الخميس، 23 ديسمبر 2010

أين انا ؟؟ الحلقه الخامسه عشر

اين انا ؟؟ الحلقه الخامسه عشر

بقلم: ندى الياسمين

الحاجه كوثر بعد المشكله الى فاتت مع رانيا خدت فترة هدنه من المشاكل بس مافيش فايده هي برضه مش عاجبها حاجات كتير

مش بس فى رانيا لا فى رانيا وفى هاني بس طبعا هاني له الف عذر مش بس كده لا كمان اي غلط بيعمله هاني نابع من اخطاء رانيا

يعنى مثلا لو هاني اتاخر يوم الجمعه على ما ينزل الصبح يبقى رانيا الى ا خرته

لوهاني مبوز ورد ناشف على ابوه ولاامه يبقى هى رانيا الى قالباه وعاطياه كلمتين

وهكذااااا وطبعا الكلام ده مش بيبقى فى قلب الحاجه كوثر بس

لااااااا لازم تدي رانيا كلمتين فى جنابها .... وتقول لهاني عشر كلمات على مراته تخليها طالع مش طايق يبص فى وشها

واوقات برضه هاني لما بيحس ان الحاجه كوثر جايه اوي على رانيا كان يحاول عابثا يدافع عن رانيا

بس لقى انه لما بيعمل كده .. بيبقى ليلته مش فايته من الحاجه كوثر حيث انه ازااااااااي يدافع عنها كمان

بس اهى بتعدي الايام على كده ورانيا اصبحت واخده خط جديد فى حياتها تماما...... اتغيرت

رانيا لما عرفت ان رحاب هاتكون فى عليا بيوتي سنتر ما قالتش لرحاب فى الاول على ما تجمع افكارها خصوصا ان هاني دخل عليها وهى بتتكلم

بس كانت محتاره مش عارفه تعمل ايه تروح ولا ما تروحش ... تقول لرحاب الحقيقه ولا تعتذر وخلاص ... بصراحه حكاية ان هاني كان يعرف واحده دي هى مش قادره تحكيها لحد حاسه انها مهينه لها اولا

بعد ما فكرت رانيا كام يوم فى الموضوع اخدت قرارها واستقرت عليه ... رانيا قررت تروح

وقبل الخطوبة بيوم قالت لهاني انا بكره هاخد جنى ونروح عند ماما من الصبح عشان خطوبة رانيا النهارده هاسيب جنى مع ماما بالليل واروح حتى الكوافير قريب من ماما

ووافق هاني على مضد ... اه ماهو بعد ما رانيا ا تغيرت هو كمان اضطر يتغير وبقى يوافق على حاجات ما كانش بيوافق عليها قبل كده ... بس على مضد

رانيا اصلها بقت عندها اصرار اكتر .. وكمان عندها حاله من الصمت والا مبالاه بمن حولها ... يعنى لو لقت هاني بيزعق بتمشي وتسيبه اصلا وتعمل نفسها مش سامعاه ... لما تسمع كلمتين من حماتها تطنش خاااااااالص وتعمل مش سامعه

ما عادتش زي زمان بتضحك كتير وتعيط كتير وتتكلم كتير .... دايما ساكته ودايما مش فرحانه ولا زعلانه

اوقات بس غصب عنها بتعيط بس بينها وبين نفسها ... واوقات بتضحك من قلبها بس لما تبص فى عنين جنى وهى بتضحك لها وتلاعبها

هاني رغم كل شيء حاسس ان رانيا مجروحه ومتغيره منه وبيحاول يجى على نفسه شويه عشان يرضيها وترجع زي زمان

المهم راحت رانيا عند مامتها من الصبح

واتصلت على رحاب وقالت لها هاجيلك السنتر على الساعه 5 ولبست واتشيكت اوووووي وكانت حاسه بنفسها ان قويه اوي مش عارفه جابت القوه دي منين وراحت لرحاب على الكوافير ....

ولفت بعنيها فى السنتر عشان تدور على عليا بس ما عرفتش هى فين بس لاحظة ان فى صور كتير فى المكان لواحده ست حلوه اوي ... قالت هى دي اكيد عليا ... بس عارفين رانيا لما شافت صورتها ارتاحت اكتر

هى صحيح عليا حلوه اوي ... بس حست من صورتها انها متكلفه اوي ... وتفتقد فعلا جمال الروح ... مافيهاش طبيعيه وتلقائيه .. من الاخر رانيا حست انها مش ند لها وما غارتش منها ولا حاجه

المهم قعدت رانيا ساعه تقريبا مع رحاب ولسه ما شافتش عليا وفجأه لقتها ظهرت فى المكان ودخلت على مكتبها

