الأحد، 17 أكتوبر، 2010

قلب كامل 24

الحلقه الرابعة والعشرون

بقلم ندى الياسمين

نورا بدأت تتحرك على وهن وجلست بجوار احمد تعتنى به قليلا فامسك احمد بيديها قائلا باسى: نورا سامحينى يا نورا انا والله مش عارف انا عملت كده ازاي ... انا مش عارف اعتذر ازاي واعوضك ازاي ؟؟ انا اسف اسف اوي يا نورا

نورا باعياء وغصه : انا عارفه يا احمد بس انا كمان مش عارفه اعمل ايه .. يرضيك الى بيحصلى ويرضيك الوضع على كده ... صدقنى انا كمان مش عارفه اقولك انا ايه يرضينى .. لا قادره اقولك اعيش معاك على كده ولا قادره اقولك طلقها وهى فى بطنها ابنك .. ما اقدرش

احمد : لا يا نورا بس انا عايزك انتى انا هاطلقها واتفاهم معاها واخد منها الولد اربيه انا .. نربيه سوا ..

نورا بلهفه : لا .. حرام عليك يا احمد .. تاخد طفل من امه ازاي بس ..

احمد : مش عارف انا محتار مش عارف اعمل ايه .

نورا وهى تربت على يده وبعد تنهيده قصيره : اقولك على حاجه خليها على الله بقى ونسيب الموضوع ده شويه لحد ما ربنا يتم شفاك على خير وترجع تقف على رجلي عشان تعرف تفكر

احمد : انا اهم من رجليا واهم من كل حاجه فى الدنيا اشوفك انتى بخير يا نورا ربنا يشفيكى ويخليكى ليا يارب

ويقبل يدها ويربت عليها

كامل فى سيارته يدور بعقله :

الحمد لله ان الصبيان مش معترضين .. بس لسه منى ... انا عارف انها هاتثور وتعترض وهاتعمل مشكله

انا عارفها كويس ..... يزفر زفره قويه ويقول ايييييييه يا كامل انت هاتضعف ... انا هاعدي عليها وانا طالع واكلمها

وعلى باب شقة منى

منى : بابا اهلا يا بابا ايه النور ده اتفضل يا بابا

كامل : ازيك يا منى عامله ايه .. انا قلت اعدي اشرب معاكي القهوه .. انتى قهوتك لا يعلى عليها بتفكرني بقهوه المرحومه امك

منى : بس كده يا بابا عنيه والله .. تصدق انا كمان نفسي اشرب قهوه .. ثواني وتكون عندك القهوه

كامل : طب انا هاتيلى الواد ابنك الصغر اما العب معاه شويه على ما تخلصيها

محمد يبدأ يومه وحالاته المزاجيه سيئه للغايه ويباشر عمله حتى الظهر ويشعر باعياء وصداع فيقرر ان يعود للبيت .. وفى الطريق ..

محمد : الو ازيك يا ايهاب ... تصدق ياد انت ابن حلال .. والله واحشنى ..انت فين ؟؟

ايهاب : انا فى الشغل بس نازل بعد عشر دقايق الكافيه فى البريك ما تيجى تقعد معايا شويه

محمد : طيب انا قريب منك هاتيجى تلاقينى مستنيك فى الكافيه .

منى : اتفضل يا بابا القهوه التمام

كامل : هاتي يا بنتى تسلم اديكى ... اقعدي يا منى عايز اتكلم معاكي كلمتين

منى : خير يا حبيبى اتفضل

كامل : قبل اي حاجه لازم تعرفي ان مامتك كانت وما زالت والله غاليه عليا اوي

منى بزفره قويه : علينا كلنا يا بابا والله ... ما تعرفش انا محتاجلها اد ايه

كامل : منى بصراحه انا مش قادر استحمل وحدتي ... انا نويت اتجوز .

منى بصدمه : ايه ؟؟ تتجوز ؟؟ ازاي ؟؟

كامل : ايه الى ازاي يا بنت

منى : ازاي تقبل واحده غير ماما تدخل بيتنا ... ازاي حد يكون مكان ماما يا بابا ... ليه انت ناقصك ايه يا بابا .. انا قصرت معاك فى حاجه ....وتكمل وبدأت عيناها تغرورق بالدموع ... هانت عليك ماما يا بابا

كامل : منى اهدي بس خلينى اعرف افهمك ..

