الأحد، 1 أغسطس 2010

الحلقة5

الحلقة 5

بقلم حنعيش يعنى حنعيش

.........................

علا صوت كامل وهويتحدث فى التليفون وامتلأ صوته بالفرحه : واحشنى يا بن الكلب ... ازاى .. والله ... أخيرااا.. ألف حمد وشكر لله...دا اليوم اللى كنت مستنيه من 5سنين ... والله نفسى اكون موجود ...هحاول والله ... ربنا معاك ياحبيبى .. كلنا كويسين وبخير مش ناقصنا الا انك تكون معانا... خلى بالك من نفسك مع السلامه ...مع السلامه

وضع كامل التليفون على المكتب وقال لاحمد ومحمد ... اخوكوا حدد ميعاد مناقشة الدكتوراه بعد اسبوعين وان شاء الله هياخدها بامتياز.. ده ابنى وانا مربيه...عايزين لما يناقش الدكتوراة نعمل حفله نعزم فيها الوزرا .... حاول احمد استفزاز كامل قائلا : ماشى ياحاج ... ماانت بتحبه اكتر مننا ...لم يستسلم كامل للاستفزاز وقال: كلكوا معزة واحدة ... بس اخر العنقود سكر معقود ... مش الوسطانى الرخم .... يالا انت واخوك شوفوا شغلكوا

********************

جلست مها على كرسى الانتريه ونادت الخادمه لتحضر لها مج النسكافيه ...ورفعت السماعة لتتصل بوالدتها ...صباح الخير ياماما ...ازيك يا حبيبتى ...والله العيال لاخمنى ... ومحمد طول النهار برة ... انا اللى قاعدة للدروس والمدرسين .... وياريتهم فالحين الا دراجاتهم زى الزفت ....ماتيجى تقعدى عندى يومين ...انتى اخف منى ...لا متقوليش كدة ... محمد بيحبك ... دا لسه امبارح بيقولى احنا بقالنا كتير ماشفناش ماما دى وحشانى ...ياستى احنا مالنا ومال اخواته كل واحد قافل عليه باب شقته ... ماهو ده اللى عايزة اتكلم معاكى فيه ... بزن عليه فى موضوع الفيلا ده ومش راضى .. خايف من ابوه ولا ايه مش عارفة ... ايوه والله يا ماما دا اكتر واحد مطحون فى الشركة دى ...طاب يا ماما يجيبها بس وبعدين حكاية بإسم مين دى سهله

جاءت الخادمه بالنسكافيه ... فقالت لها مها بعصبية ... حطيها عندك وغورى شوفى شغلك ....ايوة يا ماما ... بقولك ايه يا حبيبتى ... مش هينفع الكلام فى التليفون ... انا جيالك اقعد معاكى ساعتين قبل الولاد ما ييجوا من المدرسة

قامت مها واخذت النسكافيه ودخلت لتستعد للذهاب الى امها

*****************

جلس كامل على مكتبه ورفع سماعة التليفون وطلب من السكرتيرة ان تلغى جميع التليفونات والمقابلات والمواعيد وان تحضر له فنجان من القهوة ... رجع كامل بكرسيه الى الخلف وسرح مع خياله : هي امنيه ما اتصلتش ليه ... نسيت ولا ايه ...ممكن تكون ماعدتش تحبنى ... بس لما قابلتها كان كلامها بيقول انها لسه بتحبنى ... ولا انا موهوم ولا ايه ...لا تلاقيها ملخومه بس مع بنتها ... عروسة بقى وضيوف وناس جايه تزور وتبارك .... بس اكيد حتتصل ... يااااااااه ... زمان ماكنش فيه موبيلات ... ولا حتى ارضى ... ولما كانت الدراسة تخلص ... كنا نشوف بعض بالعافيه

