الأحد، 5 ديسمبر، 2010

أين انا ؟؟ الحلقه التاسعه

الحلقه التاسعه
بقلم : ندى الياسمين

رانيا بعد ما هاني نزل
جريت على التليفون واتصلت بهيام ... وحكيت لها الى حصل
هيام قالت لها مافيش فايده فيكى يا رانيا هاتفضلي عبيطه لحد امته ... ماشي عموما هو كده كويس بس الحكايه كانت محتاجه منك شوية سوياسه يا اختي عشان ما تقفلش المواضيع كده

عموما خلاص انا هاروحله النهارده اقعد معاه شويه ونشوف هانعمل ايه

الحاج كارم .. بعد ما رجع من بره رجع شغله فى الحكومه بس ما كانش مواليه الاهتمام الكفايه خصوصا ان الى بيرجع من بره بيكون فى الغالب متاخر فى الترقيات فبيرجع يلاقي زمايله بقوا رؤساء عليه وده بيخليه مقلق من الشغل ومش لاقي نفسه فيه .. واغلبهم بيتركن على الرف

كارم رغم انه هو شديد اوي مع العيال بس كان قلبه بيتقطع من قاعده باسم بين اربع جدران وغلب عشان يجيبله شغل والواد مش راضي يشتغل فى الاخر فكر وقال الواد ما ينفعوش الا شغلانه حكومه .. اه

يروح الشغل ساعتين ويرجع وخلاص على كده ومرتب مضمون ومعاش وخلاص ولما يحب يسافر بره يبقى يسافر ولا يتنيل واهو شغله بيبقى موجود .. وما كدبش خبر جاب مليون واسطه ومليون معرفه عشان يعرف يعين الواد فى نفس المكان الى هو بيشتغل فيه واخيرا جاب تاشيره من الوزير وما كانتش الدنيا سايعاه ساعتها

ورجع البيت فرحان ومزقطط .. وقال لنجاة انه جاب التاشيره وكانت هى كمان فرحانه اوي

ودخل جري على باسم الى لسه صاحي من النوم وقاله .. باسم رد عليه بكل هدوء او برود وقاله : ودى مرتبها هايبقى كام ان شاء الله ؟؟
كارم اتغاظ منه اوي : وقاله مرتبها كام ؟؟ اكيد اكتر من الى انت بتقبضه وانت نايم فى السرير ليل ونهار

باسم : يا بابا انا قلتلك مش عايز وظايف .. انا عايزه ااسااااااافر و...

وقبل ما يكمل الحاج كارم كان هاينفجر بقى من الغيظ منه فقاطعه بحده وشده وقاله : اسمع لما اقولك يا واد انت انا حفيت وبوست الايادي عشان اعرف اجيبلك التاشيره دي ... وانا خلاص دى اخر حاجه ممكن اقدمهالك .. متنيل عايز تسافر فين ومين هايقبلك ان شاء الله .. هو انت بتعرف تعمل حاجه اصلا انت فاكر انك بصحيح متعلم .. ده انت حمار زي كل الحمير الى مخرجاهم جامعات اليوم

يكون فى علمك انا هامشي فى اجراءات التعيين بتاعتك وانت هاتروح تستلم وتشتغل غصب عن عينك وعين اهلك ... وقسما بالله لو روحت واشتغلت لاكون طاردك من البيت زي الكلب .. بلاش دلع ومسخره فاضيه انا سكت عليك كتير ... ايه يا اخي ده ... ده ما عادش فى احساس خالص

ويخرج من اوضة باسم ويقفل عليه باب اوضته وهو ماشي بيكلم نفسه وفى اقصى حالات غضبه

ونجاة الى كانت حاضره الكلام ده تجري على باسم تطبطب عليه وتقوله معلش يا حبيبى انت برضه غلطان ( اصل هى شايفه ان باسم ده حساس اوي زيها ومن الاخر ده دلوعتها طول عمره )

شريف : الو يا مدام عليا كنت عايز اجيب الصنايعيه الى هايشتغلوا عند حضرتك يعاينوا الشغل عشان اتفق معاهم على المعاد وكده

عليا: طبعا يا شريف اهلا بيك فى اي وقت طبعا عموما انا قدامي نص ساعه واكون فى المحل حصلني على هناك

وبتتصل بعدها بهاني : ايوه يا هاني معلش الغي معادنا بقى انا اصلي جايلي عمال فى المحل عشان التجديدات الى قلتلك عليها

هاني بضيق مكتوم : ماشي يا عليا خلاص مش مشكله

علياء : تحب تيجى تعدي عليا فى المحل ونبقى نتعشى سوا ؟

هاني : لا خلاص النهارده بقى يوم تاني هابقى اتصل عليكى

وبيقفل هاني التليفون .... حتى انتى يا ست علياء عامله فيها مهمه .. ماشي انا استاهل برضه
وبيقوم ينفخ ويلبس وينزل لاصحابه على القهوه ....

