السبت، 20 نوفمبر 2010

أين انا ؟؟ الحلقه الرابعه

اين انا ؟؟ الحلقه الرابعه

بقلم : ريــــــم

في المستشفى ...خرجت رانيا من غرفة الافاقة ودخلت غرفة عادية كان قاعد فيها هاني والحاجة كوثر ومامة رانيا

جري هاني عليها وقالها حمد لله على السلامة يا حبيبتي .. ابتسمت وسألته عن البيبي فجاوبها بأنها بنوتة جميلة بس في الحضانة وأنهم قالوله لازم تقعد في الحضانة شوية لحد ما تستقر .

مامة رانيا قعدت شوية واستأذنت تجيب حاجات للبيبي وحاجات لرانيا لانها نزلت بسرعة لما هاني اتصل وما لحقتش تجيب اي حاجة لان الكل مش كان متوقع ان رانيا تولد فجأة كدا

الحاجة كوثر كان كل همها ان هاني يرتاح شوية وكأن هاني اللى لسا طالع من عملية مش رانيا .. وكانت كل شوية تقوله ارتاح يا ابني شوية لسا جاية لك ايام صعبة

بصت الحاجة كوثر وهى بتحاول ان كلامها يبان انه هزار وقالت لها :

وانتي يارانيا دايما متعبة كدا ؟؟

ولادة في السابع وقيصري وحضانة ومصاريف .. يلا .. ربنا يعينك يا هاني

بعد يومين خرجت وراحت على بيت مامتها وقعدت اسبوعين .. هاني زارها فيهم مرة ومرة تانية لما جه ياخدها يجيبوا جنى بنتهم من الحضانة وراحوا على بيتهم .

لما راحت رانيا شقتها اتفاجئت ان الحاجة كوثر محضرة كل حاجة للسبوع واختارت كل حاجة على ذوقها .

رانيا كانت تعبانة جداً نفسياً الفترة دي زي اي ست بعد الولادة

وزود دا احساسها انا مالهاش رأي في اى قرار حتى لو كان سبوع بنتها

بعد السبوع اللى كانت بتتصرف فيه الحاجة كوثر على أنها الكل في الكل وبعد ما الكل مشي حتى مامة رانيا

رانيا قالت لهاني : مش كان المفروض أختار أنا مستلزمات السبوع وايه اللى هايتقدم للضيوف ؟؟ مش انا بردو اللى تعبت وولدت ؟؟

رد هاني وهو مستاء : انتي ليه ما بتعرفيش تفرحي ؟؟

انتي تختاري او ماما تختار المهم السبوع اتعمل

وبعدين يارانيا ماما هى اللى عملت السبوع بفلوسها

من غيرها كنت هاعمل سبوع منين يعني ؟؟

--

وصول جنى ماغيرش اي حاجة زى ما رانيا كانت بتصبر نفسها وبتتمنى

بالعكس بعدهم أكثر

رانيا بقى كل اهتمامها لجنى والرضاعة والغيار وبقت عصبية ومرهقة من السهر طول الليل ونسيت حتى نفسها

وهاني بقى يهرب من الدوشة والعياط لاصحابه او النت

او نازل عند مامته وقاعد معاها

وطبعا الحاجة كوثر الحقيقة كانت ما بتقصرش خالص في أنها تحاول تخليه يقعد عندها اكثر بدلعها ليه وكانت دايما تقوله انت مش حمل سهر يا حبيبي ولا دوشة العيال

وكانت دايما تقول لرانيا : اوعي تطلبي منه حاجة ولا تشغل باله بالبنت الحاجات دي للستات بس

انا كنت بعمل كدا مع عمك عمري ما خليته يحس ان هاني او هيام تعبانين كنت بروح للدكتور لوحدي واشتري احتياجاتهم لوحدي ومش بشيله هم حاجة

الغريب بقى ان الحاجة كوثر كانت بتتبنى نظرية تانية خالص مع بنتها هيام

وكانت بتطلب من عمر جوز هيام دايماً انه يريحها ويشيل عنها هم الولاد شوية !!!

دا غير ان الحاجة كوثر كانت بتتدخل في طريقة اعتناء رانيا بجنى

انتى ملبساها خفيف كدا ليه ؟؟

هى البنت مالها ضعيفة اوي ليه كدا هو انتى ما بترضعيهاش كويس ولا ايه ؟؟

خلاص بقى دى بقى عندها اربع شهور لازم تدوقيها كل حاجة .............

