الثلاثاء، 23 نوفمبر 2010

اين انا ؟؟...الحلقه الخامسه

الحلقه الخامسه

بقلم:أبو احميد

هانى بص لرانيا شوية بذهول مش مصدق اللى قالته أو مش مصدق اللى هو عمله

رانيا كررت طلبها تانى بس بحدة أكبر

هانى قالها إنت أكيد إتجننتى وسابها واقفة وخرج ورزع الباب وراه

وهو نازل لقى مامته على الباب بتحاسب الراجل بتاع السوبر ماركت اللى جايبلها الطلبات

إستغربت وقالتله مالك ياحبيبى تعالى جوه شوية

هانى دخل وهو متنرفز وحكى لمامته اللى حصل

هى الصراحة ماعجبهاش قوى إنه يمد إيده على مراته بس هى كعادتها

لازم تنصفه وتطلعه مش غلطان

إنت ياحبيبى كان رد فعلك زيادة شوية بسهى إزاااااى تقل أدبها عليك؟

هانى عجبه الكلام وركب الموجه وقعد يشتكى من رانيا وإهمالها ليه ولبيتها ولنفسها

الحاج محمد خرج من أوضته وقالها ياولية إتقى الله

ده بدل ماتقوليله عيب عليك تمد إيدك على مراتك؟

هى إتغاظت وقالتله إنه ما ينفعش مراته تقول عليه ماعندوش شخصية

علشان هو إبن بار وبيعاملنا كويس

الحاج محمد قاله يا إبنى إخزى الشيطان وإطلع طيب خاطر مراتك

هانى قاله ده على جثتى يعنى تهينى وكمان تطلب الطلاق

وراح سايبهم ونازل على القهوة

-----------------------------------------------------------

رانيا فضلت تعيط وجنى كمان علشان رانيا ماكانتش عارفة تأكلها ولا تغيرلها

ماكانتش قادرة تسيطر على أعصابها

حست إن كرامتها إتجرحت جرح عميق وإن فى شىء جواها إتكسر

مسكت الموبايل وكلمت مامتها وهى بتعيط

مامتها إتخضت وإفتكرت إن البنت تعبانة ولا حاجة

رانيا حكتلها اللى حصل

أمها لامتها وقالتلها إنها حذرتها من الأول من الناس دول

ويعنى إيه طلاق وفى بنت وياعالم يمكن يكون فى حاجة تانية فى الطريق

رانيا قالتلها يعنى لو كنت غلطت لازم أدفع تمن غلطتى العمر كله؟

أمها قالتلها إنها لازم تمشى حياتها وإنهم حيجوا بكرة علشان

يعرفوا هانى إن رانيا ليها أهل وإنه ماينفعش يمد إيده عليها

رانيا خلصت المكالمة وهى حاسة إن مالهاش ضهر

حست قد إيه هى ضعيفة وإن أمها اللى مفروض تبقى حضنها الدافى

مش حاسة بيها

مسكت الموبايل وكلمت شريف

شريف لما حكيتله قالها أنا جاى دلوقتى أطلع عين أهله

رانيا قالتله لأ تعالى بكره مع بابا وماما

علشان ألاقى حد يدافع عنى بجد

-----------------------------------------------------

هانى نزل قعد على القهوة شوية بس مالقاش أصحابه

مشى وراح دخل سايبر صاحبها صاحبه برضه

دخل على النت وفتح الفيس بوك

وعمل شاتنج مع بنت كان يعرفها زمان أيام الجامعة (من ورا رانيا)

