السبت، 27 نوفمبر 2010

أين أنا ؟ ...الحلقة السادسة

أين أنا ؟ ... الحلقة السادسة

بقلم :ندى الياسمين

الحقيقه اهل رانيا مش رامينها ولا حاجه بالعكس هما بيحبوها بس بطريقتهم .. امها طول عمرها طبعها جاف شويه هى بتحبها بس مش عايزاها تخرب بيتها .. ...

ابوها كان الود وده انه ياخد هاني عشر اقلام بدل الالم الى اده لبنته بس ما ينفعش .. الحكايه مش عافيه وكان لازم يهدي شريف.. مهما كان الشباب له رعونه مش مطلوبه فى الحالات دي .

رانيا لسه بتعيط ومموته نفسها من العياط ..

وبعدين همست فى ودن ابوها .. بابا طب ممكن تاخدوني اريح اعصابي بس يومين .. انا مش قادره اتخيل انكم هاتسبوني وتمشوا ... وبتوسل .. عشان خاطري يا بابا

الحقيقه الحاج كارم قلبه وجعه .. ورد بلين : يا حبيبتى والله عايز اخدك معايا بس خايف الموضوع يكبر .

رانيا : لا مش هايكبر ولا حاجه انا اتفقت مع هيام على كده وهى قالت انها هاتمهد لهم تحت .. ومش هايحصل حاجه وهارجع تاني ان شاء الله بس استريح شويه .

قدام توسلات رانيا وتاييد شريف ما قدرتش مامتها تتكلم ولا ابوها قدر يقول لا

ونزلت رانيا مع ابوها فى هدوء .. وبكل ادب الحاج كارم قال للحاج محمد .. بعد اذنك يا حاج انا هاخدهم عندي شويه على ما رانيا اعصابها تهدى

الحاج محمد : ليه بس كده يا رانيا خليكى فى بيتك يا بنتى ... طب اقولك تعالى عندي اقعدي هنا معايا

الحاجه كوثر : ايوه يا رانيا مالكيش حق برضه ايه يعنى ما ياما بيحصل بين الراجل ومراته

وقبل ما تكمل قاطعها الحاج كارم .. بعد اذنكم اصل شريف بيستعجلنا طلع بالعربيه واخدهم ومشي ... وهو ماشي الحاج كارم ميل على هاني .. وقاله يا ابنى مراتك وبنتك عندي والبيت بيتك تيجى وقت ما تحب .. ولما رانيا اعصابها تستريح انا هاجيبها بنفسي

ومشيت رانيا وطول الطريق ما بتتكلمش لكن الدموع شغاله كالعاده

وكل ما يحاول شريف ينفث عن غضبه يسكته الحاج كارم .. عشان ما يزودش على رانيا

هيام بحده: ايه يا هاني الى انت عملته ده .. انت ازاي تمد ايدك على مراتك .. انت اتجننت ؟؟

هاني : باقولك ايه يا هيام انتى ما تعرفيش الى حصل وانا كمان ما عنديش استعداد احكي اسمعي من ماما انا ماشي

هيام : استنى هنا كلمنى ايه ماشي دي .. انت مش هاتكبر بقى .. ايه ده وبتنزل تشتكي لماما كأنك جاي تشتكيلها من زميالك فى المدرسه ..

هاني : شايفه يا ماما هى الى بتغلط فيا اهي .. يعنى عيل .. ماشي يا ستى انا عيل بقى

هيام وهى بتخفف من حدتها شويه : يا هاني هو انت لو كنت عيل ما كانش بقى في مشكله ... تعالى بس اقعد ومالكش دعوه بماما ولا بحد .

وهى بتبص لمامتها : البيت بيتك الى هايتخرب ده ... بيتك انت مش بيت مامااا

هاني بعصبيه : يعنى انتى عايزاني اسيب الهانم تغلط فيا وتهزأنى واسكتلها ؟؟ عصبتنى يا هيام .. وانتى عارفه انى عصبي

هيام وهى بتحاول تهزر عشان تهدي الموقف : عصبي ايه يا واد انت هاتعملهم عليا انا .. وبصوت واطي وهى خايفه من مامتها .. الحبه دول تعملهم على ماما انما انا لا

فبيبتسم هاني والجو يهدى والمناقشة تكون احسن

هيام : بص يا هاني انا هاقولك كلمة حق.. انا سمعت من مراتك وسمعت من ماما ... انت غلطان برضه يعنى عيب اوي لما تستقوى على واحده ست ضعيفه وتضربها مش مرجله يا وله .

