الأحد، 14 نوفمبر 2010

أين أنا ؟ الحلقه الثالثة

أين انا ؟

الحلقة الثالثة

بقلم حنعيش يعنى حنعيش

رانيا بدات تحس بألم فى ضهرها وهيه قاعدة ... ماهى واقفة طول النهار فى المطبخ ... طبيخ وفرش سفرة ولم سفرة وغسيل مواعين وعمايل شاى وغسل كوبيات ... عقاب اسبوعى زى عقاب سيزيف بطل الاسطورة اللى غلط غلطه ... فحكمت عليه الالهه بأنه يشيل صخرة ويطلع بيها لقمة الجبل ...و أول ما يوصل ... تقع الصخرة فينزل يجيبها تانى ويطلعها لقمة الجبل .... ويفضل كده لنهاية الدنيا ...ذل وقهر وفروض ولاء وطاعة لازم تتقدم كل اسبوع والويل والثبور وعظائم الامور للى يفكر مجرد التفكير انه يقول لأ .....

رانيا شاورت لهانى علشان يطلعوا ... لكن هانى عمل نفسه مش شايفها ....وبدل ماتقوم تطلع شقتها .. غصبت على نفسها واستحملت الالم ورسمت على وشها ابتسامة وقعدت ...

بعد ما المولد انفض ... والولى انبسط بصوابع رانيا اللى اتقادت ...طلعت رانيا وهانى شقتهم ... هانى دخل جرى على النت ... ورانيا دخلت اوديتها رمت نفسها على السرير وبدأت فى ممارسة هوياتها اللى ماتعرفش تعمل غيرها ... العياط ....رانيا طول عمرها كدة .... ماتعرفش تعمل حاجة غير انها تعيط ... ابوها الحاج كارم لما كان يشخط فيها كانت تدخل اوديتها وتقعد تعيط ... عم كارم كان على طول يزعق لها ... على طول يقولها عيب ... على طول يمنعها من الكلام والضحك ..عمرة ما خدها فى حضنة حتى وهية صغيرة ... كان طول عمرها نفسها ان ابوها يحضنها ... زى مابتشوف البنات اصحابها وابوهم بيحضنهم ...بس عم كارم على طول مشغول بالبلد ومشاكل الفلاحين وقعادتهم العرفية ... ماهو بقى كبير البلد ... له ارض وبيت بناه بعد مارجع من سنين الغربه ...كان دايما يقول البيت والارض دول انا جبتهم علشان أأمن العيال ...بس رانيا كان ليها رأى تانى ... كانت شايفة ان الارض والبيت علشان يبقى كبير البلد ... ولو كان فعلا عايز يأمن العيال زى مابيقول ... كان اشترى ارض وبنى بيت فى المكان اللى هما عايشين فيه .... مش فى البلد اللى بيكرهوها وعمرهم ماراحوها ...ساعات كتير رانيا كانت بتحس انها بتكره ابوها .... بس كانت بتقاوم الاحساس ده ... وتقعد فى اودتها تعيط .... مره او مرات حاولت انها تلجأ لحضن امها لما عم كارم يزعق لها ... لكن نجاة كانت دايما مشغوله يا اما بتحضير شغلها .. يا اما بتحضير اللبس اللى حتروح بيه شغلها ... لما كبرت رانيا كانت دايما تقول لمامتها نفسى اقعد معاكى واتكلم واحكيلك ...بس كانت الاجابه واحدة دايما .... مش فاضية لو عايزة فلوس عندك فى الشنطة ... خدى اللى انت عايزاه ...ولما اتخطبت ... كانت تنزل لوحدها تشترى جهازها ...

رانيا طول عمرها وحيدة ...طول عمرها مش حاسة ان فيه حد بيحبها ...كان نفسها فى اخت ..تقعد معاها وتفضفض لها بس يا خسارة ماعندهاش غير اخين ولاد ....باسم اللى نادر ماتشوف على وشة ابتسامه ... كانت دايما تسأل نفسها ... هو بابا ازاى اختار له الاسم دة ؟...باسم محبوس فى اودته بقاله تلت سنين من ساعة ما اتخرج ... ما شتغلش رغم ان عم كارم جابله بدل الشغلانه عشرين ... بس هوه عايز يسافر امريكا ... عايز يبقى مليونير ويخلى البنت اللى حبها وسابته مع اول عريس غنى خبط على بابها تندم ... وطبعا لا اشتغل ولا سافر امريكا ولا حيسافر امريكا ولا البنت حتندم ...الوحيد اللى كانت بترتاح معاه ... شريف ... مع انه اصغر منها باربع سنين ..هوه فى كليه الحقوق ... بس بيقول مش حأشتغل محامى .. المحاماه دى شغلة نصب ... شريف بيعمل مشاريع وبيشتغل فى كل حاجة ... ممحراتى .. نجارمسلح ... فى بنزينه .. عمل مشروع وصلة الدش ...دلوقت بيشتغل سمسار...شريف الوحيد اللى نفد من البيت الكئيب ... بس الدنيا علمته كتير ... هوه الوحيد اللى شاف هانى على حقيقته ... قال لرانيا لما هانى جه يخطبها : انت بتحبيه ... قالت له : ايوه .. قال لها : حبيه زى ما انتى عايزة ...فكرى فيه وفى الحصان الابيض اللى حايجى ياخدك عليه وينقذك من بيت الرعب اللى احنا عايشين فيه .. اسهرى للفجر واحضنى المخدة وبصى للسقف ... حبيه اوحبى الحب اوحبى حاله الحب اللى انت فيها ... بس نصيحه اوعى تتجوزيه ... انت بالنسبه له مش اكتر من لعبه نفسه فيها ... واول ما حاياخدها ... حيلعب بيها شوية ويرميها ... هانى انانى ...والانانيه ملهاش دوا .. دا عيب فى الكروموسومات ... ماينفعش تضحكى على نفسك وتقولى حا غيره بعد الجواز ...دايما شريف عندة وجهة نظر ... وكتير بتطلع صح ...

