الاثنين، 29 نوفمبر 2010

أين انا ؟ الحلقه السابعه

أين انا ؟ الحلقه السابعه

بقلم : خواطر شابه

هاني مفتحش بقه بكلمة فضل باصص لهيام وبعدين لف وخرج تاني من غير ولا كلمة شكله كان عامل زي اللي خذ قلم على غفلة

الحاجة كوثر من جوه : هيام مش هاني ده اللي جه هو فين

هيام : خرج ياماما

الحاجة كوثر : ايه الولد الطايش ده ياربي هو جه في ايه وخرج في ايه

هيام : انا قلت له اني كنت عند رانيا وانها بلغتني انها حامل و....

قاطعتها الحاجة كوثر : حامل!!!! هي لحقت مصيبة ايه دي ياربي يا حبيبي يا ابني حتلاقيها من ايه ولا ايه

***********

هاني خرج من غير ما يعرف هو رايح فين فضل ماشي في الشارع وكل شوية يقول لنفسه يارب حمل تاني ووحم وولادة ايه الحظ ده بس ياربي أنا لازم افكر في حل الحمل ده مش لازم يستمر ده حتى جنى لسه صغيرة وانا كمان مش حمل عيال ولا حمل مسؤولية كفاية علي جنى ثم

وهو يمسك رأسه بين يديه :لازم رانيا تتخلص من الحمل ده مفيش حل غير كده بس ازاي??

ويرجع يستعيذ بالله من الشيطان الرجيم

ويقول :ايه ده يا ابني انت حتكفر"

بس يرجع يفتكر رانيا وبطنها المتكعبرة والمستشفى والولادة والمصاريف يرجع تاني يقول لا لازم الاقي حل لازم

***********

رن تلفون رانيا وردت « الو رحاب ازيك”

رحاب : رانيا اعملي حسابك حأعدي عليك النهارده بعد الظهر نخرج نشم هوا خلينا نرجع ايام زمان والله لها وحشة”

رانيا : طيب وجنى مين حيقعد بها انا يابنتي خلاص محكوم علي بقعدة البيت قال نرجع ايام زمان قول للزمان ارجع يازمان

رحاب : ليه يابنتي التشاؤم ده بنتك ماشاء الله عدت التمان شهور يعني ممكن تخرجيها معاك عادي انت ليه بتعقدي الامور

رانيا: طيب خلاص بس حنتقابل فين

رحاب : كافيه الامل اللي كنا بنتقابل فيه ايام الكلية انتي فاكراه?

رانيا : اكيد يارحاب فاكره وهي دي ايام تتنسي

رحاب : ايوه قبل ما سي هاني يمنعك تقعدي معانا بحجة انه بيغير عليكي

رانيا بتنهيدة : ايوه كان بيغير عليا

************

شريف صحي الصبح وقبل مايقوم من فراشه رن تلفونه « الو مين معايا » رد اللي على الطرف التاني من الخط « صباحوا يا عم شريف مالك نسيتني انا خالد »

شريف « اه خالد يا عم انا لسه صاحي لسه مش شايف قدامي »

خالد « عندي لك حتة شغلانة سقع قلت اكلمك يمكن يكون لك في الطيب نصيب »

شريف « طيب استناني على القهوة انا جاي حالا »

بعد شوية وصل شريف عند خالد في القهوة اللي متعودين يقعدوا عليها

شريف « خالد خير ياابني شغلانة ايه دي اللي انت جايبها »

خالد « فيه واحدة ست عندها محل اكسسوار ومستحضرات تجميل اشترت محل جنب محلها وحابة تتوسع وتفتحهم على بعض انا قلت احنا اولى بالسبوبة دي »

شريف « اكيد احنا اولى بس مقلتليش انت تعرفها منين »

خالد « انا معرفهاش بس حد معرفة هو اللي اداها نمرتي وهي اتصلت بيا وفهمتني على المطلوب هاه قلت ايه »

شريف « ماشي يا معلم كلمها وحدد لنا معاد »

خالد « حالا يا لورد استنا ثواني أطلبها »

خالد “ الو مدام عليا”

