الاثنين، 8 نوفمبر 2010

اين انا .. الحلقه الاولى

اين انا ..؟

الحلقه الاولى

بقلم ندى الياسمين

رانيا

بنت جميله وهاديه ورقيقه طول عمرها.. . كانت امها بتباهى بيها وتقول مافيش فى ادبها واخلاقها دى ما تعرفش تروح اخر الشارع وحدها .. وبتتكسف من خيالها .

راحت كلية اداب قسم انجليزى ... اداب زي ما قال مكتب التنسيق .... وانجليزى عشان امها قالت لها علم نفس ايه الى عايزاه .. وتطلعي تشتغلي ايه ان شاء الله؟؟

وحتى فى ثانويه عامه راحت علمي عشان ابوها قالها ادبي ايه الى عايزه تدخليه ده بتاع الناس الى ما بتفهمش الادبي ده ... انما انتى شاطره وممكن تدخلي كليه من كليات القمه الى بصحيح .. انتى تدخلي علمي وتروحي صيدله زي ماما ولا هندسه زيي ولا يمكن تتشطري كده وتدخلي طب

وراحت علمي ... بس ما حصلتش حاجه خالص من دول .. بس مش مهم اهى راحت

فى الكليه قعدت السنتين الاولانين تحضر فى الكليه بكل جد واجتهاد واتعرفت على اصحاب كتير وشافت عالم جديد ... وبدأت تسمع كلام جديد وتوصلها افكار جديده ...

حضرت مره ندوه فى الكليه عن بناء الشخصيه .. والاستقلاليه .. واتكلموا كمان عن وضع المرأه فى المجتمع و و و ........... يااااااااه كلام حلو اوي انا كنت فين من زمان .

و فى سنه تانيه ظهر فى حياتها هاني ... الى جه محول ولما قابلها وكلمها كانت رانيا بقت حاجه تانيه ... اعجب بيها اوي وبفكرها وجمالها وهدؤها ...وقدر يخترق حصونها الى عمر ما حد اخترقها ابدا .. رغم محاولات كتير ... واختراق حصونها ده ما كانش سهل ابدا ابدا ..

وشويه شويه هاني بقى كل حياتها ما بقيتش تعرف تتنفس الهوا من غير ما يكون هو فى حياتها .... تليفونات ورنات ورسايل وحب ...وكل حاجه بتاخد رايه فيها وهو كمان بيحكى لها كل حاجه ...

اقنعها تلبس الحجاب .. واقنعها تبطل تحط ميك اب... واقنعها انه مالوش لازمه تقعد مع الشله القديمه الى فيها ولاد اصله بيغير عليها...

كا ن كل ده بيسعدها اصله بيحبها وده علامة الحب .. وبعدين هى مقتنعه بالي هى بتعمله ... هى مش صغيره لا اطلاقا ...

اوقات بيختلفوا بس بيرجعوا يتصافوا تاني وترجع الحياه وردي

وخلصت الكليه ورانيا رفضت دايما كل عريس يتقدم لها ... وابوها جاب لها شغل كويس فى شركة سياحه بتاعة واحد صاحبه ... وفضلت مستنيه برضه لحد لما اشتغل هاني عشان يجى يخطبها ... وجاب اهله وجه يخطبها

وكانت الطامه الكبرى

ابوها رفض وامها اشتكتها لطوب الارض ...

بقى هو ده الى عاجبك بعد كل الى رفضتيهم .... ده ما حلتوش الهوا .. وبيشتغل مندوب فى شركة مستلزمات طبيه بمرتب ما ياكلكوش عيش حاف ...ولا اهله .!!!! ابوه موظف على اد حاله فى الزراعه .. وامه ست بيت وشكلها مش متعلم ولا بالكتير معاها اعداديه ...

رانيا بقى ما عادتش رانيا بتاعة زمان ... تفتكروا ؟؟!!.... المهم انها اصرت على موقفها وبعد مشاكل وعياط وجذب وشد وافقوا اهلها على مضد

على خطوبه باضيق الامكانيات.. واتفاق على جواز بعد سنتين فى شقه فى بيت ابوه القديم فى منطقه شعبيه .............