ضحك كامل ضحكه عاليه ... اما انا كنت باعمل مغامرات .... كنت اقف قدام البيت ... بالساعة والساعتين واول ماتطلع فى البلكونه اجرى استخبى ورا أى شجرة عشان متشوفنيش .. بس الغريب انها كانت بتشوفنى وتعمل مش واخدة بالها ومتعديش ربع ساعة إلا والاقيها نازلة وتمشى من قدامى من غير ما تبص عليا ولا تحسسنى انها شايفانى وتفضل ماشية لغاية بيت منال صاحبتها مع انه كان مشوااااااااار .. وعشان انا عرفت الطريق وحفظته كنت بسبقها واروح اقف مع عبد الله صاحبى اللى كان فاتح بوتيك على ناصية الشارع اللى فيه بيت منال وهى كانت كريمة معايا وبتعدى عالمحل كل كام مرة كده تشترى حاجة عشان نتكلم مع بعض كلمتين ونعرف اخبار بعض .. وكل مرة تتفاجئ بيا .. قال يعنى ههههههه.... بس كانت أسعد لحظات حياتى لما أتفاجئ أنا بيها فى بلكونة البيت اللى قصاد بيتنا .. كان بيت الخياطة اللى مكانتش بتفصل غير عندها يدوب اشوفها نبتسم لبعض ونحيى بعض وتدخل جررررى قبل مامتها ما تاخد بالها ... كانت اياااام هى عملت اللى عليها عشان انطق بس انا اللى مقدرتش برضه .. كان فقرى ملجمنى الله يسامحه بقى .. الحمد لله على كل حال

تنهد كامل تنهيدة قويه على صوت الباب .. ودخول السكرتيرة قائله : القهوه يا افندم

وضعت السكرتيرة القهوه على المكتب وفى طريقها للخروج قالت : على فكره يا فندم ... فيه ست اول مرة تيجى كانت عايزة تقابل حضرتك وانا قولـ

قاطعها كامل : ست اسمها ايه الست دى ؟؟

اخذت السكرتيرة تتذكر ، فزاد انفعال كامل وقال : انطقى اسمها ايه ؟؟

قالت السكرتيرة وهى ترتعد :امانى ... امينه .. مش فاكـ

قال كامل : اسمها امنيه

قالت السكرتيرة متهلله : ايوه يافندم امنيه

قال كامل : وفرحانه ... مشيت امتى ؟

قالت تطمنئه وهى مندهشة من لهفته الغير معتادة : ماتكونش لحقت تطلع من المجموعة

رفع كامل سماعة التليفون وطلب الامن قائلا : ايوه يا مصطفى فيه هانم اسمها امنيه خرجت من عندك ولا لسه

رد مصطفى : لسه يا فندم البطاقة بتاعتها لسه عندى

قال كامل : اوعى تمشيها يا مصطفى انا جاى لك حالا

خرج كامل من وراء المكتب وهو يجرى وسط ذهول السكرتيرة ولم يلحظ انه قلب فنجان القهوة على البنطلون .....!!!

...........................

الحلقة القادمة بقلم ريــــــــــــــــم

هناك 31 تعليقًا:

حاجات جوايا يقول...

حنعيش يعنى حنعيش
---------------
تسلم الايادى يا فندم
الحلقة جميــلة رغم انشغالك
والتطور فى سياقه تماما
ربنا يعينك ويوفقك ويزيدك ابداع

ريـــــــم
الدور عليكى يا قمر
ربنا معاكى :)


تحياتى

حنعيش يعنى حنعيش يقول...

تسلم ايدك انت ياست الريسه ... ياجماعة من الشيم الجميله اللى متعرفوهاش عن الريسه ... انها بتقف جنب المشغول وتصلح له فى حلقته علشان تمشى مع السياق العام للاحداث ... ادعو معايا ... طويل العمر يطول عمرة وينصره على مين يعاديه ..

shimaa elkholy يقول...

استااااااذ

والله بجد البوست جميل

حلو اوي الى كان كامل بيعمله هو وامنيه عسول بشكل مش ممكن

حاليا مافيش كده حضرتك حاليا بيدخلوا فى فيلم تعطيف وسنسنه على طول وهو لسه عيل واهبل وبياخد مصروف

تسلم اديك يا دوك
وطمنا عليك

shimaa elkholy يقول...

ههههههههههههههه
اهو ظهر ا هو


ازيك يا فندم وتسلم اديك

وطويل ا لعمر يطول عمره ويزهزه عصره وينصره على مين يعاديه هاي هي
هههههههههههه

ايه رايك فى الاقتراح بتاعي ؟

حنعيش يعنى حنعيش يقول...

ندى
ماعرفش ايه هوه الاقتراح ... بس انا موافق ... عمرك ما اقترحتى حاجة وحشة

حاجات جوايا يقول...