**************

رانيا كان واضح عليها انها مشغول بالها وكمان كانت علامات التعب باينة عليها ولان في بيتهم كالعادة محدش واخذ باله من حد مفيش حد انتبه للتغيرات اللي بانت عليها ولا لغممان النفس اللي كل شوية بيجيها ولا لقلة أكلها

نجاة مشغولة كالعادة بين شغلها والبيت

والحاج كارم يوم موجود وايام في البلد وحتى لما بيكون موجود كلامه كله بيكون عن مشاكل البلد وعن أهلها

اما باسم فده حكايته حكاية اوقات رانيا بتمسك نفسها من انها انها تشده من كتافه وتقول له انت حزين ليه انت عامل في نفسك كده ليه انت ربنا بيحبك انك متزوجتش ياريتني انا اللي مكانك,

ده حتى شريف اللي طول عمرها بتقول انه الاقرب ليها ما أخذش باله من حاجة يدوب كل ما يدخل الشقة يرمي السلام ويخش مهدود حيله ينام

******************

صحيت رانيا من النوم على صوت عياط جنى فتحت عينيها لقت الشمس طالعة واضح انها عدت عليها نومة ومن كثر تعبها محستش بالوقت فضلت على سريرها شوية وبعدين قامت على وشالت جنى وهي تقول استعنا على الشقا بالله

خرجت من اوضة النوم مفيش صوت في الشقة باين ان كلهم خرجوا مفيش غير شوية نور خارج من اوضة باسم واضح انه هو كمان صاحي بس كالعادة قافل عليه

فجاة جرس الباب رن راحت تفتح وهي بتقول ياترى مين اللي حيزورنا بدري كده وأول ما فتحت الباب فضلت ثواني ساكته بتبحلق في اللي كان وراء الباب وبعدين بصوت متفاجئ .........هاني!!!!!

الى اللقاء فى الحلقه القادمه

بقلم : أمير الحب

السبت، 27 نوفمبر 2010

أين أنا ؟ ...الحلقة السادسة

أين أنا ؟ ... الحلقة السادسة

بقلم :ندى الياسمين

الحقيقه اهل رانيا مش رامينها ولا حاجه بالعكس هما بيحبوها بس بطريقتهم .. امها طول عمرها طبعها جاف شويه هى بتحبها بس مش عايزاها تخرب بيتها .. ...

ابوها كان الود وده انه ياخد هاني عشر اقلام بدل الالم الى اده لبنته بس ما ينفعش .. الحكايه مش عافيه وكان لازم يهدي شريف.. مهما كان الشباب له رعونه مش مطلوبه فى الحالات دي .

رانيا لسه بتعيط ومموته نفسها من العياط ..

وبعدين همست فى ودن ابوها .. بابا طب ممكن تاخدوني اريح اعصابي بس يومين .. انا مش قادره اتخيل انكم هاتسبوني وتمشوا ... وبتوسل .. عشان خاطري يا بابا

الحقيقه الحاج كارم قلبه وجعه .. ورد بلين : يا حبيبتى والله عايز اخدك معايا بس خايف الموضوع يكبر .

رانيا : لا مش هايكبر ولا حاجه انا اتفقت مع هيام على كده وهى قالت انها هاتمهد لهم تحت .. ومش هايحصل حاجه وهارجع تاني ان شاء الله بس استريح شويه .

قدام توسلات رانيا وتاييد شريف ما قدرتش مامتها تتكلم ولا ابوها قدر يقول لا

ونزلت رانيا مع ابوها فى هدوء .. وبكل ادب الحاج كارم قال للحاج محمد .. بعد اذنك يا حاج انا هاخدهم عندي شويه على ما رانيا اعصابها تهدى

الحاج محمد : ليه بس كده يا رانيا خليكى فى بيتك يا بنتى ... طب اقولك تعالى عندي اقعدي هنا معايا

الحاجه كوثر : ايوه يا رانيا مالكيش حق برضه ايه يعنى ما ياما بيحصل بين الراجل ومراته