حازم : ايه يا ابنى مالك كده عمال تنفخ فى السجاير ووشك شبه الشراب المقلوب

هاني : باقولك اييييه مالكش دعوه بيا وسبنى فى حالي مش ناقص غلاستك يا سي حازم

حازم : بس بس ياعم خلاص انا غلطان .. ايه العيال الفقريه دي ... فينك يا سمسم يا حبيب هارتي هو الى بيشد معايا حلو مش بوز اخص زيكم انتم الاثنين

محمد : اه صحيح هو فين الواد ده غطسان من امبارح

حازم : ده عقبال عندي ان شاء الله ( عشان انتم عندكم بالفعل ) موضوع العروسه الى كان ماشي فيه وفق واشتروا الشبكه امبارح والنهارده مش عارف بيعملوا ايه فمش فاضي بقى ياعم

محمد : بجد طب خيييييير ربنا يوفقه .. عقبالك يا زفت انت عشان نرتاح منك شويه

هاني : ليييييييييه بس ليييييييييه ما تخليهم يعنى لازم تجنى عليهم ويحصلهم الى حصلنا ما تسيبهم يا اخويا

محمد : ايه يا ابنى فى ايه انت لسه مراتك عند اهلها

هاني : ايوه يا سيدى ... والمصيبه بقى كمان ايه ... حاااااااااااامل

محمد : يا شيخ حرام عليك حد يقول برضه على الرزق مصيبه .. استغفر ربنا يا اخي

هاني : استغفر الله العظيم يارب ... بس مش قادر اتخيل ان هاعيده من الاول

حازم : ايووووووووووون حلو الشيخ محمد هايستلمك .. باقولكم ايه انا هاقوم اوصل عند الواد بتاع الموبيلات الى فى اخر الشارع ده اجيب كفر للموبايل بتاعي على ما تخلصوا حوار الازواج الفكسان ده .. مش ناقص سده نفس سبوني بقى انا عايز اتجوووووووووووز

محمد : ايوه قوم يا ابنى غور بقى خلينا نعرف نتكلم

محمد لهاني : بص يا هاني الدنيا كلها يا ابنى مسئوليات ... ما تهربش من مسئولياتك .. هى يعنى حملت فيه لوحدها
وبعدين انا قلتلك روح يا ابنى اخزي الشيطان وراضي مراتك ورجعها انت برضه غلط انك مديت ايدك عليها.

هاني : يا سيدى اتهببت روحت وقعدت تترسم عليا وتقولي لما يجى بابا لما تعتذرلي قدامهم كلهم وساقت فيها على الاااااخر

محمد : يا سيدى ما يجراش حاجه راضيها ما انت برضه خليت شكلها وحش قدام اهلها واهلك راضيها وبوس راسها هايحصل ايه يعنى دي مراتك يا سيدى ام عيالك ...

هاني : باقولك ايه يا محمد والنبى غير السيره دي اصل انا جايب اخري منها

محمد : طيب ماشي بس روق كده وربنا يهديلك الحال .... شوفت الماتش بتاع امبارح ؟

رانيا محتاره كلمه بتجيبها وكلمه بتوديها .. مش عارفه تعمل ايه .. تسمع كلام امها الى راحه جايه تقطم فيها وتقولها شورتك واختيارك والناس البيئه الى اتجوزتي منهم و و و ...

ابوها الى بيقولها ارجعي بيتك وعيشي وربى عيالك وخلاص

هيام الى بتقولها قاوحي الدنيا وواجهي وحاولي تغيريه

رانيا لنفسها

انا عاجبنى اوي كلام هيام .. بس مش عارفه انفذه ازاي ... انا حاسه انى فاشله بجد ...

هو انا باحب هاني برضه ... بس لا مش هانساله انه مد ايده عليا .... ياااااااه عمري ما كنت اتخيل ان هاني الرقيق الى بيحبنى ا لى ما بيستحملش يشوف دموعي انه يمد ايده عليا ويضربنى ... انا بجد غبيه واكيد انا الى فيا عيب مش هو بس

ياااااااااااربى اعمل ايه بس وارضى ميييييييين واسيب ميييييييين انا احترت وكالعااااااده وصلة عياط معتبره.. بس رانيا بتستغفر ربنا وتقوم تتوضا وتصلي الظهر وتفضل تدعي ربنا بحاجات كتيره اوي وتشكيله من الدنيا وما فيها


