الاثنين، 26 يوليو، 2010

قلب كامل 2

الحلقة 2

بقلم حاجات جوايــا
........................



كان لكلمات أمنية الأخيرة وقعها المدهش على قلب كامل .. قلب كامل الذى كان قد نسى الخفقان منذ عهود بعيدة ، فوجد نفسه فى لحظة واحدة يسترد نبضه من جديد ويسبح مع ذكريات الشباب وكأن عمره اُختزل إلى الثلث وعاد ابن العشرون ربيعا الذى يود مصارحة حبيبته بحبه

نطق كامل بكلمات التعزية آليا لكن من داخله كان يود لو هنأها أو بالأحرى هنأ نفسه .. وإن كان لا يدرى ماذا ستكون ردة فعلها ان صارحها بحبه بعد كل هذه السنوات وبعد ان تقدم كل منهما فى العمر إلى هذا الحد

كانت أمنية تسير بجوار كامل لتقوده إلى ابنتها وهى تحاول أن تتجاذب معه أطراف الحديث متساءلة عن سبب وجوده فى الفندق فى هذا اليوم

أجابها كامل : شركتى منظمة حفل عشاء عمل بمناسبة توقيع عقد مشروع جديد

أمنية : ما شاء الله ما شاء الله .. يارب دايما من نجاح لنجاح.. بعد ما تسلم على دينا هاجى معاك أسلم على المدام واتعرف عليها ... ولا هى تتضايق ؟

كامل : لا أبدا مش هتضايق .. المدام ... تعيشى انتى من فترة طويلة

أمنية : آســـــــفه .. ربنا يديك طول العمر ويعوضك خير فى اولادك

كامل محاولا التحكم فى مشاعره لتبدو نبرته عادية : ربنا يعوضنا احنا الاتنين


قامت أمنية بتعريف كل من كامل ودينا ببعضهما البعض وانضم اليهما داليا الاخت الكبرى ودعاء الاخت الوسطى وبعد عبارات قليلة من التهنئة والمجاملة .. تركا دينا وأخواتها واتجها معا صوب باب القاعة لتوديع بعضهما البعض

بادر كامل قالا : أنا سعيد جدا انى شوفتك النهارده يا امنية .. متتصوريش أد ايه

أمنية : انا كمان سعيدة انى شوفتك بعد السنين دى كلها

كامل : ياريت نبقى على اتصال .. لو احتاجتى حاجة يعنى .. ياريت متتردديش انك تطلبيها منى

أمنية : أكيد هنبقى على اتصال .. جوزى الله يرحمه كان سايبلى حتة أرض .. وانا انشغلت فى تجهيز البنات ونسيتها .. دى فرصة طبعا انى استغلها والجأ لمجموعتك الهندسية عشان تنصحونى استثمرها ازاى وفى اى مشروع

كامل بإيماءة مسرحية : الشركة وصاحبها تحت امرك طبعا .. تعالى فى أى وقت ومتشيليش هم حاجة خالص .. دى مش معرفة يوم ولا اتنين ........ ولا ايه ؟

ابتسمت أمنية خجلا : اه طبعا .. انا عارفة .. وإلا مكنتش فكرت فى شركتك بالذات
ثم استدركت .. انا عطلتك عن ضيوفك أسيبك بقى تروح لهم ..عشان ميستنوش كتير

(تمنى كامل لو يقول لها : ضيوف ايه وشركة ايه .. ده انا مصدقت لقيتك ) لكنه قال : ممممم عندك حق ميصحش اسيبهم .. ان شاء الله نكمل كلامنا لما تيجى عندنا الشركة .. بس ابقى عرفينى الاول عشان أكون موجود وأحظى بشرف استقبالك

ضحكت امنية من ايماءته الأخيرة وهى تقول : خلاص اتفقنا هكلمك الاول

كامل : طيب .. امشى انا بقى ( وهو لا يرغب فى الذهاب ويقدم قدما ويؤخر الاخرى ) نتقابل فى الشركة قريب .. مش كده ... قريب

أمنية وهى تبتسم : قريب ان شاء الله

كامل : السلام عليكم

أمنية : وعليكم السلام .. مع السلامة

ذهب كامل وظلت أمنية واقفة مكانها لبضعة ثوانى وهى تقاوم ابتسامة فرحة تصر على الخروج من محبسها و الإعلان عن نفسها على وجهها الجميل الذى أضاء أكثر ......... وأكثر

.......................