وقبل ما تكمل قاطعها الحاج كارم .. بعد اذنكم اصل شريف بيستعجلنا طلع بالعربيه واخدهم ومشي ... وهو ماشي الحاج كارم ميل على هاني .. وقاله يا ابنى مراتك وبنتك عندي والبيت بيتك تيجى وقت ما تحب .. ولما رانيا اعصابها تستريح انا هاجيبها بنفسي

ومشيت رانيا وطول الطريق ما بتتكلمش لكن الدموع شغاله كالعاده

وكل ما يحاول شريف ينفث عن غضبه يسكته الحاج كارم .. عشان ما يزودش على رانيا

هيام بحده: ايه يا هاني الى انت عملته ده .. انت ازاي تمد ايدك على مراتك .. انت اتجننت ؟؟

هاني : باقولك ايه يا هيام انتى ما تعرفيش الى حصل وانا كمان ما عنديش استعداد احكي اسمعي من ماما انا ماشي

هيام : استنى هنا كلمنى ايه ماشي دي .. انت مش هاتكبر بقى .. ايه ده وبتنزل تشتكي لماما كأنك جاي تشتكيلها من زميالك فى المدرسه ..

هاني : شايفه يا ماما هى الى بتغلط فيا اهي .. يعنى عيل .. ماشي يا ستى انا عيل بقى

هيام وهى بتخفف من حدتها شويه : يا هاني هو انت لو كنت عيل ما كانش بقى في مشكله ... تعالى بس اقعد ومالكش دعوه بماما ولا بحد .

وهى بتبص لمامتها : البيت بيتك الى هايتخرب ده ... بيتك انت مش بيت مامااا

هاني بعصبيه : يعنى انتى عايزاني اسيب الهانم تغلط فيا وتهزأنى واسكتلها ؟؟ عصبتنى يا هيام .. وانتى عارفه انى عصبي

هيام وهى بتحاول تهزر عشان تهدي الموقف : عصبي ايه يا واد انت هاتعملهم عليا انا .. وبصوت واطي وهى خايفه من مامتها .. الحبه دول تعملهم على ماما انما انا لا

فبيبتسم هاني والجو يهدى والمناقشة تكون احسن

هيام : بص يا هاني انا هاقولك كلمة حق.. انا سمعت من مراتك وسمعت من ماما ... انت غلطان برضه يعنى عيب اوي لما تستقوى على واحده ست ضعيفه وتضربها مش مرجله يا وله .

وما تقوليش اتعصبت .. ما انت بتتعصب على ماما .. اشمعن ما بتضربش امك ؟؟؟ ها ؟؟ ما ترد

هاني : الله هو فى حد يضرب امه ؟؟؟

هيام : ااااااااااه شوفت ما فيش حد يضرب امه انما فى حد يضرب مراته!!!! يبقى عادي ... لا يا هاني انت غلطان .. يعنى انت لو جوزي ضربني كنت هاتبقى برضه تقولي معلش اصله اتعصب

هاني : وهو انتى زيها ؟؟؟ دى غلطت فيا .. انتى بتغلطي فى جوزك

هيام : اولا هى ما غلطتش اوي يعنى للدرجه دي .. انت مكبر الموضوع ... ثانيا مين قالك انى مش زيها ما الواحد ياما بيغلط برضه عادي ... هو فى حد ملاك ولا حد صح على طول يا ابنى ..

هاني وبدأ يلين شويه : اه يعنى المطلوب مني اعمل ايه دلوقتي ...

هيام : يا باي عليك مش مطلوب منك تعمل حاجه انا اتفقت مع رانيا انها تروح عند اهلها يومين كده على ما تروق منك ويمكن خلقتك العكره توحشها ولا حاجه ويبقى الكلام اهدى واروق .. وان شاء الله هابقى اروح ازورها ولو حبيت تيجى معايا ابقى تعالى

هاني : مش رايح زي ما راحت مع ابوها تبقى تيجى مع ابوها بقى.. ولا عنها ما جت اصلا .

هيام بضحك : طب قوم .. قوم اطلع اصل خلاص هارتكب فيك جريمه

فات اربع ايام على وجود رانيا فى بيت اهلها ...

