الخميس، 2 ديسمبر 2010

أين انا ؟؟ الحلقة الثامنه

تنويه اداري :
الحلقه دي كان المفروض يكتبها امير الحب ومعادها مقرر من بداية الحلقات وغيرنا المواعيد بعد اجازة العيد واعلنا ده
وامير الحب ما استجابش ودبسني اخر حاجه بصراحه لانى لسه كاتبه الحلقه الى قبل الى فاتت
وفضلت اقول يا ولاد الحلال الى عايز يكتب حلقه ... عموما الى كتبت الحلقه عضوه جديده جميله اوي هي منى ابو السعود
وانا بصراحه بعد ما قريت كتاباتها نشنت عليها وقلتلها هانجبوكي معانا فى الليالي يا شابه ..... وقد كاااااان ودبسناها ولله الحمد ... اهلا يا منى بيكى معانا فى اسرة الليالي ومنورانا
وبالنسبه للاخ امير بقى لو ماظهرش وابدى اعتذار باسباب معقوله ومقبوله سيطبق عليه عقوبات التاخير المنصوص عليها فى الدستور
اهي فوق روحوا شوفوها

الحلقه الثامنه

بقلم : منى أبو السعود

رانيا اتفاجئت اوي مكانتش متوقعة تلاقي هاني قدمها ، اول ما شافته شريط طويل عدي قدام عينيها من اول حبها ليه لغايه القلم اللي صدمها .

رانيا فضلت متلخبطة مش عارفة تفرح علشان جالها لحد عندها ما هي بتحبه برضه ولا تكشر في وشه علشان مش قادرة تنسي ازاي ضربها .فضلت بصاله و ساكتة راح هاني اتكلم و قالها : ايه انا هافضل واقف كده مافيش اتفضل ؟

و قام واخد منها جني و بيقولها : جني وحشتني اوي البيت وحش من غير ضحكتها . و فضل يبوس في البنت و يحضنها.

رانيا فاقت من اللي هي فيه و قالتله : اسفة اتفضل

دخل هاني علي الصالون و قعد رانيا فضلت واقفة علي باب الصالون و ساكتة

هاني : انتي هاتفضلي واقفة ايه ماكنتيش عاوزه تشوفيني ؟

رانيا محتارة اوي في مشاعرها بين انه واحشها اوي و انها زعلانة منه و صعبان عليها نفسها.. مش عارفة تقوله وحشتني و تروح لحضنه و لا تقلب وشها و تفضل مأموصه.

هاني حس انها محتارة ما هو عارفها كويس و علشان عارف ان قلبها طيب لعب علي كده وقالها

هاني : رانيا انا أسف اني ضربتك بس انتي نرفزتيني اوي و ما انا ما كنتش حاسس بعمل ايه سامحيني البيت وحش اوي من غيرك

"طبعا علشان مش لاقي اللي يتّدلع عليه و يتأمر"

رانيا شافت كده ابتدت تحن ماهو البيه بيسهوك لها و حست انه ندمان علشان ضربها و مش عارف يعيش من غيرها ، بس ازاي تسامحه علي طول كده ، و ازاي يجي الصبح كده و هو عارف ان باباها مش البيت مش لازم يحترم صاحب البيت فراحت قالتله:

طيب يا هاني فهمت انك ندمان بس ليه جيت دلوقتي مش كان لازم تيجي و بابا هنا ؟

هاني : انا حبيت اصالحك انتي و مايهمنيش غيرك انت و جني و ابننا اللي جاي " قالها بحنيه اوي "

بس هو طبعا جه الصبح علشان ميضطرش يواجه حماه او اخوها شريف .

رانيا طبعا اتأثرت بحبتين الحنية دول و هاتك يا عياط ، هاني لما صدق عرف انها خلاص حنت و سهل تسمع كلامه و قالها :

يالا يا حبيبتي علشان نرجع بيتنا بقي . رانيا : طيب مش نستني بابا .

هاني و نستني ليه هو انتي مش مراتي هاستأذن علشان اخد مراتي اقولك كلميه في التليفون .

و رانيا رايحه تتكلم في التليفون افتكرت كلام هيام ليها ........................

رانيا : انا مش هارجعله تاني انا اتهنت اوي .

هيام : انا مقلتلكيش ترجعي انا عارفة اخويا كويس و عارفة عيوبه متدلع و اناني علشان كده لازم يتربي و ياخد علي دماغه علشان ميمدش ايده عليكي تاني و لازم يعتذرلك قدامنا كلنا.

