الخميس، 11 نوفمبر 2010

أين أنا..؟؟ الحلقة الثانيه

أين انا ؟ الحلقة الثانيه

بقلم : حاجات جوايا

اول سنين الجواز هى حجر أساس الحياة الزوجية .. وعلى أد أهميتها بتكون صعوبتها .. وبيبان من خلالها شكل العلاقة الزوجية بين الزوجين بعد كده

لما رجع هانى من بره بعد نص الليل .. فضلت رانيا انها متفتحش معاه مواضيع عشان متعملش مشاكل .. هى صحيح مشحونة وكانت قاعدة تستناه وهى هتطق من الغيظ بس هى عارفة آخرتها مهى مش أول مرة .. وكل ما تيجى تكلمه فى حاجة مش على مزاجه يقولها انتى غاوية نكد وبتحبى تنكدى عليا .. فعلى ايه بقى .. خليها ساكتة احسن لما الوقت يكون مناسب

من غير ولا كلمة قامت دخلت المطبخ تحضر العشا .. هو صحيح بيتاخر بره البيت كتير بس عمره ما يتعشى من غيرها ولا يحب أكل غير اكلها هى عودته على كده وهو كمان حابب كده .. صحيح اصحابه بياخدوه منها كتير بس برضه الأكل لازم يكون فى البيت

فى الوقت ده كان هانى فتح التليفزيون على برنامج كروى وفتح الكمبيوتر واتصل بواحد صاحبه .. صاحبه اللى كان لسه معاه من شوية .. وطبعا هاتك يا كلام ويا ضحك وكانه راديو واتفتح ..خلص هانى مع صاحبه وفتح الماسنجر بتاعه واداها شات ..

رانيا الحمل تاعبها هى دلوقتى فى الشهر السابع بس نفسيتها تعبانة اكتر من تعب الحمل .. كان نفسها اوى ان هانى يبقى حاسس بيها ويساندها .. هى مش عايزاه يشيل ولا يحط .. مش عايزاه يقوم بدلها بمهام البيت .. هى بس عايزاه يحس بيها .. يخاف عليها .. يحسسها ان حملها ده مش عبء عليها .. ولا مرض ملازمها .. من يوم ما حملت وهى محبوسة بين اربع جدران ..لا عارفة تخرج ولا تتفسح ولا تنطلق .. كل ما تقوله عايزة تروح فى مكان يقولها لما تبقى تولدى بالسلامة عشان الطريق والمطبات .. عشان الجو برد واخاف تاخدى نزلة وانتى حامل .. عشان الجو حر واخاف يجيلك هبوط .. كل حاجة بقت ممنوعة .. كل حاجة بقت مستنية فرج الولادة .. هو بيخاف عليها صحيح بس مش كده .. دى حاجة تخنق !

شافت رانيا برامج كتير فى التليفزيون عن صحة المراة الحامل .. كل البرامج اجمعت على ان حالة الام النفسية بتاثر بالسلب او بالايجاب على الجنين .. كل البرامج قعدت تناشد الزوج بانه يهتم بمراته فى فترة حملها عشان اكتئاب الحمل .. هى فعلا عندها اكتئاب .. مش بتبطل عياط كل يوم .. نفسيتها فى الارض ومش مستحملة اى حاجة .. اوقات كتير كانت بتكره حملها لانه حرمها من كل حاجة .. لانه بعد جوزها عنها .. لان حركتها بقت مقيدة .. هى حاسة انها عيانة مش حامل .. حاسة ان الحمل ده مرض مش حاجة كويسة !

رانيا خلصت تحضير العشا .. والعشا فى عرف هانى يعنى طبق سندويتشات مع زبادى وشاى وكوباية مايه .. مهو هانى مش بيحب ياكل عالسفرة ويغمس من كذا صنف .. الموضوع ده بيرهقه .. كفاية عليه اوووى وجبة الغدا تبقى عالسفرة.. ودى طبعا مجتش بالساهل كده .. هو أصلا مش بيحب يقوم من مكانه .. يحب الحاجة تجيله لحد عنده .. لو نايم ياكل عالسرير .. ولو قاعد عالكمبيوتر ياكل قدامه.. ولو قاعد عالانتريه ياكل برضه هناك .. المهم انه ميتعبش نفسه ويقوم هو اتعود على كده فى بيت مامته وطبعا لازم مراته تعمل زى مامته والا يبقى اتبهدل واتمرمط وفينك يا حاجة وفين ايامك !!!!