رانيا بدأت شويه تبطل عياط وانشغلت بالناس حواليها بس برضه كل ما بتخلى عليها الدنيا تقعد برضه تفكر فى الى حصل وفى حياتها وتسح من عنيها كعادتها

وقلبت فى كلام هيام كتير فى دماغها .. خصوصا ان هيام برضه طلعتها غلطانه .. بس مش فى كل حاجه زي هاني ومامته

لكن هى لامتها على اهمالها لنفسها وعلى بعدها عنه

وانه صحيح هى اول مره ام وطبيعى انها تكون متكعبله على عينها كده

بس لازم وانتى اما تنسيش نفسك

لازم تعرفي انك فى المقام الاول بنى ادمه مش هاقولك زوجه

انما بنى ادمه تستحق انك تعتنى بنفسها وتحس نفسها حلوه وانيقه ومرغوبه

لازم تحسى انك بنى ادم وانك ست وانك زوجه وانك ام طبعاااا

كان لازم بعد شهرين تلاته تبدأي تفوقي لنفسك

.. هيام قالت لها كمان : بصي يا بنتى مش عشان هو اخويا ولا حاجه لكن كل علاقه لها طرفين لو نجحت يبقى بسبب الطرفين ولو فشلت يبقى برضه بسبب الطرفين .. حتى ولو كان مسؤلية طرف منهم بس فى الفشل انه كان سلبي وما قدرش يواجه خطأ الطرف التاني .

وبصراحه هيام اقرت وقالت ان اخوها متعب ومتدلع واناني .. بس قالت لها برضه انه طيب اوي وقلبه ابيض وبيحبها .. بس هو محتاج شويه صبر وهايتغير على اديها ... وانتم برضه صغيرين لسه و العمر قدامكم طويل ومافيش بيت بيخلا ومافيش اثنين بيبقوا مطبعين على بعض كده من اول يوم .

وهيام كمان الى اقترحت عليها انها تروح عند اهلها واتفقت معاها انها هاتكون على اتصال معاها ويعرفوا هايعملوا ايه بعد كده ...

وبدأت كمان رانيا تنفذ واتصلت على رحاب صاحبتها والى قطعت صلتها بيها بدون اسباب ورحاب فرحت اوي وقالت لها ما دام انتى عند مامتك انا هاجي اشوفك انتى وحشاني ..

رحاب كانت اعز صديقات رانيا واقربهم لنفسها .. رحاب لسه ما اتجوزتش .. بصراحه رانيا كانت محتاجه تحكي لحد وتفضفض وتاخد راي حد من بره المشكله

رحاب اصلا اول لما شافتها اتخضت وقالت لها ايييييه ده ؟؟!! انتى مالك شبه الاشباح كده ليه

وبعد قاعده طويله رحاب قالت : لا لا انا لا يمكن اسيبك كده من بكره عندنا شغل انتى لازم ترجعي رانيا بتاعة زمان قبل ما تعرفي الموكوس الى خلاكي شبه الاشباح كده

هاني بقى مقضيها وعامل زي الطفل الصغير الى واخد اجازه من المدرسه .. لا حد بيقوله ودي ولا جيب ولا بامبرز ولا حد بيعيط ولا روحت فين ولا جيت منين .. بيجوع ينزل ياكل عند مامته .. برنامج يومه كلاتى بيروح الشغل ويرجع يتغدى وينام شويه ... ويصحى ينزل لاصحابه على القهوه ...ويرجع على النت لحد الفجر

وفضل خمس ايام يقول محلاها عيشة الحريه .. هو انا كنت اتهبلت فى عقلي ليه واتجوزت .. يارب تخليها هناك .. ولو ان جنى وحشتنى بس برضه انا كده اروق

هيام راحت زارت رانيا وعلى اتصال معاها على طول .. وهيام قالت لهاني انها راحت وقالتله تعالى معايا ما رضيش .. ولما رجعت الحاجه كوثر كانت مستنياها فى استجواب طويل عريض

عن ماقبلتهم ليه .. والهانم ناويه ترجع امته .. وبكل سخريه اعصابها هديت ولا لسه ؟؟

فات اسبوع

هاني جه يروح الشغل وبيفتح الدولاب كالعاده يطلع هدوم ما لقاش هدوم مكويه

كوى هو اصل مستعجل لسه هاينزل لماما ..