وقعدت رانيا نص ساعه متردده تروح تكلمها ولا لا خصوصا ان عليا ما تعرفهاش ... المهم فى الاخر ظبطت رانيا مكياجها وايشاربها ودخلت لعليا الى شكلها ما كانش مبسوط

وسلمت عليها وقالتلها بكل ثقه وثبات ... ازيك يا مدام عليا ... انا رانيا .. اخت شريف

عليا ما كانتش متوقعه : ارتبكت وسكتت دقيقه على ما استجمعت افكارها وقالت لها اه اهلا اهلا

رانيا : الحقيقه انا بالصدفه رحاب صاحبتى كانت خطوبتها النهارده وهى هنا عندك اجي ابارك لها واعتذرلك عن انى ما جيتش حسب دعوتك للافتتاح .. اصل جنى كانت تعبانه

عليا : اه الف سلامه عليها ... ونورتينا ومبروك لصاحبتك...بس شريف ما قاليش انك زي القمر كده .... طب اتفضلي يا مدام رانيا تشربي ايه

رانيا : لا لا خالص دي رحاب خلاص ماشيه وانا لازم اروح معاها

عليا : ليه كده انا كنت عايزه اتكلم معاكي شويه

رانيا : محاولة انهاء ا لموقف بسرعه : ان شاء الله فرصه تانيه يا مدام عليا

وجريت رانيا منسحبه وهى سايبه عليا تفكر وتحتار هى كمان لسبب زيارة رانيا وميت سؤال تاني فى دماغها

رانيا بعد اليوم ده قررت انها تنسى عليا اصلا وتمسحها من حسابتها ... بس الى ما قدرتش تنساه ان هاني حب عمرها .. كان بيعرف واحده ست غيرها وهما متجوزين كمان

وقررت كمان تفضل على صمتها .. وتحاول تعمل الى هى عايزاه .. وتفضل ترسم وتحاول ترجع الشغل تاني .... وتهتم بنفسها .. مش عشان هاني ولا عشان اي حد ... وانما عشان نفسها بس

رسمت رانيا واشتركت فى المعرض ... وباعت لوحات مش كتير يعنى بس يعنى مش بطال كونها اول مره

حاولت تلاقي شغل يناسب ظروفها دلوقتي بس للاسف ما لقيتش ... بس ما ياستش ما زالت عايزه تعمل الى هى عايزاه

بدأت شويه تتصلح مع هاني .. ما نسيتش بس بتحاول تنسى ... بس لا مش زي زمان جواها لسه حاجه واجعاها وكاسره قلبها

اصل الست لما بتحب اوي بتدي بدون حساب وكمان بتتنازل بدون حدود .. ما بتتخيلش ان الى بتحبه ممكن يقابل كل ده بخيانه او جحود وكمان يعتبرها حاجه بسيطه وهى المفروض تسامحه بكل بساطه .

بس ما كانش بتخلا الايام برضه من مشاكل ... اوقات كانت بتفقد اعصابها وتزعق وتصرخ بشكل هستيرى وتقفل عليها وتعيط ... كتير اوي اوي ... وبعد كده ترجع تاني تهدى وترسم وتكتب كمان ايوه بطلع الى جواها فى قصص وخواطر عشان تحاول تريح نفسها

وشريف بعد كام شهر من قصة عليا والى فضلت تبعتله رسايل وتتحايل عليه يرجع لها قرر يسافر بره

وعشان هو اشتغل فى ميت حاجه وعنده خبره فى حاجات كتير

واحد صاحبه جابله عقد كويس فى الامارات وظبط نفسه وسافر ... وابوه وهو مسافر قاله يا ابنى لو استقر بك الحال هناك شوف عقد لاخوك الى هايموت على السفر ده اهو اشتغل فى الحكومه بس عامل زي الى بياكل اكل مش على هواه .. خليه يتنيل ياخد اجازه لما يتثبت ويغور يسافر

رانيا كانت زعلانه اووووي ان شريف سايبها ومسافر .. كانت حاسه ان هو الى لها فى الدنيا واقرب حد من عيلتها لها ... بس برضه اتمنتله انه ربنا يكرمه ويوفقه .. وسافر شريف وعانت رانيا من غيابه لشهورعلى ما اتعودت على الوضع ده

الحاجه كوثر : تعالى يا جنى انى زهقانه يا حبيتى مش لاقيه حد تلعبي معاه ... المفروض ماما تجيبلك نونو جديد يونسك بقى ويلعب معاكي

رانيا : لسه يا طنط شويه جنى لسه عندها سنتين بس

الحاجه كوثر : طيب ماهو يادوب كده واتاخرتي كمان ... على ما تخلفي تانى تبقى هى 3 سنين وانتى يعنى وراكي ايه ..