حطت الصينية قدامه .. لقيته بيقول : مش عايز .. مليش نفس

استفزها رده جدا : مش عايز ايه ؟؟؟.. انت كلت بره ؟

هانى : لا

رانيا : أمال مش عايز ليه ؟

هانى : مليش نفس .. شربت كابيتشينو عالكافى سد نفسى

رانيا : طيب لما انت مش عايز مقولتش ليه ؟ مش شوفتنى قمت احضر العشا ؟

هانى : مخدتش بالى والله .. معلش كلى انتى

رانيا بغيظ : مليش نفس

رانيا طبعا كانت هتطق من الغيظ .. اصلها مش اول مرة يعمل فيها كده .. بتحس كتير ان دماغه مش معاه ومش مركز .. وبيغيظها جدا انه مش بياخد باله ان فيه حاجة كان المفروض يقولها ويطنش ....و مهما تلفت نظره مفيش فايدة ولا فيه امل ............ خالص

راحت قعدت عالانتريه ومسكت الريموت عشان تغير القناة الكروية اللى ملهاش لازمة دى .. سمعته بيقول : سيبيه بسمعه

غاظها جدا كلامه .. مهو قاعد اصلا عالكمبيوتر بيشيت .. بيسمع ازاى بقى .. هو دايما كده بيحب ياخد كل حاجة .. انانى بقى تعمل ايه فى طبعه ده .. طنشت رانيا وقلبت وجابت القناة اللى هى عايزاها

بعد شوية .. رفع عينه من الشاشة وقالها : قلبتى ليه .. مش قولتلك بسمعه ؟

رانيا حاولت تتمالك نفسها عشان متنفجرش فيه .. مهى خلاص جابت آخرها معاه وردت بهدوووووووووء : بتسمعه ازاى يعنى ؟ انت لسه واخد بالك اصلا انى قلبت .. مفيش حد يقدر يكتب ويسمع فى وقت واحد

هانى بهدوء برضه : انا بقدر

رانيا باستنكار : والله ؟ .. ولما انت بتقدر مش بتسمعنى ليه لما بكلمك .. بتسكتنى ليه كل ما احاول اقولك حاجة وتقولى ثوانى .. مش حاسس بوجودى جنبك ليه ؟.. انت مش بتكلمنى خالص غير لما تكون عايز حاجة .. فين حبك ليا .. فين اهتمامك بيا وبحملى .. فين هانى بتاع زمان ؟

هانى بضيق : يوووووووه .. الاسطوانة هتشتغل .. أنا داخل أنام أحسن .. تصبحى على خير

هانى قفل الكمبيوتر – من غير ما يسألها ان كانت عايزاه مفتوح ولا لأ – ودخل ينام من غير ما يغير هدومه كالعادة وسابها مع الدموع تونسها فى ليلها الحزين

................

أهل هانى ناس طيبين – ده اللى بان لها لغاية دلوقت رغم رأى مامتها فيهم – مفيش مشاكل على الاقل حصلت بسببهم بالعكس كانوا كتير يساندوها فى مشاكلها مع هانى .. ابنهم المدلل ..ورغم حبها ليهم الا انها كانت أوقات بتحس انها بتكرههم .. مش عشان معاملتهم السيئة لقرايبهم ولا بخلهم ولا حاجة من دى خالص .. عشان بس تربيتهم الغلط لهانى .. مدلعينه بشكل فظيع .. هى ياللى اسمها بنت مش متدلعة زيه كده .. هى مش متدلعة خالص اصلا .. كانت اكبر اخواتها واتعودت تشيل المسئولية .. لكن هو طبعا الصغير .. ده غير انه الولد الحيلة .. ازاى يعنى ميبقاش متدلع .... دلعهم ده خلاه بقى راجل انانى .. انانى جدا .. هو ومن بعده الطوفان .. اهم حاجة يرضى نفسه .. ويعجب بنفسه .. والناس عليها تمدح فيه وفى جماله وشطارته ..... يختى كميلة !!