اولا مافيش حد ابدا يملا مكان ماما .. وما حدش ابدا قال ان حد هايجى مكان ماما .. انا لما اتجوز ان شاء الله هاخد شقه بره بعيد بس هاتبقى قريبه من هنا برضه عشان افضل قريب منكم وهاتفضل شقتي فوق زي ما هى وهانتجمع فيها دايما وكل حاجه هاتفضل زي ما هى مافيش حاجه هاتتغير يا بنتى

منى : اه ده انت مرتب كل حاجه بقى يا بابا .. د ه انت مش بتاخد رايي انت بتدينى خبر ... هما الرجاله جرالهم ايه كلهم ؟؟!!

كامل : قصدك ايه ... وبحده قليله .. منى انا يا بنت مش صغير وما حدش وصي عليا انا بس ما حبيتش اعمل حاجه من وراكم .... ويرجع للين الحديث ثانية : يا منى انتى اقرب ولادي لنفسي يا منى حسى بيا يا بنتى انا عايش لوحدي .. محتاج حد جمبي ...امك سايبه فراغ فى حياتي كبير وانا راجل كبرت وطول عمري شقيان

منى بحزن بالغ وهدوء : والى انت هاتتجوزها دي يا بابا هي الى هاتملا فراغ ماما ؟؟

كامل بياس لحظي : مافيش فايده مش هاتفهمينى ..

منى بحزن واسى : واخواتي الصبيان عرفوا الكلام ده ؟؟

كامل : ايوه عرفوا وموافقين .

منى : كمان ؟؟!! مش قلتلك انت بتدينى خبر .. وتكمل والدموع منهمره على وجهها .. عموما يا بابا انت حر اعمل الى انت عايزه ما اقدرش امنعك

وتجهش ببكاء قوي ويسحبها كامل الى حضنه ويربت عليها بحنان وعيناه قد تحجرت بهم دمعتين حارقتين

محمد مشيرا الى ايهاب ليعرف مكانه وبعد تبادل السلامات

ايهاب : ايه يا جدع انت لو ما كنتش اسأل عليك ما تفتكرنيش ولا ايه

محمد : ما تستهبلش بقى ما انا الى متصل عليك المره الى فاتت

ايهاب : خلاص ياعم هو احنا بينا الكلام ده برضه .. انت صاحب عمري .. بس تقول على الطاحونه الى احنا فيها

محمد : واي طاحونه يا ابنى ..

ايهاب : بس مالك يا حماده شكلك وصوتك مش عاجبنى .. احمد اخوك عامل ايه دلوقتي

محمد : احمد كويس بيتحسن الحمد لله .

ايهاب : امال مالك كده حاسس ان الشراب المقلوب الى فى وشك ده وراه مصيبه .. يلا اعترف

محمد : ابدا بس مخنوق شويه ... ما بقيتش عارف الناس عايزين ايه ولا انا حتى عايز ايه ..

ايهاب : امممممممم موضوع كبير يا ريس .. مشيرا للويتر .. هات يا ابنى اثنين شاي عشان نركز ............. قول بقى مراتك عملت فيك ايه ... حاكم انا عارف كل مصيبه فى هذا الكون وراها احد الزوجات الكريمات

محمد مبتسما : تصدق اه ياله ... ده هايجونونا بعون الله الستات دول

ويستعيد جديته : تصدق بالله انا جيت وقت حسيت انى كرهت اخواتي وابويا والشغل والعيشه والى عايشنها وحسيت فعلا ان انا كل السنين الى فاتت دي كنت بانحت فى الصخر من غير اي داعي

ايهاب : يا ساتر يارب ليه يا ابنى ما طول عمرك انت واخواتك ايد واحده .

محمد : الزن يا ابنى .. زن زن زن .... وانا فضلت اهاودها برضه واريح دماغي واقول كل الستات كده لحد ما الحكايه زادت عن حدها .. بس الحمد لله انا فوقت فى الوقت المناسب

ايهاب : لا طبعا خد بالك الستات فعلا اجدع ناس يخربوا العلاقات بين الراجل واخواته .. ما تسألش عنها

محمد : انا لما احمد عمل الحادثه وعشنا الموقف الكئيب ده كلنا مع بعض ولقيت منها يا اخي جحود كده ناحية اخوايا الى مرمي بين الحيا والموت ... فوقت وقلت لا انا لازم اراجع حساباتي .. وبعدين يا اخي حسيت انها اتسعرت على الفلوس وعايزه كل حاجه باسمها .. وحاجه تقرف