وبعد سنتين خطوبه ... رانيا شافت كتير فى هاني ما كانتش شايفاه بس كانت بتحاول تصبر نفسها او بالاحرى تكذب نفسها .... وتقول اصل هاني مضغوط فى الشغل وعليه عبء كبير وتحاول تخفف عنه دايما

وتحلم باليوم الى تبقى معاه فى بيت واحد وتخلص ضغوط الجواز والشقه عشان اعصابه تهدى ويرجع زي زمان

واتجوزت اخيرا .... وبعد سنه من الجواز كانت حامل وقتها

رانيا : هاني انت نازل ولا ايه ؟؟

هاني : ايووووه فى حاجه ؟

رانيا : رايح فين ؟؟ رايح لاصحابك طبعا؟

هاني: ااااه فى مانع ...

رانيا : انت مش كنت واعدنى النهارده تنزل معايا عشان نشتري حاجة البيبى .. الفلوس هاتتصرف

هاني : خليها الاسبوع الجاي .. اصل رايح مشوار مع اصحابي

رانيا : دى تالت مره تعملها معايا خلي بالك

هاني بكل ضيق : يووووووووه اوف بقى هانبدا موال كل مره .. مش عارف انا اعملك ايه يعنى انتى خلاص قايمه تولدي بكره ما لسه شهرين !!

رانيا : طب خلاص خلاص .. طب خدنى ودينى عند ماما انا هاقعد لوحدي اعمل ايه

هاني : لا .. اولا هاتعطلينى وتلبسي فى ساعه .. ومش طريقى ... وانا مش هاتاخر

وقبل ما تكمل رانيا كلامها بيكون مشي وهو بيرزع الباب

رانيا انفجرت بالعياط ... الحكايه اصلها مش هدوم البيبى ولا الخروج مع اصحابه ولا اي حاجه

الحكايه انها حاسه ان هاني اتغير .. ولا يمكن هو كان كده اصلااا بس هى ما كانتش شايفاه ؟؟

شغال قوانين وفروض عليها من يوم ما اتجوزوا ... حتى انها اكتر قرايبها بقى ممنوع تزورهم ... ده ما بيستخفش دمه وده بيغير منه ودي رخمه وبتتريق عليه ...

حتى اصحابها ... كل واحده بحجه شكل خلاها تبعد عنها

لما بقت مافيش اي حد فى حياتها غير هاني وبس

والشغل .. هو لولا ان هاني كان متفق معاها انها تشتغل بعد الجواز كان هايقعدها من الشغل برضه.. لكن هى استمرت فى الشغل رغم تعب الحمل .. خصوصا ان هاني مرتبه كله تقريبا كان طالع اقساط من ايام الفرح

وعموما كده كده لما تولد هاتضطر تقعد من الشغل ويا عالم هاترجع تاني ولا لا ...

هاني وحيد مامته وباباه له اخت واحده بنت واكبرمنه

متدلع اوي .. وده قالتهولها امه من اول يوم بس رانيا ما كانش عندها مانع ساعتها انها تبقى تدلع هاني

اناني اوي ... اتعود انه دايما اولى وابدى باي اهتمام واي حاجه هو دايما فيها الاهم

عنده اعتقاد ان مش مهم هو يرضى الناس اطلاقا هما الناس اساسا يتمنوله الرضا والمفروض يستحملوه كده زي ما هو ... وهو ما يستحملش حد خالص

هاني مش شرير مش وحش .. بس كمان ما ينفعش ... لازم رانيا تاخد جزء من الى هى بتديه ما بقتش قادره تستمر كده... حاسه ان احلامها بتتبخر قدام عنيها

رانيا فى اليوم ده ما بطلتش عياط وتفكير لحد ما هاني رجع... واحده بعد نص الليل ....

والى اللقاء فى الحلقه القادمه

بقلم حاجات جوايا

هناك 42 تعليقًا:

أبو حميد يقول...

على بركة الله
شكلها حتبقى حلوة يا ريسة

sony2000 يقول...

حلوااااااااااا
ومستنين الباقي
شكلي كدا كأني شفت القصه دي فمييين من اللي حوليااااا

ستيتة حسب الله الحمش يقول...

يا مساء الواقعية
حلوة يا ندى
تسلم ايدك
يالا يا حاجات
عاش يا رجالة

challenger يقول...