رانيا بطلت عياط ॥ تعبت من العياط ... ماكانتش عارفة هيه بتعيط ليه ؟ .. من الم الضهر اللى بيزيد كل شويه ...ولا بتعيط على حظها ... ولابتعيط على ضعفها قدام ابوها وامها وحماتها وجوزها ... ولا بتعيط علشان صعبان عليها نفسها ... وفجأه زاد الم الضهر ... صرخت : الحقنى يا هانى ........ وبدأ الم المخاض .... فى السابع

الى اللقاء فى الحلقه القادمه
بقلم : ريم

هناك 26 تعليقًا:

ليالي مصرية يقول...

وطبعا طبعا طبعا

لازما ولابد نقول استاااااااااااذ طول عمرك

وزي ما قلتلك تحياتي لقلمك الى بيمخمخنى

وحلو اوي اوي وصف الوضع بشوية تذمر وغتاته بتاع الزياره الاسبوعيه عشان المواضيع هاتبدأ تحلووووو اهو
هههههههههههه


يلا يا ريم حظك جاي فى الولاااااااااده صوتي معاها براحتك


بس قولي يا دوك هو ايه سر ان كل الحوامل فى القصص والمسلسلات بيولدوا على السابع ؟؟
ههههههههههههههههههه

sony2000 يقول...

ومتابعين:)

Unknown يقول...

جميله أوي كالعاده للأسف معظم البنات هوايتهم العياط اللي مبيعملش حاجه غير انه ينفس عن غضبهم لكن بعد تاني مره عياط بالكتير محدش بيسأل في الدموع دي و تغيير طبعاً محدش بيتغيير
في انتظار المزيد من كتاباتكم الممتعه
كل سنه و انتم طيبين

حنعيش يعنى حنعيش يقول...

ست الريسة
اخجلتم تواضعنا ...
الحوامل بيولدوا فى السابع علشان القصة تحلو وتاخد ابعاد كتيير وتعمل شوية سسبنس

حنعيش يعنى حنعيش يقول...

sony2000
المتابعة مش كفاية ... المشاركة اهم

حنعيش يعنى حنعيش يقول...

شيرين
منورة الليالى والله ... فكرى كده وشاركى

Unknown يقول...

أنا نفسي أشارك بالفعل ايه الطريقه...يشرفني طبعاً اني أكتب في الليالي المصريه
لو ممكن

حنعيش يعنى حنعيش يقول...

شيرين
ممكن ونص ... كل اللى عليكى انك تباغى الريسة وهية تحدد لكى ميعاد حلقتك

محب روفائيل يقول...

رائعة جدا يا دكتور

فعلا توظيف جيد لادوار اخواتها وابوها وامها

بس هنا فيه مشكلة على ما اظن لو القصة دى هتبقى مسلسل مثلا او فيلم (قول يا رب) لازم فى اول حلقة نشير ولو من بعيد للناس اللى عمالة تظهر فى القصة دى واحد ورا التانى واقصد اهل رانيا وجوزها زى ما يكونوا كانوا مهاجرين كلهم لامريكا بربطة المعلم وظهروا فجأة فى الحلقة التانية والتالتة ، لازم يأتى ذكرهم فى الفرح والكلام التعبان ده :((

دى حاجة بسيطة حبيت اشارك بيها
غير كده القصة رائعة يا اسلام
مع تحياتى
الكاتب محب روفائيل

حاجات جوايا يقول...

