الأحد، 2 يناير، 2011

اين انا؟؟؟ الحلقه الثامنه عشر

اين انا ؟؟ الحلقه الثامنة عشر

بقلم: حنعيش يعنى حنعيش

باسم اول ما عينة جات فى عين اخت عبد الله اتلخبط ... مسك كاس الشربات وايدة بتترعش .. وقال شكرا يا سلوى ... ردت اخت عبد لله : العفو بس انا اسمى سمر ... وضحكت ومشت بدلال ... باسم كان حيتجنن ... ممكن فيه حد شبه حد كدة .. نفس العنين .. نفس الشفايف ... نفس طريقة الكلام ... ايه ده ...حلم ولا ايه .؟.... باسم فاق على ايد عبدالله وهوه بيهزه : ايه يابنى ... سرحان فى ايه ... الشربات حيقع ... باسم : ايه لا ابدا ولاحاجة ... الا مين اللى قدمت لى الشربات دى ؟... عبد الله دى سمر اختى الصغيرة .. فى رابعة اداب ... ونظر اليه نظرة ذات معنى واستفهام .وقال : بتسأل ليه ؟ ... باسم وهوه بيهرب من عين عبد الله :لا ابدا ... انا قولت كدة برضة ... اصل فيها شبه منك ... عبد الله وهو يحاول اخراج باسم من حالة الحرج : مش عارف .. انت بتمدحنى ولا بتشتمها ...؟ ... ضحك باسم وعبد الله وجلس كل واحد مع افكارة ... عبد الله قال فى نفسة :ياسلام لو البت سمر تكون عجبت باسم ... بصراحة الواد كويس وابن ناس واخلاق ... والاهم انه يقدر يتجوز ... يعنى ممكن يشيل من على كتفى كتير ... وكدة مايبقاش غير البت هناء ... ربنا يكرم ونزقها ... والحق انا بقى اشوف نفسى واتجوز ... عايز الحق اى حاجة ان شالله بو....... فاق عبد الله على صوت باسم : ايه مش حنروح نسلم على العريس11 والعروسة ونتصور معاهم ؟... عبدالله : اه ايوه ايوه ... اتفضل ...

*************************

ام عبد الله وابوه كانوا قاعدين ملاحظين كل اللى بيحصل حواليهم فى الفرح ... هما بيرحبوا بالمعازيم ويسلموا عليهم ويضحكوا معاهم ... بس كل تركيزهم كان على اهل العريس ... بيدوروا فيهم على عريس ينفع لبنت من البنات ...حاكم العيله مافيهاش حد عدل .. دا كان رأى ام عبد الله ... ابو عبد الله وامه شافوا اللى حصل فى موقعة الشربات ... ابو عبد الله قال لمراته وهوه بيغمز لها ويخبطها فى كتفها : ايه رايك يا وليه ؟ ... ام عبد الله : دا يبقى يوم المنى يا حاج ... ابو عبد الله : انا شايف انه محترم كدة وابن ناس ... ام عبد الله وهى ترفع عينها للسماء( يمكن تكون ابوابها مفتوحة ) : وعنده اللى مكفيه ... ابو عبد الله : بس بتك الوسطانية ؟ ... قالت : مين هناء .. وهية تكره الخير لاختها ... وبعدين كله بياخد نصيبة .. واكيد .. اكيد ربنا شايل لها حاجة كويسة .. دى مابتفوتش فرض ... دى اول من اتحجب فى عيالك ... ابو عبد الله : ماقولناش .. بس خايف لا البت تشيل فى نفسها لما اختها اللى اصغر منها تتجوز قبلها ...ام عبد الله وهية بتخبطة فى ايدة : بس ما تقاطعش .. هو انت شوفته جه يطلب ايدها ؟!! ... ابو عبد الله : الدور والباقى عليكى انت بقى ... يالا كدة ورينا الشطارة وماتخليهوش يطير من ايدينا ...

*************************************

الحاجة كوثر فضلت تنادى ... ياهانى ... ياهانى ... الحقنى يابنى ... نزل هانى ورانيا جرى علشان يشوفوا فيه اية .... فتح الباب لقى الحاجة كوثر قاعدة على كنبة الانتريه فى الصاله وحاطه وشها بين ايدها.. هانى بانزعاج : مالك يا ماما فيه ايه ... خير .. رانيا : فيه ايه يا طنط .. حاسه بحاجة ؟ ... كوثر ماردتش ... وقعدت ترتعش بطريقة مبالغ فيها ... اثرت زيادة على هانى ... بس اكدت لرانيا ان الموضوع استعباط مش اكتر... هانى وهو فى حاله يرثى لها : ايه ياماما والنبى ... كوثر وهيه بتطبطب على هانى : لا يابنى .. ماتضخضش يا ضنايا ... انا كويسة ... خد مراتك واطلعوا شقتكوا ... هانى : ازاى بس اسيبك من غير ما اعرف فيه ايه ؟ ... كوثر : ابدا يا بنى .. دى تهيؤات من الوحدة ... حاكم الوحدة مرة ... بتخلى الواحدة تشوف حاجات وتسمع حاجات ودماغها يفضل يجيب ويودى ... هانى : ايه بس احكى لى ... كوثر : ابوك ....هانى : الله يرحمه .. ماله ؟ ... كوثر : كان طالع من الحمام وحاطط الفوطة على وشه زى عادته ... بص لى وقالى : انت لسه سهرانه يا كوثر ... قومى نامى ... قولت له : ........ رانيا مشت وقفلت وراها الباب وطلعت شقتها ... بصت على جنى وهيه نايمه ... غطتيتها وقالت : تصدقى يا جنى ان امك عبيطة وحتفضل طول عمرها عبيطة ... دخلت رانيا اوديتها ... علقت قميص النوم الاحمر فى الدولاب ... ورمت نفسها على السرير ... كان نفسها تعيط .. بس الغريبة انها ما عيطتش ... ونامت ... هيه مانمتش على طول ... بس نامت ... وطبعا هانى ماطلعش ....

