الأربعاء، 28 يوليو 2010

قلب كامل 3

الحلقة 3

بقلم ندى الياسمين

............................

التفتت نورا لتجدها يد كامل تربت عليها فى حنان ويبدو انه قد لاحظ حزنها وتصرفات احمد زوجها

ابتسم لها قائلا : قاعده لوحدك ليه يا نورا ؟

فردت منى وقد وصلت اليهم : لا مش لوحدها ولا حاجه انا جيت اهو اشوف الهانم سرحانه فى ايه.... وموجهة كلامها الى نورا .. اللى واخد عقلك يا نورا

رسمت نورا ابتسامه على وجهها يبدو انها انتزعتها انتزاعا لتظهرها على وجهها وقالت : ابدا والله باتفرج على الناس عادي

ضاحكها كامل ومنى قليلا وانصرف كامل وظلت منى تحاول التحدث الى نورا التى ينتقل نظرها دائما الى زوجها الغارق فى ضحكاته مع الشقراء.

فقالت لها منى باشفاق : نورا ما تزعليش من عمايل احمد هو الواد ده طول عمره كده شقي بس وحياتك هو مش وحش بس هو طبعه كده مجنون شويه

وتستطرد محاوله التهوين على نورا الموقف ... عارفه وهو صغير كنت اقوله يا ابنى انت اول ما بتشوف تاء تانيث اعصابك بتسيب

وتضحك منى ونورا كثيرا وتنهي نورا ضحكتها قائله بمراره تظهر فى حروفها: لا ما انا اتعودت على كده ما تاخديش فى بالك

وتنتهي الحفله على خير وجه وبنجاح على المستوى العملي وامام العماره الشاهقه التى يسكنوا فيها جميعا يتبادلون الاحاديث والسلامات ويتفرقون جميعا كل منهم يحمل ما يحمله معه من مشاعر وافكار

كامل : سارع الى مكتبه واخرج مجموعة صور قديمه له فى الجامعه والتي بالطبع تضم صور أمنية

يمر امامه شريط ذكرياته الجميله الى ان يتوقف عند صوره تظهر فيها صورة امنيه الى جانب زوجها فيما بعد مع باقي الاصحاب ويتغير ملامح وجهه الى بعض الاسى حين يتذكر وقت ان جرع المراره بضياع امنية منه

ولكنه سرعان ما ينفض الذكريات عن راسه ويقول بفرح : بس خلاص .. ويضع يده على قلبه ويستطرد هايدق تاني .... لا ده هايرقص مش هايدق بس

........................

محمد موجها كلامه الى مها بغضب بمجرد ان خلا بها : انتى مش هاتبطلي كلامك الى مالوش لازمه ده ... وبتختاري اوقات غير مناسبة بالمره ... انتى ايه ما بتزهقيش .

مها ببرود وهى تتخلص من مجوهراتها : انت الى ما بتزهقش ؟؟؟ ما بتزهقش تشقى وتتعب وفى الاخر كله رايح

محمد : يوووووه قلتلك مافيش حاجه اسمها كله رايح كله بتاعنا انا واخواتي .... وقبل ان يكمل

ترد مها : اهو اديك قولت انت واخواتك ... ليه هما بيشتغلوا زيك ؟؟

محمد : قلتلك مالكيش دعوه وبعدين انا باخد راتب عن شغلي وعمري ما طلبت حاجه من بابا وقالي لا راكبين انا وانتى احسن عربيات ومودي ولادي ا حسن مدارس وانتى لبس ومجوهرات ونوادي ومافيش حاجه نقصانا ابدا يبقى ليه بقى كل ده ؟؟؟!!

مها : حقى يبقى لنا مال لواحدنا ويبقى لك شركه لوحدك ويكون عندنا املاك بتاعتنا وبتاعة ولادنا

محمد : وهو انا قلتلك لا واصلا ماهى الشركه والاملاك فعلا بتاعتنا وبتاعة ولادنا يا ستى وانا اعمل شركه وابقى صغير لوحدي ليه ما انا دلوقتي اكبر شركه فى البلد ... انتى بتفكري ازاي ..... ويستطرد بضيق باقولك ايه خليكى فى حالك وما تتكلميش فى الموضوع ده تاني .

مها بحنق وغضب : لا هاتكلم بقى وده حقي ..... واكملت حديثها بينما محمد يخرج من الغرفه غاضبا محاولا الابتعاد عنها

....................................

