الثلاثاء، 14 ديسمبر 2010

أين أنا ؟؟ الحلقه الثانية عشر

أين انا ؟؟...الحلقة الثانية عشر

بقلم : سوني

لما هاني سمع الاسم........قال في نفسه:عليا...عليا مين

ولما أنتهت رانيا من التلفون سألها...مين اللي كنتي بتجيبي فسيرتها مع أخوكي

فردت وقالت..دي عاليا ,اللي بيتشغل عندها اخويا ...

فقال ليها :طب ودي فين يعني؟

قالتلوا:انت بتسأل الاسئله دي كلها ليه؟

فرد وقال:لااااا خالص انا بس بدعبس معاكي....مالك بس هتذعلي مني تاني ولا ايه

ردت:وانا أقدر علي الزعل معاك بردو...ثم تبعتها بأبتسامه ساحره فنظر لها نظره هي الوحيده فالكون التي عرفاها وتتحس بها فقط

...................................................................................

في بيت رانيا وهاني بعد أسبوع من الحادثه...العلتين معزومين علي غدا ...ودار الحوار

هاني:تسلم أيديكي ياعمري...بجد الاكل رائع

رانيا:هو رائع يعني المره دي ولا أيه؟؟

هيام:الحق يامعلم انتا كدا اتدبست

ووسط ضحكات الجميع قال هاني

هو انا اقدر بردو اقول حاجه...والله حلو كل مره

شريف:ايييييييييون....مايجبها الا حكومتها

هيام:هو حد بردو يعرف يعمل أكل لابلاحلاولاه ولا بالطعامه دي زي رانيا

تسلم ايديكي بجد

شريف:الا قلي يهاني انتا كنت عامل ايه اليومين اللي فاتوا من غير رانيا

هاني:أكتشفت بجد اني ولا حاجه من غير وجودها جنبي...ايام ربنا مايرجعها خالص

الحاجه كوثر:خلاص يجماعه ماحدش يجيب سيره الايام دي والحمد لله انهم رجعوا سالمين لبعض تاني

هاني ورانيا تتموا:الحمد لله

...................................................................................

رجع هاني من الشغل تعبان ...

فسلم علي رانيا وقال لها:ها عملتي أيه النهارده؟؟

قالت له:ولا حاجه ياحبيبي بس تعبت بجد من عمايل شغل البيت وجنا ......مهو انتا عارف

فبص ليها كدا .....زي المثل اللي بيقول ريما رجعت لعادتها القديمه

مافيش غير الاهتمام بجنا والبيت بس وقال في نفسه...ياريت الاسبوع بعد الحادثه دا كان مد شويه.........ماعلينا

ومافقشي فكلامو الا بصوت رانيا تقول:جعان أحضرلك الاكل....فقال:لا شكرا انا بس عاوذ أرتاح شويه

وبصت ليه وقلتلوا :براحتك وراحت لأوضه جنا وراح هو علي اوضتهم..للشات والنت تاني

...................................................................................

عاليا تتكلم مع شريف في الموبيل:أزيك ياشريف عامل ايه ياوحش..كدا متسألش عني المده دي كلها

شريف:انا الحمد لله تمام........أنتي ايه أخبارك

عليا:وحشا طول ماأنتا بعيد عني كدا.....بردو ينفع كدا

شريف:والله مابيدي انتي عرفه الشغل بقي واكل كل وقتي ومبقدرش حتي انام ساعتين تلاته علي بعض

ردت وقالت:كده يعنى الشغل بينسيك اصحابك ؟

فقال:لا ابدا والله طب والله كنتى على بالي من شويه

عليا بسعاده : بجد .. وجيت على بالك ليه بقى

شريف بارتباك : يعنى كنت بافكر اجيلك عشان اشوف رايك ايه فى الشغل الى خلص لحد دلوقتي فى المحل يعنى

عليا : يا سيدى ما دام يرضيك هو يرضينى ... عموما خلاص انا كمان كنت عايزاك فى موضوع كده

شريف : خير يا مدام ؟؟

عليا : لا مش هاينفع فى التليفون شوف نتقابل امته ؟؟

شريف : اجي لحضرتك المحل بعد ساعتين كده

عليا: لا خلينا نتقابل بره المحل عايزه اغير جو .. عموما فوت عليا فى المحل بعد ساعتين ونروح سوا اي مكان ... الكلام معاك وحشنى

شريف بارتباك واضح : اييييه وانا كمان .. طب خلاص اتفقنا

..............................................................................

في بيت هاني ورانيا...شريف بيتكلم مع رانيا

رانيا:أمتا هنفرح بيك يا ابنى بقى؟

شريف:قريب بأذن الله.......قريب جدااااااااااااااا

رانيا:أييييييه ...انا حاسه ان في حاجه جديده....صح ولا لا

شريف يرد بأبتسامه:ايون في...عاليا اللي بشتغل معاها

رانيا:اخيرا ياعم...ياااااااه دا انتا دوختنا كل دا...طب وهي شكلها عامل أزاي

وفي هذه الاثناء يدخل هاني وهو يسمع جزء من الكلام قائلا:أيه يجماعه ماتفرحوني معاكم

فردت عليه رانيا وقالت:أخيرا شريف هيتجوز

هاني:مبروك ياشريف ...وتطلع مين اللي أخدت قلبك كدا

شريف:هي أسمها عاليا.....الست اللي بشتغل معاها

تغير وجه هاني وقال:مين

شريف:عاليا اللي بعمل المحل بتاعها في مصر الجديده

عندما رأت رانيا وجه زوجها قالت:خير في حاجه ياهاني؟

لحظتها رن موبيل شريف وفرد وقال:ألو..........