صراحة انا مش كنت ناوي اعلق

بس لفت انتباهي حاجه وموضوع هو اللي يشوفه يفتكره بسيط
بس هو من الناحية الواقعية كبيييير قوووي

يا ترى هل رأي الاهل له علاقة وقيمة في الزواج؟
بمعنى انتي هنا قولتي في القصة ان ابوها وامها ماكنوش موافقين والاسباب اللي كانت واضحة الفروق الطبقية والمعيشية
ودي حاجة بتخلي القارئ او حتى على ارض الواقع يتحدى الامر اصل اللي معاه ماكنش طول عمره معاه اساسا وحتى لو طول عمره معااه العبرة مش في معاه العبرة ازاي وليه وهل عينه مليانة ولا من اصحاب الكروش المفتوحة عموما مش ده موضوعنا
موضوعنا انها بعد مااتحدت اهلها واتجوزتها اكتشفت انها يمكن كانت غلطانة علشان ما سمعتش كلام اهلها..
وفي بعض الاحيان بتطلع وجهة نظر الاهل احيانا مخطئة ويعيشوا حيااة سعيدة

يا ترى رأي الاهل ايه وضعه في قائمة الاولويات حابب اعرف

انا عن نفسي عندي قناعة ان ابويا او امي ماعندهمش اغلى مني فدايما هيخافوا عليا فاكيد بيحاولوا يختاروا معايا الاصلح ليا مش معنى ده انهم بيلغوا شخصيتي بالعكس بس فيه حكمة بتقول لا خاب من استشار واللي بيستشير اكييييد هيستشير حد عنده خبرة وحكمة ويكون بيعزني

انا بجد النقطة دي لفتت انتباهي وحابب اشوف رودو الناس وخصوصا ان بسم الله ماشاء الله اغلب المدونين هنا كبار في السن واكيد عندهم اولادهم او حتى مروا بالتجربة المشابهة حابب اعرف ردودهم ايه في نقطة رأي الاهالي

وفيه نقطة مرتبطة اكتر بالقصة دي علشان نكون محددين برضو الا وهي نقطة اني اعجبة بانسانه او انسانة تعجب بشخص ويكونوا مرتبطين عاطفيا بدون اي ارتباطات رسمية او حتى يتقدم لها بس هم مرتاحين لبعض

ويكون مثلا رد الاهالي بالرفض

يا ترى في وجة نظركم يسمعوا كلام الاهالي ولا يعاندوهم ؟؟!!!

challenger يقول...
أزال المؤلف هذا التعليق.
challenger يقول...
أزال المؤلف هذا التعليق.
Tears يقول...

جميل اسلوبك

بحب الكتابة بالعامية


تحياتي

Noha Saleh يقول...

جميلة انا هتابع معاكم

مصري جدا يقول...

أين أنتي!!!!!!!!!!!

طب وعهد الله ما أعرف

حتى فتشني فتش

ايه ياخويا دا أحنا كمان هندور عليكي قبل ما نقرا؟

ali younes يقول...

سيادة الرئيس ندى الياسمين
والله أنا خايف من قصصك دى لانها بتكون طبخة كدة مركبة وصعبة
هى تبدوا في البداية انها سهلة بس بعد كدة تكون تركيبة صعبة
المهم أنا لما قرأة القصة وشفت سرعة الاحداث فكرتك هتنهيها
لكن الحمد لله انت خليتيها مفتوحة بطرقة صعبة
ايوة لان اصعب شيئ المشاكل الاسرية ولما تكون المشكلة دخل افراد الاسرة بتكون اصعب شيئ
بعدين انت يا سيادة الرئيس عملت قائمة الذين يكتبون القصة ومعملتش حساب يا سيادة الرئيس
مكنش العشم
انا زعلان قوى
وابعث تحياتي لكل الاصدقاء ولك شخصيا

حنعيش يعنى حنعيش يقول...
أزال المؤلف هذا التعليق.
حنعيش يعنى حنعيش يقول...

الست الريسة
طبعا تسلم ايدك مافيش كلام ... ...

المتحدى ...
ماشى ماشى ... كبار سن ؟ ماشى ماشى .. طاب خلى بالك بقى ... من امن الدوله بتاع الليالى ....

خواطر شابة يقول...

بداية عنوان القصة جميل و موحي بأن من قالته تعيش حالة من التخبط في ياتها
تعجبني جدا المواضيع الاجتماعية فيها الكثير ليقال وتعليق challenger دليل على اهمية طرح المواضيع الاجتماعية وافاق النقاش التي تفتحها
القصة مفتوحة ويمكن تطويرها على اكثر من صعيد
رانيا انا صراحة شلتني حاساها استسلامية ومن النوع اللي القط بياكل عشاه واللي بيلجأ للدموع دائما كحل وكسبيل للمواجهة
هاني ده حيكون حبيب عضوات جمعية المرأة المتوحشة حيوروا فيه العبر ههه
تمنياتي بالتوفيق وان تنجح هذه القصة كسابقاتها
دمتم بكل الود

