانى قالها ماشى بس هو ما طلعش وفضل بايت تحت.

هانى كان حاسس إنه بقى راجل البيت ومش عايز يسيب أمه, وأمه كمان ساقت فيها وماصدقت, هانى فضل يبات عند مامته شهرين وكان بيطلع شقته يقعد شوية ويغير هدومه وطلب من رانيا تبات معاه تحت, هى فى البداية رفضت بلطف بس لمل الموضوع زاد عن حده قالت لهانى إن اللى هو بيعمله ده ماينفعش, هانى غضب جدا وقالها عايزانى أسيب أمى لوحدها؟ رانيا قالتله ده اللى بينا وبينها دور!!!! هانى قالها ولو وبلاش تحطى نفسك فى موضع إختيار بينك وبين أمى.

رانيا ماعرفتش تعمل إيه غير إنها تدخل أوضتها وتعيط بس شوية صغيرين وبعدين كلمت مامتها فى التليفون ومامتها قعدت تهديها وتقولها إنه بس علشان حزين على أبوه وكده

رانيا ماعرفتش تعمل إيه غير إنها تطلع همها فى الرسم والمدونة بس لما نشرت بوست عن مشكلتها وطبعا هى مش معرفة حد هى مين لقت تعليق من شخص تعرفه.................

-----------------------------------------------------------------------------------------

الى اللقاء فى الحلقه القادمه

بقلم: منى هيكل

أين انا ؟؟ الحلقه الخامسه عشر

2010-12-23T23:06:00.004+02:00

اين انا ؟؟ الحلقه الخامسه عشر

بقلم: ندى الياسمين

الحاجه كوثر بعد المشكله الى فاتت مع رانيا خدت فترة هدنه من المشاكل بس مافيش فايده هي برضه مش عاجبها حاجات كتير

مش بس فى رانيا لا فى رانيا وفى هاني بس طبعا هاني له الف عذر مش بس كده لا كمان اي غلط بيعمله هاني نابع من اخطاء رانيا

يعنى مثلا لو هاني اتاخر يوم الجمعه على ما ينزل الصبح يبقى رانيا الى ا خرته

لوهاني مبوز ورد ناشف على ابوه ولاامه يبقى هى رانيا الى قالباه وعاطياه كلمتين

وهكذااااا وطبعا الكلام ده مش بيبقى فى قلب الحاجه كوثر بس

لااااااا لازم تدي رانيا كلمتين فى جنابها .... وتقول لهاني عشر كلمات على مراته تخليها طالع مش طايق يبص فى وشها

واوقات برضه هاني لما بيحس ان الحاجه كوثر جايه اوي على رانيا كان يحاول عابثا يدافع عن رانيا

بس لقى انه لما بيعمل كده .. بيبقى ليلته مش فايته من الحاجه كوثر حيث انه ازااااااااي يدافع عنها كمان

بس اهى بتعدي الايام على كده ورانيا اصبحت واخده خط جديد فى حياتها تماما...... اتغيرت

رانيا لما عرفت ان رحاب هاتكون فى عليا بيوتي سنتر ما قالتش لرحاب فى الاول على ما تجمع افكارها خصوصا ان هاني دخل عليها وهى بتتكلم

بس كانت محتاره مش عارفه تعمل ايه تروح ولا ما تروحش ... تقول لرحاب الحقيقه ولا تعتذر وخلاص ... بصراحه حكاية ان هاني كان يعرف واحده دي هى مش قادره تحكيها لحد حاسه انها مهينه لها اولا

بعد ما فكرت رانيا كام يوم فى الموضوع اخدت قرارها واستقرت عليه ... رانيا قررت تروح

وقبل الخطوبة بيوم قالت لهاني انا بكره هاخد جنى ونروح عند ماما من الصبح عشان خطوبة رانيا النهارده هاسيب جنى مع ماما بالليل واروح حتى الكوافير قريب من ماما

ووافق هاني على مضد ... اه ماهو بعد ما رانيا ا تغيرت هو كمان اضطر يتغير وبقى يوافق على حاجات ما كانش بيوافق عليها قبل كده ... بس على مضد