ورانيا من ناحيتها ما كانتش بتنفذ ولا حاجة من اللى حماتها بتقول عليها وكانت ماشية على نصائح دكتور الأطفال بحذافيرها ..

ودا طبعاً كان بيزعل الحاجة كوثر اللى كانت شايفه انها بتفهم احسن من اي دكتور

جنى تمت 8 شهور وبقى كل اللى بيجمع هاني ورانيا هو بس جنى ومش اى حاجة تانية

هاني يقعد يلعب مع جنى شوية وطبعا الشوية دول مش بيزيدوا عن نص ساعة رغم حبه لها وتعلقه بيها الا انه كان بيزهق بسرعة وباله مش طويل

ورانيا هى كمان بقى كل كلامها مع هاني طلبات

عاوزين بامبرز

النهاردة معاد الدكتور

الدوا الخافض للحرارة خلص

كله طلبات

وهاني في كل مرة تطلب فيها كان يتنرفز ويزعق وينزل من البيت

هو صحيح بيرجع بالطلبات اللى رانيا طلبتها بس بيرجع كمان بوش مقلوب ومكشر

ورانيا حاسه انها درجة رابعة بعد مامته وأخته وأصحابه

على طول خايفة تتكلم وعلى طول خايفه تقول رأيها

حتى خايفه تزعل او تترفز او تعبر عن غضبها كانت بتخاف من رد فعل هاني

كانت عارفه انه عصبي وومكن وقت غصبه او انفعاله يعمل اي حاجة

وعلشان كدا كانت بتتحاشاه لما يتنرفز وتسكت وتعيط من غير اى رد فعل

بس دا كله كان مش بيمر عليها سهل .. كانت في كل مرة تسكت فيها وتتحمل عصبيته بتفقد جزء من روحها وكرامتها وطاقتها وقدرتها على التحمل

وكانت دايما بتفكر لحد امتى الوضع دا هايستمر ؟؟

امتى هاتعرف تعيش حياتها ؟؟

هاتستنى كدا في وضع انتظار لحد ما تروح احلى سنين عمرها ؟؟

في يوم كانت بتطرح على نفسها الاسئلة دي للمرة المليون

وخدها التفكير ولقت نفسها متحمسة انا تناقش هاني وراحت له وهو قاعد على الكمبيوتر وقالت له : عاوزه اتكلم معاك

هاني رد بسخرية : خير يا رانيا عاوزه ايه ؟؟ فيه ايه خلص عاوزاني اشتريه ؟؟

رانيا : ياهاني انا بتكلم بجد .. لحد امتى هانفضل انا وانت بعيد ؟؟

هاني : بعيد ازاي يعني ؟؟

رانيا : انت فاهم وعارف اقصد ايه وعارف انك في وادي وانا في وادي تاني خالص

انت مش حاسس بينا ولا احنا حاسين بيك

وصل هاني لعصبيته المعتادة لما حد يناقشه في اى حاجة سلبيه فيه وابتدى يحتد على رانيا

وقالها : ياهانم روحي بصي لنفسك في المرايا وشوفي بقيتي عامله ازاي

انت ما بتسرحيش شعرك ولا بتحطي ميك اب الا لما تكونى خارجة من البيت دا إذا افتكرتي يعني

لما بتدخلى عليا مش بفرق بينك وبين بيبرون جنى من ريحة اللبن

ردت رانيا وودموعها سابقاها : وهو قبل ما جنى تيجي كنت يعنى هاني الملاك ؟؟ ما أنت بردو كنت سايبني لوحدى طول الوقت وكنت حتى بترفض اخرج معاك بحجة انى بقعد ساعات ألبس وأحط ميك اب

هو انت مش عاجبك كدا ولا كدا ؟؟

أنت دايماً ظالمني ياهاني ومعايا بشخصية ومع مامتك واختك بشخصية تانية معايا مسيطر وقاسي ومعاهم هادي ووديع ومطيع ومش بتكسر لهم كلمة ولا رأي وأنت فرحان ومبسوط

هاني رد بصوت عالي : يعني انا معاهم معدوم الشخصية ؟؟

رانيا : والله انا بقول اللى أنا شايفاه مش بجيب حاجة من عندي

كلام رانيا الجرئ لاول مرة مع هاني نرفزه جداً وافقده صوابه لدرجة انه مش حس بنفسه الا وهو بيرفع ايده وبيضرب رانيا بالقلم

نزل القلم على خد رانيا وكأنه غيرها وحولها لرانيا تانية

حتى ان دموعها توقفت عن النزول وبصت لهاني بتحدٍ وقالت له :

لو سمحت ياهانى ... طلقني

الى اللقاء فى الحلقه القادمه

بقلم : ابو احميد

هناك 36 تعليقًا:

ليالي مصرية يقول...