خواطر شابة يقول...

challenger
انا عن نفسي اعتبر رأي الاهل مهم جدا في الزواج وموافقتهم مهمة جدا لذا اعتقد في حالة رفضهم لابد من فهم اسباب هذا الرفض وتحليلها خصوصا لو لم تكن اسباب عاطفية بل اسباب موضوعية هنا يجب ان نقف وقفة مع النفس ونحلل أسبابهم ونحاول ان نحللها بموضوعية بعيدا عن مرأة الحب العمياء التي تخفي العيوب او على أقل تقدير تبسطها
دمت بكل ود ومرحبا بك في اسرة الليالي

خواطر شابة يقول...

علي يونس
جل من لا يسهو أخي
دمت بكل الود

البنفسج الحزين يقول...

والله بدايه موفقه ومبشرة ..
القصه باين عليها هتبقي مليانه أحداث مثيرة انا بحب القصص الاجتماعيه جدا لأنها بتمس كل واحد فينا من زوايا مختلفه...
ع البركه من فضلك يا ريسه احجزيلي حلقه في اسبوع العيد اللي كله أجازات ده عشان ابقي فاضيه...
سلام

ندى الياسمين يقول...

ابو احميد
حلوه بوجودكم يا باشا

ندى الياسمين يقول...

سوني

انا شوفتها عشرين مره عادي هههههههه

ندى الياسمين يقول...

ستيته حياتي

ما انتى عارفه ما عنديش الا الواقعيه للاسف

ندى الياسمين يقول...

تشالنجر

محمد انت برضه جاي تحلل فى القصه هنا
ههههههههههههههههه

نورت يا محمد الليالي وان شاء الله تكتب معانا كمان

الحقيقه انا ليا راي خاص فى الموضوع ده
ان احنا المفروض اننا نعطي فرصه للاولاد يختاروا حتى لو اختاروا صح
ما دام وصل لسن الشباب لازم يختار هو ننصحه اه انما نجبره لا

حتى النصيحه تكون بالراحه ما تكونش بالتاثير عليهم والالحاح والضغط النفسي
لازم يتعلموا يختاروا ومره صح ومره غلط ويتحملوا نتائج اختيارتهم

نورت يا محمد

ندى الياسمين يقول...
أزال المؤلف هذا التعليق.
ندى الياسمين يقول...

تيرز

مرسي يا حبيبتى ربنا يخليكى انتى نورتينا

ندى الياسمين يقول...

نهاصلاح
انتى الى جميله ونورتينا

ندى الياسمين يقول...

مصري جدا

ههههههههههههه وايه يعنى ماتدوروا

ندى الياسمين يقول...

م. علي يونس

والله كنت هاكتبك والله

بس بصراحه اتكسفت يعنى اصل كل الى انا كتبتهم انا على صله معاهم بالميل وكده
فخفت حضرتك يعنى تكون مش فاضي

لكن كده بقى هاحط اسم حضرتك على طوووول

ومتشكره يا فندم ونورتنا

ندى الياسمين يقول...

د اسلام

اه صحيح شوفت يا اخويا بيقولك كبار السن ده هايتقطع ده محمد سبهولي بقى

قال كبار السن قاااااااال ايام مش معديه تصدق
ههههههههههههه

تسلم يا فندم ونورت

ندى الياسمين يقول...

خواطر

انا كمان شايفاها استسلاميه ومالهاش موقف محدد

مرسي يا جميل

ندى الياسمين يقول...

البنفسج الحزين
تسلمى يا جميل

هو اسبوع العيد ده امته ؟؟ بس بتيهئلي انه خلاص كده اتحجز
هاحطلك حلقه بعد م علي يونس

نورتي يا جميل

شيرين سامي يقول...

ياااااه واقعيه جداً و ملاقيتيش غير اسم هاني أهو هاني لسه نازل الشغل من شويه هههههه
تسلم ايديك القصه هايله أنا قلت أقراها بليل على رواقه
بصي هو للاسف كل الأزواج اللي أعرفهم بيتغيروا بشكل كبير بعد الزواج لكن مش معنى ان الرومانسيه بتقل و السلوك بيتغير ان الحب بيختفي هو بس بياخد شكل تاني زي انه يكون عايز يوفرلها كل حاجه عايز يشوفها مرتاحه بيخاف عليها
لكن واضح ان صاحبنا ده مُتسلط شويه و هي طالما نفذت رغباته بحازافيرها من الأول يبقى لا تراجع و كمان مدلع يبقى عليه العوض و منه العوض و مفيش غير انها تعتبره ابنها الكبير و في ظل انه كمان مش فاضيلها و كمان هيجيلها النونو اللي هينسيها اسمها يبقى هتفضل طول عمرها تقول أين أنا
بحيكي على الاسلوب السهل الممتع و طبعاً متابعاكم

Mona Abo - Elso3od يقول...