وبين جدران اخرى كانت هناك نورا هادئة الطبع والتى وجمت وتملك منها حزن فشلت فى ان تخفيه

واحمد ينظر لها وهى تتجه الى فراشها ... مالك يا نورا حاسس انك متضايقه

نورا : لا ابدا مافيش حاجه .... ولم تستطع نورا منع دموعها بعد اخر حرف

فهلع اليها احمد : ايه ده انتى بتعيطى فى ايه ؟؟ حد زعلك فى الحفله .؟؟؟

ويضمها الى صدره وتجهش هى فى بكائها اكثر

فيربت على ظهرها ويضمها اكثر ويقولها : طب اهدي .. اهدى عشان خاطري وقوليلى مالك

نورا : احمد انا عايزاك تتجوز

احمد : يووووووووووه يا بنتى مش قلتلك بطلي الهبل الى فى دماغك ده ... انا مبسوط كده

نورا : يا احمد احنا بقالنا خمس سنين متجوزين وانا ما عرفتش اخلفلك طفل تفرح به

احمد : يا ستى انا قلتلك ان انا مش عايز عيال لو جم ماشي ماجوش خلاص من عند الله

وبضيق .. وبعدين ايه لازمة الكلام ده دلوقتي بس واحنا راجعين من الحفله مبسوطين

نورا : لازمته انى لما باشوفك بتكلم أي واحده باتجنن واحس انك بتعمل كده عشان انا ناقصه حته

احمد : واحدة مين يا ستى ده شغل كله شغل

نورا : يا سيدى باقولك اتجوز انا موافقه هو انا قلتلك حاجه

احمد : يا بنتى انتى عبيطه مش عايز اتجوز وبعدين مين قالك ان المشكله فيكى ما الدكاتره قالوا ان احنا الاثنين ما عندناش حاجه

ويستطرد محاولا التسريه عنها .. وبعدين تعالي هنا اتجوز انا ليه مش فاهم ما انا متجوز ومتجوز قمر يا ناس

فتبتسم نورا من خلف دموعها ... ايوووه اضحك عليا بقى وام شعر اصفر اللى كنت واقف هتاكلها بعنيك دى ؟

احمد : اصفر ايه واخضر ايه بس وحياتك عندي ده تسليك مصالح شغل والله شغل .... شغللللللللل

ومداعبا اياها : واحنا مش هانشوف شغلنا ولا ايه ؟؟؟

…………………

أمنية ...ما زالت امنية لم تنتهي ليلتها بعد فهى مشغوله بانهاء اليوم وتوديع ابنتها امام منزلها الجديد وعيناها مملؤتان بالدموع

وبعد توديعها للعروس انضمت إليها داليا ودعاء

داليا : ماما تعالى عندي النهارده بيتى معايا

دعاء : لا انسى انا حاجزاها من الصبح ... وتنظر لامنيه مش صح يا ماما ؟؟

أمنية : لا مش صح يا حلوه انتى وهى انا مش راحه لا هنا ولا هنا انا هاروح بيتى

داليا : لا مافيش الكلام ده هاتروحي تنامي لوحدك تعالى بس عشان نقعد نرغي بقى ونعلق على الفرح

امنيه : باقولكوا ايه انا مرهقه جدا ومش قادره لا ارغي ولا اعمل أي حاجه انا باحلم بحمام دافي وسرير دلوقتي

داليا : خلاص انا هاجيب العيال واجي ابات انا معاكي

أمنيه : عيال ؟؟ لا لا لا باقولك عايزه انام ده انتى عيالك قرود يا ماما وبعدين ليه اصلا روحي يا بنت منك لها يلا كل واحده تبات فى حضن جوزها

وسبوني بقى اروح استجم بعد المشوار الطويييييييييييييل ده

وفعلا تعود أمنية الى بيتها وتنظر الى جدرانه وتبتسم ابتسامه هادئه

وهى تنظر الى صور بناتها المعلقه على الجدران

وتزفر زفره راحه وهى تقول : الحمد لله

وتلتقي عيناها بصورة زوجها الراحل : فتبتسم ايضا وتقول بصوت مسموع ... خلاص يا شريك العمر اطمنت عليهم كلهم زي ما وصتنى ياللى مشيت بدري وسيبتنى وحدي

وتطرق لحظات فى شجن ثم تذهب الى غرفتها وتستعد لنومها وحين تذهب للفراش تتذكر كامل ................!

…………………

الحلقة القادمة بقلم خواطر شابة

هناك 27 تعليقًا:

amirelhob يقول...

حلقه جميله جدا بجد ورصيد جديد يضاف لبنك الابداع اللى موجود فى المدونه هنا يا دايما كدا من رائع لى اروع يا رب وان شاء اللى الجاى يبقى على نفس المستوى واحسن كمان وميرسى بجد على الحلقه المتميزه دى

حاجات جوايا يقول...

حلقة رائعة جدا جدا يا ندى
الله ينور يا قمر
حبيبت جدا ان القصة مشت مع نفس تصورى للاحداث
تسلم الايادى يا جميل

الدور عليكى يا نوجا
ربنا معاكى :)

حاجات جوايا يقول...