تاني يوم ما لقاش هدوم اصلا نضيفه ... عايز ينزل الهدوم لمامته بس مكسوف

مش متعود ..

نزل سألها : ماما هو ما تعرفيش المفروض اغسل القمصان بتاعي على برنامج كام ؟؟

قالتله : على الدي كويس .. طب ما تجيبهم يا ابنى وانا اعملهوملك

هاني : لا يا ماما مش مستاهله نزول وطلوع

هاني غسل هدومه ونشرها وكواها

وبوظ قميصين عشان حط بلوزه جنا الحمرا فى الغساله غلط

وقال ايه يعنى معجزه هى ماهى عادي اهو ما خادتش حاجه

ونظام يومه زي ما هو .. بس عليا اتصلت عليه .. اه صاحبته بتاعة زمان

عليا كانت بنت جميله اوي ... اتعرف عليها مره من على النت واتقابلوا مرتين والكلام ده كان قبل ما يخطب رانيا

بس بصراحه هى صحيح كانت بتستريحله وبتحب تتكلم معاه بس لا ما كانش احلامها كده

عليا كانت عايزه فلوس .. بالتالي قالتله نقضيها صداقه بس يا امور لما عرفت ظروفه.. وكمان بصراحه هاني كان شايفها لعبيه وكان مقلق منها شويه

ولقيت عليا ضالتها واتجوزت فعلا واحد اكبر منها ب 20 سنه بس ما اتجوزش قبل كده ( فى مصر )وعايش طول عمره فى فرنسا

اتجوزته وسافرت معاه وقعدت معاه سنتين ورجعت من هناك مطلقه ومعاها فلوس كتير وفتحت محل اكسسوار ومستحضرات تجميل كبير وبقت معاها فلوس اكتر واكتر

وبعد ما بقت كده فوجيء بيها هاني بتبعتله رساله على اميله وسايباله فيها رقم تليفونها ..!!!!

ورجعت العلاقات بينهم وكانت على النت بس

بس لما حصل المشكله الاخيره بصراحه هاني بقى كان حاسس انه كان فى سجن وطلع منه وقرر انه يروح يقابلها مش بس يقابلها

طبعا هو حاكيلها المشاكل الى حصلت وهى بقى اقترحت عليه انه يجى يقضي معاها يوم فى اسكندريه هى هناك بتغير جو

وفعلا راح

وكان يوم حلو اوي عليا بصراحه جميله اوي وواخده بالها من نفسها اوي اوي

ودلوعه اوي . وحنينه وناعمه بزياده مش زي .....

هما جريوا ولعبوا واتفسحوا واتغدوا واتعشوا واخدوا لنش فى البحر

بس...

كده وبس .. هاني شقي أه ... بس تربيته ما تخليهوش يقع فى غلط اكبر من كده

بس بصراحه كده عليا كانت ناويه على اكتر من كده

وعزمت عليه كتير انه يبيت معاها

بس هو ما رضيش

والحقيقه كمان هو قرف من عليا اوي لما حس منها كده

بس ده ما يمنعش انه استمتع باليوم جداااا

ورجع وهو مبسوط اوي

ورجع لقى يوم الجمعه فى بيت العيله خلص

وطبعا كان قايلهم انه فى مشوار شغل

هيام راحت تاني زارت رانيا

وابدت اعجابها بقصة شعرها الجديده وقالت لها ايوه كده دلعي نفسك يا جميل

واعطت لها فلوس وقالت لها دول هاني باعتهم ليكى ولجنى

ما كانتش رانيا راضيه تاخدهم بس هيام اصرت

وطبعا الحاج محمد الى قال لهاني يعمل كده

اينعم المبلغ صغير بس مش مشكله المهم انه فكر ينبه ابنه لحاجه زي كده

وقعدت هيام تتكلم مع رانيا حوالي ساعه فى حاجات كتير تخص مشكلتهم او لا

بصراحه هيام عاقله اوي ومخها كبير ورانيا بتتعلم منها حاجات كتير اوي

وفى الاخر هيام قالت : ايه مش هاترجعي بقى مش كفايه كده

رانيا باعياء : معلش يا هيام يومين كمان اصل انا تعبانه والله ما باقدرش اشيل جنى حتى

هيام : ليه مالك ؟؟!!