هيام راحت بالليل عند ماماتها عشان تقابل هاني لقته فى القهوه قالت فرصه تمسك ودن الحاجه كوثر شويه حاكم هيام عارفه ان هى الي بتقوي قلب هاني وتنصره فى الغلط

هيام : ماما انا عايزه اقول على حاجه مهمه ... انتى لازم تعترفي ان هاني غلطان ولازم تشجعيه انه يروح يجيبها ويراضيها البنت حامل حرام عليكم كده ولا انتى يرضيكى بيتهم يتخرب

كوثر : طب ما هوراح يا فالحه ورجع من هناك يغلي يا حبة عين امه .. الهانم قال عايزاه يعتذر لها قدام الكل .. ليه ان شاء الله هو خلاص الدنيا اتقلبت .. ما خلاااص قلنالها غلطه ومش هاتكرر .. وهو فى راجل بيعتذر لمراته ده ايه قلة الادب دي

هيام : حرام عليكى يا ماما يعنى لو كنت انا الى انضربت القلم ده كان هايبقى رايك كده

كوثر: تنضربي ليه ان شاء الله وانتى لسانك طويل زي المزغوده دي انتى مؤدبه ومتربيه

هيام : ماما بلاش تضحكي على نفسك انا مؤدبه وجوزي كمان مؤدب ومحترم ما يعملش كده

كوثر : كده يا هيام يا عنى اخوكي هو الى قليل الادب ... لا بقى اخوكي مؤدب وانا مربياكم كلكم احسن تربييه .. بس يظهر انتى الى تربيتك جت معووجه ولا جايز سي عمر بقى هو الى قلب دماغك وغيرك

هيام : يا كوكو خلاص ما تزعليش بقى انا باهزر معاكي ... وبعدين خلينا فى موضوعنا انا هاكلم هاني دلوقتي تسمحي يعنى حضرتك لو ما قلتليش كلمه تصلح ما تقوليش حاجه .. عشان خاطري يا ماما دول عيال ومش عارفين حاجه هايخربوا بيتهم وبعدين يندموا

كوثر وقد هدأت ثورتها : الله وهو انا يا بنتى مش عايزه خراب والله بالعكس ربنا يهدي سرهم

هيام : طيب تقفي فى صفي وتفهمى هاني انه غلط فى البنت وانه يروح معايا نراضيها ونجيبها ايه رايك ؟

كوثر : ماشي يا ستى حاضر لما اشوف اخرتها معاكي يا بنت ابوكي .

هيام : وماله ابويا بس ما كنا بنبوس التراب الى بيمشي عليه .. وبعدين ده انا حتى شبهك يا كوكو حتى بصي

وفى محل علياء جه شريف ومعاه العمال ووراهم الشغل واتفق معاهم وجم يمشوا علياء طلبت منه يمشي الناس الى معاه ويرجع لها عشان يتفاهموا على الاسعار وكده

علياء : بص بقى يا استاذ شريف انا بصراحه ماليش خبره خالص فى التعامل مع العمال عشان كده انا مش عايزه اتعامل مع حد منهم خالص انا عايزه يبقى مني لك وانت الى تباشر الشغل كله وتقف مع العمال دول وكده .. تاخد الشغله كلها مقاوله يعنى .. ايه رايك ؟؟

شريف : والله بس انا فى ايدى شغلانه كده الايام دي و ..

قاطعته عليا : يا سيدى على اد ما تقدر كده وبعدين ده بزنس برضه وهتاخد عليه فلوس كويسه .. انا بصراحه استريحتلك ومستأمناك واصل انا ماليش حد .. فمش هلاقي حد يتفاهم مع العمال

شريف : قالها اوك بس اول اسبوع مش هاعرف اجي غير ساعتين فى اليوم على ما اخلص الشغلانه الى معايا

عليا : خلاص اتفقنا .. بس قولي هنا انت شكلك كده ما يجيبش جو الصنايعيه وكده انت خريج جامعه ؟

شريف : ايوه انا ليسانس حقوق .. بس انتى عارفه مصر بقى

عليا بدلع : انا قلت كده برضه انا ليا نظره فى الناس ... عموما اقدر اقول انى سعيده باكتساب صديق جديد ؟؟

شريف باحراج شديد : يا خبر يا مدام ده انا اتشرف بيكى .... و .... و انا هاستاذن بقى معلش عشان ورايا شغل

هاني على القهوه مع اصحابه لسه موبايله رن .. بص فيه وقال فى نفسه دي هيام

رد : ايوه يا هيام ازيك وازي العيال ..... ايه ؟؟؟ ماما ؟؟؟ليه مالها أنا سايبها كويسه .. طب انا جاي حالا وهاجيب معايا دكتور ...