كان حفل العشاء - على عكس حفل الزفاف - يميزه طابع راقى هادئ حيث انبعثت الموسيقى الكلاسيكية من كل مكان وسيطرت الإضاءة الخافتة على مشاعر الحضور وجعلتهم أكثر هدوءا وحميمية .. وكان الجميع يتجاذبون أطراف الحديث مع بعضهم البعض فى جو من الألفة والمودة برغم ان السمت الغالب كان الحديث عن المشروع الجديد

رحب المهندس كامل بزواره ومدعويه وكان فى قمة الحيوية والنشاط وهو يتنقل بين الطاولات راسما على شفتيه ابتسامة عريضة ومتجاوبا لحد كبير مع دعاباتهم ومزاحهم والجميع مقبل عليه .. مما جعل محمد واحمد سعداء به وهم يرون والدهم سعيدا بهم - هكذا ظنوا - وبنجاحهم وترقيهم فى السوق وعلو مكانتهم بشكل اكبر من كل مرة

انفردت مها زوجة محمد بزوجها وهى تسأله بطريقتها المستفزة المعتادة : وبعدين ؟

محمد متساءلا : وبعدين ايه ؟؟؟

مها مستنكرة : وبعدين ايه ؟؟؟.... عمال تكبر الشركة كل يوم اكتر من اللى قبله ومضيع كل وقتك فيها ومقصر فى حقى وحق ولادك .. كل ده ببلاش ؟؟

محمد : يعنى ايه ببلاش ؟؟

مها : يعنى انت بتشتغل هنا زيك زى أى موظف تانى .. ايه الفرق بينك كابن صاحب الشركة وأحد مديريها عن أى موظف عادى .. انت بتاخد مرتب وهما كمان بياخدوا مرتب ومحدش بيشتغل قدك ولا بيتعب تعبك ولا حتى أحمد اخوك .. وأخوك محمود أصلا مش فى دماغه .. ومكبر دماغه وقاعد فى المانيا بحجة الدكتوراة .. وفى الآخر نصيبه هيبقى قد نصيبك .. مش عارفة انت هتفضل كده لإمتى ؟؟ مضيع حقك وحقنا .. طيب حقك انت حر فيه .. حقنا احنا فين ؟؟؟

استشاط محمد غضبا لكنه كتم انفعالاته كعادته دائما .. فهو يحب ان يزن كل كلمة قبل ان يقولها .. ثم تحدث بصوت خفيض حتى لا يلفت اليه الانظار : أولا أنا مش مقصر فى حقك ولا حق ولادى وعارف انا بعمل ايه كويس
ثانيا : ده لا وقته ولا مكانه .. لينا بيت نتكلم فيه براحتنا

قال محمد ذلك ثم تركها وانصرف ليكمل ترحيبه بالضيوف محاولا ان يرسم ابتسامة على شفتيه حتى لا يلاحظ أحد ضيقه .. فى الوقت الذى كان احمد يقف مع فتاة شقراء يتضاحك معها ويبدو عليه الاهتمام الشديد بها

عندما رآه محمد نظر صوب الطاولة التى تجلس عليها نورا زوجة أحمد ليراها تجلس وحيدة حزينة ونظرها مصوب نحو زوجها المستغرق تماما مع رفيقته الحسناء .. فهمس لنفسه قائلا : مفيش فايدة فيك أبدا يا أحمد .. مسكينة يا نورا

ثم اتجه صوب الطاولة التى تجلس عليها شقيقته منى برفقة زوجها وأبناءها وهمس لها فى اذنها : نورا قاعدة لوحدها زعلانة من تصرفات أخوكى .. قومى اقعدى معاها شوية وانا هستناكى مع الدكتور حسام والولاد

بينما نورا سابحة فى أفكارها وأحزانها .. فوجئت بيد تربت على كتفها التفتت لتجدها يد .............؟

....................................

الحلقة القادمة بقلم ندى الياسمين


هناك 24 تعليقًا:

حاجات جوايا يقول...

يارب الحلقة تعجبكم

الدور عليكى يا ندود
ربنا معاكى :)

ندى الياسمين يقول...

جمييييييييله

حلوه جدا جدا جدا

وايه يا باشا الموسيقى والجو الجامد ده

وبعدين بقى هناخد على الدلع يا ريس

بجد تسلم اديكى

وانا بقى ربنا معايااااااا

sony2000 يقول...

يااعييييني علي الموسيقي الهاديه واللي بتناسب الجو صراحه
لو الجو هيبقي كدا
فقلتحيا الديمقراطيااااااااا
هههههههههههه
بجد حلقه حلوه ومستنظرا الباقي

ندى الياسمين يقول...

الحلقه جاهزه يا ريسه وبعتهالك فى اميل

امااااال احنا عالم جاهزه يا بنتى

يلا قوليلى بقى رايك

حنعيش يعنى حنعيش يقول...

