السبت، 18 سبتمبر 2010

قلب كامل 12

الحلقة التانية عشرة

بقلم حنعيش يعني حنعيش

دخل محمد على كامل وهو يحمل مجموعة كبيرة من الاوراق والملفات ...

محمد : فاضى قد ساعه كده علشان تمضى الورق ده ...

كامل : يابنى مش خلاص بقى انت واخواتك بقيتوا المسؤولين عن الشركة ؟

محمد : هوه احنا نقدر نستغنى عنك يا باشا ... وبعدين دا فيه ورق نقل الملكيه منى ليك بتاع شركة محسن

كامل : هات يا سيدى

محمد : الا ياحاج ايه حكاية شركة محسن دى ... احنا دفعنا كتير فى شركه خسرانه ...مش عادتك ياباشا تخسر ....

كامل : ياسيدى ياما كسبنا ... ايه يعنى لما نخسر شوية ...

محمد : ياحاج ... ياحاج ...انت مابتحبش حاجة اسمها خسارة ... ولا هيه على رأى يحيى شاهين فى الثلاثية ...بضاعة اتلفها الهوى ....

ضحك كامل ضحكة مدويه وقال : اتلم ياولا ... انت تعرف عن ابوك كده ...

محمد : الحلال ياباشا مدام فى الحلال اتكل على الله

كامل :ايه يا واد عايزنى اتجوز ؟

محمد : وماله ياحاج انت اصبى مننا ... وبعدين اللى ماطلناهوش زمان نلحقه دلوقت ...

ارتبك كامل وقال : قصدك ايه يا واد

محمد : ماقصديش ياباشا كل الحكاية ماتخليش فى نفسك اى امنيه الا وتحققها ..

زاد ارتباك كامل واكمل محمد : قصدى تخلص بقى .. ولا انت لسه حتكون نفسك ...

كامل : عارف يا واد على قد ما انا متغاظ منك ... على قد ما انا فرحان بيك... ناصح زى ابوك ومايفوتكش حاجة ...

محمد : يعنى انا صح بضاعة اتلفها الهوى ؟

لكامل : ياعبيط البيزنس بتاع محسن ده بكرة يجيب ملايين كل الحكايه شوية تظبيطات

محمد : باشا ... وربنا المعبود باشا .. بتكسب من كله


********


وصل احمد لعيادة الدكتور جواد ... وبمجرد ان قال اسمه للمرضة حتى قفزت من وراء المكتب وقالت : اتفضل يا احمد بيه الدكتور فى انتظارك ... دخل احمد المكتب ... قام الدكتور واستقبله بحفاوه ... وطلب من الممرضة قائلا: قهوة احمد بيه ياسناء ... بسرعه ...

احمد: خير يادكتور

الدكتور بتودد : خير انشاء الله يا احمد باشا ... سعادتك طبعا راجل اعمال وبتعرف فى البيزنس ... وعارف ان الخطأ البشرى وارد فى اى عمل ...

احمد باستغراب : مش فاهم

الدكتور : يعنى اكيد فيه موظف عند سعادتك او معاليك نفسك ممكن تقع فى خطأ غير مقصود ...

احمد وقد بدت عليه علامات الضيق : هوه ايه الموضوع بالظبط ؟

الدكتور : حاقول لجنابك ...دخلت الممرضة وقدمت القهوة وخرجت ...حمل الدكتور فنجان القهوه وقدمه لاحمد قائلا : اتفضل يا باشا ..

اخذ احمد فنجان القهوة وقال بحدة : اتكلم على طول يا دكتور انا مش فاضى للف والدوران ده ...

الدكتور : ايوه ... ايوه .. انا عندى لسعادتك خبر حلو ... فاكر سعادتك لما جيت سعادتك مع المدام وطلبت من جنابك تحليل للسائل المنوى ..

احمد بنرفزة : ايوه سعادتى فاكر وقولتلى ماتعملهوش غير فى معمل الامانه لانه معمل محترم وواخد الايزو ...

الدكتور .: تمام هوه ... هوه...