جميلة اوى يا دوك رغم انها قصيرة اوى :)
عجبنى اوى الكلام عن اللقاء الاسبوعى بانه العقاب الاسبوعى .. وتبصله يطنش هههههه


وعجبنى جدا وصف والد رانيا
بس كان نفسى رانيا يكونلها اخت .. وتتجوز .. ونشوف حرب العدايل مع بعض

وصف والدتها بقى ضايقنى
هى كده يعينى ملهاش حد فى الدنيا خالص
غير شريف وشريف ولد يعنى مش هيقدر يقوم بدور الام ولا الاخت

واعتقد نفسيا لما البنت مايكونلهاش حد بالشكل ده وتبقى اخده عالوحدةواخواتها صبيان تبقى اقوى واصلب متبقاش شخصية ضعيفة ولا كبيرها الدموع
مش عارفة رايك ايه

بس فى المجمل الحلقة جميلة كالعادة يا دوك
تسلم الايادى

shimaa elkholy يقول...

يا سييييييييييييدى على السسبنس

ماشي يا باشا

كلمات من نور يقول...

حبيه اوحبى الحب اوحبى حاله الحب اللى انت فيها.
====================

ممكن فعلا يكون حبها هروب من بيت معرفتش فيه الحنان فحبت الحب مش الزوج

منتظرين

غير معرف يقول...

السلام عليكم ورحمة الله وبركاته
وكل عام وأنت بخير وإلى الله أقرب
عيد أضحى مبارك

حنعيش يعنى حنعيش يقول...

الكاتب محب روفائيل
اولا شكرا جزيل
ثانيا دى شهادة اعتز بيها
ثالثااول تلت اربع حلقات بتحاول تجمع الشخصيات اللى حننطلق بيها ....ودى اصل الفكرة ... ان احنا نعمل شخصيات واحداث ندبس بيها اللى بعدنا علشلن نثير الابداع

حنعيش يعنى حنعيش يقول...

حاجات جوايا
تسلمى يارب ...الانسان لما يبقى تحت ضغط القهر والوحدة والقلق ... يا اما بيتمرد يا اما بيستسلم وانا شفت ان الاستسلام والهروب يمشى اكتر مع رانيا
دمتم بود

خواطر شابة يقول...

بداية يا أهل الليالي الكرام أضحى سعيد ينعاد عليكم بكل فرح ان شاء الله
تانيا دكتور اسلام الحلقة جميلة فيها تركيز على اسرة رانيا تعرفنا معك على اسرتها وعلى ظروف تربيتها رغم ان الصورة الان قاتمة اكثر من الفكرة التي أخذناها عن هذه الاسرة في الحلقة الاولى
ايضا التحليل النفسي لاحساسها بلمة الجمعة قربنا كثيرا من مشاعرها وجعل احتمال ولادتها في السابع منطقيا
بالمجمل الحلقة جميلة وتحفز من يكتب بعدك لانها مفتوحة على احتمالات عدة

حنعيش يعنى حنعيش يقول...

كلمات من نور
انا معاكى مليون فى الميه ... معظم الجوازات اللى عن حب يا هروب يا احلام يقظة

حنعيش يعنى حنعيش يقول...

مدونة الامل
كل سنه وانت طيبة وسعيدة

حنعيش يعنى حنعيش يقول...

خواطر شابة
كل سنه وانت طيبة ... كات لازم نعرف ايه اللى خلى رانيا مستسلمه كده ... فيه اكتر من حاجة ... بس انا لقيت ان الجو الاسرى المفكك هوه افضل البدائل المطروحة من وجهة نظرى

أحمد عبد الحميد يقول...

أولا أحب أشارك رانيا

عااااااااااااااااااااااا
عااااااااااااااااااااااا
عااااااااااااااااااااااا

أحمد عبد الحميد يقول...

ثانيا
الحلقة حلوة يا دكتور وطبعا ده العادى بتاعك

ثالثا
الكاتب محب: مين قالك إن الحلقات دى حتبقى مسلسل أو فيلم؟ دى بقت خلاص وإحنا ماضيين العقود قبل ما نكتب

رابعا
مستنيين إبدعاتك ياريم وترفقى بيا... أنا اللى بعدك

sony2000 يقول...

اوكييييييييييه
ويااااااااكو اهو
بس يارب الاقي مكان بس

shimaa elkholy يقول...

شيرين سامي لو حابه تشاركي قوليلي عشان احط اسمك فى الجدول الى عندك على اليمين بره فى المدونه

سوني حطيتك فى الدور خليكى فاكره


رييييييييييييم اظهري وباني ايه الحكايه

هاكلمك الصبح



منورين يا جماعه وشكلكم بتاكلوا فته

حاجات جوايا يقول...

انا حاجزة دور يا ريسة نسيتينى ولا ايه ؟
اشهد يا زمن عالروؤساء اللى بينسوا الشعب

كل سنة وانتى طيبة يا قمر وبكل الخير
كل سنة وكل اهل الليالى طيبين وبكل الخير
عيد اضحى سعيد عليكم وعلى الامة الاسلامية جمعااااااااااااااء

غير معرف يقول...

اود ان الفت نظر الكاتب الى ان وظيفة والد رانيا مهندس اما وظيفة والد هاني الزراعه
اماالحلقه فهي جميلة جدا

حنعيش يعنى حنعيش يقول...
أزال المؤلف هذا التعليق.