قبل ما تتجوز كان عندها احلام ملهاش حدود .. كلها أحلام رومانسية حالمة .. الحب مكنش عرفلها طريق قبل هانى .. عشان كده لما قابلته اديتله كل المخزون اللى كانت شايلاه جواها من حب ومشاعر رومانسية وثقة .. صدقته فى كل وعد وعدهولها بالسعادة وزودت عليهم كمان شوية وعود من خيالها .. كانت هتموووت وتتجوز عشان تبقى معاه .. هى وهو بس .. والحب تالتهم .. مش عايزة حاجة تشغلها عنه ولا حاجة تشغله عنها .. عايزة تصحى على حب .. وتنام على حب .. وتتنفس حب .. ايييييييييه .. احلام .. أحلام واتبخرت مع اول اسابيع الجواز .. اكتشفت ان الجواز مفيهوش كده خالص .. كلها افلام .. منهم لله الممثلين اللى خدعوها بالرومانسية فى افلامهم .. منهم لله الكتاب اللى عيشوها فى عالم تانى برواياتهم .. منهم لله المطربين اللى عشموها بالحب فى اغانيهم .. الله يسامحهم عيشوها فى الوهم وصدقتهم

هى صحيح بتحبه .. قبل ما تعرفه كويس كانت بتحبه .. واتجوزته عشان بتحبه .. بس بعد ما عرفته كويس .. وعرفت طباعه .. وانانيته .. مش عارفة لو رجع الزمن بيها و قابلته تانى وهى عارفاه كده كان ممكن ترضى تتجوزه ولا لا .. هو طيب صحيح .. وبيحبها صحيح .. وبيجيبلها اللى هى عايزاه صحيح .. بس بيحب نفسه اكتر .. وبيهتم بنفسه اكتر .. ممممممم .. الموضوع محتاج اعادة نظر

يوم الجمعة هو يوم زيارتهم الاسبوعية المقدسة لاهل هانى .. مش زيارة كده وبس .. لالالالالا .. ده اليوم بيبتدى من بعد صلاة الجمعة .. ولغاية بعد صلاة العشا بشوية .. بتتجمع فيه كل الاسرة .. هى اسرة صغيرة مش كبيرة .. مكونة من الام الحاجة كوثر .. والأب الحاج محمد .. وهيام أخت هانى الكبيرة .. والمهندس عمر جوزها .. وأحمد ونور ولادهم الصغيرين .. سنتين واربع سنين

هانى ابن بار جدا باهله .. بيحبهم جدا .. ويخاف عليهم جدا .. ويخاف على زعلهم جدا جدا جدا .. متنكرش ان حبه لاهله من الحاجات اللى حببتها فيه اكتر .. اهلها ربوها على ان اللى ملوش خير فى اهله ملوش خير فى حد .. عشان كده هى فرحانه ان هانى له خير في اهله .. بس بالمقابل مش بيخصص يوم لاهلها رغم انه يقدر .. هى طلبت منه كتير بس دايما بيتحجج كل مرة بحجة شكل .. أهلها وحشوها اوى .. بتروحلهم كل فين وفين .. علاقتها بيهم قايمة عالتليفونات ونفسها تعمل يوم ثابت فى الاسبوع لزيارتهم زى هانى ما بيعمل مع اهله .. بس هو مش عايز .. مش ناسى لاهلها انهم رفضوه فى الاول وحسسوه انه قليل جنبهم .. حتى لما اهلها بيعزموها عالغدا مش بيرضى يروح .. دايما بيلاقى عذر .. ويسيبها تروح لوحدها فى اوقات كتير .. ولو راح معاها يبقى يوم مش معدى .. ويحملها ذنب كل حاجة تحصل خارجة عن ارادتها .. زى البرد والمطر.. والحر .. والزحمة !!!

فى بيت اهل هانى رانيا بتنشغل بتحضير الغدا واعداد السفرة وغسل الاطباق .. بتساعدها فى كده هيام أخت هانى اللى برغم فرق السن بينهم الا ان علاقتها بيها كويسة جدا وقوية جدا وبتحس انها اختها بجد .. هيام بتشتغل مدرسة علم نفس .. ناجحة جدا فى شغلها .. شخصية قوية وعندها كاريزما بتخليها قريبة من كل القلوب .. أما جوزها بقى فبيعاملها معاملة خاصة جدا بتحسس رانيا أنه بيرفعها على الراس .. بيحترمها ويقدرها ويحبها جداااا .. ويلجأ لها فى كل اموره .. لو اتكلموا الكلام ميخلصش .. ولو سكتوا كلام عيونهم وقلوبهم مينتهيش