رانيا اصلها بقت عندها اصرار اكتر .. وكمان عندها حاله من الصمت والا مبالاه بمن حولها ... يعنى لو لقت هاني بيزعق بتمشي وتسيبه اصلا وتعمل نفسها مش سامعاه ... لما تسمع كلمتين من حماتها تطنش خاااااااالص وتعمل مش سامعه

ما عادتش زي زمان بتضحك كتير وتعيط كتير وتتكلم كتير .... دايما ساكته ودايما مش فرحانه ولا زعلانه

اوقات بس غصب عنها بتعيط بس بينها وبين نفسها ... واوقات بتضحك من قلبها بس لما تبص فى عنين جنى وهى بتضحك لها وتلاعبها

هاني رغم كل شيء حاسس ان رانيا مجروحه ومتغيره منه وبيحاول يجى على نفسه شويه عشان يرضيها وترجع زي زمان

المهم راحت رانيا عند مامتها من الصبح

واتصلت على رحاب وقالت لها هاجيلك السنتر على الساعه 5 ولبست واتشيكت اوووووي وكانت حاسه بنفسها ان قويه اوي مش عارفه جابت القوه دي منين وراحت لرحاب على الكوافير ....

ولفت بعنيها فى السنتر عشان تدور على عليا بس ما عرفتش هى فين بس لاحظة ان فى صور كتير فى المكان لواحده ست حلوه اوي ... قالت هى دي اكيد عليا ... بس عارفين رانيا لما شافت صورتها ارتاحت اكتر

هى صحيح عليا حلوه اوي ... بس حست من صورتها انها متكلفه اوي ... وتفتقد فعلا جمال الروح ... مافيهاش طبيعيه وتلقائيه .. من الاخر رانيا حست انها مش ند لها وما غارتش منها ولا حاجه

المهم قعدت رانيا ساعه تقريبا مع رحاب ولسه ما شافتش عليا وفجأه لقتها ظهرت فى المكان ودخلت على مكتبها

وقعدت رانيا نص ساعه متردده تروح تكلمها ولا لا خصوصا ان عليا ما تعرفهاش ... المهم فى الاخر ظبطت رانيا مكياجها وايشاربها ودخلت لعليا الى شكلها ما كانش مبسوط

وسلمت عليها وقالتلها بكل ثقه وثبات ... ازيك يا مدام عليا ... انا رانيا .. اخت شريف

عليا ما كانتش متوقعه : ارتبكت وسكتت دقيقه على ما استجمعت افكارها وقالت لها اه اهلا اهلا

رانيا : الحقيقه انا بالصدفه رحاب صاحبتى كانت خطوبتها النهارده وهى هنا عندك اجي ابارك لها واعتذرلك عن انى ما جيتش حسب دعوتك للافتتاح .. اصل جنى كانت تعبانه

عليا : اه الف سلامه عليها ... ونورتينا ومبروك لصاحبتك...بس شريف ما قاليش انك زي القمر كده .... طب اتفضلي يا مدام رانيا تشربي ايه

رانيا : لا لا خالص دي رحاب خلاص ماشيه وانا لازم اروح معاها

عليا : ليه كده انا كنت عايزه اتكلم معاكي شويه

رانيا : محاولة انهاء ا لموقف بسرعه : ان شاء الله فرصه تانيه يا مدام عليا

وجريت رانيا منسحبه وهى سايبه عليا تفكر وتحتار هى كمان لسبب زيارة رانيا وميت سؤال تاني فى دماغها

رانيا بعد اليوم ده قررت انها تنسى عليا اصلا وتمسحها من حسابتها ... بس الى ما قدرتش تنساه ان هاني حب عمرها .. كان بيعرف واحده ست غيرها وهما متجوزين كمان

وقررت كمان تفضل على صمتها .. وتحاول تعمل الى هى عايزاه .. وتفضل ترسم وتحاول ترجع الشغل تاني .... وتهتم بنفسها .. مش عشان هاني ولا عشان اي حد ... وانما عشان نفسها بس

رسمت رانيا واشتركت فى المعرض ... وباعت لوحات مش كتير يعنى بس يعنى مش بطال كونها اول مره

حاولت تلاقي شغل يناسب ظروفها دلوقتي بس للاسف ما لقيتش ... بس ما ياستش ما زالت عايزه تعمل الى هى عايزاه

بدأت شويه تتصلح مع هاني .. ما نسيتش بس بتحاول تنسى ... بس لا مش زي زمان جواها لسه حاجه واجعاها وكاسره قلبها

اصل الست لما بتحب اوي بتدي بدون حساب وكمان بتتنازل بدون حدود .. ما بتتخيلش ان الى بتحبه ممكن يقابل كل ده بخيانه او جحود وكمان يعتبرها حاجه بسيطه وهى المفروض تسامحه بكل بساطه .