امير الحب
----------
الحلقة فعلا هايلة
وان شاء الله حلقتك كمان تبقى جميلة
ربنا معانا جميعا
:)
تحياتى

خواطر شابة يقول...

يا لهوي على الحلقة القادمة بخواطر شابة انا ركبي سابت انت ماشيين بايقاع جميل جدا جدا ومسؤولية كبيرة لمن سيكتب بعدكم ليحافظ على نفس المستوى ربي يستر ان شاء الله
ندى الياسمين الحلقة سهلة ممتنعة فيها لمسات انسانية جميلة ومرت بسلاسةوهدوء تسلم الايادي عزيزتي
حاجات جوايا موعدي حسب الجدول هو يوم 30 يوليوز وهو يوم عطلة هنا لحسن حظي يعني حلقتي ستكون جاهزة للنشر نهار الثلاثين انا سأكتبها ليلة 29 بالتالي لن تنشر في مثل هذا الوقت الجرعة ستكون نهارية وليست ليلية ههه
تحياتي للجميع

حاجات جوايا يقول...

خواطر شابة
--------------
هههههههههههه فاكراه انا احساس سيبان الركب ده ههههههه
انا والله سعيدة ان الايقاع جميل وقوى وان شاء الله اللى جاى يبقى اجمل واقوى
متقلقش يا جميل ده انت الابداع كله:)

هتتنشر الحلقة ان شاء الله الجمعة بالليل
والحمد لله ان موعد حلقتك صادف عطلة عشان تكونى بعيدة عن ضغط الشغل
بس اول ما تتكتب اتاتش وسيند على طوووووووول انتى عارفة الحالة صعبة هههههههه

ربنا معاكى حبيبتى

غير معرف يقول...

مها دية مستفزة استفزاز بجد انا كانت حاسس وانا بقراء اني محمد وعايز اعمل فيها اي مصيبة دي حاجة صعبة قوي

احمد لو يبطل يسلك شغلة ويخلي باله من الحنينة نورا بجد كانت هاعيط :)

ابو كمميل و مينو هانم شكلهم كدة جامدين اخر عشرين حاجة نفسي انط في الصورة ابوس ابو الكمايل انا بحب الشخصيات دي اقوي


مستني االحلفة الرابعه علي احر من الجمر تخياتي ليكم جميعا وحلقة رائعه

أحمد عبد الحميد يقول...

تسلم الأيادى يا ندى
الحلقة حلوة قوى... مستنيينك يا خواطر
بعد إذن جميع المشاركين فى الحلقات الجميلة دى.. ينفع من دلوقتى أحجز الحلقة الأخيرة لأنى نفسى أختم الحكاية زى ما بدأتها.. لو ماينفعش مافيش مشكلة خااالص لأن القصة بتاعتنا كلنا
تحياتى للجميع

خواطر شابة يقول...

ابو حميد
هذا اصلا تقليد اتبعناه والقصة الاولى الدكتور اسلام هو من بدأها وهو من أنهاها واكيد مرحب جدا بفكرة ان تختم انت هذه القصة
سيادة الرئيسة نلتمس من سيادتكم حجز الحلقة الاخيرة لابو حميد طبقا لما جرى عليه العرف في الليالي
مع تحياتي

حاجات جوايا يقول...

محمود هيرمس
------------
سعيدة جدا انك متابع معاناومندمج مع الاحداث
:)
الحلقة الرابعة بكره بالليل ان شاء الله .. ربنا يهون :)

تحياتى

حاجات جوايا يقول...

أبو حميد
---------
الحلقة محجوزة ليك من البداية بالفعل
احنا اتفقنا من القصة اللى فاتت ان ( اللى يحضر االعفريت هو اللى يقدر يصرفه )ههههههههههه
لو مكنتش انت طلبت كنت هتدبس فيها برضه بالترشيح :)

تحياتى

حاجات جوايا يقول...

خواطر شابة
------------
100 100 يا خواطر
فليحيا الشعب المصحصح

شدى حيلك يا قمر ربنا معاكى :)

حنعيش يعنى حنعيش يقول...

ولسه .... انتوا شوفتوا حاجة ... ندى دى كتله مواهب ... اللى بتقدمه لنا دة ولا حاجة من اللى عندها ....
تسلم ايدك يا ندى .... وخصوصا ان الحلقة اتكتبت بعد الحلقة اللى فاتت على طول ... ايه الوهبه دى يا اخواتى

ستيتة يقول...

الله يا ندى
الله
متعة بجد
عاش يا ردالة

shimaa elkholy يقول...

