الاثنين، 29 نوفمبر 2010

أين انا ؟ الحلقه السابعه

أين انا ؟ الحلقه السابعه

بقلم : خواطر شابه

هاني مفتحش بقه بكلمة فضل باصص لهيام وبعدين لف وخرج تاني من غير ولا كلمة شكله كان عامل زي اللي خذ قلم على غفلة

الحاجة كوثر من جوه : هيام مش هاني ده اللي جه هو فين

هيام : خرج ياماما

الحاجة كوثر : ايه الولد الطايش ده ياربي هو جه في ايه وخرج في ايه

هيام : انا قلت له اني كنت عند رانيا وانها بلغتني انها حامل و....

قاطعتها الحاجة كوثر : حامل!!!! هي لحقت مصيبة ايه دي ياربي يا حبيبي يا ابني حتلاقيها من ايه ولا ايه

***********

هاني خرج من غير ما يعرف هو رايح فين فضل ماشي في الشارع وكل شوية يقول لنفسه يارب حمل تاني ووحم وولادة ايه الحظ ده بس ياربي أنا لازم افكر في حل الحمل ده مش لازم يستمر ده حتى جنى لسه صغيرة وانا كمان مش حمل عيال ولا حمل مسؤولية كفاية علي جنى ثم

وهو يمسك رأسه بين يديه :لازم رانيا تتخلص من الحمل ده مفيش حل غير كده بس ازاي??

ويرجع يستعيذ بالله من الشيطان الرجيم

ويقول :ايه ده يا ابني انت حتكفر"

بس يرجع يفتكر رانيا وبطنها المتكعبرة والمستشفى والولادة والمصاريف يرجع تاني يقول لا لازم الاقي حل لازم

***********

رن تلفون رانيا وردت « الو رحاب ازيك”

رحاب : رانيا اعملي حسابك حأعدي عليك النهارده بعد الظهر نخرج نشم هوا خلينا نرجع ايام زمان والله لها وحشة”

رانيا : طيب وجنى مين حيقعد بها انا يابنتي خلاص محكوم علي بقعدة البيت قال نرجع ايام زمان قول للزمان ارجع يازمان

رحاب : ليه يابنتي التشاؤم ده بنتك ماشاء الله عدت التمان شهور يعني ممكن تخرجيها معاك عادي انت ليه بتعقدي الامور

رانيا: طيب خلاص بس حنتقابل فين

رحاب : كافيه الامل اللي كنا بنتقابل فيه ايام الكلية انتي فاكراه?

رانيا : اكيد يارحاب فاكره وهي دي ايام تتنسي

رحاب : ايوه قبل ما سي هاني يمنعك تقعدي معانا بحجة انه بيغير عليكي

رانيا بتنهيدة : ايوه كان بيغير عليا

************

شريف صحي الصبح وقبل مايقوم من فراشه رن تلفونه « الو مين معايا » رد اللي على الطرف التاني من الخط « صباحوا يا عم شريف مالك نسيتني انا خالد »

شريف « اه خالد يا عم انا لسه صاحي لسه مش شايف قدامي »

خالد « عندي لك حتة شغلانة سقع قلت اكلمك يمكن يكون لك في الطيب نصيب »

شريف « طيب استناني على القهوة انا جاي حالا »

بعد شوية وصل شريف عند خالد في القهوة اللي متعودين يقعدوا عليها

شريف « خالد خير ياابني شغلانة ايه دي اللي انت جايبها »

خالد « فيه واحدة ست عندها محل اكسسوار ومستحضرات تجميل اشترت محل جنب محلها وحابة تتوسع وتفتحهم على بعض انا قلت احنا اولى بالسبوبة دي »

شريف « اكيد احنا اولى بس مقلتليش انت تعرفها منين »

خالد « انا معرفهاش بس حد معرفة هو اللي اداها نمرتي وهي اتصلت بيا وفهمتني على المطلوب هاه قلت ايه »

شريف « ماشي يا معلم كلمها وحدد لنا معاد »

خالد « حالا يا لورد استنا ثواني أطلبها »

خالد “ الو مدام عليا”

**************

رانيا كان واضح عليها انها مشغول بالها وكمان كانت علامات التعب باينة عليها ولان في بيتهم كالعادة محدش واخذ باله من حد مفيش حد انتبه للتغيرات اللي بانت عليها ولا لغممان النفس اللي كل شوية بيجيها ولا لقلة أكلها

نجاة مشغولة كالعادة بين شغلها والبيت

والحاج كارم يوم موجود وايام في البلد وحتى لما بيكون موجود كلامه كله بيكون عن مشاكل البلد وعن أهلها

اما باسم فده حكايته حكاية اوقات رانيا بتمسك نفسها من انها انها تشده من كتافه وتقول له انت حزين ليه انت عامل في نفسك كده ليه انت ربنا بيحبك انك متزوجتش ياريتني انا اللي مكانك,

ده حتى شريف اللي طول عمرها بتقول انه الاقرب ليها ما أخذش باله من حاجة يدوب كل ما يدخل الشقة يرمي السلام ويخش مهدود حيله ينام

******************

صحيت رانيا من النوم على صوت عياط جنى فتحت عينيها لقت الشمس طالعة واضح انها عدت عليها نومة ومن كثر تعبها محستش بالوقت فضلت على سريرها شوية وبعدين قامت على وشالت جنى وهي تقول استعنا على الشقا بالله

خرجت من اوضة النوم مفيش صوت في الشقة باين ان كلهم خرجوا مفيش غير شوية نور خارج من اوضة باسم واضح انه هو كمان صاحي بس كالعادة قافل عليه

فجاة جرس الباب رن راحت تفتح وهي بتقول ياترى مين اللي حيزورنا بدري كده وأول ما فتحت الباب فضلت ثواني ساكته بتبحلق في اللي كان وراء الباب وبعدين بصوت متفاجئ .........هاني!!!!!