رانيا راجعت نفسها لما افتكرت الكلمتين دول و رجعت لهاني قالبه وشها .

هاني اتفاجئ بشكلها قالها مالك . رانيا انا مش هانزل معاك يا هاني مينفعش تمد ايدك عليا و الموضوع يعدي كده عادي انت لازم تعتذرلي قدام الناس كلها اهلي و اهلك . و شدت جني من ايده .......

هاني اتنرفز و قالها : هو لعب عيال انتي مش كنتي نازله معايا ايه اللي غيرك

رانيا : انا خلاص شويه السهوكه بتوعك دول مايخشوش عليا انا خلاص مش هاستحمل انانيتك و دلعك دول تاني انا عايزه احس اني متجوزه راجل يشيل همي مش انا اللي اشيل همه .

هاني اتنرفز اكتر و قالها رانيا لو مجتيش معايا دلوقتي مش هتشوفيني تاني

بمنتهي التحدي رانيا ردت عليه: انت حر انت اللي عملت كده و ضربك ليا مش هيعدي بالساهل

هاني خرج شايط و رزع الباب وراه ..........

---------------------------------------------------------------------------------------

في الوقت ده كان شريف اخوها و صاحبه خالد رايحين معاد مدام عليا " عليا اياها " دخلوا المحل لقوا واحدة انما ايه صاروخ علي راي خالد قامت رحبت بيهم و عرفتهم بنفسها و فضلت تتكلم معاهم علي طلباتها و ايه الشغل اللي عايزاه منهم بس كانت في نفس الوقت ما بتشيلش عينيها من علي شريف . خالد اخد باله قال لشريف و هما قايمين يعاينوا المحل التاني اللي فيه الشغل :هنيالك يا عم المدام واخده بالها منك اوي . شريف ضحك و قاله: يا عم كبر خلينا في شغلنا

خالد: و ماله يا عم سبوبه و صاروخ زي ده معاها مايضرش

شريف: بقولك ايه انا ماليش في الكلام ده خلينا في شغلنا

و خلص المعاينه بتاعته و رجع لعليا يتفق معاها علي المقاولة بس هي استأذنت منهم علشان وراها معاد مهم و ادت شريف رقم تليفونها علشان يكلمها يتفقوا . .......!!

---------------------------------------------------------------------------------

هاني نزل متنرفزو متغاظ من نفسه اوي عمال يكلم نفسه انا استاهل انا غبي اني سمعت كلام بابا و ماما انا كان مالي خليها في بيت ابوها و انا مريح دماغي حاجة تقرف و افتكر كلام والده لما قعد معاه هو و الحاجة كوثر .............

الحاج محمد: شوف يا هاني عمايلك دي مش عجباني انت مش لسه عيل صغير تغلط و نقول معلش

هاني: فيه ايه بس يا بابا انا عملت حاجه

الحاج محمد : كل ده و ماعملتش حاجه تهين مراتك و تضربها و سايبها في بيت اهلها كل ده و مفكرتش تسأل عليها هي و بنتك ايه انت واخدها من الشارع عيب عليك و علي تربيتي ليك

الحجه كوثر تحاول تخفف التوتر : معلش يا حاج ما هي برضه غلطت فيه

الحاج محمد : يا سيتي بلاش كلامك ده هو اللي بيمرع ابنك ما هو يا ما الناس بتتخانق هو انا عمري مديت ايدي عليكي في خناقة عيب كده ميصحش.

الحاجة كوثر : معاك حق يا حاج بس خلاص بقي عفا الله عما سلف و هاني عرف غلطته و هايروح يصالح مراته

برضه الحاجة كوثر مش عايزه هاني يتهزأ بس عايزاه يصالح مراته ما هي مش ماري منيب اوي يعني، برضه يهمها بيت ابنها ما يتخربش.

هاني قالهم : يعني عاوزيني اعمل ايه دلوقتي ؟

الحاج محمد : تروح لمرتك تطيب خاطرها و ترجعها البيت من بكره و الا انت حر .

هاني : حاضر يا بابا.

هاني طبعا ندمان دلوقتي انه سمع كلامهم و فضل ماشي مش عارف يروح فين ...........

ومسك تليفونه و اتصل بعليا ..............