هى الحقيقة حاجة إييييييه ... صاروخ

وكان كل يوم بيكلمها ساعة وساعتين وكام مرة كده قالتله

يتقابلوا زى زمان وهو كان بيحاول يهرب

هو هانى على قد البلاوى اللى فيه بس هو كان بيحاول يخلص لرانيا

خصوصا بعد ما إتجوز

بس النهارده دخل وكلمها

وقالها إنه عايز يشوفها

---------------------------------------------------

هانى رجع أخر الليل ودخل أوضة النوم

سحب مخدة وبطانية وخرج نام فى الصالة

رانيا كانت صاحية وحاسة بيه بس ما دورتش وشها ناحيته وفضلت نايمة

وهى حاضنة جنى

------------------------------------------------------

الصباح ده كان صباح الجمعة وهانى أجازة

أول ما صحى من النوم دخل الحمام وغسل وشه ونزل على مامته عدل

أول ما دخل البيت أبوه قاله إن حماه وحماته جايين بعد الصلاة

هانى رد بكل برود خير؟

أبوه قاله إنت مابتحسش؟ يعنى عايز تضرب بنتهم

والموضوع عادى كده؟

هانى رد بمنتهى الإستفزاز دى مراتى وأنا حر وماحدش يتدخل

أبوه إتغاظ جدا وقاله حتكبر عليا يالا ولا إيه

أمه جت على الخناقة ودخلت تهديهم وتدافع عن هانى

الحاج محمد قاله قسما عظما لو ما إتعدلتش

وراضيت البنت دى وأهلها ليكون حسابك معايا أنا

كفاية إنك حاططنا فى موقف زى الزفت مع نسايبك

أمه بقى إتحمقت قوى وقالتله إنهم لو قلوا أدبهم حتوريهم مقامهم

ده هانى كان يستحق ست ستها

وهما بيتكلموا جرس الباب رن

فتحوا لقوا هيام وجوزها وولادهم

طبعا إستفسروا عن سبب الزعيق إيه

لما عرفوا هيام زعلت قوى قوى وجريت على فوق علشان تشوف رانيا

عمر خد الحاج محمد علشان يصلوا وقال لهانى يتوضا ويحصلهم

صلوا الجمعة وطلعوا البيت كل ده وهيام لسه عند رانيا

مافيش ربع ساعة والجرس رن

لقوا الحاج كارم ومدام نجاة وشريف

الحاج محمد رحب بيهم أهلا وسهلا نورتم بيتكم

وشوية المجاملات دى

سلموا عليهم بفتور وخصوصا شريف

اللى وهو بيسلم على هانى ضغط على إيده بقوة كأنه نفسه يكسرهاله

الحاجة كوثر كانت قاعدة لاوية بوزها

ومدام نجاة كانت قاعدة وحاطة رجل على رجل بمنتهى الألاطة

فضلوا ساكتين شوية

الحاج محمد قالهم يا أهلا وسهلا تحبوا شاى ولا حاجة ساقعة؟

الحاج كارم رد إنهم مش جايين يضايفوا وإنهم جايين يشوفوا إيه اللى حصل لبنتهم

الحاجة كوثر دخلت فى الكلام وقالت إن البيوت كلها فيها مشاكل

وإن دى حاجات بين الراجل ومراته وإحنا مالناش دخل فيها

شريف راح محموق وقالهم طالما بين الراجل ومراته عرفتوها إنتم إزاى

الحاج كارم سكته وقاله إستنى لما الكبار يتكلموا

المهم شد وجذب من هنا وهنا

وعلى طول الخط الحاجة كوثر بتدافع عن هانى وبتلوى الحقائق

ومدام نجاة بترد عليها بمنتهى الألاطة

وخلصوا القاعدة على إن دى اول وأخر مرة

والحاج محمد قالهم إن رانيا دى بنته ولو حصلت حاجة تانى

هو اللى حيجيبلهم حقها من إبنه

وكلمتين من هنا على كلمتين ن هنا ولموا الموضوع

وطلعوا لرانيا

باباها ومامتها وأخوها

وهانى فضل تحت

لقوا عندها هيام أخت هانى سلمت عليهم

وإستأذنت منهم ونزلت على طول

باباها قالها إنهم خلاص حلوا المشكلة مع هانى وأهله

وإنه مش حيعمل كده تانى

ومامتها قالتلها إنها لازم تستحمل نتيجة إختيارها

شريف ماكانش عاجبه الكلام وقالها معلش يا بنتى إستحملى المرة دى

ولو حصل تانى كلمينى أنا على طول وأنا حجيبلك حقك

أبوها شخط فيه وقاله بلاش شغل البلطجة والصنايعية اللى بقيت منهم دول

رانيا عيطت وحست إن فعلا هى مالهاش ضهر

وقررت إنها تسمع لنصايح هيام اللى أحست إنها أكتر واحدة نصحتها بإخلاص

-----------------------------------------------------------------------

والى اللقاء فى الحلقه القادمه

بقلم : ندى الياسمين

هناك 27 تعليقًا:

ليالي مصرية يقول...

ايون ايون ايون

بس كده لسه هاني ما طلعناش عليه اعماله
بس انت سلمتهولي بصراحه بيضه مقشره بالمزه الى بيكلمها دي هايتلسووووووع صح

ووقع فى يد من لا يرحم ههههههههههههههه

تسلم اديك يا باشمهندس وبجد حلقه جميله والحوار بين الشخصيات رائع

Noha Saleh يقول...

الحلقة جميلة واللى اسمه هانى ده رخم اوى برضه ولازم يتعاقب بقى
لا بجد الحلقة حلوة اووووووى ومستنيين الحلقات الجديدة

حاجات جوايا يقول...