ايهاب : طب كويس انك انت فوقت فى الوقت المناسب .. بس اوعى برضه تخرب بيتك يعنى حاول معاها برضه انت عارف العيال مالهاش ذنب

محمد : والله ما انا عارف الى انا قولته النهارده ده هايوصلنى لفيين بس عموما انا ارتحت لما قلت لها الكلام ده

ايهاب : يا خوفي منك يا بدران انت عملت ايه يا فالح .. انا قلت من الاول الشراب المقلوب ده ما يطمنش

محمد : يعنى هاعمل ايه يعنى يا اخويا ما انت عارف اخري يعنى كلمتين بعبعت بيهم وخلاص بس والله يا جدع كانوا كابسين على نفسي .. وكنت حاسس انى قرفان من نفسي وهما جوايا ..

نهى: سلام عليكم .. صباح الخير يا دكتور حسام

حسام : اهلا يا انسه نهى اتفضلي شويه على ما اخلص الى فى ايدى

وبعد انصراف من هم فى مكتب حسام تنظر نهى الى حسام بعتاب : ازيك

حسام : الحمد لله .. ازيك انتى يا نهى عامله ايه

نهى : انا كويسه طول ما انت كويس

حسام : ايه مالك شكلك متغير

نهى: انا برضه الى متغيره ؟؟

انت الى من امبارح بتكلمنى بفتوره وكأنى انا السبب ان ابنك تعب

حسام : ايه التخاريف دي !!!

نهى : مش تخاريف ... حسام صارحنى انت رجعت فى كلامك ... حسيت انى غلطه فى حياتك ؟؟

حسام : بلاش هبل يا نهى انا اعصابي مش مستحمله

نهى : ولا انا اعصابي مستحمله ... احنا لازم نحسم الامر يا حسام انا حاسه انك متغير من ناحيتى

حسام : نهى انا مش متغير من ناحيتك انا بس مرهق ودماغي مشتته شويه ..

نهى : طب احكيلى شاركنى .. قولي ايه مشتتك وايه شاغلك .. ولا انا الى مشتتاك ؟؟

حسام : والله ما عدت عارف حاجه

نهى بحنان : طب قول الى يجى على بالك واحنا نعرف سوا

حسام : منى شكلها شكت فى حاجه .. عماله تقولي كلام غريب من امبارح وتحكيلى قصص على صاحبتها ... مش عارف والله

نهى : اه هو ده الى مضايقك بقى .. منى ... طيب المفروض اعمل انا ايه

حسام : يوووووووه ... مش هاحكيلك حاجه تاني... انتى عارفه ظروفي كويس من الاول وانا قايلك ان لا يمكن اهد بيتى عشان ولادي

نهى بتراجع عن ثورتها : طب خلاص خلاص ... طب اهدى واحكيلى حصل ايه بالظبط

تفتح امنيه باب شقتها بمفتاحها وتحدث نفسها : انا نسيت اقفل الباب بالمفتاح ولا ايه ؟؟!! ولا تكون حد من البنات جه

وتقول بصوت عالي : حط يا حسين الحاجه فى المطبخ واستنى ما تنزلش

وتدور ببصرها فى البيت ويشوبها بعض القلق والخوف

وتقول بصوت عالي حد هنا منكم يا بنات ... فياتى صوت من داخل الشقه : ايوه ياماما انا هنا

امنيه : دينا!!! منوره يا قلب ماما ... خلاص اانزل انت يا حسين

وتدخل امنيه تبحث عن دينا لتجدها تجلس فى غرفة المكتب الخاصه بوالدها وتحتضن صورته وتبكي بشده

امنيه وهى بتجري عليها: دينا مالك فى ايه يا حبيبتى .. بتعيطى ليه .. حصل حاجه .. جوزك فين

دينا : مافيش يا ماما مافيش انا كويسه وجوزي كويس الحمد لله ... انا بس افتكرت بابا الله يرحمه

امنيه بزفره راحه والم فى نفس الوقت : ومين نساه بس يا بنتى ... تعالى يا حبيبتى .. وتضمها على صدرها ولا تستطيع منع دموعها

وبعد لحظات تتضرع دينا لامها : ماما لو كنتي هاتتجوز صحيح عشان خاطري الى هاتتجوزيه ده مايجيش البيت هنا ولا يقعد مكان بابا ولا ينام مكانه ولا يعيش فى بيتنا

امنيه بكل اسى : طبعا يا حبيبتى ما تقلقيش خالص ... انا هاسيب الشقه هنا زي ما هى وهاجي هنا كل ويك ايند نقضيه مع بعض ومع اخواتك البنات زي ما كنا بالظبط مافيش حاجه هاتتغير صدقينى .