الى اللقاء فى الحلقه القادمه

بقلم : أمير الحب

هناك 22 تعليقًا:

ليالي مصرية يقول...

خواطر

تسلم اديكى يا جميل الحلقه تمام اوي

وبعدين ايه ده بقى

علياء ايه الى جابها هنا دلوقتي ههههههههههههههههه

ماشي لما نشوف اخرتها معاكم

تسلم اديكى يا جميل

sony2000 يقول...

طب انا عاوذالي حلقه كدا حونين بمناسبه نجاحي
ممكن
ولا هطحن؟

كلمات من نور يقول...

أنا تهت شويتين بس ركزت وجمعت وفي الاخر وصلت

متابعه معاكم

Noha Saleh يقول...

هو هانى ده مش هيتعدل يعنى
لما نشوف بقى اللى هيحصل
بس طولوا الحلقة شوية:)

shimaa elkholy يقول...

نداء الى امير الحب

اظهر وبان عليك الامان

تظهر وتبعتلي اميل على اميل المدونه لانى ما اعرفش اميلك

وتكتب الحلقه بدري من فضلك ما تبعتهاش على اخر لحظه عشان لو فى حاجه عايزه اناقشك فيها نلحق نناقشها

خد بالك كويس الرئيس الجديد مفتري
هههههههههههههه

shimaa elkholy يقول...

سونى انتى اسمك مكتوب اصلا فى الحلقات

عايزه دور جديد غير ده ؟؟

ولا ايه مش فاهمه

Unknown يقول...

حلوه أوي الحلقه و فيها حبكه دراميه هايله
في الانتظار

خواطر شابة يقول...

ندى الياسمين
ههه بخصوص عليا حبيت اعمل شوية اكشن خليها تولع بين شريف وهاني
مع ودي عزيزتي

خواطر شابة يقول...

سوني
مبروك النجاح حبيبتي
انت عندك في الجدول الحلقة 12 لو عاوزة قبل كده شوفي مع الست الريسة اذا كان ممكن

خواطر شابة يقول...

كلمات من نور
شكرا للمتابعة بس انت مقلتيش انت تهت في انهي حتة من الحلقة

خواطر شابة يقول...

Noha Saleh
هاني محتار ومش حمل مسؤولية ولا ولاد بس لما هو كده ايه اللي وداه للزواج كان يخليه دلوع ماما ولا حد يقدر يكلمه

خواطر شابة يقول...

شيرين سامي
شكرا على رأيك المشجع
تمنياتي بدوام المتابعة
مع ودي

حاجات جوايا يقول...

جميلة يا خواطر
عجبنى توضيحك لافكار هانى واحساسه بانه هيشيل تانى مسئولية مش ادها
فى انتظار معرفة الحوار اللى دار بينه وبين رانيا
تحياتى

خواطر شابة يقول...

حاجات جوايا
شوفي مع ندى لو في امكانية تأخذي انت الحلقة التاسعة كي لا تكون حلقاتها متقاربة ففي هذا ضمان للتجديد وتنوع الافكار

خواطر شابة يقول...

ندى الياسمين
سيادة الريسة لو في مجال تتبادلي المواقع للحلقات المفترض كتابتهاانت وحاجات جوايا كده حتدخل دماء جديدة للحلقات
ده اقتراح ولمحكمتكم الموقرة واسع النظر ههه

أحمد عبد الحميد يقول...

خواطر
حلوة الحلقة
دائما أسلوبك سلس وجميل مع وجود خط جديد فى حلقاتك دائما
ياترى شريف حيعمل إيه مع الست دى؟ :)

shimaa elkholy يقول...

خواطر

اخس عليكى يعنى انا دمي قديم انا متجدده على طول ههههههههههههه

انا عرضتها قبل كده على سالي ما ردتش

انا الحلقه الى فاتت كاتباها بدل ستيته

وعموما هانشوف

shimaa elkholy يقول...

امير الحب اذا الحقه ما وصلتنيش لحد باليل انا هاسند الحلقه لحد غيرك

ويارب الاقي حد اصلا

الشعب ده متدلع وربنا

خواطر شابة يقول...

ندى الياسمين
والله عزيزتي انا مقدرة هموم الرئاسة وحاسة بيكي بس برضه ده مشروعنا ولازم ندعمه عشان ينجح ويستمر فصبر جميل والله المستعان
بخصوص الحلقة لا والله مش قصدي انا بس حابة ناس جديدة تكتب يمكن تفتح افاق جديدة لان كل واحد فينا عندو تصور للقصة لكن تعدد الكتاب هو اللي بيخلي القصة تروح في حتت تانية مكناش حتى متوقعينها فهمتيني هو انا استجري اقول على سيادة الريسة دمها ثقيل ده حتى يبقى معنديش دم ههه

خواطر شابة يقول...

ابو حميد
سعيدة ان الحلقة أعجبتك ورأيك أعتز به جدا
شريف بقى انا سبته لكم اعملوا فيه مابدالكم بس انا متوقعة مشاكل بينه وبين هاني

خواطر شابة يقول...

ندى الياسمين
هل توصلت بحلقة أمير الحب?

خواطر شابة يقول...

ندى ايه اخبار الحلقة?