احمد: انطق يادكتور فيه ايه ؟

الدكتور : ابدا حصل غلطه بسيطة بتحصل فى كل بلاد العالم ... تحليلك اتلخبط مع تحليل واحد تانى ... واكتشفنا الغلطة... الحمد لله انت سليم وزى الفل وتقدر تخلف من بكرة

وقف احمد منتفضا : يعنى ايه غلطة بسيطة ... جاى تقولى الكلام ده دلوقت ... انا حاخرب بيت المعمل ده..حاقفله

الدكتور : ياباشا دا المعمل بتاع المدام

احمد : وكمان بتقلب عيانينك انت والمدام ... والله لااقفل لك العيادة كمان

الدكتور :دى جزاتى انى قولتلك ... ماهو كان ممكن اسكت وما اقولكش حاجة ...

احمد وهو خارج مسرعا : بينا المحاكم يادكتور ... حقفل لك العيادة والمعمل

خرج احمد غاضبا تعصره الافكار .. لا يرى امامه غير صورة نورا ... اخذ سيارته واسرع بها كى يصل الى نورا ... يقبل يديها ويذرف الدموع تحت قدميها ... لقد اهانها مرتين وفى المرتين لا مجال للمغفره... تزوج عليها واتهمها بالخيانه ... لم يرى احمد الاتوبيس وهو يخرج من الشارع الجانبى ... اصطدم احمد بالاتوبيس


***********

حسام يخرج من المحاضرة ويصطف حوله الطلبه يسألونه ويستشيرونه ... لانه من نوع الاساتذة الذى يحبه الطلبه ... فهو قريب منهم ويعاملهم معامله طبية ولا يتأخر عن طلب احدهم ... وصل حسام الى مكتبه وقبل ان يدخل .. نادت عليه نهى قائله : دكتور حسام ممكن اخد من وقت حضرتك تلت دقايق بس ... فرد عليها حسام : اتفضلى ... دخل حسام ومن وراءه نهى .. نهى الابنه الكبرى لعائله متوسطة الحال .. والدها توفى وهى فى العاشرة من عمرها ... وصممت والدتها انت تتعلم هى واخوتها الثلاثة تعليم جامعى ...نهى جميله ذكيه ... الطلبه يرون انها تتعالى عليهم ... وانها لاتتعامل الا مع الكبار ...يقولون ويلوكون عليها الكثير ,, ولكن لا احد يعلم الحقيقة ...

حسام : اتفضلى اقعدى يا نهى واقفة ليه .... ايه تشربى ايه ...

نهى : مرسى ... ربنا يخليك يا دكتور ... انا مش عايزة اعطلك ...

حسام : لا حتعطلينى ولا حاجة ... دى كانت اخر محاضرة النهاردة ... انا مصدقت اخلص ... كان يوم مرهق جدا ...الواحد باينه عجز ولا ايه ؟

نهى : ايه اللى حضرتك اللى بتقوله ده .. انت لسه فى عز شبابك ... دا انت وحضرتك واقف معانا ... بيبان ان حضرتك زميلنا ... اوعى تكون فاكر ان الشعرتين البيض دول معناهم ان حضرتك عجزت لاسمح الله ... دول معناهم خبرة وعلم وثقافة ....

حسام : ربنا يخليكى يابنتى ..

نهى : لا والنبى يا دكتور ماتقولش يابنتى ...انا يادوب اختك ...

حسام رجع بظهره للوراء ومد قدميه وضرب الجرس ... دخل الفراش قائلا: اامر يا دكتور

حسام : قهوه على الريحه فى كوبايه ... تشربى ايه يا نهى

نهى وهيه تنظر بثبات فى عين حسام : قهوه على الريحه فى كوبايه




كامل يمسك الموبيل ويتكلم مع امنيه وهو ممدد على الشيزلونج فى مكتبه ممسكا مج النيسكافيه : ازيك ياروحى

امنيه : ايه يا كامل الكلام ده ...

كامل : ايوه روحى وحياتى وحبيبى من زمان ...يا امنيه يالا بقى العمر مافيهوش قد اللى راح ...نفسى اعيش مع اللى قلبى حبها طول عمرى تحت سقف واحد

امنيه : الموضوع مش سهل كدة يا كامل ... بناتى وولادك ... حنقول لهم ايه ؟

كامل : ولادى ما فيش منهم مشكله ... الواد محمد موافق وبيقو لى ياللى بقى

امنيه : ايه انت قولت لهم ؟

كامل : لا قولت ولا غيره.. الواد محمد اللى طالع ناصح زى ابوه ..بيفهمها وهيه طايرة ... بصى انا حافاتح الولاد النهاردة

امنيه : لا ... لا ياكامل استنى شويه

كامل : استنى ايه .. على راى محمد هوه احنا لسه بنكون نفسنا ...وفجأه دخلت السكرتيرة قائله: الحق يا كامل بيه ... الحق ... احمد بيه عمل حادثه بالعربيه ونقلوه المستشفى

كامل: بتقولى ايه... وازاى دة حصل واسرع خارجا وهو بيقول حضروا لى العربية بسرعة بسرعة

الحلقة القادمة بقلم
أمير الحب

هناك 8 تعليقات:

خواطر شابة يقول...