رانيا : مش عارفه والله ... وتسكت وبضيق شويه .. بصراحه انا شاكه انى حامل

هيام وهى فرحانه : بجددددد طب شاكه ليه ما تتاكدي .. ده كويس جدا... مبرووووك

رانيا : كويس ايه بس فى الظروف دي .. انا مضايقه اوي وحتى خايفه اعمل اختبار حمل ... وحتى جنى لسه صغيره ..

وما قدرتش رانيا وانفتحت فى العياط كالعاااااااااده

هيام طيبت خاطرها وقالت لها ما تزعليش يمكن ده خير يا بنتى عشان يلم شملكم تاني وما تعيطيش كده حرام عليكى وكلي كويس انتى وشك باين عليه الارهاق جدا

يلا انا هاتصل عليكى الصبح تكوني عملتي الاختبار عشان اطمن عليكى

واعتذرت هيام انها مش هاتقدر تطول عن كده عشان الولاد مع عمر جوزها ونزلت بعد ما رانيا بدأت تهدى شويه

هاني صحي الصبح بعد مشوار اسكندريه جسمه كله مكسر

مش شايف قدامه جه يلبس ما لقاش طبعا لبس مكوي

وقف قدام الدولاب شويه وبعدين نقى تي شيرت قديم كان بطل يلبسه بس ما بيحتاجش مكوى اوي

لبسه من غير مكوى وما لقاش شراب نضيف لبس الجزمه من غير شراب

ونزل راح الشغل وراح متاخر ومن غير فطار

واصحابه فى الشغل لاحظوا وقالوله مالك كده انت تعبان ولا فى ايه وكان حاسس انه شكله مبهدل واي كلام

ولما رجع اتغدى تحت وطلع مش قاااادر عايز يكمل نوم لسه مشوار امبارح برضه ماثر عليه

طلع ينام فى اوضته لقها منكوشه ومافيش فيها شبر ممكن ينام فيه هدوم وكوبايات وورق ومناديل مووووولد

راح قااافل الاوضه ونام فى اوضة جنا

ولما صحي نزل راح القهوه لاصحابه بعد ما كوى طبعا بس كان مزاجه وحش وقعد شويه من غير ما يتكلم ومشي

وروح فضل ماشي فى الشقه مضايق ومخنوق وبصراحه كده حس انه لواحده

وجنى وحشته اوي كان زمانها ماليه البيت ضحك

دخل على النت نفس الكلام ونفس الناس و .. وعليا .. كلمها شويه بس هو مقفول منها

قفل وقام نام .. قعد ساعتين فى السرير لحد ما عرف ينام

وفضل على الحاله دي 3 ايام .. وكانت الحاجه كوثر زمان بتدلعه

دلوقتي بصراحه ما عادتش بتقدر .. وكمان هى واخده تنبيهات مشدده من الحاج كارم ومن هيام .. انها تبطل دلع فيه عشان يبقى راجل بقى ويرجع مراته ويعيش كويس

.. والحاجه كوثر برضه مش وحشه اوي هى بس بيصعب عليها ابنها ... زي كل ام عادي

بتحبه بطريقتها هى

رجع هاني من الشغل فى يوم لقى هيام موجوده سلم عليها وقالها ايه النور ده امال فين العيال ؟؟

قالتله لا العيال مش معايا .. اصل انا كنت عند رانيا وجيت من هناك على هنا

كشر هاني شويه .. وقالها واخبارهم ايه ؟؟ جنى عامله ايه ؟؟

قالتله كويسين و .... رانيا حامل .............