وما تقوليش اتعصبت .. ما انت بتتعصب على ماما .. اشمعن ما بتضربش امك ؟؟؟ ها ؟؟ ما ترد

هاني : الله هو فى حد يضرب امه ؟؟؟

هيام : ااااااااااه شوفت ما فيش حد يضرب امه انما فى حد يضرب مراته!!!! يبقى عادي ... لا يا هاني انت غلطان .. يعنى انت لو جوزي ضربني كنت هاتبقى برضه تقولي معلش اصله اتعصب

هاني : وهو انتى زيها ؟؟؟ دى غلطت فيا .. انتى بتغلطي فى جوزك

هيام : اولا هى ما غلطتش اوي يعنى للدرجه دي .. انت مكبر الموضوع ... ثانيا مين قالك انى مش زيها ما الواحد ياما بيغلط برضه عادي ... هو فى حد ملاك ولا حد صح على طول يا ابنى ..

هاني وبدأ يلين شويه : اه يعنى المطلوب مني اعمل ايه دلوقتي ...

هيام : يا باي عليك مش مطلوب منك تعمل حاجه انا اتفقت مع رانيا انها تروح عند اهلها يومين كده على ما تروق منك ويمكن خلقتك العكره توحشها ولا حاجه ويبقى الكلام اهدى واروق .. وان شاء الله هابقى اروح ازورها ولو حبيت تيجى معايا ابقى تعالى

هاني : مش رايح زي ما راحت مع ابوها تبقى تيجى مع ابوها بقى.. ولا عنها ما جت اصلا .

هيام بضحك : طب قوم .. قوم اطلع اصل خلاص هارتكب فيك جريمه

فات اربع ايام على وجود رانيا فى بيت اهلها ...

رانيا بدأت شويه تبطل عياط وانشغلت بالناس حواليها بس برضه كل ما بتخلى عليها الدنيا تقعد برضه تفكر فى الى حصل وفى حياتها وتسح من عنيها كعادتها

وقلبت فى كلام هيام كتير فى دماغها .. خصوصا ان هيام برضه طلعتها غلطانه .. بس مش فى كل حاجه زي هاني ومامته

لكن هى لامتها على اهمالها لنفسها وعلى بعدها عنه

وانه صحيح هى اول مره ام وطبيعى انها تكون متكعبله على عينها كده

بس لازم وانتى اما تنسيش نفسك

لازم تعرفي انك فى المقام الاول بنى ادمه مش هاقولك زوجه

انما بنى ادمه تستحق انك تعتنى بنفسها وتحس نفسها حلوه وانيقه ومرغوبه

لازم تحسى انك بنى ادم وانك ست وانك زوجه وانك ام طبعاااا

كان لازم بعد شهرين تلاته تبدأي تفوقي لنفسك

.. هيام قالت لها كمان : بصي يا بنتى مش عشان هو اخويا ولا حاجه لكن كل علاقه لها طرفين لو نجحت يبقى بسبب الطرفين ولو فشلت يبقى برضه بسبب الطرفين .. حتى ولو كان مسؤلية طرف منهم بس فى الفشل انه كان سلبي وما قدرش يواجه خطأ الطرف التاني .

وبصراحه هيام اقرت وقالت ان اخوها متعب ومتدلع واناني .. بس قالت لها برضه انه طيب اوي وقلبه ابيض وبيحبها .. بس هو محتاج شويه صبر وهايتغير على اديها ... وانتم برضه صغيرين لسه و العمر قدامكم طويل ومافيش بيت بيخلا ومافيش اثنين بيبقوا مطبعين على بعض كده من اول يوم .

وهيام كمان الى اقترحت عليها انها تروح عند اهلها واتفقت معاها انها هاتكون على اتصال معاها ويعرفوا هايعملوا ايه بعد كده ...