طاااااااااااااخ

وعنها وراح واخدها جوزين اقلام

كده ياريم طب ايه رايكم بقى الواد هاني ده لو ما طلعتوش عين اهله انا هاروح سايبالكم الرياسه دي بقى هههههههههههههههههههه

تسلم اديكى يا ريم ايوووووون هو كده الشغل اشتغل بقى

كلمات من نور يقول...

زجهة نظر موضوع ريحة الزوجة بيبرونة لبن وتتجمل للشارع في حين تقعد في البيت بريحة البيبي ووووووو

بس قلم ليه يا أبو حميد بس.؟؟

في انتظار الجزء الخامس

Noha Saleh يقول...

انا قرأت الحلقة 2و3و4 مرة واحدة
ماتتأخروش فى الباقى وخلوا رانيا تجمد شوية علشان جوزها ده رخم اوى

حاجات جوايا يقول...

وصلنا لطلب الطلاق فى الحلقة الرابعة
يا خووووووفى تنتهى الحكاية فى محكمة الاسرة هههههههههههه
الحلقة جميييييلة ياريم وواقعية لابعد الحدود
تسلم ايدك يا قمر


ندى الياسمين
شكلى كده ياريسة هعمل عليكى انقلاب
حاجزة حلقة من زماااااااااان وفى الاخر تسوحينى للحلقة ال14
خدى بالك بقى من نفسك الايام دى .. قد اعذر من انذر ههههههههههههه

sony2000 يقول...

يالهوتيييييييييييي
فالحلقه الرابعه واتضربت
امال فالحلقه 14 هيعمل ايييييه
لاااااااااا
ويييين قانون الاسره الجديد
الواد دا هيتقتل
هههههههه
لا بجد حلقه حلوا
وربنا يسترها عليا

Unknown يقول...

حلقه حلوه أوي و واقعيه أوي أوي بجد تسلم ايدك يا ريم
و هي دائماً كده البنت الطيبه اللي بتتحمل بيجي لحظه بعدها بتبطل طيبه و استحمال
و هاني ده أنا عاذراه المشكله كلها في الحاجه كوثر و تربيتها
أشكركم على ادراج اسمي في جدول الليالي و في انتظار القلم قصدي الحلقه الجايه

Tota يقول...

هانى ده لازم يتربى ويندم على كل لحظة عذب فيها مراته واتخلى فيها عن بنته لازم يدوق طعم الدموع وعذاب السهر والم الوحدة علشان يتعلم الدرس هو والست والدته الله يسامحها هى وكل الامهات اللى بيسيئوا تربيه اولادهم الصبيان
اما بالنسبة لرانيا فلازم تجمد وتشد حيلها كده وتستغنى عن هانى ده وترد له ولأمه الصاع صاعين وتقف على رجليها من غير مساعدة حد وزمن الدموع ده لازم ينتهى ماحدش بيقف جنب حد الزمن ده كل واحد بس هو اللى بيشيل نفسه لازم تخليهم يعتذروا لها و يسفوا التراب لحد لما تبقى تفكر تحن عليهم وتسامحهم
اكتر حاجة باكرهها فى الدنيا ذل الناس للبنى ادم المحترم
شكرا على سعة صدركم واسفة لتطفلى عليكم.. انا متابعة من زمان لكن القصة دى استفزتنى بجد

حنعيش يعنى حنعيش يقول...

باشا والنبى باشا ... حلقة روعة وعجبانى جدا جدا جدا .... تسلم ايدك ... احب انا التدبيس للى حيكتب بعدى ..

ياابو حميد ...حل المشكله ياجميل ... وورينا القوة

غير معرف يقول...
أزال المؤلف هذا التعليق.
Remas يقول...

ليالي مصرية
ندى انتى عارفه بقى انا مش عندي صبر
ههههههههههههههه

واكيد ابو حميد هاياخد حق رانيا

تسلم ايديكى انتى يا توتة
كفاية انك صلحتى النفي المقلوب بتاعي
ههههههههههههههههه
وشلتى اى ( مش ) من قبل الكلمة ورجعتيها وراها

ههههههههههههه

بجد انتي سكر والله

تسلمى لى ياقمر ومعلش بقى انا متعبة دايما كدا

Remas يقول...