رانيا بتحبها جدا .. يمكن لانها بتشوف فيها الصورة اللى كانت تتمناها لنفسها .. بتفرح عشانها وكانها بتفرح بنصها التانى اللى محققتوش .. وميمنعش برضه انها بتزعل على نفسها لما بتلاقى هانى بعيد عنها كده .. بس الاكيد انها مش بتحسدها ولا بتحقد عليها .. ابدا ابدا .. هى بس بتتمنى لنفسها سعادة زى سعادتها

أما الحاجة كوثر .. فطبعا بتكون قاعدة مع هانى - ابنها حبيبها اللى بيوحشها ومبتصدق تتلم عليه رغم انها بتشوفه كل يوم فى الطالعة والنازلة .. مهم ساكنين معاها فى نفس البيت - ومعاهم الحاج محمد والمهندس عمر .. واحمد ونور

هانى بيموت فى احمد ونور بيحبهم جدا جدا .. قبل ما يتجوز كانوا كل حياته .. وما زالوا .. صحيح مش بيشوفهم دلوقت غير كل اسبوع مرة .. بس لما بيشوفهم بيتحول ويرجع طفل زيهم .. وكانه عمره ما كبر .. وطبعا ده بيفرح الحاجة كوثر جداااا

الحاجة كوثر نقدر نقول عليها ام الجميع رغم تعليمها المتواضع الا انها العقل المدبر لكل صغيرة وكبيرة تخص اسرتها ..الكل بيعتمد عليها بما فيهم هانى طبعا لدرجة انه لو تعب شوية او حتى جاتله نزلة برد يجرى عليها ويصمم يبات عندها عشان تمرضه وترقيه .. مش بس كده لالالالالا دى كمان بتوصف له الأدوية اللى بتحفظ اسمائها ودواعى استخدامها عن ظهر قلب ..!!

أخيرا افتكروا ان فيه ناس واقفة فى المطبخ – بعد الغدا طبعا – وندهوا لرانيا وهيام عشان يجيبوا الشاى ويقعدوا معاهم

هيام راحت قعدت جنب جوزها عالكنبة الصغيرة .. ورانيا قعدت على كرسى الفوتيه لوحدها .. مهو هانى قاعد جنب مامته ..!

الحاجة كوثر : أخبار الحمل معاكى ايه يارانيا ؟

رانيا : والله يا ماما تاعبنى أوى.. الشهور اللى فاتت مكنش تاعبنى كده .. ظهرى بيوجعنى أوى لما بقف كتير.. وبنهج جامد لما اعمل مجهود

الحاجة كوثر : وبتتعبى نفسك ليه يا بنتى .. هى الدنيا هتطير .. خلى بالك من نفسك ..انتى فى السابع يعنى خطر .. ريحى نفسك على أد ما تقدرى

رانيا : ان شاء الله

توقعت رانيا انها تقول كلمتين لابنها عشان ياخد باله من مراته الحامل اللى فى السابع .. بس طبعا محصلش .. ووجهت كلامها لجوز بنتها المهندس عمر

الحاجة كوثر : أنا حاسة ان هيام تعبانة الايام دى يا عمر .. شوف وشها أصفر ازاى .. انت بتتعبها ولا ايه ؟

عمر مدافعا عن نفسه : أبدا والله يا ماما .. اسأليها حتى

هيام مبتسمة : تاعبنى ايه بس يا ماما .. ما انتى عارفة انى باخد كورس وعندى امتحانات ..ده بس عشان مش بنام كويس .. انتى ناسية احمد ونور كمان

الحاجة كوثر : ومتناميش كويس ليه يا بنتى .. لو عمر مش هيعرف ياخد باله من أحمد ونور هاتيهوملى لغاية ما تخلصى .. هى تربية العيال صعبة عليا ما انا اللى مربياكوا .. ومربياكوا احسن تربية .. واهو البيت فاضى علينا انا وابوكى زى ما انتى شايفة .. هاتيهم ياخدوا بحسنا عما تخلصى ويريحوكى شوية