وبدأت كمان رانيا تنفذ واتصلت على رحاب صاحبتها والى قطعت صلتها بيها بدون اسباب ورحاب فرحت اوي وقالت لها ما دام انتى عند مامتك انا هاجي اشوفك انتى وحشاني ..

رحاب كانت اعز صديقات رانيا واقربهم لنفسها .. رحاب لسه ما اتجوزتش .. بصراحه رانيا كانت محتاجه تحكي لحد وتفضفض وتاخد راي حد من بره المشكله

رحاب اصلا اول لما شافتها اتخضت وقالت لها ايييييه ده ؟؟!! انتى مالك شبه الاشباح كده ليه

وبعد قاعده طويله رحاب قالت : لا لا انا لا يمكن اسيبك كده من بكره عندنا شغل انتى لازم ترجعي رانيا بتاعة زمان قبل ما تعرفي الموكوس الى خلاكي شبه الاشباح كده

هاني بقى مقضيها وعامل زي الطفل الصغير الى واخد اجازه من المدرسه .. لا حد بيقوله ودي ولا جيب ولا بامبرز ولا حد بيعيط ولا روحت فين ولا جيت منين .. بيجوع ينزل ياكل عند مامته .. برنامج يومه كلاتى بيروح الشغل ويرجع يتغدى وينام شويه ... ويصحى ينزل لاصحابه على القهوه ...ويرجع على النت لحد الفجر

وفضل خمس ايام يقول محلاها عيشة الحريه .. هو انا كنت اتهبلت فى عقلي ليه واتجوزت .. يارب تخليها هناك .. ولو ان جنى وحشتنى بس برضه انا كده اروق

هيام راحت زارت رانيا وعلى اتصال معاها على طول .. وهيام قالت لهاني انها راحت وقالتله تعالى معايا ما رضيش .. ولما رجعت الحاجه كوثر كانت مستنياها فى استجواب طويل عريض

عن ماقبلتهم ليه .. والهانم ناويه ترجع امته .. وبكل سخريه اعصابها هديت ولا لسه ؟؟

فات اسبوع

هاني جه يروح الشغل وبيفتح الدولاب كالعاده يطلع هدوم ما لقاش هدوم مكويه

كوى هو اصل مستعجل لسه هاينزل لماما ..

تاني يوم ما لقاش هدوم اصلا نضيفه ... عايز ينزل الهدوم لمامته بس مكسوف

مش متعود ..

نزل سألها : ماما هو ما تعرفيش المفروض اغسل القمصان بتاعي على برنامج كام ؟؟

قالتله : على الدي كويس .. طب ما تجيبهم يا ابنى وانا اعملهوملك

هاني : لا يا ماما مش مستاهله نزول وطلوع

هاني غسل هدومه ونشرها وكواها

وبوظ قميصين عشان حط بلوزه جنا الحمرا فى الغساله غلط

وقال ايه يعنى معجزه هى ماهى عادي اهو ما خادتش حاجه

ونظام يومه زي ما هو .. بس عليا اتصلت عليه .. اه صاحبته بتاعة زمان

عليا كانت بنت جميله اوي ... اتعرف عليها مره من على النت واتقابلوا مرتين والكلام ده كان قبل ما يخطب رانيا

بس بصراحه هى صحيح كانت بتستريحله وبتحب تتكلم معاه بس لا ما كانش احلامها كده

عليا كانت عايزه فلوس .. بالتالي قالتله نقضيها صداقه بس يا امور لما عرفت ظروفه.. وكمان بصراحه هاني كان شايفها لعبيه وكان مقلق منها شويه

ولقيت عليا ضالتها واتجوزت فعلا واحد اكبر منها ب 20 سنه بس ما اتجوزش قبل كده ( فى مصر )وعايش طول عمره فى فرنسا

اتجوزته وسافرت معاه وقعدت معاه سنتين ورجعت من هناك مطلقه ومعاها فلوس كتير وفتحت محل اكسسوار ومستحضرات تجميل كبير وبقت معاها فلوس اكتر واكتر

وبعد ما بقت كده فوجيء بيها هاني بتبعتله رساله على اميله وسايباله فيها رقم تليفونها ..!!!!