دمى اتحرق من وقاحة هانى ومامته وبنت الشات اللعين
عجبتنى الاطة مدام نجاة احب انا الألاطة فى المواقف دى ههههه
وزعلت على كسر خاطر رانيا واحساسها انها اتدبست وهتشربها للاخر وملهاش ظهر

عايزة اعرف هيام شارت على رانيا بايه ... اه على فكرة يا ابو حميد اسمها هيام مش ريهام

تسلم ايدك يا ابو حميد حلقة جميلة اوى وده طبعا العادى بتاعك :):)

مستنية حلقتك يا ندى بفارغ الصبر
متخليها بكره وتبردى نارى :)
لسه هستنى تلات ايام
الصبر من عندك يارب

الجواز و سنينه يقول...

تسلم اديك يا باشمهندس
حقيقى حله جامده
و كالعاده واقعيه
تفاصيل كتير دقيقه
بتغوص بينا داخل الحكايه
بطريقه مؤلمه احيانا
عجبنى وصفك فى احساسها انها مالهاش ظهر
ده حقيقى بيحصل لما المرأه تحس ان مافيش حد جنبها و كمان وصفك فى ان معقول حد يدفع العمر كله ثمن اختيار؟؟؟؟؟
الغريب فى الامر انه مسلسل لا ينتهى
و كأنه اشخاص بتسلمه لبعض
لكننا نشاهد شخصيه هانى فى كثير من الرجال
بكل تفاصيلها
حتى فى مدافعه اهلهم عنهم
عجبنى وصفك لحاله المرأه و مشاعرها

فقط لى تعليق ضغير
إغزى الشيطان

تعديلها اخزى الشيطان
تحياتى

كلمات من نور يقول...

ندى الياسمين مهندس ازاي؟ مش هي برضة صاحبة مدونة ندى الياسمين؟

معلش أنا مستجده وتايهه وسطكم ...متابعه معكم

ليالي مصرية يقول...

حاجات جوايا

تصدقي ان انا اول لما خدت الحلقه خدت بالي من اسم هيام ده وبعدين نسيت اغيره

هاعمله دلوقتي ايون كده اصحوا للون معايا

وبعدين انا مستعده اكتبلك الحلقه الحين اوبعتهالك اكسيكلوسف يا باشا هو احنا نقدر
هههههههههههههههههههه

منوره

ليالي مصرية يقول...

الجواز وسنينه

اوك اخزي

علم وينفذ يا باشا

ليالي مصرية يقول...

كلمات من نور

يا جميل لا هى مش مدونتي الشخصيه وانما انا مشاركه فيها

واحنا بنتداول الاداره بينا حاليا انا الريسه

وكل واحد فينا بيكتب الحلقه

الحلقه بتاعة النهارده الى كاتبها ابو احميد


وصلت الحدوته ولا ايه

انا ندى الياسمين بس متخفيه فى الليالي ههههههههههههه

ليالي مصرية يقول...

نها صلاح

ما تقلقيش الدور عليا هاوضبه

Remas يقول...

الحلقة حلوة فعلا جدااااا يا ابو حميد
برافو يا فندم كالعادة بتعرف تطلع من اى مأزق بسهولة واقتدار

اوافق الجواز وسنينه جدا في انك كنت رائع في وصف مشاعر المرأة عندما تشعر ان حتى من كانت تعتقد انه سندها تخلى عنها

عاجبنى اوى اوى شريف
وعجبني لما رد على الحاجة كوثر وقالها
لما هى حاجة بين الراجل ومراته امال انتو عرفتوا ازاى

سلمت يداك يا ابو حميد

وفي انتظار تعذيب هاني على ايديكى يا ندى الياسمين
ههههههههههه

عارفه انك هاتخد حق رانيا صح اووووووي

خواطر شابة يقول...

جميل التطور الحاصل في الاحداث منطقي وفي نفس الوقت فيه سخونة
هاني نموذج سئ للازواج لا في تصرفاته ولافي طريقة معالجتها
بالنسبة لتصرف اسرة رانيا هذا معتاد غالبا العائلات تحاول التدخل لاصلاح الامور وليس لتأزيمها
حماة رانيا بتفكرني بماري منيب في حماتي قنبلة ذرية ههه
مستنية حلقتك ياندى عشان نفسي اعرف حتخلي هيام تكون قالت ايه لرانيا
دمتم بكل الود

حنعيش يعنى حنعيش يقول...