هيام : ما انتى عارفة يا ماما انى مقدرش ابعد عنهم ولا ابعدهم عنى .. مقدرش انام الا وهما فى حضنى .. اسيبهم ازاى بس .. انا عارفة طبعا انك قدها وقدود واحسن منى كمان بس مقدرش .. انتى ام وعارفة

الحاجة كوثر : امال اعمل ايه بس عشان ترتاحى .. آجى اقعد عندك انا

هيام : تنورينى يا ماما طبعا .. بس مش عايزة اتعبك .. هما يومين وهيخلصوا متشغليش بالك انتى

اخيرا تدخل الحاج محمد موجها كلامه للحاجة كوثر: يا ستى متسيبوهم فى حالهم هو حد اشتكالك .. هما يومين بالطول ولا بالعرض وهيعرفوا يظبطوهم بمعرفتهم

بصت الحاجة كوثر لجوزها بنظرة تأنيب وقالت : يعنى الحق عليا .. براحتكم

هيام قامت باست مامتها على خدها وعلى ايدها وقالت لها : متحرمش منك يا ست الحبايب .. احنا بس مش عايزين نتعبك .. غيرت الموضوع بسرعة بطريقتها اللذيذة المعهودة ووجهت كلامها لهانى وقالت : ايه يا سى هانى بقى .. انت مبتصدق تيجى عشان تقعد تلعب مع العيال وتسيبنا .. اكبر شوية بقى وتعالى اقعد مع الكبار

هانى مداعبا : يا ساتر عالنفسنة .. انا عارف انك بتغيرى منى عشان ولادك بيحبونى اكتر منك .. ولعلمك بقى احنا بينا اسرار كتير متعرفيهاش .. وعمرى ما هقولك عليها .. احنا بينا وعد .. وجه كلامه للاولاد وهو يداعبهم وقال : مش كده يا قمر انت وهى

أحمد ونور فى نفس واحد : كده يا انكل وانفجروا فى الضحك

هيام عملت نفسها متغاظة وقالت : بقى كده .. ماشى ماشى .. حسابنا فى البيت يا كتاكيت ههههه وادورت لرانيا وقالتلها : عاجبك كده عمايل جوزك دى ههههههه

................

الى اللقاء فى الحلقة القادمة

بقلم : حنعيش يعنى حنعيش

هناك 34 تعليقًا:

ليالي مصرية يقول...

سالي هو انا عندي غير سالي

الحلقه ميه ميه وجيالي متراجعه ومتنسقه وميت فل وخماشر بصراحه

وكمان هاتغيرلنا الموسيقى التصويريه

حلقه جميله يا سالي وعجبتنى فكرة اللاسلم واللا حرب مع حماتها
عشان يبقى فى مجال برضه لفتح باب المشاكل مع اهل الزوج

عجبتنى اوي رسم شخصيةهيام كمان الاحاجه واحده هاقولهالك بينى وبينك هههههههههههههه

اممممممم بس خلاصل الحلقه فى المجمل حلوه اوي وتسلم اديكى يا جميل

ليالي مصرية يقول...

دكتور اسلام عليك الدور عايزين تقطيع بقى وكده

sony2000 يقول...

ميييا مييييييا
:)

محب روفائيل يقول...

على فكرة يا سالى الحلقة دى حلوة جدا
ومترابطة فى أحداثها جدا
والاغرب بقى انها مترابطة جدا مع أحداث الحلقة اللى فاتت
وده محيرنى شوية بسبب اختلاف الكتاب
عموما منكم نستفيد

محب روفائيل يقول...
أزال المؤلف هذا التعليق.
Unknown يقول...

حلوه أوي أوي أوي و اللغه سهله و الأحداث واقعيه مكتوبه بخفة دم
متابعاكم

حاجات جوايا يقول...

ليالى مصرية
............

ندى الياسمين
تسلمى يا قمر .. شوفتى بقى .. مش اى اى ولا زى زى .. كله الا اللغة .. انا تخصص فرنساوى صحيح بس العربى فى دمى وعروقى ههههههه

ايه رايك فى الموسيقى الجديدة حطيتها خلاص اهه .. عشان يبقى لكل قصة موسيقى خاصة بيها

حمات رانيا من النوع اللى بينطبق عليه المثل : مكسر ما تاكلى .. وصحيح ما تكسرى .. وكلى لما تشبعى يا مراة ابنى

ههههههههه عارفاه اكيد

ميرسى يا جميل
ايه يا ترى الحاجة اللى مش عاجباكى
لو بخصوص هيام احتمال اقدر اخمنها ههههههه

ميرسى يا قمر ربنا يخليكى يا ريسة

كلمات من نور يقول...