ورجعت العلاقات بينهم وكانت على النت بس

بس لما حصل المشكله الاخيره بصراحه هاني بقى كان حاسس انه كان فى سجن وطلع منه وقرر انه يروح يقابلها مش بس يقابلها

طبعا هو حاكيلها المشاكل الى حصلت وهى بقى اقترحت عليه انه يجى يقضي معاها يوم فى اسكندريه هى هناك بتغير جو

وفعلا راح

وكان يوم حلو اوي عليا بصراحه جميله اوي وواخده بالها من نفسها اوي اوي

ودلوعه اوي . وحنينه وناعمه بزياده مش زي .....

هما جريوا ولعبوا واتفسحوا واتغدوا واتعشوا واخدوا لنش فى البحر

بس...

كده وبس .. هاني شقي أه ... بس تربيته ما تخليهوش يقع فى غلط اكبر من كده

بس بصراحه كده عليا كانت ناويه على اكتر من كده

وعزمت عليه كتير انه يبيت معاها

بس هو ما رضيش

والحقيقه كمان هو قرف من عليا اوي لما حس منها كده

بس ده ما يمنعش انه استمتع باليوم جداااا

ورجع وهو مبسوط اوي

ورجع لقى يوم الجمعه فى بيت العيله خلص

وطبعا كان قايلهم انه فى مشوار شغل

هيام راحت تاني زارت رانيا

وابدت اعجابها بقصة شعرها الجديده وقالت لها ايوه كده دلعي نفسك يا جميل

واعطت لها فلوس وقالت لها دول هاني باعتهم ليكى ولجنى

ما كانتش رانيا راضيه تاخدهم بس هيام اصرت

وطبعا الحاج محمد الى قال لهاني يعمل كده

اينعم المبلغ صغير بس مش مشكله المهم انه فكر ينبه ابنه لحاجه زي كده

وقعدت هيام تتكلم مع رانيا حوالي ساعه فى حاجات كتير تخص مشكلتهم او لا

بصراحه هيام عاقله اوي ومخها كبير ورانيا بتتعلم منها حاجات كتير اوي

وفى الاخر هيام قالت : ايه مش هاترجعي بقى مش كفايه كده

رانيا باعياء : معلش يا هيام يومين كمان اصل انا تعبانه والله ما باقدرش اشيل جنى حتى

هيام : ليه مالك ؟؟!!

رانيا : مش عارفه والله ... وتسكت وبضيق شويه .. بصراحه انا شاكه انى حامل

هيام وهى فرحانه : بجددددد طب شاكه ليه ما تتاكدي .. ده كويس جدا... مبرووووك

رانيا : كويس ايه بس فى الظروف دي .. انا مضايقه اوي وحتى خايفه اعمل اختبار حمل ... وحتى جنى لسه صغيره ..

وما قدرتش رانيا وانفتحت فى العياط كالعاااااااااده

هيام طيبت خاطرها وقالت لها ما تزعليش يمكن ده خير يا بنتى عشان يلم شملكم تاني وما تعيطيش كده حرام عليكى وكلي كويس انتى وشك باين عليه الارهاق جدا

يلا انا هاتصل عليكى الصبح تكوني عملتي الاختبار عشان اطمن عليكى

واعتذرت هيام انها مش هاتقدر تطول عن كده عشان الولاد مع عمر جوزها ونزلت بعد ما رانيا بدأت تهدى شويه

هاني صحي الصبح بعد مشوار اسكندريه جسمه كله مكسر

مش شايف قدامه جه يلبس ما لقاش طبعا لبس مكوي

وقف قدام الدولاب شويه وبعدين نقى تي شيرت قديم كان بطل يلبسه بس ما بيحتاجش مكوى اوي

لبسه من غير مكوى وما لقاش شراب نضيف لبس الجزمه من غير شراب

ونزل راح الشغل وراح متاخر ومن غير فطار

واصحابه فى الشغل لاحظوا وقالوله مالك كده انت تعبان ولا فى ايه وكان حاسس انه شكله مبهدل واي كلام