روووووووووووووووووعة ... حلقة فى منتهى الجمال ... تسلم ايدك ياريسة ... الليالى دى شكلها كدة حتبقى فخمه قوى...
ماشاء الله ندى جهزت على طول كدة ... حد ياجماعة يبخر الليالى وصحابها

حاجات جوايا يقول...

ندى الياسمين
------------
تسلمى يا قمر
شوفتى بقى بروق عالشعب عشان يشتغل بنفس
ويبدع :)
ما انا ريسكوا حبيبكوا حارسكوا اللى لا يمكن ابدا يفرسكوا
هههههههههه

ربنا معاكى ومعانا
دعواتك النهارده الدعاء مستجاب :)

وصلت الحلقة يا جميل
كله تمام يا متمكن انت يا متمكن :)

حاجات جوايا يقول...

sony 2000
-----------
هههههههههههههه
تحيا تحيا تحيا
ميرسى يا قمر
والقادم ان شاء الله اجمل

حاجات جوايا يقول...

حنعيش يعنى حنعيش
----------------
الف شكر يا فندم
ربنا يخليك يارب
ان شاء الله هتبقى جميلة طول ما الحماس موجود وقلبنا عليها
هههههههه ربنا الحافظ يا فندم
ربنا يستر :)

أبو حميد يقول...

يا سلاااااام على الجمال
تسلم الأيادى يا فاندم... عاوزين نحفظ حقوق الملكية علشان الحلقات دى لما تنزل فى رمضان 2011 يبقى لينا نصيب فى السبوبة دى :)
تحياتى

حاجات جوايا يقول...

أبو حميــــد
------------
الله يخليك يا فندم
اسعدنى رايك كثيرا لكونك صاحب الفكرة وكاتب اول حلقة والاب الروحى لقلب كامل

فعلا عايزين نحفظ حقوق الملكية الفكرية
سهل اوى نتسرق :(
ربنا يستر :)

تحياتى

خواطر شابة يقول...

انا متأخرة يقطع الشغل وسنينه
ياعزيزتي بداية فرحانة بشكل المدونة وبالموسيقى المرافقة وبأن قصة ثمن الاحلام اصبحت مكتملة على هذه المدونة تسلم ايدك عزيزتي وان شاء الله من حسن لاحسن دائما
بالنسبة للقصة اعجبني السياق الذي صارت فيه اعجبني هذا البعد الرومانسي الموجود أعجبني خط الشر المثمثل في زوجة محمد كما تعاطفت مع زوجة احمد
عزيزتي القصة سارت بشكل سلس ومفتوح على كل الاحتمالات تسلم ايدك ومستنيين حلقتك يا ندى وربي يستر بعدها معايا انا
مع ودي

حاجات جوايا يقول...

خواطر شابة
----------
يقطع الشغل وسنينه فعلا عشان بيأخرك علينا يا نوجا هههههههه
الحمد لله حبيبتى ان التعديلات عجبتك
ايوه كده حسسونى انى بعمل حاجة عشان لو طمعت فى الكرسى تانى ابقى اقول انجازاتى السابقة اشمعنى انا يعنى ههههههههههههههه

ادى ميزة الرئاسة بقى
تاخدى الجرعة قبل الكل ههههههههه

ان شاء الله ربنا هيستر وهتبدعى كالعادة
متقلقيش يا قمر
:)

ستيتة حسب الله الحمش يقول...

الحلقتين يجننوا
روعة روعة روعة

ممكن ابوس ايديكم
واخنق ابداعكم
واترجاكم وانا على ركبة ونص
واعيط يمكن اصعب عليكم
وحياة النبي تسيبوا القصة حلوة كده
عااااااااااااااااااااااا
بحب انا الأفلام الرومانسيكية وها ازعل لما يبتدي احمد يواعد الشقراء في الفورسيزونز ويقعد اخوها في جناح ويرمي عشيقته من البلكونة

يا مصريييييييييييييييييييين
انا رومانسيكية مسكينة بكره رصيف نمرة خمسة العيييينييييف
خلوها كده مع موسيقى حالمة رائعة
تحصل كولكيعة
هوب تفكوها على طول

انا بهزر طبعا
عيشوا
هو المصري ليه ايه في الأخر الا فاتن حمامة؟ :)

حاجات جوايا يقول...

ستيتة حسب الله الحمش
-------------------
اهلا يا دكتورة
ههههههههههههه
انتى كده عايزة تجيبى لاحمد اعدام من اولها ومجموعته تتأثر فى البورصة ههههه
لا بعد الشر هو مش هيوصل للدرجة دى ان شاء الله
اتمنى يعنى :)

منورانا يا قمر

amirelhob يقول...