بيت مصري جدا ...سواء الزوج والزوجه أو بيت اهل الزوج بس طبعا اللي كتبت تسلم إيدها كاتبه بتعبيرات حلوة ورشيقه ...تحياتي

حاجات جوايا يقول...

sony 2000
...........
تسلمى يا قمر
ربنا يخليكى يا حبيبتى
حجزتى حلقة ولا لسه ؟؟

حاجات جوايا يقول...

الكاتب محب روفائيل
.....................
أهلا يا فندم
الف شكر
الحلقة اللى فاتت كانت بداية القصة .. اول حلقاتهابقلم ندى .. ودى تانى حلقة من نفس القصة بقلمى.. والحلقة الجاية واللى بعدها ولغاية الحلقة التلاتين من نفس قصة أين انا ؟ هتكون بنفس الاسلوب ان شاء الله ولكن بكتاب مختلفين
دى فكرة ليالى مصرية
كل مدون يكتب حلقة بناء على الحلقة اللى اتكتبت قبله .. فى نفس القصة ونفس الدراما ونفس الاحداث والشخصيات

يارب تكون الحيرة زالت والامور وضحت
لما هتابعنا اكتر هتفهم اكتر ان شاء الله
نورتنا يا فندم وشكرا جزيلا

حاجات جوايا يقول...

شيرين سامى
...........
ربنا يخليكى يا شيرين
ده من ذوقك والله يا قمر
هنستناكى دايما

حاجات جوايا يقول...

كلمات من نور
...............
اهلا يا فندم
هو فعلا بيت مصرى جدا
الف شكر يا فندم :)
نورتنا

حاجات جوايا يقول...

ندى الياسمين
...........
احجزيلى الحلقة اللى عليها الدور يا ريسة بعد اذنك :)

البنفسج الحزين يقول...

حلقه جميله وواقعيه جدا
تسلم ايديكي يا سالي...

خواطر شابة يقول...

عارفة ياسالي وانا بأقرأ كانت تتردد في ذهني اغنية في حاجات لنانسي عجرم حسيت ان كلمات الاغنية مطابقة بشكل كبير لحياة رانيا اسمعيها كده وشوفي
الحلقة جميلة هناك شخصيات جديدة اضيفت وملامحها توضحت ويمكن البناء عليها
واقعية القصة جعلتني احس ان ابطال القصة حقيقيون من دم ولحم
يسلم قلمك سالي

محب روفائيل يقول...

أهلا سالى ، مساء الخير وشكرا على الترحيب الجامد ده
على فكرة أنا عارف كل حاجة بتعملوها هنا ماشية ازاى وسبق وطلبت من المسئول من حوالى يوم او يومين أن اشترك معاكم فى تقديم الحلقات بس مش القصة دى بقى ، وانما فى القصة التانية علشان أبقى مخضرم :)
والمسئول رحب جدا وده من دماثة خلقه طبعا
أما بقى اللى كنت كاتبه فى التعليق الاول فده يبين مدى اعجابى واستغرابى للى بتعملوه ، لان فعلا الحلقتين مترابطتين مع بعض رغم اختلاف الكتاب ، واختلاف الكتاب ربما يعنى اختلاف الافكار والاسلوب وده انا ملاحظتهوش فى الحلقتين دول .
انتوا شكلكم بتذاكرو مع بعض من ورانا :))
قولولى بتتقابلوا فين علشان القصة اللى جاية هكون معاكم ان شاء الله :))))
وبالتوفيق
الكاتب محب روفائيل

just dream يقول...

بجد المدونه جميييله اوووى والقصه اجمل واجمل وبجد انسجمت معاها جدااااااااا يمكن لان شفتها فعلا ف الواقع العملى مع الناس وحقيقى الازواج اللى من نوعية هانى ربنا يصبر زوجاتهم عليهم
حقيقى بحييكم جدا على الاسلوب الجميل ده
تقبلوا تحياتى

حاجات جوايا يقول...

البنفسج الحزين
...............
ربنا يخليكى يا قمر
متحرمش منك :)

حاجات جوايا يقول...