الى اللقاء فى الحلقه القادمه

بقلم: خواطر شابه

الثلاثاء، 23 نوفمبر 2010

اين انا ؟؟...الحلقه الخامسه

الحلقه الخامسه

بقلم:أبو احميد

هانى بص لرانيا شوية بذهول مش مصدق اللى قالته أو مش مصدق اللى هو عمله

رانيا كررت طلبها تانى بس بحدة أكبر

هانى قالها إنت أكيد إتجننتى وسابها واقفة وخرج ورزع الباب وراه

وهو نازل لقى مامته على الباب بتحاسب الراجل بتاع السوبر ماركت اللى جايبلها الطلبات

إستغربت وقالتله مالك ياحبيبى تعالى جوه شوية

هانى دخل وهو متنرفز وحكى لمامته اللى حصل

هى الصراحة ماعجبهاش قوى إنه يمد إيده على مراته بس هى كعادتها

لازم تنصفه وتطلعه مش غلطان

إنت ياحبيبى كان رد فعلك زيادة شوية بسهى إزاااااى تقل أدبها عليك؟

هانى عجبه الكلام وركب الموجه وقعد يشتكى من رانيا وإهمالها ليه ولبيتها ولنفسها

الحاج محمد خرج من أوضته وقالها ياولية إتقى الله

ده بدل ماتقوليله عيب عليك تمد إيدك على مراتك؟

هى إتغاظت وقالتله إنه ما ينفعش مراته تقول عليه ماعندوش شخصية

علشان هو إبن بار وبيعاملنا كويس

الحاج محمد قاله يا إبنى إخزى الشيطان وإطلع طيب خاطر مراتك

هانى قاله ده على جثتى يعنى تهينى وكمان تطلب الطلاق

وراح سايبهم ونازل على القهوة

-----------------------------------------------------------

رانيا فضلت تعيط وجنى كمان علشان رانيا ماكانتش عارفة تأكلها ولا تغيرلها

ماكانتش قادرة تسيطر على أعصابها

حست إن كرامتها إتجرحت جرح عميق وإن فى شىء جواها إتكسر

مسكت الموبايل وكلمت مامتها وهى بتعيط

مامتها إتخضت وإفتكرت إن البنت تعبانة ولا حاجة

رانيا حكتلها اللى حصل

أمها لامتها وقالتلها إنها حذرتها من الأول من الناس دول

ويعنى إيه طلاق وفى بنت وياعالم يمكن يكون فى حاجة تانية فى الطريق

رانيا قالتلها يعنى لو كنت غلطت لازم أدفع تمن غلطتى العمر كله؟

أمها قالتلها إنها لازم تمشى حياتها وإنهم حيجوا بكرة علشان

يعرفوا هانى إن رانيا ليها أهل وإنه ماينفعش يمد إيده عليها

رانيا خلصت المكالمة وهى حاسة إن مالهاش ضهر

حست قد إيه هى ضعيفة وإن أمها اللى مفروض تبقى حضنها الدافى

مش حاسة بيها

مسكت الموبايل وكلمت شريف

شريف لما حكيتله قالها أنا جاى دلوقتى أطلع عين أهله

رانيا قالتله لأ تعالى بكره مع بابا وماما

علشان ألاقى حد يدافع عنى بجد

-----------------------------------------------------

هانى نزل قعد على القهوة شوية بس مالقاش أصحابه

مشى وراح دخل سايبر صاحبها صاحبه برضه

دخل على النت وفتح الفيس بوك

وعمل شاتنج مع بنت كان يعرفها زمان أيام الجامعة (من ورا رانيا)