كلمات من نور

ازيك ياقمر عامله ايه ؟؟

هو ابو حميد بريد بصراحة من القلم

لان انا اللى كتبت الحلقة وانا السبب في القلم مش ابو حميد
هههههههههههههههه

بس ايه رأيك في الزوجة شبيهة البيبرون ؟؟

منورانا يا حبيبة قلبي

Remas يقول...

Noha Saleh

هلا يا نهى منورة والله

وحااااضر يا توتة هانخليها تجمد اكيد
واكيد اللي هايكتبوا الحلقات القادمة مش هايسيبوا رانيا ساكته كدا

Remas يقول...

حاجات جوايا

اهلا بيكى حبيبتى
انتى وحشانى جدا

ايوا طبعا طلاق في الحلقة الرابعة
انا قلت بقى لسا هايتخانقوا ويتناقشوا
هو قلم وطلب طلاق وخلاص ويبقى في سسبنس كدا
هههههههههههههههههههه

وحشاني بجد

Remas يقول...

sony2000

ميرسي ياقمر انتى الاحلى

ايوووا اتضربت في الحلقة الرابعة

وفي 14 يمكن يتصالحوا ويبقوا كويسين

هنا الحلقات دايما فيها مفاجآت

عامله ايه يا سوني ؟؟
واخبارك ايه حبيبتي ؟؟

Remas يقول...

شيرين سامي

تسلمي يا شيرين يااارب
ربنا يخليكي يا حبيبتي

فعلا كلامك صح والطيب مهما كان هادئ الا انه بيجى وقت وصبره ينفذ ويبتدى يحتد ويقول اللى جواه

وهاني فعلا مش هو سبب مشكلته

وعلى فكرة انا بردو شايفه ان حتى رانيا مشاركة في الغلط
الاتنين مسئولين وان اختلفت النسب

نورتينا في الحلقات وفي انتظار حلقتك يا قمر قريبا بإذن الله

Remas يقول...

Tota

يا حبيتي انتى منورة ووجودك اسعدني واسعد كل اهل الليالي اكيد

ومتابعتك تشرفنا وتهمنا

ومش توصينا يا توتة الناس هنا مش بيسيبوا حق حد مش محاتجين توصية يعني
هههههههههههههه

منورانا يا توتة وتعليقك فرحنى جدا

Remas يقول...

حنعيش يعنى حنعيش

يا دكتور حضرتك اللى باشا والله

ميرسي على رفع معنوياتي المستمر والدائم

انا بستنى بجد الكومنت بتاع حضرتك بفارغ اصبر

انا كنت خايفه من ابو حميد علشان موضوع القلم دا
بس هو الحقيقة عنده سعة صدر وخد الامر عاااااادي ومش زعل منى ولا حاجة
هههههههههههههههه

ابو حميد اصله واثق من امكانياته وعارف انه ادها وقادر على الخروج من اى موقف بسهولة

ميرسي لحضرتك جدا جداااااااا

Remas يقول...
أزال المؤلف هذا التعليق.
ستيتة يقول...

علي النعمة انا سمعت الحلقات دي قبل كده
مصرية مصرية
لحد
أن أن تشششششششششششششششششششش
قصة القلم
لأ دي مسمعتهاش خالص
دي قصة محتاجة وقفة
وقفة رجالة :)
تسلم ايدك يا ريما

shimaa elkholy يقول...

معلش يا سالي والله نسيت ولما جيت احط دورك بقى
ما عرفتش احطك قبل مين قلت هايزعلوا

فمعلش بقى حقك عليا انتى عليكى الاستحمال

انا ليا دور بعد ابو احميد مكان ستيته عشان اعتذرت

لو عايزاه يا بطه انا تحت امرك

just dream يقول...

حقيقى راااائعه منتظرين الباقى ومتابعينكم دايما
اما موضوع القلم اللى نزل على رانيا ده فبجد انا حسيت انه جرحنى انا وبيجرح اى بنت لانها حقيقى بتحس انها ولا حاجه
يلا اهى تستاهل مش هيا اللى اختارت لو كانت فكرت مره بعقل مكنش ده اللى حصل
سلمت اقلامكم

البنفسج الحزين يقول...

يا جدعان هاني ده لازم يتربي يضربها ازاي يعني هي رانيا ملهاش رجاله ولا ايييه...هي بنات الناس لعبه...
هههههههه
أبو حميد ...دي مسؤليتك عايزينك تجيب لنا حق رانيا وتوري هاني الرخم الغلس ده العين الحمرا ...
حلقه حلوة قوي يا ريم تسلم ايدك...