خواطر شابة
.............
ازيك يا جميل
عارفاااااااها .. هى الديفا نانسى عجرم تقول حاجة اى كلام:)
فعلا شبهها وده يوضح لنا ان الموضوع مش على اد المصريين بس .. اللبنانين كمان متبهدلين هههه:)
سعيدة جدا انك وصلتى لاحساس المعايشة وانتى بتقرى
تسلمى يا قمر متحرمش منك

حاجات جوايا يقول...

الكاتب محب روفائيل
------------------
مساء النور يا فندم
معلش بقى فهمت غلط .. تنورنا طبعا ولو عندك الرغبة ممكن تشاركنا القصة الحالية مهى لسه قدامها وقت كبير .. لسه بنبتدى .. وبالمتابعة هتتشجع وهتبقى مخضرم متقلقش :)

ههههه ده سر المهنة بقى
الخلطة السرية لليالى مصرية ههههههه
اى حاجة بتتعمل بحب لازم تكون فى افضل صورة
وان شاء الله الحلقات الجاية هتفاجئك أكتر
نورتنا يا فندم

حاجات جوايا يقول...

قول ياااااااارب
.................
أهلا يا جميل
ربنا يخليكى حبيبتى
يااااااارب يصبر زوجاتهم عليهم هههه
تسلمى يا قمر
نورتينا

shimaa elkholy يقول...

محب

انت مرحب بيك دايما وبعدين مش هانقولك بنتقابل فين على فكره خصوصا انا وسالي ههههههههههههههههه

انا وسالي ممكن نتقابل فى الحلم وتطلع الكتابه كده

احنا فى القصتين الى فاتوا ما كناش بنسق مع بعض كل واحد بيكتب بدماغه وفكره

المره دي كده برضه انا بس باديلهم اساس القصه وكل واحد بيكتب بفكره ولعلمك تنوع الفكر ده هو الى بيخلي الدنيا محتلفه عندنا

محب روفائيل يقول...

سالى ، ندى : شكرا ليكم جدا
سالى عادى جدا كلنا كتير بنفهم غلط علشان فى حاجات كتير فى الدنيا عايزين نفهمها وبصراحة انا واحد من الناس مش فاضى افهم كل حاجة
ندى صدقينى انا متشوق جدا انى اكتب معاكم لكن خليها بعد القصة دى برضه ومتضغطيش عليا اكتر من كده :))
شكرا جزيلا لكم وانا متابعكم اول باول
وبالتوفيق
الكاتب محب روفائيل

أحمد عبد الحميد يقول...

سالى
---
الحلقة حلوة فعلا بس ده العادى بتاعك

الأستاذ محب
----------
ليه مستعجب قوى كده من تناسق الحلقات؟ إنت لسه شوفت حاااااااجة
واضح إن حضرتك متابع جديد

الريسة
------
أنا موافق على ميعاد حلقتى


د.إسلام
------
مستنيين إبداعاتك

كل أهل الليالى
-------------
كل سنة وإنتم طيبين

amirelhob يقول...

اول حاجه كل سنه وانتوا طيبين

الحلقات بدايتها جامده جدا ورائعه واكتر من مجرد رائعه والله

اسف انى غايب عنكم بقالى فترا بس بجد محتاج منكم خدمه تحفه


عايز من كل اللى ليه اكونت على الفيس خدمه بجد هتفيدنى اوى


فى لينك عايز احطوا تدخله عليه تعمله لايك موضوع تبع الجامعه عباره عن مسابقه نوكيا

عايز بجد من كل حد فيكم لايك واحده هتعدينى جامد اخوكم بقا ومحتاجلكم


http://www.facebook.com/#!/photo.php?fbid=111090955624061&set=o.136020236446067

اللينك اهو لو لقيت مفيش لايك اعمل جيون للجروب وبعدين ادخل اعمل لايك للصوره ياريت اللى يعمل لايك بس بعد اذنكم يقولى فى كومنت بجد الموضوع دا محتاجه اوى بليز

وكل سنه وانتوا طيبين وعيد سعيد يا رب عليكم و ووحيات الليالى ما تنسوش موضوع اللايك


ومن قلبى بتمنلكم كل خير وسعاده وصحه وتوفيق وفرح وابتسامه تدوم يا رب طول العمر

Remas يقول...