بجد حلقه من اجمل ما يمكن وبجد خوفتنى اكتر انا يمكن لسه بدرى على حلقتى بس خايف مبقاش قد الناس الى كلمها كبير اوى وجميل جدااا وحاسس انى بجد خايف رغم ان الموضوع نوعا ما سهل بس حاسس بردو بخوف لان متعودتش على انى اكون وسط ناس كبيره فة الكلام والمقام كدا
بجد حلقه روعه ويا رب ابقى على الاقل نصكم كدا ويا رب يكمل الموضوع على خير ومن قلبى بتمنلكم كلكم كل خير وسعاده وصحه وتوفيق وفرح وابتسامه تدوم يا رب طول العمر

mahmoudhermes يقول...

ana mosh ader asta el goz3 bsor3a argokm ana b2at modmaennnnnnnnnn :D gamila awi

عصـــــــــــام الــــديــن يقول...

الله الله
تسلم الانامل
بجد روعه وكمان الحلقه الاولى جميله
الخط العام للروايه بدا يتشكل ويارب تكمل على خير
تحياتى

حاجات جوايا يقول...

أمير الحب
---------
تسلم يا فندم ربنا يخليك
الحمد لله ان الحلقة عجبتك
ربنا يكرمك
متقلقش خالص انت قدها وقدود وان شاء الله حلقتك تبقى جميلة
تحياتى

حاجات جوايا يقول...

محمود هيرمس
-----------
الله يكرمك
هههههه كلام فى سرك اللى بيتابع الليالى بيبقى مدمن وحالته متأخرة كمان
اسألنى أنا
عمرك شوفت ريس مدمن
نحن نختلف عن الأخرون طبعا ههههههههههه

تحياتى

حاجات جوايا يقول...

عصام الدين
--------------
الله يخليك يارب
تسلم يا فندم
الحمد لله وان شاء الله القادم اجمل
تحياتى

mahmoudhermes يقول...

لا مشفوتش غير هنا :) بجد انا حاسس اني لقيت كنذ اسلوب رائع بجد من الاخر جامدين اخر 20 حاجة :) مشش عاوزين تعطيل لوسمحتو وراية الحلقة التلته مش عاوزين كلام كتير عايزين فعل نشاط :) تحياتي يافندم

حاجات جوايا يقول...

محمود هيرمس
-------------
ربنا يكرمك
اتفضل يا فندم الحلقات كلها مفتوحة على بعض ادخل من الباب اللى يعجبك :)

تحياتى

Story pain يقول...

بعد قرآتي لبداية الحلقة فقط اكتشفت ان في حاجات كتير جواكِ مش بنشوفها في مدونتك...موهبة أدبية عايزين نشوفها في مدونتك كمان مش هنا بس

طبعا أسلوبك واختيارك للأحداث مناسب جدا للقصة ...بداية الحلقة بوصف مشاعر كامل ربطت كويس أوي بين الحلقتين..والوصف عبر أوي عن الموقف وأضاف جو أكثر رومانسية

الحوار تلقائي .بسيط ..بس يمكن كان مفاجأة للقارئ ..يعني كان متوقع أن الايحاءات اللي فيه بمشاعرهم وحبهم تكون أقل علشان الاثارة في الاحداث تكون اكبر.

الحوار اللي كان في الفندق عرفتي توظفيه صح جدا..لانك فتحتي بيه افاق كتير في القصة...يمكن الحوار الاخير ده بدايه لكل احداث القصة

كده بأه هتخلينا نغير رأينا في الديمقراطية المتنكرة..ونبأه من أنصارها:)

تسلم ايدك يا قمر

حاجات جوايا يقول...

story pain
----------
أهلا يا قمر
منورة مدونة الليالى

تسلمى يا جميل متحرمش منك ده بس من ذوقك
مدونتى اكيد لها كل الحب والانتماء
بس تقدرى تقولى كده انها مسألة ارزاق
كل مدونة ولها رزقها هههههههه
والظروف اللى بتحكم:)


حوار امنية وكامل وايحاءاته كانت تكملة لوصف الحلقة الاولى وتمهيد للحلقات القادمة خصوصا ان كان فيه حاجة بينهم عارفينها وحاسينها بس مش مصرحين بيها فكان لازم الجليد يبدأ يذوب عشان الحلقات المترتبة تبدأ تشتغل فى الموضوع ده

ميرسى جدا يا قمر على رأيك فى الحلقة والاسلوب
وميرسى جدا لزيارتك الجميلة
ودعمك للديكتاتورية المتنكرة على هيئة ديموقراطية :)

نورتينا يا قمر