الى اللقاء فى الحلقه القادمه
بقلم م. علي يونس

هناك 14 تعليقًا:

ليالي مصرية يقول...

الف الف سلامه يا ريم على البنات عندك ويارب ربنا يشفيهم ويطمنا عليهم

شعبي الحبيب نظرا لاعتذار ريم من امبارح عن حلقتها الى انا دبستفها فيها من المره الى فاتت

فانا اضطريت اكتب الحلقه وعشان ما كنتش فاضيه لسه كاتباها حالا وراجعتها كروته

ياريت حد يراجع ويقولي ايه الموضوع احداث واسامي و طباعه وكده يعنى

مستنيه رايكم

حاجات جوايا يقول...

جميلة اوى يا ندى
جمييييييييييلة بجد
تسلم الايادى يا قمر

المراجعة بقى يا ستى

مامة رانيا اسمها نجاة مش جيهان

وجيهان الى كانت حاضره الكلام ده تجري على باسم

انتى كتبتيها صح الاول وبعدين نسيتى


الاخطاء الاملائية بقى بسيطة

ويخرج من (اوضى )باسم

هاني : لا خلاص النهارده بقى يوم (اني ) هابقى اتصل عليكى

(فين )يا سمسم يا حبيب هارتي

بس مش قادر (اتخير )ان هاعيده من الاول

مسؤليات و مسؤلياتك = مسئوليات ومسئولياتك

امها الى (راحها) جايه

هيام الى بتقولها قاوحي الدنيا( وواجعي )وحاولي تغيريه

خلاااص قلنالها (غلط )ومش هاتكرر

لو ما (قلتليش )كلمه

وقال فى نفسه( ده) هيام


بس خلاص .. عايزة كمان :)

الاحداث 100 100 عاجبانى اوى
تسلم ايدك يا ندى


والف سلامة على بناتك يا ريم ربنا يشفيهم ويطمنا عليهم يارب
ابقى طمنينا يا حبيبتى

sony2000 يقول...

ربنا يارب يطمنا عليهم
اللهم امين

Noha Saleh يقول...

الف سلامة على ولاد ريم
بجد القصة حلوة اوى والاحداث ماشية تمام
مستنيين بقى اللى هيحصل

كلمات من نور يقول...

متابعين والحبكة زادت و ربنا يعينك يا ندى معلش ...انتي ادها أهو و القصة ماشيه تمام

ليالي مصرية يقول...

مرسي ياجماعه ما اترحمش منكم ابدا

ويا سالي عاجزه عن الشكر علىالمراجعه
والله امبارح كنت مرهقه خالص وبالعافيه قدرت اكتب بعد ما رجعت من بره وجيت عند المراجعه بقى وقفلت


مرسي يا بنات على التشجيع

Mona Abo - Elso3od يقول...

تسلم ايدك يا ريسه الحلقة حلوة اوي
حلوة عليا دي بترسم علي تقيل و بتلعب علي الناحتين
و شكرا علي تحديد حلقة تانية لي

شيرين سامي يقول...

الحوار تُحفه بجد كأني كنت شيفاهم و الأحداث سريعه و رائعه
ألف سلامه على أولاد ريم و في الانتظار للحلقه الجايه

karmen يقول...

الف سلامة ياريم وربنا يطمنا عليهم يارب


حلقة جميلة بجد تسلم ايدك
تحياتي

خواطر شابة يقول...

الف سلامة على اولاد ريم
ندى يا ستي والله انت قدها وقدود الحلقة جميلة بايقاع سريع واحداث منطقية
انا بس مش فاكرة هو الحاج كارم كان بره فين انا لااذكر ذلك
اعجبتني تطورات القصة وايضا الشخوص الجديدة التي دخلت حازم العازب ذو الحس الكوميدي ومحمد العاقل الذي يحتوي صديقه وينصحه
دمت بكل الود عزيزتي وتسلم الايادي

حنعيش يعنى حنعيش يقول...

استاذ ورئيس قسم الحوار ... تسلم ايدك يا ريسة

ali younes يقول...

سيادة الرئيس الهمام
ندى باشا
حلقت فخامتكم جميلة وحدوتة

أحب ان أعرفكم أني أرسلت الحلقة العشرة مساء أمس أتمنى أن تكون وصلت بالسلامة وارجوا مراجعتها ونشرها بعد التدقيق
وربنا يخليك لينا يا ريس
م/ علي يونس

خواطر شابة يقول...

عزيزتي ندى الياسمين
رجاء احجزي لي حلقة جديدة
دمت بود

أبو حميد يقول...

الكبير كبير
والنص نص نص
والصغير مش عندنا فى الليالى

تسلم الأيادى يا ريسة