حنعيش يعنى حنعيش
----------------
هههههه الله يخليك يا فندم
انا مصلحتش غير رتوش بسيطة
الفكر والابداع انت صاحب الفضل فيه
عجبنى اوى دخول مامة مها فى الاحداث وانها كمان مصدر للشر فى القصة وهى اللى بتحرك مها
وعجبتنى لهفة كامل
بحب جدا اسلوبك البسيط التلقائى اللى بيوضح العلاقات الرومانسية بين اطرافها
زى كامل وامنية هنا
وفهمى وزينب فى ثمن الاحلام

ربنا يعينك يا فندم وتتغلب على مشغولياتك وتزداد ابداعا

تحياتى

حنعيش يعنى حنعيش يقول...

على فكرة ... حكاية كامل وامنيه واللى كانوا بيعملوة ... شركه بينى وبين الريسه فى الكتابه ... اه مش بقولكوا .. طويل العمر يطول عمرة ويزهزه عصره وينصره على مين يعاديه ...هاى هى

shimaa elkholy يقول...

نقول تاني الاقتراح يا باشا

الاقتراح اننا فى بداية كل فتره رئاسيه

نكون بالفعل قررنا مين هايكتب العشر حلقات القادمه

وقبل ما يبدأوا كتابه نعمل اجتماع على اي ميل نتكلم فيه عن شخصيات القصه وكل واحد يطرح افكاره بحيث يكون فى تكامل وترابط فى الحلقات اكتر من كده

ايه رايك ؟؟

shimaa elkholy يقول...

يا سيدى

برضه اللمسه الحريمى فى الرومانسيات لها طعمه تاني يا ريس

ماشي ربنا يخليلكى لنا يا ريسه
منورين يا قوم

حاجات جوايا يقول...

ندى الياسمين
------------
ازيك يا ندود
بالنسبة لاقتراحك يا جميل
رغم ان له ايجابيات مهمة زى اننا نمشى كلنا فى نفس السياق ومحدش يشذ او يغيب عنه حاجات مهمة
الا انه هيقلل عنصر الخيال والابداع والحرية فى حلقتك وهيعملها سقف .. والابداع ملوش سقف والا يبقى اسمه حاجة تانية
عنصر المفاجأة فى الحلقات له بريق خاص واحساس رائع بيوصل للمتلقى
بيشدنا ويشوقنا عشان نعرف الحلقة الجاية هيحصل فيها ايه
لكن لو حددنا من البداية الخطوط العريضة حتى هنفقد عنصر الحماس وهنقعد نلف وندور على فكرة واحدة ونخنق خيالنا ونمل من الفكرة فى حد ذاتها

ده رأيى المتواضع
وهستنى رأى باقى الاعضاء
ونشوف الاغلبية هيستقروا على ايه ؟؟

تحياتى يا جميل

shimaa elkholy يقول...

لا بصي يا سالي انتى مش فاهماني

احنا مش هانتكلم عن كل واحد عايز احداث ايه

انما المفروض نتكلم عن الشخصيات وطبيعة كل شخصيه وتصور كل واحد فينا للشخصيه ازاي

لو خدتي بالك فى ثمن الاحلام كان فى اختلاف فى الراي من الكتاب حول شخصية ميار

هل هى شريره فعلا ولا هى مش شريره لكن طموحه واختارت طريق غلط لتحقيق طموحتها


وده خلى فى تضارب شويه فى الاحداث من وجهة نظري وتموج للشخصيه

يعنى هاديلك مثال

شخصية محمد مثلا فى القصه
هاديلك انطباعي انا الى كتبت على اساسه والى ممكن يكون غير انطباعك خالص

بالتالي انتى او اي حد بعدي ممكن يخلى محمد تصدر منه تصرفات ما تمشيش مع ملامح الشخصيه

مثلا انا شايفه ان محمد رغم كل شيء كلام مراته ده بيعتمل جواه ولو حتى على سبيل الزن على الودان من مراته

وفعلا هو حاسس انه بيشتغل اكتر وانه بياخد قليل وهو غيور شويه

دى وجهة نظري ممكن يكون كاتب تاني يطلع محمد ده ملاك مقهور من مراته الشيطانه

وهكذا لما نتكلم عن افكارنا اعتقد هاتكون افيد

وعنصر الاثاره موجود كل واحد هايحتفظ باحداثه ومفجآته عادي

وبرضه مستنيه رايكم

حاجات جوايا يقول...