عود احمد لقصة قلب كامل وان شاء الله يسير قطارها بثباث دون توقف في محطات جديدة الى ان يصل الى محطته النهائية في الحلقة الثلاثين
دكتور اسلام اعرف صعوبة ان تكتب بعد فترة التوقف الطويلة هاته واقدر ذلك لانني اجدني محتاجة بشكل قوي للعودة لقراءة كل الحلقات من البداية لمسك خطوط القصة وشخوصها
تعرف محمد في البداية وهو يتحدت مع ابيه أحسست كأنه يتحدت بأسلوب وديع مع تهامي باشا ههه خصوصا عندما قال "وربنا المعبود باشا ...بتكسب من كله"
نهى شخصية جديدة على القصة جيد ستحرك خيط منى وحسام
يسلم قلمك
تحياتي لك

شمس النهار يقول...

ماشاء الله
قصه محبوكه ومشوقه

هنستني الباقي وبعدين نتكلم بقا

تحياتي

ستيتة يقول...

سبقتني نوجا
وطبيعي تسبقني مش رئيس مجلس ادارة بنك الطعام المصري
قصدي رئيس مجلس ادارة الليالي المصرية

تحفة طبعا ولسه ها اقول على محمد لقيت نوجا برضه سبقتني
محمد في الحلقة دي فالجر خالص ياباشا
انا حسيت انه جاي من ميكروباص الليمبو
ودول ناس ولاد ناس برضه يعني فيه حدود لكلام الحاج :)
بس والله بأمانة حلقات قلب كامل دي متعة
وتحياتي لكل أهل الليالي

البنفسج الحزين يقول...

عود أحمد لاستكمال حلقات (قلب كامل)
بس طول الحلقات اللي فاتت احنا اتعودنا ان شخصيه محمد شخصيه جادة ورجل أعمال وهو اللي ماسك الشغل وشخصيه أحمد أخوة هو اللي مرح ودمه خفيف وفي الحلقه دي شوفنا العكس بقا لدرجه اني افتكرت أول ما قريت ان اللي كان بيتكلم مع كامل هو أحمد مش محمد ...
دي كانت ملحوظتي علي الحلقه بس بصفه عامه الحلقه جميله وبجد رجعت فكرتنا بالشخصيات بتاعه القصه من تاني وشخصيه نهي الجديده هتفتح خط جديد في الراما ....
تحياتي

خواطر شابة يقول...

امير الحب الو الو هل تسمعني حول

Remas يقول...

حلوة اوى الرجوع لقراءة الحلقات

القراءة بس
الكتابة هاتكون سعبة وشايله همها جداااااااا
هههههههههههه

الحلقة جميلة يا دكتور كعادة حضرتك دائما

انا شايفه ان محمد عادي ممكن يهزر مع باباه ويقول كدا
خاصة ان طريقة الكلام دي لم تصبح مقتصرة على فئة دون الاخرى


تسلم ايديك يا دكتور

حنعيش يعنى حنعيش يقول...

ربنا يخليكى ياريم ... دول قطعونى يا بنتى ... والله كله بقى بيتكلم كدة .... وبيفكر كدة وبيتصرف كدة ... بس احنا ساعات كدة بنحب نعيش مع الوسادة الخاليه

shimaa elkholy يقول...

امممممممم
مش عارفه يا دوك باشبه على المعمل ده عدى عليا قبل كده
هههههههههههههه

لو ما كانش عدى عليا قبل كده كنت قلت ايه شغل افلام السبعينات ده :)

المهم الحلقه جميله

هو انا لا اخفيك قولا بعد ما قريت شويه كده قمت راجعه كده ابص هو الى بيتكلم مين احمد ولا محمد ؟؟


اصل احمد هو الى كان بيتكلم بالطريقه دي ومحمد كان جد شويه

بس عموما عادي برضه مافيهاش مشكله

وحكاية الطريقه وكده عادي اساسا الموضه دلوقتي الكلام بالطريقه واوحش والله اصل الاوضاع كلها بقت مقلوبه