الى اللقاء فى الحلقه القادمه

بقلم : شرين سامي

هناك 16 تعليقًا:

ليالي مصرية يقول...

تسلم اديكى يا سوني

جميله الحلقه ونشكر الظروف ان لحقناكي قبل البيات الشتوي ا لى عايزه تعمليه
ههههههههههههههههههه

Unknown يقول...

آه ه ه ه
كان قلبي حاسس اني هشيل ليلة عاليه ربنا يستر أنا هبتدي أكتب الحلقه أهووو

ليالي مصرية يقول...

اوك يا شرين احب انا الهمه دي

وانا جاهزه لاي مناقشه

وخدي بالك الكتابه بالعاميه


واهم حاجه منطقية الاحداث من فضلك

والميل بتاعي الشخصي اهو لو حبيتى ترغي معايا فى اي حاجه بخصوص الحلقه

sbarny_yarb@yahoo.com

Mona Hekal يقول...

تسلم ايدك يا سوني الحلقة حلوة
ههههههه دبستي شرين سامي في عاليا
شرين سامي عارفة انك قدها و حلقتك ان شاء الله هتطلع حلوة متقلقيش في انتظارها ان شاء الله

حاجات جوايا يقول...

ايه يا ولاد ده
اخدلى غطس بالبطانية يومين ارجع الاقى حلقتين نزلوا
هى الايام عندكم بتعدى بسرعة كده ليه

بجد هو عدى اربع ايام
ولا انتوا اللى استعجلتوا فى النشر

هتجننونى
ههههههههههههه

خواطر شابة يقول...

سوني
الحلقة جميلة رغم قصرها بس انا عندي ملاحظتين
اولا شريف المدردح مش راكب معايا اننه اول ما يحس باهتمام من عليا وحتى قبل ما يتأكد من ده يروح يحكي لاخته انه بيفكر يتزوجها شايفاها مش منطقية
تانيا شايفة ماكنش فيه مقدمات تبين تطور العلاقة بين شريف وعليا من علاقة عمل بين صاحبة عمل ومن يعمل معها الى أزيك يا وحش فاجئني هذا التطور لانه جاء بشكل فجائي
تبقى هذه وجهة نظر مطروحة للنقاش وتحتمل الصواب والخطأ
تسلم ايدك عزيزتي
دمت بكل الود

كلمات من نور يقول...

جميل كدا الكلام احلو

وشيرين إن شاء الله تبدع الحلقة الجايه

في انتظاركم

حاجات جوايا يقول...

البنفسج الحزين
.............
الحلقة 11 كانت رائعة
جميلة اوى اوى يا بنفسجا
معلش يا اوختى الدفا عفا و كنت فى حالة تجمد كلى هههههه
ربنا يعديها على خير الاسبوع الجاى بقى ومينزلش تلج جامد :)
تسلم الايادى يا قمر


سونى
....
حلو اوى التطور اللى حصل فى الاحداث يا سونى

عجبنى رجوع ريمة لعادتها القديمة هههههه مهو الطبع يغلب التطبع

وعجبنى دخول عاليا فى الاحداث بس متوقعتش انها هتوصل لجواز وكده .. شريف برضه لسه صغير وفى بداية حياتة وعاليا دى امراة محنكة
اتمنى العناية الالهية تحرسة وتسسخر اقلامكم لنجدته فى الحلقات القادمة :)
تسلم الايادى يا قمر

فى انتظار الحلقة القادمة لارى رد فعل هانى

مش الحلقة الجاية يوم الجمعة ولا ايه النظام ؟؟

تحياتى للجميع

Unknown يقول...

أنا خلاص كتبتها أبعتها دلوقتي على الميل عشان لو في حاجه نظبتها
بس كان عندي احساس و أنا بكتبها اني مش عايزه أبطل كتابه بجد الأحداث و العاميه مشجعني جداً:))

sony2000 يقول...

والله انا كتبتها حسب اوامر الحكومه لاني فعلا مضغوطه جدااااا الايام دي وأسالوا الريسه هي اللي كانت كتابعه مش بلحق حتي اقعد معاها ربعايه علي بعض
فقلت بدال مااعتذر اكتبها وعسي انها تكون نالت اعجابكوا

البنفسج الحزين يقول...

أولا باشكر حاجات جوايا وبقولها ولا يهمك الدفا عفا فعلا...
سوني:
الحلقه حلوة بس في حبه حاجات كده مش منطقيه انا بأيد خواطر ان مش معقول شريف يفكر في الجواز من عليا كده خبط لزق يعني كان لازم يكون في تدرج في العلاقه بيهم يوصله انه يتعلق بيها لدرجه انه يفكر يتجوزها ولا علشان قابلته مرة برا المحل يبقي خلاص ...
دي وجهه نظري والحلقه في المجمل جميله..

Carmen يقول...

حلقة جميلة سوني تسلم ايدك يآقمر
تحياتي

Noha Saleh يقول...

جميلة اوى الحلقة دى
والاحداث ماشية بشكل حلو اوى كمان
اللى عاوز يكتب معاكم حلقة بقى يعمل ايه

خواطر شابة يقول...

ندى الياسمين
الو الو حول

اسماء عبدالعزيز يقول...
أزال المؤلف هذا التعليق.
اسماء عبدالعزيز يقول...

صباح الفل
اولا الحلقة جميلة والمدونه اجمل وايه الروعه دي تسلم ايديكي ياسوني بجد اسلوبك رائع جدا
مستنيه انا بشوق كبير للجميلة شرين سامى وقلمها المميز
تحياتى للقائمين على المدونه .. واذا حابين مشاركه انا موجودة بس خلونى للآخر
ههههههههههههههه
عشان بحب الضلمه والجو الغامض
وافنشها على طول
ههههههههه
كونوا بألف خير وصحه وسعادة