بس ما كانش بتخلا الايام برضه من مشاكل ... اوقات كانت بتفقد اعصابها وتزعق وتصرخ بشكل هستيرى وتقفل عليها وتعيط ... كتير اوي اوي ... وبعد كده ترجع تاني تهدى وترسم وتكتب كمان ايوه بطلع الى جواها فى قصص وخواطر عشان تحاول تريح نفسها

وشريف بعد كام شهر من قصة عليا والى فضلت تبعتله رسايل وتتحايل عليه يرجع لها قرر يسافر بره

وعشان هو اشتغل فى ميت حاجه وعنده خبره فى حاجات كتير

واحد صاحبه جابله عقد كويس فى الامارات وظبط نفسه وسافر ... وابوه وهو مسافر قاله يا ابنى لو استقر بك الحال هناك شوف عقد لاخوك الى هايموت على السفر ده اهو اشتغل فى الحكومه بس عامل زي الى بياكل اكل مش على هواه .. خليه يتنيل ياخد اجازه لما يتثبت ويغور يسافر

رانيا كانت زعلانه اووووي ان شريف سايبها ومسافر .. كانت حاسه ان هو الى لها فى الدنيا واقرب حد من عيلتها لها ... بس برضه اتمنتله انه ربنا يكرمه ويوفقه .. وسافر شريف وعانت رانيا من غيابه لشهورعلى ما اتعودت على الوضع ده

الحاجه كوثر : تعالى يا جنى انى زهقانه يا حبيتى مش لاقيه حد تلعبي معاه ... المفروض ماما تجيبلك نونو جديد يونسك بقى ويلعب معاكي

رانيا : لسه يا طنط شويه جنى لسه عندها سنتين بس

الحاجه كوثر : طيب ماهو يادوب كده واتاخرتي كمان ... على ما تخلفي تانى تبقى هى 3 سنين وانتى يعنى وراكي ايه ..

الكلمه الى بتضايق رانيا جداااااااااا وتحسسها انها مالهاش لازمه فى الدنيا اصلا

بلعت رانيا ريقها بقوووه ومعاه االكلام الى مش عارفه تقوله واستاذنت وخدت جنى وطلعت

بس بصراحه هى كانت فعلا فكرت فى حكاية انها تخلف تاني من قبل ما حماتها تقولها بس الطريقه بتاعة حماتها ضايقتها

هاني جاله شغل فى شركه تانيه اكبر وشغل احسن واتنقل فى شغل جديد وبقى مشغول اكتر ما عادش فاضي خالص لرانيا ولا البيت وبيرجع من الشغل هلكااااان

حتى اصحابه ما عادش بيشوفهم غير كل فين وفين وخصوصا ان كلهم بقوا متجوزين دلوقتي وكل واحد وراه بقى حياته وبيته ومشاكله

وهي دي سنة الحياه ...

لو نقلت زرعه من مكان لمكان ... لازم الزرعه دي تاخد وقتها ونوليها كمان عنايه خاص على ما تبتدي تضرب جذورها فى الارض الجديد وتثبت نفسها وتستعيد قواها تاني وترجع ورقها يصحصح وتزهر وتثمر كمان

ولو نقلناها من مكان لمكان واهملناها ممكن تموت او تمرض او ما تديناش ثمر كما يجب ان يكون

لازم الزوجين يصبروا على بعض لحد ما كل واحد فيهم يستقر فى حياته الجديده

رانيا فكرت فى كلام حماتها بعد كام يوم وحاولت تفكر بشكل عقلاني ومن غير انفعال من كلام حماتها الى ضايقها وشافت انها عندها حق ... وقررت تكلم هاني فى الموضوع ...............

الى اللقاء فى الحلقه القادمه

بقلم : ابو احميد