أحمد عبد الحميد يقول...

إيييييييييييييه
هى رانيا دى لاقينها على باب الجامع؟
دى ليها مدونين رجالة حيقطعوك
يا واد يا تيييييييييييييييت

أحمد عبد الحميد يقول...

تسلم إيديك وكيبوردك يا ريم
الحلقة حلوة قوى
بجد
:)

Remas يقول...

ستيتة حسب الله الحمش

عندك حق يا ستوتة هى صناعة محلية %

شفتيني يا ستوتة وانا شريرة ؟؟

هههههههههههههه

تسلمي يارب ياقمر
واكيد رجالة الليالي هاياخدوا حق رانيا

وحشتيييييييني اوي

Remas يقول...

قول ياااارب

واحنا تسعدنا متابعتك وتعليقك

اكيد القلم مهين وجارح
ولا تقلقي ابداااااا
ابوحميد هاياخد حق البنت اكيد

تسلمى ياقمر على رأيك ومتابعتك وكلامك الجميل

Remas يقول...

البنفسج الحزين

ازيك ياقمر ؟
عامله ايه ؟؟
تسلمي يا توتة بجد ومبسوطة انا ان الحلقة عجبتك

ابو حميد مش هايقر وهاياخد حقها ان شاء الله

ميرسي اوي اوي لكِ

Remas يقول...

ابو حميد

هلا بأبو حميد

الناس كلها منتظرة الحلقة بتاعتك على أحر من الجمر

وانا عارفه انك مش هاتسيب حق رانيا

وميرسي خالص خالص يا فندم على رأيك في الحلقة

في انتظار الحلقة غدا ان شاء الله

هبة فاروق يقول...

هى الرجالة مالهم كدة مش عاجبهم العجب لية عايزين كل حاجة فى الست
تبقى مية مية حتى لو كانت عندها ظروف
بلا هم
عجبتنى مدونتك يا قمر ومتبعاكى سلام

الجواز و سنينه يقول...

هايله يا ريما
تسلم اديكى يا قمر
و عماله تقوليلى مش عارف ايه
يا بنتى انتى ابدعتى و الله
مش عارفه ابو حميد فعلا هايعمل ايه
ربنا معاك و يقويك على المزنق ده
تسلـــــــــــم ايدك يا عسل

Remas يقول...

هبة فاروق
اهلا بيكى يا هبة منورانا ياقمر

المدونة بتاعة ناس كتير هما اهل الليالي العسولين الكرام و كل حد فينا بيكتب حلقة والمدونة دي عمل جميل مشترك بينا كلنا

ولا الرجالة ولا الستات حد فيهم عاجب التاني

هى الدنيا كدا فعلا

منورة ياقمر

Remas يقول...

الجواز وسنينه

ربنا يخليكى يا حبيبة قلبي
دايما كدا واقفة جنبي ومناصرة ليا وبتجاملينى

هههههههههههههههه
ضحكتيني والله لما قلتي وعمالة تقوليلى مش عارف ايه
ههههههههههههههه
سكر انتى والله ياتوتة

منورة الليالي كلهااااااا يا قلبي

momken يقول...
أزال المؤلف هذا التعليق.
momken يقول...

الاحداث واقعيه جداً
اشعر مع هذه الحلقه انى ارى احداث حقيقه
واشخاص حقيقون
موجودين فى بيت مصرى جدا

اشفق جدا على هانى فقد ظلمته انثى (كوثر) وظلم انثى(رانيا)
بقياس بيسط
نجد انها انثى ظلمت انثى

لكن بغض النضر عن اى شىء
ارى ان الرجل الذى يلجأ للضرب هو رجل عاجز...وهو شاهد على عجزة

تسلم ايدك حلقه ممتعه جدا
وهربتى ببراعه من فخ الملل
ايوة كان فى ضرب وطلاق لكن يشهد لك يتجنب الملل فى الصرد

تحياتى

Remas يقول...
أزال المؤلف هذا التعليق.
Remas يقول...

momken

أهلا بكَ ممكن في الليالي

ميرسي جدا جدا على رأيك في الحلقة

وصدقت جدا جدا
فالأنثى بتربيتها للرجل ( ابنها ) اما ان تظلم انثى او تنصفها وتسعدها

عجبنى جدا قولك انثى ظلمت انثى

وبصراحة فضّلت ان اخرج من الهدوء حتى تنفعل رانيا وتتغير الاحداث

اسعدنى تعليقك الثّري

ميرسي للمرة الثانية ونورتنا يا فندم