الكلمه الى بتضايق رانيا جداااااااااا وتحسسها انها مالهاش لازمه فى الدنيا اصلا

بلعت رانيا ريقها بقوووه ومعاه االكلام الى مش عارفه تقوله واستاذنت وخدت جنى وطلعت

بس بصراحه هى كانت فعلا فكرت فى حكاية انها تخلف تاني من قبل ما حماتها تقولها بس الطريقه بتاعة حماتها ضايقتها

هاني جاله شغل فى شركه تانيه اكبر وشغل احسن واتنقل فى شغل جديد وبقى مشغول اكتر ما عادش فاضي خالص لرانيا ولا البيت وبيرجع من الشغل هلكااااان

حتى اصحابه ما عادش بيشوفهم غير كل فين وفين وخصوصا ان كلهم بقوا متجوزين دلوقتي وكل واحد وراه بقى حياته وبيته ومشاكله

وهي دي سنة الحياه ...

لو نقلت زرعه من مكان لمكان ... لازم الزرعه دي تاخد وقتها ونوليها كمان عنايه خاص على ما تبتدي تضرب جذورها فى الارض الجديد وتثبت نفسها وتستعيد قواها تاني وترجع ورقها يصحصح وتزهر وتثمر كمان

ولو نقلناها من مكان لمكان واهملناها ممكن تموت او تمرض او ما تديناش ثمر كما يجب ان يكون

لازم الزوجين يصبروا على بعض لحد ما كل واحد فيهم يستقر فى حياته الجديده

رانيا فكرت فى كلام حماتها بعد كام يوم وحاولت تفكر بشكل عقلاني ومن غير انفعال من كلام حماتها الى ضايقها وشافت انها عندها حق ... وقررت تكلم هاني فى الموضوع ...............

الى اللقاء فى الحلقه القادمه

بقلم : ابو احميد

هناك 16 تعليقًا:

ليالي مصرية يقول...

ايووووون انا الى كتبتهااااااااااااااا

ريم عندها ظروف واعتذرت

انا هاوريكم يا شعبي الحبيب الصبور المهاود

ويكون فى علمكم انا ما راجعتهاش خالص
حد بقى يراجعها لغويا ومطبعيا واحداث وكله

يا نائب الرئيس شوفي شغلك بقى

اصل انا لسه كاتبه الحلقه دلوقتي حاااالا طازه والله وبالعافيه

شيرين سامي يقول...

الحلقه بجد بجد رائعه و منطقيه و سلسه تسلم ايديك رانيا تصرفاتها نضجت و مع ذلك لسه بتجيلها انتكاسات (زي كل البنات) و ده منطقي أوي
في انتظار الحلقه الجايه
تحياتي للجميع

Dr/ walaa salah يقول...

بجد فرحانه ان رانيا شالت عليا من دماغها

احسن عشان متجيبش مشاكل لنفسها

وفرحانه كمان لشريف انه سافر

منتظره الحلقه اللي جايه

مشكوره يا حبيبتي

حاجات جوايا يقول...

ليالى مصرية
..........
تسلم الايادى يا جميل
الحلقة جمييييلة
عجبتنى مقابلة رانيا لعليا وسفر شريف
وجت فى دماغى احداث كتير هتترتب على كده
مش عارفة بقى اللى هيكتب هيشوفها ازاى
بس الاكيد انها هتبقى حلوة :)

الحاجة كوثر من الناس اللى تتكره كده لله فى لله
اعوذ بالله
ده انا بحب عليا اكتر منها هههههه


تسلم ايدك يا ندى
ويارب ظروف ريم تكون خير
وحشتنا بقالها كتير مش معانا


الاخطاء مش كتير
هجبهاك اهه

حاجات جوايا يقول...

المراجعة
........
يحاول عابثا .....> يحاول عبثا
عشان خطوبة رانيا النهارده .......> رحاب
ووافق هاني على مضد ........> على مضض
بس على مضد ......> شرحه
بنفسها ان قويه اوي .......> انها قوية
بس لاحظة .....> لاحظت
وهى هنا عندك اجي .....> جيت
بس ما كانش بتخلا........> ماكانتش بتخلى
ايوه بطلع الى جواها ......> بتطلع
تعالى يا جنى انى زهقانه......> انتى
لسه يا طنط ....> رانيا كانت بتقول لحماتها يا ماما فى اول القصة

بس خلاص
اى خدمة يا ريسة :)

حنعيش يعنى حنعيش يقول...