احلى حاجة ان ابو حميد محافظ على الشخصيات وانفعالاتها وردود افعالها ... الله ينور يا باشا

just dream يقول...

المهم الحل ياجماعه انتو بتحكوا دلوقتى حكايات مصريه يمكن بتحصل ف نص بيوت مصر فييييين الحل
يعنى المطلوب منها دلوقتى انها تنضرب وتحط ف بقها شوز وتسكت ولا ايه وبعدين اللى زى هانى ده بصراحه لازم يتاخد ضده موقف حاسم مش هيقولوه متعملش كده تانى ياوحش هههههه
تحياتى لقلمك يابشمهندس

Unknown يقول...

جميله اوي الحلقه و الحوارات و عجبني حكاية البنت بتاعة الشات عشان تكتمل أركان السخافه و حسابه هيبقى عسير ان شاء الله
أنا قريتها امبارح و خدت بالي من ريهام بدل هيام خوفت يكون في أحداث فاتتني مع أني متابعه كويس أوي عشان كده مرضتش أعلق غير لما أقراها تاني
في الانتظار تحياتي

shimaa elkholy يقول...

يا نهار اسوس ده هاني دي هايتعمل فيه بلاوي
ده الشعب كله مستحلفله ههههههههههههههههههه

ما تقلقوش انا جيتله خلاص

قول يارب الصبر يا جودعان احنا لسه فى الحلقه الخامسه من ثلاثين حلقه

أحمد عبد الحميد يقول...

الست الريسة (ندى الياسمين)
------------------------
شكرا يافندم
وبعدين هانى أهو بين إيديكى ظبطيه زى ما إنت عايزة

أحمد عبد الحميد يقول...

Noha Saleh
-----------
شكرا والحمد لله إن الحلقات عجباك
منورة الليالى با فندم

أحمد عبد الحميد يقول...

سالى
----
بعد الشر عليكى من حرقة الدم
لو عايزة تعرفى هيام شارت على رانيا بإيه إتصلى بيها وإسأليها
نياهاهاهاااااااااااااا
معلش على غلطة الإسم بس أنا كنت بكتب الحلقة دى فى ظروف غامضة
منك لله يا (ياناجاوا)

أحمد عبد الحميد يقول...

الجواز وسنينه
-------------
شكرا يا فندم أخجلتم تواضعنا
إيه ده هو فى رجالة زى هانى كده؟؟؟؟
شكرا على توضيحك لإخزى الشيطان

أحمد عبد الحميد يقول...

كلمات من نور
-------------
ندى الياسمين مش مهندسة..... دى رئيسة جمهورية الليالى

أحمد عبد الحميد يقول...

ريم
---
شكرا على مجاملاتك الرقيقة دائما

ندى حتعذب هانى بس؟ دى حتشلوحه

أحمد عبد الحميد يقول...

خواطر شابة
----------
إيه أخبارك؟
دائما أنت صاحبة التحليلات المنطقية
دمت بكل ود

أحمد عبد الحميد يقول...

دكتور إسلام
----------
قصدك يعنى إن الحلقة مافيهاش أحداث... صح؟
والله كله من (ياناجاوا)منه لله
منور دايما يا دكتور

أحمد عبد الحميد يقول...

قول ياااارب
-------------
شكرا يا فندم
إحنا مش جايين نقدم حلول... إحنا بنكتب روايات
بس عارف الحل إيه؟ قول ياااارب
:)))

أحمد عبد الحميد يقول...

شيرين سامى
----------
شكرا شكرا
إنت عجبتك حكاية البنت بس هانى عجيته البنت نفسها... نياهاهاهاااااااااا

تانى حقول إن الغلطة بسبب (ياناجاوا)

أحمد عبد الحميد يقول...

ندى الياسمين
-----------
بصى إنت عاقبى هانى شوية بس من غير ما تموتيه... ماشى؟
هاهاهااااااا

محب روفائيل يقول...

ياللاسف أنا جيت فى الآخر
أسف يا ابو حميد بس كان عليا امتحان فيزياء النهاردة ، اه والله امتحان فيزياء فى يوم الجمعة
المهم فعلا انت حافظت على الايقاع لدرجة كبيرة جدا
والحلقة فى مجملها رائعة
بس يا جدعان انا عندى الحل وبمناسبة بقى انى صعيدى
هبعتلكم سلاح آلى وتهزروا بيه بس مع الجزمة اللى اسمه هانى ده الله يحرق دمه زى ما حرق دمى
ااااااااه مبتعرفوش تستخدموا الآلى طيب استنونى فى محطة مصر وانا هحللكم المشكلة من اولها لاخرها :))