حلو اوى الكلام ده
خصوصا ان احيانا فيه ناس بتكسل ترجع تشوف تاريخ الشخصية من الحلقات السابقة
ده اللى بيخلى فيه تعارض بين سمات الشخصية الواحدة

بالنسبة لشخصية محمد مثلا
احنا فهمنا من اول حلقة ان اولاد كامل كانوا مثال للذرية الصالحة
يعنى سواء محمد او احمد او منى او محمود
فكلهم مهما خدتهم الدنيا هيرجعوا تانى لحضن باباهم ومش هيعصوه

محمد ممكن زى ما بتقولى ينساق لرأى مراته ولو على سبيل انه يريح دماغه من زنها .. احتمال يطمع .. احتمال يقول اشمعنى انا .. لكن فى النهاية المفروض انه هيرجع تحت جناح باباه من تانى كابن بار طائع .. مش رجل بلا شخصية

ده تصورى لشخصيته
وقياسا عليها اخواته

موافقة على اقتراحك يا ندى
بفتح باب المناقشة

بس المشكلة هتبقى فى الزمان والمكان والمواعيد الملخبطة

نتواصل بالايميلات بقى كبداية وبعدين نوحد الاقتراحات النهائية فى ايميل يرسل للجميع

تحياتى يا قمر

خواطر شابة يقول...

اعجبتني الحلقة وأعجبني ان امنية لم تكن المتصلة لانني وانا أكتب توقعت ان من سيكتب بعدب لن يجعلها تتصل وصدق ظني.
تطور الشخصيات سلس ودخول والدة مها على الاحداث جاء بشكل غير مقحم
تفصيل علاقة كامل بأمنية وضحت ماكان ملتبس في حلقتي وما كانت اشارت له ندى من انه لم يكن بينهما علاقة حب بحيث الان توضحت الامور
تسلم الايادي دكتور

خواطر شابة يقول...

عزيزتي ندى الياسمين
اقتراحك ليس فيه ما يسئ لكن أعتقد ان جمال التجربة هو في تلقائيتها دون تخطيط ولا رسم حدود وفي ان كل المسارات مفتوحة وكل النهايات والاحداث ممكنة
اعتقد اننا كمهتمين بالموضوع وكمتابعين نستطيع مراقبة الاحداث ومسار الشخصيات وابداء الملاحظات متى ما كان لها محل لتصليح ما نتفق على انه خارج السياق
في رأيي المتواضع هذا هو افضل حل كي يبقى الابداع حر وغير مقيد والامر مطروح للنقاش

خواطر شابة يقول...

حاجات جوايا
كل الود لك عزيزتي

Mahmoud Hermes يقول...

الله انا قلبي اتنخطف مع ابو الكماميل بجد شعور جميل قوي وانتم بصراحة جامدين قوي بتعاملو تشويق بدرجه جاميله ايه رايكم متعاملو سهر علي كذا حلقه في التليفزيون و بتاعه كمال ديه كوميدي تريجيدي اجتماعي اخر حاجة بجد ايه رايكم في الفكرة دي ؟ اصلكم جامدين بجد ؟

Remas يقول...

الحلقة حلوة اوى اوى يا دكتور
طبعا مس حاجة غريبة على دكتور اسلام
وتسلم ايدين الريسة طبعا اللى واقفة جنب الكل

عقبال ما تقفي جنبي ياااااااارب
انا متفقة مع ندى في ان الاحداث اللى تذكرها كامل عن ايامه القديمة مع امنية كانت جميله وتذكرنا بايام الحب الجميل

ان شاء الله الحلقة هاتكون جاهزة بكرا وربنا يستر بجد

حلقة خواطر شابه رائعة بجد
وبحس انك يا خواطر مصرية اكتر منى هههههههه

دا اناهاتعلم منك لمصري
ربنا يحميكى ماشاء الله

تسلم ايديكو بجد
وادعووووووولى

حنعيش يعنى حنعيش يقول...

ندى
انا رأيى ان حلاوة الفكرة انها بتستفذ الابداع والخيال .. لان ماحدش عارف اللى قبله واللى بعدة حيعمل ايه .. وعلشان كدة نسيبها مفتوحة احسن ... ونصلح لبعض اللى يخرج عن السياق ... لكن لو قصدك ان احنا نحط تصور للشخصيات الاساسيه فى القصه ...ونسيب بعد كده اللى عايز يضيف شخصيات يضيف ... ماشى كدة ممكن تظبط اكتر ... المهم بقى عايزين تدبيس حلو كدة زى بتاع ابو ريان فى ثمن الاحلام ... ونشوف مين الشاطر اللى حيطلع من المطبات دى وازاى حيطلع منها... تسلم افكارك ياريسة ياسابقة... طاب والله كلمه سابق دى حلوة امال مش بيحبوها فى مصر ليه ....مع ان معناها ان انت اللى سبقت ...حاجةغريبة...