ايه الحلاوة دة .. بقينا محترفين وبنكتب الحلقات قبلها بنص ساعة ... كدة الواحد اتطمن على مستقبل الدراما .
بجد تسلم ايدك .. مقابلة رانيا وعاليه تاخدى عليها امتياز مع مرتبة الشرف ..
دا طبعا العادى من رئيسة الليالى .. بس برضة تسلم ايدك

كلمات من نور يقول...

تسلم ايدين اللي كتب وكل اللي بيكتب بصراحه بيعجبني فيكم بتعرفوا تمسكوا الخيوط من بعض وتغزلوا قصة جميلة مترابطة...تحياتي

البنفسج الحزين يقول...

ايه التطور الكبير اللي حصل في القصه ده اغيب حلقتين ارجع الاقي رانيا المستكينه اللي بتعيط علي طول بقت busines woman
وبترسم لوحات وبتبيعها ...والله فرحتلها قوي انها بقا لها شخصيه مستقله وبطلت عياط ...
وخط عليا رانيا عجبني قوي ...
وانبسطت ان شريف سابها وسافر فعلا مكانش هينفع يرتبط بيهاحتي علشان مشاعر أخته اللي كانت هتضطر تتعامل معاها وهي مجروحه منها هي وهاني ...
بس انا شايفه ان هاني موقفه من تغير شخصيه عليا مش واضح لحد دلوقتي يا ريت حد يوضحه في الحلقات اللي جايه ....
لو سمحتي يا ريسه احجزيلي حلقه...
تحياتي

خواطر شابة يقول...

ندى الياسمين
يا سيادة الريسة الشعب الحبيب الصبور المهاود بيقولك عدلي الجدول وخلينا نعرف مين اللي حيكتب لحد الحلقة الاخيرة في ناس كثير طالبة حلقات
ياسيادة الريسة بصي للشعب بنظرة رضى ورحمة ونفذي طلباته ينوبك ثواب ههه

خواطر شابة يقول...

حلو تطور القصة وحلو ان بقى فيه امتداد زمني
عجبني سفر شريف ده رد فعل طبيعي بعد معرفته بالعلاقة اللي كانت بين هاني وعليا
اخو رانيا الكبير رجع ظهر في الاحداث تاني وعرفنا أخباره وده كان بطريقة غير مباشرة وبشكل حلو اوي
لقاء عليا ورانيا مقتضب بس يمكن البناء عليه لانه يبقي كل الاحتمالات مفتوحة.
هي هيام فين معقولة في كل هذا الامتداد الزمني ميكونش لها ولا حدث مؤثر.
اعجبني جدا تشبيه الازواج في بداية الزواج بالزرعة التي تنتقل لتربة جديدة فعلا التشبيه في محله بشكل كبير لهذا تعتبر أصعب سنوات الزواج هي سنته الاولى ان تعداها بسلام تكون احتمالات نجاحه فيما سواها اكبر
دمت بود عزيزتي

خواطر شابة يقول...

ندى الياسمين
عزيزتي ياريت تدي الحلقة 19 للبنفسج الحزين
هههه والنبي ومين نبا النبي نبي تعدلي الجدول وتخلينا نعرف مين اللي حيكتب للحلقة الاخيرة هههه
دمت بكل الود عزيزتي

Wise يقول...

متابعه معاكم ان شاء الله
فى انتظار الحلقات القادمة
كل حلقه بيزيد اعجابى بالفكرة
وكل من كتب بها
تحياتى لكم جميعا

Mona Abo - Elso3od يقول...

سيادة الرئيس دائما ما تنقذين الموقف في اللحظات الاخيرة عشتي زخرا لليالي :)))
حلوة الحلقة اوي تسلم ايدك

carmen يقول...

حلقة هايلة تسلم ايدك ندي الياسمين تحياتي العطرة

ندى الياسمين يقول...

تسلموا يا جماعه ربنا يخليكم يارب وما اتحرمش منكم

وشكرا على المراجعه يا سالي والله ما فضيت اصلحها حتى

ويا خواطر انا مش فاكره مين طلب الحلقات ؟؟؟

معلش يا جماعه الى طلب دور يفكرني انتم عارفين السن وكده

والحلقه ال19 ريم كانت حاجزاها بدلت معايا يعنى

والبنفسج انا حطيتها بدل داليا قوس قزح الى اعتذرت لحين قراءة القصه

محمدابراهيم يقول...

السلام عليكم ماشاء الله اسلوبك فى كتابة القصه شيق وجميل تقبلى تحياتى اخيكى محمد ابراهيم مدونة اكسجين مصر