دينا : اهو كلام يا ماما بعد كده هاتنسينا وتنسي بابا ياماما

امنيه : انساكم ايه يا دينا وانسى بابا ازاي .. حد بينسى عمره يا حبيبتى ... هو انا لسه هاعيش اد ما عشت

دينا ببكاء شديد : امال عايزه حد غير بابا ليه يا ماما ... ليه

امنيه وقد انهارت تماما : حرام عليكى يا بنتى ما تقسيش عليا ... انا تعبت

دينا : خلاص يا ماما خلاص اعملي الى انت عايزاه .. دي اصلا حياتك وانتى حره فيها ..

امنيه : حياتي ؟ هو انا عشت حياتي كلها عشان مين يا دينا مش عشانكم ؟؟

وتستطرد محاولة انهاء الموقف ... عموما ممكن تهدي نفسك بقى وتبطلي عياط وان شاء الله كل حاجه هاتتحل

ويلا قومي اغسلي وشك عشان تتغدى معايا

دينا : ما تزعليش مني يا ماما .. انا باحبك اوي ... بس غصب عني والله ..

امنيه : طيب يا حبيبتى انا عارفه معلش معلش .

نهى : بص هو كلامها يقلق فعلا انا معاك بس برضه ممكن يكون عادي .. وبعدين بتهيئلي كده مراتك من النوع الى لو كانت متاكده من حاجه زي كده كانت هاتواجهك

حسام : ايوه انا كمان باقول كده ... هى لو كانت متاكده كانت واجهتنى وما كانتش هاتسكت

نهى : طيب على الاقل دلوقتي احنا عارفين انها حتى لو فى حاجه هايبقى شك بس

يبقى انت لازم تحاول تطمنها وتشيل الشك ده من قلبها

حسام : طب وبعدين وحكاية انها عايزه تسافر معايا دي

نهى تطرق مفكره ثم تقول : امممم هاقولك قولها ماشي مؤقتا على ما نشوف هانعمل ايه

حسام : ماشي ربنا يستر

نهى وبدات نبرة الغيره تظهر من جديد : ان شاء الله ربنا يستر احسن تعلق لنا المشنقه

حسام : هانرجع تاااااااني للكلام العبيط بقى

نهى : يا سيدى لا نرجع ولا غيره

وتنصرف نهى وينصرف هو الى عمله ومحاضرات شارد الذهن ومشتت جدا

وينتهي يومه وهو فى طريقه للعوده يقلب الافكار فى داخله

انا ايه الى دخلت نفسي فيه ده .. بتهيئلي دى اخرة البطر على النعمه ... بصراحه منى مافيهاش عيب .. انا الى طماع وطفس

بس اعمل ايه بس .. انا رغم كل حاجه مش سعيد .. حاسس ان ناقصني حته .. فى حاجه ناقصاني ... مش مبسوط ... حاسس انى وانا مع نهى بتكون الحاجه دي موجوده

وبعدين منى المسافه بينى وبينها بعدت اوي ... وبقى مسيطر على كل كلامها وافكارها العيال وبس .. ما انكرش انها شايله عني كتير .. بس انا محتاجها هى ... محتاجها زي ما العيال محتاجينها... انا محتاجها اكتر من زمان مش عارف ازاي

ويزفر زفره قويه ... ركز يا حسام انت محتاج مين بالظبط محتاج منى ولا نهى ؟؟!!!

انا خلاص دماغي هاتشت من مكانها ... صحيح انا باحب نهى ؟؟ بصراحه باحبها قلبي معاها رجع يدق تاني حسيت انى بنى ادم مش انسان الى من تاني

السؤال الاهم : هى بتحبنى فعلا ؟ ولا مصلحه ؟؟!!

مش مهم حتى . المهم انى اكون سعيد

مش مهم ازاي يا بنى ادم انت .. انت عبيط ولا ايه

طب ومنى ؟ باحبها لسه ؟؟

اه طبعا ... طبعااااا باحبها وما اقدرش اتخيل حياتي من غيرها

بس برضه لسه ناقصنى حته ... حته مش عارفها

ولا انا عارفها وباستعبط ؟؟!!!