الى اللقاء فى الحلقه القادمه

بقلم : ريم

بس خلاص كده يلا انزلوا شوفوا الحلقه

هناك 40 تعليقًا:

ليالي مصرية يقول...

الحلقه جميله يا منى

وبجد شكرا انك اخدتي الحلقه وانا عارفه انك عملتي كده عشان احنا كنا مزنوقين

والحقيقه ريم كمان عرضت عليا المساعده

بس انا دبستها فى الحلقه الى بعديكى عشان خاطر خواطر والدم الجديد وكده هههههههههههه

والحلقه بتاعتك بجد جميله وحلوه اوي احساسك برانيا الملخبطه دي

وعجبنى تطورات عليا وشريف مووووووت

وكمان موقف اهل هاني

تسلم اديكى

Mona Abo - Elso3od يقول...

اولا :انا ما كنتش اقدر ارفض لك طلب و يا بخت من فك زنقة اخوه
ثانيا : بجد شكرا للتعليق الجميل ده علي الحلقة
بس دي اول مرة اكتب حاجة بالشكل ده و فعلا قلقانة من رد الفعل بس انتي كده طمنتيني شوية ، ويا رب تعجب اهل الليالي المصرية.

حنعيش يعنى حنعيش يقول...

منى
حللت اهلا ونزلت سهلا ... ايوة كدة عايزين دماء جديدة عبقرية واحساس ... تسلم ايدك واهلا وسهلا بيكى
ياست الريسة ... بحق جاه حبيبك النبى .. القانون قانون ... وقانون الليالى مافيهوش معلش وعلشان خاطرى .. وانتو ماتعرفوش انا مين ... والكلام دة ... القانون سيف على الكل ... والنبى والنبى

حاجات جوايا يقول...

اهلا بيكى يا منى عضوة جديدة فى اسرة الليالى
الحلقة جميلة اوى اوى
واسلوبك فعلا رائع ومشيتى مع الاحداث وصفات الشخصيات كويس جدا
تسلم ايدك يا جميل
احجزى بقى حلقات جديدة
نورتينا حبيبتى

شيرين سامي يقول...

تسلم ايديك يا منى الحلقه هايله و طبيعيه موووت

كلمات من نور يقول...

ما شاء الله يا منمن مسكيتي الخيط وفي ثواني غزلتي من القصة نسيج جديد وخاص بيكي ....بجد تسلم الايادي والقصة بقت اكشن جميل

في انتظار المزيد منك في الليالي المصرية

Noha Saleh يقول...

بجد برافو عليكى يامنى الحلقة تحفة والله

karmen يقول...

رووووووووووووووووووووعة يامني
بجد خطيرة تسلم ايدك حبيبتي

Mona Abo - Elso3od يقول...

في البداية قبل ان ارد علي التعليقات المشجعة للغاية و التي اسعدتني كثيرا ، يجب ان اتوجه بالشكر لرئيس الليالي ندي الياسمين لمساعدتي في افكار الحلقة و معايشتي لها و لولا مساعدتها ما خرجت الحلقة بهذا الشكل
فضل يجب ان ينسب لاهله
شكرا يا ريسه

خواطر شابة يقول...

منى ابو السعود
اهلا بك عزيزتي في اسرة الليالي اعجبتني الحلقة واعجبني ايقاعها
ايضا اعجبني توضيح التخبط الذي تعيش فيه منى في علاقتها بهاني وطبيعة تصرفاتخا معه
التطور في خط شريف عليا هاني عاجبني وموحي بأحداث كثيرة ستحرك القصة
أهلا بك عزيزتي عضو جديد في اسرة الليالي وسيسعدنا اكثر لو كان الانضمام نهائي وليس فقط فك زنقة بمعنى تحجزي حلقة جديدة
دمت بكل الود عزيزتي

سندباد يقول...

جميل جدا السرد والفكرة وفي انتظار المزيد منكم انشالله
تقبلا مروري الاول تحياتي الخالصة

خواطر شابة يقول...

ندى الياسمين
ست الريسة دمت ذخرا لنا في المواقف الصعبة وانت قدها وقدود
ههه شفت ان كان عندي حق في حكاية الدماء الجديدة ورب ضارة نافعة غياب امير الحب اللي نتمنى ان المانع يكون خير خلانا كسبنا عضوة جديدة في اسرة الليالي.
بخصوص امير الحب في مرحلة اولى لازم نعرف ظروفه ايه بعد كده وعلى ضوء هذه الظروف يكون القرار
دمت بكل الود عزيزتي

Mona Abo - Elso3od يقول...