هى الحقيقة حاجة إييييييه ... صاروخ

وكان كل يوم بيكلمها ساعة وساعتين وكام مرة كده قالتله

يتقابلوا زى زمان وهو كان بيحاول يهرب

هو هانى على قد البلاوى اللى فيه بس هو كان بيحاول يخلص لرانيا

خصوصا بعد ما إتجوز

بس النهارده دخل وكلمها

وقالها إنه عايز يشوفها

---------------------------------------------------

هانى رجع أخر الليل ودخل أوضة النوم

سحب مخدة وبطانية وخرج نام فى الصالة

رانيا كانت صاحية وحاسة بيه بس ما دورتش وشها ناحيته وفضلت نايمة

وهى حاضنة جنى

------------------------------------------------------

الصباح ده كان صباح الجمعة وهانى أجازة

أول ما صحى من النوم دخل الحمام وغسل وشه ونزل على مامته عدل

أول ما دخل البيت أبوه قاله إن حماه وحماته جايين بعد الصلاة

هانى رد بكل برود خير؟

أبوه قاله إنت مابتحسش؟ يعنى عايز تضرب بنتهم

والموضوع عادى كده؟

هانى رد بمنتهى الإستفزاز دى مراتى وأنا حر وماحدش يتدخل

أبوه إتغاظ جدا وقاله حتكبر عليا يالا ولا إيه

أمه جت على الخناقة ودخلت تهديهم وتدافع عن هانى

الحاج محمد قاله قسما عظما لو ما إتعدلتش

وراضيت البنت دى وأهلها ليكون حسابك معايا أنا

كفاية إنك حاططنا فى موقف زى الزفت مع نسايبك

أمه بقى إتحمقت قوى وقالتله إنهم لو قلوا أدبهم حتوريهم مقامهم

ده هانى كان يستحق ست ستها

وهما بيتكلموا جرس الباب رن

فتحوا لقوا هيام وجوزها وولادهم

طبعا إستفسروا عن سبب الزعيق إيه

لما عرفوا هيام زعلت قوى قوى وجريت على فوق علشان تشوف رانيا

عمر خد الحاج محمد علشان يصلوا وقال لهانى يتوضا ويحصلهم

صلوا الجمعة وطلعوا البيت كل ده وهيام لسه عند رانيا

مافيش ربع ساعة والجرس رن

لقوا الحاج كارم ومدام نجاة وشريف

الحاج محمد رحب بيهم أهلا وسهلا نورتم بيتكم

وشوية المجاملات دى

سلموا عليهم بفتور وخصوصا شريف

اللى وهو بيسلم على هانى ضغط على إيده بقوة كأنه نفسه يكسرهاله

الحاجة كوثر كانت قاعدة لاوية بوزها

ومدام نجاة كانت قاعدة وحاطة رجل على رجل بمنتهى الألاطة

فضلوا ساكتين شوية

الحاج محمد قالهم يا أهلا وسهلا تحبوا شاى ولا حاجة ساقعة؟

الحاج كارم رد إنهم مش جايين يضايفوا وإنهم جايين يشوفوا إيه اللى حصل لبنتهم

الحاجة كوثر دخلت فى الكلام وقالت إن البيوت كلها فيها مشاكل

وإن دى حاجات بين الراجل ومراته وإحنا مالناش دخل فيها

شريف راح محموق وقالهم طالما بين الراجل ومراته عرفتوها إنتم إزاى

الحاج كارم سكته وقاله إستنى لما الكبار يتكلموا

المهم شد وجذب من هنا وهنا

وعلى طول الخط الحاجة كوثر بتدافع عن هانى وبتلوى الحقائق

ومدام نجاة بترد عليها بمنتهى الألاطة

وخلصوا القاعدة على إن دى اول وأخر مرة

والحاج محمد قالهم إن رانيا دى بنته ولو حصلت حاجة تانى

هو اللى حيجيبلهم حقها من إبنه

وكلمتين من هنا على كلمتين ن هنا ولموا الموضوع

وطلعوا لرانيا

باباها ومامتها وأخوها

وهانى فضل تحت

لقوا عندها هيام أخت هانى سلمت عليهم

وإستأذنت منهم ونزلت على طول

باباها قالها إنهم خلاص حلوا المشكلة مع هانى وأهله

وإنه مش حيعمل كده تانى

ومامتها قالتلها إنها لازم تستحمل نتيجة إختيارها

شريف ماكانش عاجبه الكلام وقالها معلش يا بنتى إستحملى المرة دى

ولو حصل تانى كلمينى أنا على طول وأنا حجيبلك حقك

أبوها شخط فيه وقاله بلاش شغل البلطجة والصنايعية اللى بقيت منهم دول

رانيا عيطت وحست إن فعلا هى مالهاش ضهر

وقررت إنها تسمع لنصايح هيام اللى أحست إنها أكتر واحدة نصحتها بإخلاص

-----------------------------------------------------------------------

والى اللقاء فى الحلقه القادمه

بقلم : ندى الياسمين