سااااااااااااالي
الحلقة جميلة فعلاً وهادية وواقعية

حسيت بيوم الجمعة التقليدي في البيوت المصرية

وعجبني جدا جداً وصفك للحاجة كوثر

تسلم ايديكى يا توتة

ووحشتينى جدا يا سالي

كل سنة وانتي بالف الف خير يااااااارب

حاجات جوايا يقول...

ندى الياسمين
..........
شوفتى يا ندى الرفاق حائرون يفكرون يتساءلون كيف تكتبون ؟؟ هههههههههه

حاجات جوايا يقول...

أبو حميد
.......
ربنا يخليك أخجلتم تواضعنا :)

كل سنة وانت وكل أهل الليالى وقرائنا ومتابعينا والمسلمين بكل الخير يارب

حاجات جوايا يقول...

أمير الحب
..........
وانت طيب وبكل الخير يارب
شكرا جزيلا فى انتظار حلقتك ان شاء الله
بدأنا بقى الاستغلال ههههههه
هتدفع كام طيب ؟
وحياة الليالى لهدفعك هههههههه
ماشى حاضر يلا نعمل الخير ونرميه فى البحر عشان بس فى موسم حج وداخلين على عيد وكده اعتبرها العيدية ولو انها واجب عليك هههههههه

كل سنة وانت طيب

حاجات جوايا يقول...

reem
-----
ربنا يخليكى يا روما
متحرمش منك حبيبتى ده بس من ذوقك
انتى وحشانى اكتر بتغيبى فين كل ده
يارب تكونى انتى واسرتك بكل الخير يارب
كل سنة وانتى طيبة يا قمر وبكل الخير

حنعيش يعنى حنعيش يقول...

طبعا انا وحش ... بكسر الواو والحاء ... لانى اتاخرت فى التعليق ..بس قريها من يوم مانزلت والله ... وبعدين انا زهقت من كتر ما بقول ان كتاباتك حلوة ... المرة دى بقى اسمحى لى انى اقول وبصراحة ... ان الحلقة دى ....برضة حلوة

حاجات جوايا يقول...

حنعيش يعنى حنعيش
---------------
أهلا يا فندم
وحش اوى والله :)
ليكوا عليا المرة الجاية اكتب وحش عشان متزهقوش .. انا مليش غير راحة الشعب هههههههه
فى انتظار حلقتك يا فندم
تحياتى

ستيتة يقول...

سالي

يعني اغيب اجي ألاقي حلقة تخنقني
لأ
مش ممكن
أي نعم هي مصرية بحته
وصرفة
وفيها كل البلاوي المصرية مجتمعة
بس تعبت نفسيا وانا بقرأها

البه بنتي بتقول لك حرااااااااااااااام
تخلعه يا ماما زي الطبيبة المصرية اللي خلعت جوزها من يومين ودغدغت الكمبيوتر بتاعه على باب المحكمة :)

الحلقة نفسها حلوة وصح ومفيهاش الهوا
لكن الأحداث غيظاني
انا شايفة انها انسانة سلبية وطيبة
ها يحولها هذا الذكر لأنثى كائن مصري حقيقي مع الأيام

دي بت جزمة والله العظيم
لأ انا أقوم أضرب سحكوتش بقى
ضغطي هاي

حاجات جوايا يقول...

د ستيته
........
معلش حبيبتى متزعليش انا اسفه
القصة المرة هدفها تسليط الضوء على المشاكل الزوجية الشائعة وما اكترها طبعا
وفيه ستات كتير جدااااااااا بيعانوا زى رانيا كده واكتر وكاتمين فى قلبهم وعايشين بقلوب ميتة لغاية ماتجيلهم الصحوة ويلاقوا العمر بيضيع من ايديهم وهما مش سعدا وكل واحدة بقى بتتصرف بطريقتها
لو خدنا الطبيبة المصرية مثال هتلاقى معظم الرجالة المصريين مخلوعين وكمبيوتراتهم متدشدشة قدام المحكمة
دى المحكمة هتبقى ولا وكالة البلح بتاعة الحاج عبد الغفور البرعى تاجر الخردة هههههههه

قولى لمهرة معلش ده الواقع الاليم
وعلى راى المثل : بيبان مقفلة على هموم متلتلة

تحياتى يا قمر