حنعيش يعني حنعيش
شكرا علي الترحيب الجامد ده
و اتمني اكون عند حسن ظنكم

Mona Abo - Elso3od يقول...

حاجات جوايا
شكرا علي ذوقك
و الحمد لله ان اول محاولاتي عجبتكم
و ان شاء الله احجز معاكم حلقة جديدة
ده شرف ليا
تحياتي

Mona Abo - Elso3od يقول...

شيرين سامي
شكرا علي رايك و ان شاء الله في انتظار الحلقة بتاعتك اكيد هاتكون افضل
تحياتي

Mona Abo - Elso3od يقول...

كلمات من نور
ربنا يخليكي ليا دايما مشجعاني في كل كتاباتي .
يا رب اكون دايما عند حسن ظنك بيا
تسلميلي يا رب

Mona Abo - Elso3od يقول...

Noha Saleh
ربنا يخليكي يا نهي
من بعض ما عندكم
شكرا لذوقك

Mona Abo - Elso3od يقول...

karmen
ربنا يخليكي ليا
و نورتي الليالي

Mona Abo - Elso3od يقول...

خواطر شابة
شكرا علي تعليقك المشجع
و ان شاء الله اكمل معاكوا بعد اذن الريسة طبعا :)
تحياتي

Mona Abo - Elso3od يقول...

سندباد
اهلا بيك في الليالي لاول مرة

اسمحولي يا اهل الليالي ارحب بسندباد ترحيب خاص لانه كاتب خاص جدا و يشرفني وجوده.

شكرا لتلبية الدعوة بزيارة الليالي و سعيدة انها عجبتك
تحياتي الخالصة

البنفسج الحزين يقول...

أولا:اهلا بيكي يا مني عضوة جديده في
الليالي ..
ثانيا :تسلم ايديكي بجد الحلقه جميله قوي وخط شريف عليا ده خط واعد جداوينفع تتبني عليه احداث كتير
برضه عجبتني قوي رانيا لما فاقت من اثار السهوكه في الوقت المناسب ومرضيتش تروح مع هاني بالسهل كده أمال ايه يا أوختشي لازم يعرف قيمتها علشان ميزعلهاش تاني هههه ...
تحياتي

Wise يقول...

الله عليكم بجد القصه حلوة
اى نعم انا جيت متاخرة
بس المهم انى جيت
وطبعا يامنى انتى عارفه رايى فى طريقتك واسلوبك
وبشكرك انك عرفتينى على القصه الجميله ده
ان شاء الله متابعه معاكم
بس انا برضه لسه مصرة انى اشوف لك انتاج جديد وحلقات طوييييله بس من غير حزن
فى الاخر علشان انا طولت عجبتنى الفكرة جدا ياجماعه وماشاء الله القصه كلها حلوة

Mona Abo - Elso3od يقول...

البنفسج الحزين
شكرا علي ترحيبك بيا وعلي رايك في الحلقة
اما عن موضوع السهوكه معاكي حق لازم الزبون يتربي :)
و اللي ساعدني علي الفكرة دي الريسه لازم اشكرها علي توجيهاتها
و يارب دايما اكون عند حسن ظنكم
تحياتي

Mona Abo - Elso3od يقول...

wise
نورتي الليالي لاول مرة و ان شاء الله مش الاخيرة
سعيدة ان الليالي عجبتك و شكرا علي رايك فيا و يارب اكون عند حسن ظنك
و بالنيابة عن اعضاء الليالي " اذا سمحولي طبعا" اشكرك علي رايك في القصة و علي وعدك بالمتابعة
تحياتي

الحب الجميل يقول...

جميله يا منمن
ماشاء الله عليكى
لا بس عجبنى رد فعل رانيا
ايوة كدا
لامتى هنفضل ندلع وناخد على دماغنا
هههههههههههههههههه
ويارتها رايح يصالحها من نفسه
لا ........
دا رايح عشان يرضى باباه والست كوثر
تسلم ايدك يا قمر
حلقه جميله بجد

sony2000 يقول...

يالله
انا حلقتي قربت وابتدييييييييت القلق
عاااااااااااااااااا

أبو حميد يقول...

أيوه كده لازم تظهر المواهب الشابة
إدونا فرصة بقيييييييييييييييييى

منى أبو السعود مرحبا بك وبقلمك معنا فى الليالى

بقولك إيه... إنت تقربى لأبو السعود جون الأهلى؟؟aaam

amirelhob يقول...