ولما رجع اتغدى تحت وطلع مش قاااادر عايز يكمل نوم لسه مشوار امبارح برضه ماثر عليه

طلع ينام فى اوضته لقها منكوشه ومافيش فيها شبر ممكن ينام فيه هدوم وكوبايات وورق ومناديل مووووولد

راح قااافل الاوضه ونام فى اوضة جنا

ولما صحي نزل راح القهوه لاصحابه بعد ما كوى طبعا بس كان مزاجه وحش وقعد شويه من غير ما يتكلم ومشي

وروح فضل ماشي فى الشقه مضايق ومخنوق وبصراحه كده حس انه لواحده

وجنى وحشته اوي كان زمانها ماليه البيت ضحك

دخل على النت نفس الكلام ونفس الناس و .. وعليا .. كلمها شويه بس هو مقفول منها

قفل وقام نام .. قعد ساعتين فى السرير لحد ما عرف ينام

وفضل على الحاله دي 3 ايام .. وكانت الحاجه كوثر زمان بتدلعه

دلوقتي بصراحه ما عادتش بتقدر .. وكمان هى واخده تنبيهات مشدده من الحاج كارم ومن هيام .. انها تبطل دلع فيه عشان يبقى راجل بقى ويرجع مراته ويعيش كويس

.. والحاجه كوثر برضه مش وحشه اوي هى بس بيصعب عليها ابنها ... زي كل ام عادي

بتحبه بطريقتها هى

رجع هاني من الشغل فى يوم لقى هيام موجوده سلم عليها وقالها ايه النور ده امال فين العيال ؟؟

قالتله لا العيال مش معايا .. اصل انا كنت عند رانيا وجيت من هناك على هنا

كشر هاني شويه .. وقالها واخبارهم ايه ؟؟ جنى عامله ايه ؟؟

قالتله كويسين و .... رانيا حامل .............

الى اللقاء فى الحلقه القادمه

بقلم: خواطر شابه

هناك 20 تعليقًا:

ليالي مصرية يقول...

طبعا طويله الحلقه واي حد هادعي عليا هاقطعه هههههههههههههه

بما ان الحلقه بقلمى المتواضع

ياريت الساده القراء الاوائل يراجعوا ورايا الطباعه والاحداث ويبلغوني فورام

ندى الياسمين

أحمد عبد الحميد يقول...

الله ينور يافندم
الحلقة حلوة
وهانى ده طلع متربى أهو يعنى قضاها فسحة بس

صحيح ألف ألف مبروك لرانيا البيبى الجديد

Mona Hekal يقول...

المرة دي لازم اعلق تسلم ايدك الحلقة حلوة اوي
و هاني طلع اخلاق ربنا يهدي
بس ليه كده انتي كان مفروض تعافبي هاني مش تخلي رانيا حامل هي لحقت و الله صعبانة علي :(((

Noha Saleh يقول...

بجد جميلة ومستنيين الجديد

حاجات جوايا يقول...

بقى كده برضه
تيجى تعاقبى هانى تقومى تعاقبى رانيا بالحمل
ده انا جايبة الساطور وجاية اشفى بعد دبحه هههههههه
والله زعلت عشانها
ده سبب المشكلة انها اتلبخت بالنونو الجديد هتعمل ايه مع اتنين
ربنا يعينها ويقويها ويهديه

هو بقى خليه يكنس ويمسح وينظف ويكوى
واياك يسيب الاوضة متبهدلة كده .. هتبقى وقعته فحلقى غامق بإذن الله ههههههههه
يخلى البيت فلة شمعة منورة ويروح يجيبها ويسترجل بقى

بس عجبنى انه مش بتاع عك ولو ان مش من حقه برضه انه يقضى يوم مع واحدة غير مراته.. رجالة عايزة الدبح يا اختشى

حاسة ان القصة هتميل شوية لعمر وسلمى الجزء التانى

تسلم ايدك يا جميل

يلا يا نوجا الدور عليكى ربنا معاكى

كلمات من نور يقول...

جميل يا ندى

حد واجه الاتنين بأخطائهم و الأحادث بقت أسرع و أحلى ..ولو إن الغلبانه دي حامل تاني يا ترى؟.ما صدقنا بدأت تهتم بنفسها..في انتظار القادم إن شاء الله

Unknown يقول...