بعد انصراف دينا

انخرطت امنيه فى بكاء طويل انتهى بتليفون لكامل

ايوه يا كامل .. كامل انا اسفه ... اسفه اوي

مش هاقدر .. مش هاقدر يا كامل

والى اللقاء فى الحلقه القادمه بقلم ريم

هناك 22 تعليقًا:

ليالي مصرية يقول...

طبعا اول تعليق ..
طبعا مخموخ لما بيكتب بيبدع
طبعا نفسى اقول لندى هيه واللى حتكتب بعدها ... ارجعوا لمودناتكم احسن لكوا ... صدقونى الفيس بوك مش حينفعكوا
طبعا تسلم ايدك ياندى

اسلام ايوب

ستيتة حسب الله الحمش يقول...

حلقة ولا اروع حقيقة

نورا واحمد معضلة موجودة برضه في الحياة وشفناها
ياتووووورى ها تخلص ازاي


موقف منى من كامل منطقي جدا
يا اوختشي النسوة دول كلهم نكد عمال على بطال
لكن موقف بنات امنية غير منطقي بالمرة
بس الدنيا ياما فيها


محمد فضفض عن نفسه وشكله عارف بيعمل ايه
عجبني الخط ده جدا


منى ونهى
على نفس الوزن والقافية
بحيث انه لما يتزنق يدلعهم الأتنين نونا فميغلطش ويروح في ابو نكلة :)


امنية قلبها قلب خساية
معرفش انا ايه الستات الروهيفة دي
والله كامل ده رجل ولا كل الرجال
آخر الرجال المحترمين
كل ده ومزهقش ولا سلم نمر
حقا يا ولدي الحب يصنع المعجزات

لو كان ممكن بس اقول يا كماحة في موضوع علياء
متنسوش ان محمود فاتح الفوميليا في حبه لريهام
ومحمود مش كيس جوافة برضه
يعني مؤكد كل خطوة تؤثر في جوازته ها يتعمل حسابها
باقي من الزمن ست حلقات ويارب نزف كامل ونغني له نازلة السلالم

مرة تانية
حلوة وجميلة وشغل بره صحيح

sony2000 يقول...

لاااااااااااااااااااااااااع
حرااااااام
:(((((((((((
بعد كل دا
لا لاذمن التحرك السرييييع

ندى الياسمين يقول...

د اسلام

هو انا سبت مدونتي اصلا

والله انا باكتب على طول مش سبت مدونتي خالص

ريم هى الى وحشه ونوتي وسايبه مدونتها

ومرسي على الكلام الجميل عن الحلقه

ندى الياسمين يقول...

سوتيته حياتي

مرسي ربنا يخليى يا قمر

وانا ما نسيتش ريهام بس ما فاضش وقت بقى اكتب كنت خدت بالي انى سرحت سبتها لريم بقى


لما نشوف كده

وسعيده ان الحلقه عجبتك

ندى الياسمين يقول...

سوني

لما نشوف ريم هاتعمل ايه بقى فيهم ماليش دعوه

البنفسج الحزين يقول...

حلقه حلوة يا ندي الياسمين ...
ومحستش انها طويله خالص لأن الأحداث سلسه ومقنعه
وكويس انك ركزتي في الحلقه علي كامل وامنيه لأن كان بقالنا كتير مسمعناش حاجه عنهم وبعدين لازم اللي يكتب بعد كده يركز في الأحداث عليهم ويكون التطور في الخط بتاعهم سريع لأن مفاضلش غير ست حلقات ونفسي نزفهم في الحلقه الأخيرة ...
واسمع زغروطه بقي...

أبو حميد يقول...

يا جامد يا جااااااامد
الحلقة ممتعة قوى (مع إنى قريتها الصبح)
بس أبوس إيديكم بلاش تعذبوا كامل أكتر من كده
أنا بقترح نعمل لقاء تدوينى يعد نهاية القصة
الموافق يرفع إيده

reem يقول...

حلقة جميييييلة يا ندى اوي اوي
ومش طويلة خااالص خالص
بالعكس

انا مع ستوتة في كلامها جداااا وتحليلها

ندى بجد انتي بتعملى حلقة جامدة جداااا
طيب يعنى انا اكتب بعدك ازاى ؟؟؟؟؟؟

وبعدين انا نوتي يا ندى
ماااااشي لما اشوفك بس
ههههههههههههههههه

بجد تسلم ايديكى على الحلقة

reem يقول...