بجد اسف على انى ملتزمتش ويمكن دى اول مره ومش طالب السماح ولا عدم تطبيق العقوبه عليه

لانى انا وبعد اذن افضل المدونين اللى هما اكيد منى واقصد طبعا مدونين الليالى هعتذر على انى اكمل معاكم الليالي خاصه فى الوقت الحالى ودا لسبب ان اختى فى المستشفى وعندها التهاب كبد بتمنى يا رب انكم على قد ما تزعلوا منى تدعولها لانى بجد محتاج دعوئكم وخاصه اللى منكم بيصلى علطول ادعولها بجد من قلبكم
انها تخف ادعولها بحق كل حرف كتبتوا وكنتوا راضين عنوا بجد حاسس انى ميت لمجرد تعبها

وربنا يوفقكم يا رب وكويس ان فى مواهب تانيه قدرت تحل المشكله بجد سعيد ان فى ابداع اكتر من كدا لسه موجود انا هتابعكم جايز من بعيد لبعيد لكن فى نفس الوقت مستعد لدستور الليالى بس دا بعد ما ارجع عشان يكون التطبيق مش مجرد شكل

مش هوصيكم من قلوبكم تدعولها ربنا يقف معاها فى محنتها

Mona Abo - Elso3od يقول...

الحب الجميل
تسلمي لي يا حبي
و أي خدمة انا احب ارضي الجماهير و أدي الزبون علي دماغه بلا دلع فاضي ههههههه
نورتينا يا جميل

Mona Abo - Elso3od يقول...

ابو احميد
اهلا بيك و شكرا علي تعليقك
اما عن ابو السعود تمشي صفاء ابو السعود
:))

Mona Abo - Elso3od يقول...

sony 2000
قدها و قدود
معرفتش رايك في الحلقة ؟

Mona Abo - Elso3od يقول...

امير الحب
الف سلامة علي اختك و ان شاء الله ربنا يعافيها و يشفيها ان شاء الله

Casper يقول...

حلقة جميلة جدا واسلوب متميز كما اعتدنا منكِ

بالتوفيق دائما
وفي انتظار ابداعات جديدة

خالص تقديري واحترامي

Mona Abo - Elso3od يقول...

casper

اهلا بيك في الليالي المصرية نورتنا

شكرا علي رايك في الحلقة و ان شاء الله تتابعنا دايما
تحياتي ليك

bastokka طهقانة يقول...

حلوة قوي و عجبني التحول الدرامي اللي خلاها ترفض انها تروح معاه
احب الست القوية المفترية انا
هههه
جميلة يا ريم
ريم و لا منى لخبطيني

خواطر شابة يقول...

امير الحب
الف لابأس على اختك ربي يعجل بشفائها ان شاء الله
ابقى طمنا عليها وان شاء الله خير
دمت بكل ود

حاجات جوايا يقول...

أمير الحب
........
ألف سلامة على أختك ربنا يشفيها يارب ويعافيها ويزيل المها وتعبها يارب
ان شاء الله تبقى أحسن قريب

ندى الياسمين يقول...

امير الحب

لا الف سلامه عليها وربنا يشفيهالك ان شاء الله

معلش ان شاء الله كله الى يجيبه ربنا خير ربنا يستر

وابقى طمنا وقولنا اخبارها ياريت

ali younes يقول...

اولا
امير الحب
الف لا بأس علي أختك واختنا وشفاها الله وعافاها
ثانية مني
انطلاقة جيدة وحضور مشرف وتواجد مثمر
ثالثا د/ اسلام
وحشني جدا ودائما احب منك المواقف الحازمة
رابعا ندى الياسمين
ربنا يكون في عونك في حكم هذا الشعب وانت لها
خامسا الحب الجميل
علي لسان من هذة العبارة
لامتى هنفضل ندلع وناخد على دماغنا ؟؟؟؟
لو علي لسان البطلة رنيا يمكن نصدق
لكن لو علي لسان اى أمرأة في هذة الايام لا يمكن نصدق الا لما نشوف بنفسنا

اسماء عبدالعزيز يقول...

منى الجميلة الحلقة رائعه
وبصراحه فكرة المدونة جميلة جدا
واكيد بحجز لى مقعد هنا
واتابع

كوني بالف خير حبيبتي