أحمد عبد الحميد يقول...

تسلم إيدك يا دكتور إسلام
بس يا جماعة عاوزين الأحداث تسخن شوية لأنى شايف إن مافيش حاجة جديدة بتحصل
تحياتى للجميع وأرجو ماحدش يزعل من الملحوظة دى

shimaa elkholy يقول...

ماهو انا قصدي كده يا دوك

عشان بس رسم الشخصيات فى ثمن الاحلام كان فى تذبذب جامد

وعموما شيافه ان الغالبيه مش مشجع الفكره

وخلينا نشوف برضه

منورين يا قوم

خواطر شابة يقول...

ابو حميد لازلنا في الحلقة الخامسة وبالتالي ضروري ان نتعرف بداية على الشخصيات وتاريخها قبل أن نبني عليها احداث اعتقد ان المرحلة الاولى قد تمت الان وأكيد القادم سيكون أحلى ان شاء الله

حاجات جوايا يقول...

خواطر شابة
-------
منورة يا جميل:)

حاجات جوايا يقول...

محمود هيرمس
----------
شكرا يا فندم
:)
التليفزيون ده مش طموحنا خالص
يا عالقنوات الفضائية المشفرة يا بلاش ههههههههههه
البركة فيك بقى شوفلنا الموضوع ده :)
سعيدة بمتابعتك :)
تحياتى

حاجات جوايا يقول...

reem
------
تسلمى يا ريم
ربنا يخليكى حبيبتى
متقلقيش خالص هقف جنبك ووراكى وقدامك وكل مكان
هخيلك عالاخر ههههههههه
ربنا معاكى يا قمر :)

تحياتى

حاجات جوايا يقول...

حنعيش يعنى حنعيش
----------------
ابو ريان قرب خلاص اهه
حلقته بعد ريم مباشرة
هييجى بنفسه يدبس م على يونس هههه
بس مش عارفة هو مختفى ليه ؟
و م.على يونس كمان ؟؟

اظهروا وبانوا عليكوا الامان
حلقاتكم قربت
طمنونا انكم معانا

تحياتى

حاجات جوايا يقول...

أبو حميد
----------
يا فندم بلاش الحساسية المفرطة دى :)
احنا هنزعل ليه بس
كلنا فريق واحد والعمل بإسمنا كلنا
ويهمنا انه يكون فى أجمل صورة
يعنى لازم نتناقش ونقدم اقتراحات وانتقادات وتعديلات وإلا ميبقاش اسمنا فريق
فقول رأيك وكل اللى انت عايزه من غير اى حرج .. ده ضرورى جدا منك ومنى ومن الجميع

القصة اللى فاتت انت مكنتش معانا
الاحداث بدأت تسخن وتولع كمان على الحلقة العاشرة
المرة دى وانا برشح الاسماء كان هدفى الاحداث تسخن عالحلقة السابعة لان مينفعش قبل كده .. انت عارف ان كل يوم بتظهر لسه شخصية جديدة والاحداث لسه بتتبلور وبتتشكل وتحدد مسارها

الحلقة السابعة اتوقعها ان شاء الله نارية .. لانها هتبقى بقلم ابو ريان .. وما ادراك من هو ابو ريان .. المهم يظهر ويبان هههههه

فمتقلقش هتسخن هتسخن .. اعمل حسابك بس على طفاية حريق وانت جاى يومها هههههههههه


خواطر شابة
اخوكى فين يا خواطر ؟؟؟؟

خواطر شابة يقول...

حاجات جوايا
الرسالة وصلت يا افندم هو متابع وينتظر دوره وان شاء الله يكون عند حسن الظن
مع تحياتي يا سيدة الريسة

حاجات جوايا يقول...

خواطر شابة
------------
تمام يا جميل
ان شاء حبيبتى
تحياتى

حاجات جوايا يقول...

reem
-----
فينك يا جميل
الحلقة هتتنشر النهاردة
شدى حيلك
:)

تحياتى

ستيتة يقول...

حلوة حلوة
بس ياريت حد يوريني في مها يوم من اوله لو سمحتم :)

حاجات جوايا يقول...

د. ستيتة
ههههههههههه لها يوم اكيد
لكل ظالم نهاية
منورة يا قمر