دكتور اسلام


حااااااضر يافندم
التحذير وصل

والله انا حتى الفيس بوك مش بقيت بدخله كتير

وفعلا بحاول ارجع للمدونة تاني بس مرات بحس ان محى متوقف ومش عارفه اكتب حاجة ولا عندى حاجة اقولها

بس بعد النداء الالف دا من حضرتك لازم ارجع
ميرسي يا دكتور جدا جدا بجد انا بحس ان حضرتك دايما مهم في جمع شملنا زى ما جمعتنا في الليالي المصرية وكان حقيقي من اجمل التجمعات

حاجات جوايا يقول...

يا نهار ابيض حلقتين فاتونى وحلقتى اللى بعد اللى جاية
ايه الرعب ده

حلقتين جامدين اخر حاجة
حلقة البنفسج الحزين جميلة اوى
وحلقتك يا ندى رائعة
تسلم الايادى يا قمرات

يا خوفى يا بدران على امنية وكامل
لسه هيبان هيحصل معاهم ايه

شدى حيلك يا ريم
ربنا معاكى
ومعايااااااااا

ali younes يقول...

الاخت ندى الياسمين
واضح انك سبكتي الطبخة كويس في مطبخك الجميل
علي العموم حلقة طعمها لذيذ وأكلنا صوابعنا وراها .....
تحياتي لك ومستنيين ريم

خواطر شابة يقول...

يعني انتم مستقصدني مستنين اجازتي عشان تبدعوا ههه بس تعرفوا انا مستمتعة جدا بالحلقات وبتطور الاحداث
تسلم ايدك ياندى

خواطر شابة يقول...

اه نسيت أقولكم أنا نجحت في استرجاع ايميلي وغيرت رقمه السري وتم ظبط الوضع والمسائل تمام التمام يا افندم

خواطر شابة يقول...

أعزائي شعب الليالي الكرام في الجدول الحلقات محددة الى عاية الحلقة 26
الحلقة الثلاثون سيكتبها ابو حميد
الحلقة 29 ارغب بكتابتها
بقيت الحلقتان 27 و28 المرجو ممن يريد الكتابة ان يترك تعليقا بالامر لأغير الجدول
انتظر ردودكم فلا تتأخروا
دمتم جميعا بكل الود والمحبة

أبو حميد يقول...

أنا ممكن أكتب حلقة بس ده لو فى مكان فاضى
وطبعا أرشح الدكتورة ستييييييييييييتة

هو محدش ليه رد على موضوع اللقاء التدوينى الخاص بالليالى؟

amirelhob يقول...

بجد حلقه جامده جدا واجمل ما فيها طريقه تطور وتغير الاحداث

عاجبنى اوى الهدوء اللى فى الكلام وترتيبه وبجد برافو انك نقلتى الاشخاص

لطرق التفكير اللى من وجهت نظرى طبيعيه


الحاجه بقا اللى عايز فعلا احيكى عليها من النهاردا لحد بكرا الصبح

هو انك جعلتى لمحمد صديق يحكله عن مشاكله لان صعب اوى انو كان يفضفض مع حد من اخواتو خاصه وان المشكله فى جزء كبير متعلق بيهم


بجد من اجمل الحلقات

amirelhob يقول...

خواطر شابه

مبروك استعاده ايميلك مره تانيه وعودتك لينا


بجد هتنورينا تانى


بتمنى لو الحلقه 28 فاضيه تكون بقلمى


لكن لو محجوزه او فى اجمع على الدكتوره ستيته

يبقى انا هكتفى بدور المتابع
وبدون ادنى زعل او مضايقه بل بالعكس

هكون مبسوط جدا لانى متاكد مما سكتبه بدون معرفته مسبقا

عودا احمد


ومن قلبى بتمنى للجميع كل خير وسعاده

ندى الياسمين يقول...

مرسي يا جماعه للكل والكلام الجميل اخجلتم تواضعنا

ومبروك استرداد ا لميل يا خواطر ونورتي

ولو كان فى حلقه فاضيه اوك اكتبها انا لو ما كانش فى حد حجزها

شكراااااااا يا قوم

حاجات جوايا يقول...

خير يا جماعة
فين حلقة ريم
الحلقة اتاخرت ولا انا بيتهيالى ؟؟

أبو حميد يقول...

ألوووووووووووووووووو

حلقة ريم فيييييييييييييين؟

خواطر شابة يقول...

ABOU HMIDE
Please open your E-mail ,you'll find The 25'th Episode...I sent it to you because i dont have an arabic keybord.please publish it for me;Thank you