شكرا يا جماعه بجد ايه ده الكلام ده كتير عليا جدا جدا

حقيقى مش باقول كده يعنى

متشكره لكم اوي اوي اوي

احرجتوني على فكره

يلا يا خواطر بقى عايزه اعرف هايحصل ايه

احلى حاجه انك بتكتب ومش عارف هايحصل ايه جميله اوي اللعبه دي


بس انا عندي اقتراح يا جماعه
انا حافظت على نقطة معينه فى الكتابه ان كلام الراوي باللغه العربيه
وكلام الابطال بالعاميه

باقترح نخلي كل البوستات كده على اساس يكون فى تجانس فى الحلقات

ايه رايكم ؟؟

حاجات جوايا يقول...

ندى الياسمين
-------------
ده اقل واجب يا جميل :)
كنتى فيييييييييييين كل ده ؟؟؟


انا معاكى جدا فى المحافظة على تجانس نسيج الحلقات
ودى بصراحة اكتر مفاجأة عجبتنى فى حلقتك
حسيت اننا فريق متكامل
بنكمل بعض فى الفكر والاسلوب


بالنسبة لنا كمصريين سهلة لاننا بنجيد الاتنين

بس مش عارفة كمغاربة زى خواطر وابو ريان هيقدروا عالعامية المصرية ولا ايه ؟؟

أتمنى انهم يقدروا
ونكمل بنسيج موحد

تحياتى يا جميل

sony2000 يقول...

مسئوليه كبييييره فعلا
يارب اكون قدها
يارب:)

خواطر شابة يقول...

ندى الياسمين
أوافق وبشدة على اقتراحك بالكتابة بالفصحى وفقط حديث الشخوص فيما بينها يمكن ان يكون بالعامية هذا بالتأكيد سيحافظ على وحدة النص وجماليته وتجانسه ما بين الحلقات المختلفة
حاجات جوايا
بالنسبة للعامية المصرية متقلقيش ده احنا لبلب فيها والبركة في الافلام والمسلسلات هههه
مع تحياتي وودي

حاجات جوايا يقول...

خواطر شابة
--------------
ههههههه انا كده اتطمن
على بركة الله

ايه الاخبار
شدى حيلك يا جميل

خواطر شابة يقول...

حاجات جوايا
ياحبيبتي اطمني احنا قدها وقدود ان شاء الله والحلقة حتكون عندك في معادها ان شاء الله فاضل بس شوية رتوش اكملها لما ارجع البيت وابعث على طول هو انا أقدر برضه أأخر الجرعة
دمت بود

Remas يقول...

الله عليكم بجد
ندى الحلقة حلوة اوى اوى وحسيت انها واقعية جداااااااااااا
احداث منطقية والتسلسل رائع
وبجد الحلقات دى من اولها وانا مش بحس ان اكتر من واحد بيكتب
بحس ان الكل بنفس الروح ولا مرة حسيت ن في قطع في الاحداث
برافو برافو بجد

اقتراحك انا معاه جدا في ان الحديث يكون بالعاميه بين الابطال
دا بيقرب الصورة اكتر

حلقة حاجات جوايا كانت اكثر من رائعة
وانا بقى ركبي بتخبط في بعض من دلوقتى يعنى هاقعد اخبط كدا 3 حلقات
ههههههههههههه

ربنا يستر

أبو ريان يقول...

حلقة رائعة يا ندى تسلم إيديك,,,
أنا معك في الكتابة بأسلوب موحد,,
سأحاول أن أكتب الحوار بالعامية المصرية أو على الأقل جزء منه
شكرا حاجات جوايافكرت فينا ,,, دنت رئيييس والنعمة كويس

حاجات جوايا يقول...

sony 2000
------------
ان شاء الله تبقى قدها وقدود يا جميل
متقلقيش خالص :)

حاجات جوايا يقول...

خواطر شابة
-------------
انا عارفة طبعا يا باشا
ربنا معاكى حبيبتى :)

حاجات جوايا يقول...

reem
--------
ربنا يخليكى يا جميل متحرمش منك

جميل جدا انك معانا فى توحيد نسيج القصة
كده هتبقى اجمل واوقع ومش هتشتت القارئ

انتى قدها وقدود يا قمر :)

تحياتى

حاجات جوايا يقول...

ابو ريان
------------
تمام كده يا فندم
كده اتطمنت من ناحيتكوا
عاش التليفزيون عاش
هههههههههه

شكرا يا فندم الريس طبعا لازم يعمل حساب شعبه ولا ايه ؟؟
:):)

تحياتى

خواطر شابة يقول...

حاجات جوايا
هل توصلت بالحلقة عزيزتي

حاجات جوايا يقول...

خواطر شابة
-----------
تمام يا جميل وصلت
هنزلها على طول ان شاء الله