حلوه أوي بس أعتقد ان هيام دي شخصيه وهميه مستحيل أخت الزوج تبقى بالحكمه و العقل ده بس حقيقي الأحداث تُحفه و لو اني زعلانه ان رانيا موحشتش هاني كل همه مين هيظبط احتياجاته و بنته:(
أشكرك على الواقعيه الجميله و في الانتظار

خواطر شابة يقول...

ياه حمل تاني مسكينة حتلاقيها من ايه ولا ايه
صراحة احملها جزءا من المسؤولية فيما يحدث احسها سلبية وتجد سلواها في البكاء
تفضل الهروب من المشاكل بدل مواجهتها
اعجبتني هيام في دورها كحمامة للسلام
ان شاء الله استطيع البناء على هذه الاحداث وخلق حلقة مشوقة ان شاء الله
دمتم بكل الود

sony2000 يقول...

يااااااااااااااااجبارييييييييييين
وربنا يستر عليااااا
واعرف اكتب حاجه كويسا
عااااااااااااااااا

البنفسج الحزين يقول...

حلوة الحلقه ...
وواقعيه جدا...
انا مستغربه من الناس اللي بتشكر في هاني لأنه اتفسح بس مع عليا ومعملش حاجه أكبر اصلا مجرد خروجه وسفره مع واحده غير مراته حرام وخيانه ليها هو كمان كان هيعمل اكتر من كده ؟؟
عاجباني قوي شخصيه هيام ...عاقله وواخده موقف حيادي مش منحازة لأخوها ...
تحياتي

shimaa elkholy يقول...

ابو احميد

متربي نص تربيه يا ريس

هو برضه لعبي وزباله يعنى

لو كانت رانيا الى عملت كده كنت هاتقولوا عليها متربيه برضه ؟؟

والله يبارك فيك يا اخويا عقبال عندكم

shimaa elkholy يقول...

منى ابو السعود

ليه هو الحمل عقاب ليه مش فاهمه ؟؟

عادي دي حاجه بتحصل عادي جدا

shimaa elkholy يقول...

نها صلاح

تسلمى يا جميل

shimaa elkholy يقول...

حاجات جوايا

ايه يا حريمات انتم حاسين الحمل عقاب ليه للبنيه

لا طبعا مش سبب المشكله انها اتلبخت بالنونو

سبب المشكله انها ما عرفتش تنظم نفسها وتستعيد توازنها بعد البيبى

وقولي لخواطر بقى خليه يتربى وينضف البيت قبل ما هى تيجى

واتفق معاكي فى انهم رجاله عايزه الدبح والتقطيع فى اكياس كمان يا اختشي

ما شوفتش عمر وسلم الجزء التاني

بس ايييييييه انتى فاكراهم هايتصلحوا وتخلص على كده الليله

يلا هانشوف

shimaa elkholy يقول...

كلمات من نور

مرسي يا جميل ومنوراني

shimaa elkholy يقول...

شيرين سامي

لا لا مين قالك انه مستحيل كل شيء ممكن لعلمك

ايوه هاني شخصيته اناني عايز الحاجات الى تهمه بس مش حاجه تانيه

لسه بقى اصبروا علينا لما نشوف هانسويه على الجنب انهو
هههههههههههه

shimaa elkholy يقول...

خواطر

لا الحقيقه هى مش بتهرب من المشكله هى ما بتواجهش ضعيفه

ما عندهاش امكانيات كمان انها تقدر تواجه المشاكل

قليلة الحيله زي ما بنقول عليها


يلا شدي حيلك انتى يا خواطر ورينا الحلاوه بقى

shimaa elkholy يقول...

سوني

شدي حيلك يا جميل عايزين شغل على مايه بيضا وكده
ههههههههههههه

منوره

shimaa elkholy يقول...

البنفسج الحزين

مرسي يا جميل ربنا يخليكى

واتفق معاكي فى موقفك من هاني وبشدددددددددده

خواطر شابة يقول...

ندى الحلقة وصلتك ولا لا انا بعثها على الايميل اللي في المدونة