ندي الياسمين مبروك رئاسة المجلس
قصة اجمل ما فيها الواقعية في لاشخاص منا وحولنا اتمني ان اري بها بعض الايجابية من رانيا
تقبلي تحياتي لاسلوبك الرائع البسيط

حاجات جوايا يقول...

حلوة الفكرة يا ندى
واقعية جداااااااااااااااااااااا
شكلنا كده هندخل بيوت كتير
يا مسهل

كلمات من نور يقول...

لازلنا منتظرين

الكاتب محب روفائيل يقول...

القصة بدايتها جميلة جدا

وفكرة الحوار بعد القصة حلوة

بس ليا تعليق صغير كده

المفروض علشان نخلى الشباب يختاروا صح بالذات فى موضوع العمر كله واقصد به الزواج ، لازم الاباء يعلموا اولادهم ازاى يختاروا صح من وهما صغيريين
يعنى الشباب وهما اطفال لما يتحملوا المسئولية هيعرفوا يختاروا صح ( اتوماتيك ) بعد كده او على الاقل هيكون قد النتايج بتاعة اختياره الخاص
مش معنى كده أن الاباء يسيبوا عيالهم على حل شعرهم ، لا بالعكس لازم يقولولهم رأيهم ويعرفوهم الصح من الغلط حسب وجهة نظرهم على الاقل
وبكده الشباب هيعرف يختار صح او على الاقل هيقدر يتحمل نتيجة اختياره لو كان غلط

فيه حاجة أخيرة للقراء كلهم
يشرفنى انكم تطلعوا على مدونتى وتقولوا رأيكم فيها ويا سلام بقى لو تابعتوها وشاركتوا مواضيعها على المواقع الاخرى
http://elkatebrofail.blogspot.com/

أخر حاجة بجد بقى
كل سنة وحضراتكم كلكم طيبيين بمناسبة عيد الاضحى المبارك ويعيد عليكم وعلينا الايام بخير
امين يا رب العالمين

أبو حميد يقول...

فين باقى الحلقات يا بشر؟

خواطر شابة يقول...

ابو حميد
انت نسيت التعديل اللي اتوافق عليه ان بين كل حلقة وحلقة يكون فيه ثلاثة ايام لتأخذ كل حلقة دورها في القراءة وايضا من سيكتب بعدها لا يكون مضغوط
الحلقة الجديدة المفروض تنزل النهارده
دمت بود

ليالي مصرية يقول...

شيرين سامي

معاكي فى كلامك ان معنى اختفاء بعضا من الرومانسيه ان الحب يكون راح لكن برضه الى الازواج مش عارفين يفهموه انهم كده بيخلوا حياتهم جامده وصعبه عليهم اكتر بيعذبوا نفسهم بمعنى اصح

شكرا ليكى

ليالي مصرية يقول...

منى ابو السعود

متشكره ونورينا

ليالي مصرية يقول...

سالي مش احلى منك ياجميل

ليالي مصرية يقول...

كلمات من نور معاد الحقه النهارده ان شاء الله هانشرهادلوقتي
منوره

ليالي مصرية يقول...

محب روفائيل

تمام معاك جدا اننا المفروض نعلمهم صح ونسيبهم يختاروا

بس المشكله انك مهما حصل مش هايعجبك اختيارات ابنك ميه فى الميه لازم هايكون فى اختلاف فى الرأي

وان شاء الله نزورك ونورتنا

ليالي مصرية يقول...

ابو احميد

اتفضلوا الناخبين والمصوتين

انت يا عم مش صوت على اننا نخلي الفتره بين الحلقه والتانيه 3 ايام

شوفتي يا خواطر الشعب بتاعك ده مغلبنا هههههههههه

reem يقول...

الحلقة حلوة جدا جدا يا ندى

على فكرة انا علقت هنا مرة ومش لقيت تعلقي
اعيط يعنى انا دلوقتي ولا ايه ؟؟

هههههههههههههه

حلوة الحلقة بجد انا علقت هنا مع ان الحلقة التانية نزلت بس لانى لازم اقولك تسلم ايدك يا قمر