****************************

هيام بعد مانيمت العيال وجوزها ... خرجت وقعدت فى الصالون وطفت النور ... قعدت تجتر ذكرياتها مع ابوها ... تفتكر من ايام ماكان بيشيلها وهية راجعة من المدرسة على ضهرة ويطلع بيها السلم ويقلد صوت الحصان ... لغاية ماكان بيزورها فى بيتها ويجيب لولادها الشيكولاته والشيبسى ... وماينساش يجيب لها العسلية ام سمسم اللى بتحبها ... هيه كانت عارفة انه بيتعب على مايلاقيها ... بس استحاله مايجبهاش ... زاد عياطها وعلى صوتها اللى صحى جوزها وجه قعد جنبها ومسك ايديها وقال : لو الدموع بترجع الميت كنا قعدنا نعيط طول العمر ... رمت هيام راسها على صدر جوزها وقالت : وحشنى .. وحشنى قوى ... قال : اللى بيحب حد يقف حنبه ويساعده ومايسبوش لوحدة ... مش كدة ... قالت : قصدك ايه ؟ ... قال : ابوكى دلوقت عايز مساعدتك مش عايز دموعك ...ولا ايه رايك فى كلام سيدنا محمد : ولد صالح يدعو له ..... قالت عليه الصلاة والسلام ...قال : قومى اتوضى وصلى واقعدى ادعى له ... ادعى له كتير ... كدة احسن له واحسن ليكى ...

*************************************

خلص فرح اخت عبد الله والمعازيم بدأت تمشى ... باسم قال لعبد الله : استأذن انا بقى يا عبدة .... عبد الله : متشكر قوى انك جيت الفرح ... شرفتنا وانستنا ... ام عبد الله من راهم : هوه ايه اللى شرفتنا وانستنا ... وايه هوه اللى استاذن ده يا استاذ باسم يابنى ... انت فى بيت يهود ولا ايه ؟ ويمين المصطفى مانت ماشى الا لما تتعشى معانا ... باسم : بس يا حاجة .. اصل ... ام عبد الله : لا اصل ولا فصل ... ياسمر ... انت يابت يا سمر ... تعالى اعملى للاستاذ باسم فنجان قهوة على مانحضر انا واختك العشا ... وخدى بالك من الاستاذ باسم حاكم اخوكى ماتعلمش يرحب بالناس ... ووجهت كلامها لعبد الله بصوت منخفض ... قدامى يا مايل علشان تناولنى الحاجات اللى على السفرة .....جاتها نيله اللى تقول يا خلفة .....

الى اللقاء فى الحلقه القادمه

بقلم: ريم

هناك 13 تعليقًا:

ليالي مصرية يقول...

نؤسف للتاخير يا جماعه
الدكتور اسلام باعتلي الحلقه من يومين بس انا الى راحت عليا نومه امبارح معلش

طبعا مش محتاجه اقول الحلقه حلوه اد ايه يعنى هانقول ايه الاستاذ الكبير البج بوس بقى هانستنى منه ايه غير اجمل شغل

تحياتي يا فندم وتسلم اديك

خواطر شابة يقول...

دكتور اسلام
الحلقة جميلة بالمجمل وهذا هو المعتاذ من الدكتور اسلام
عندي ملاحظة واحدة على هذه الجملة "ايه هوه اللى استاذن ده يا استاذ باسم يابنى ... انت فى بيت يهود ولا ايه ؟ يعني هذا الخطاب اجد فيه نوع من العنصرية نحن ضد الصهيونية نعم ضد الاحتلال الاسرائيلي لفلسطين نعم ضد اصحاب الفكر الصهيوني من اليهود نعم اما اليهود بالمطلق فهم كتابيون مثلنا نحن مسيحيين ويهود ومسلمين نؤمن جميعا برب واحد وديننا يأمرنا بأحترام الجميع
دمت بكل الود

شيرين سامي يقول...

حلقه جامده جداً جداً عجبني حوار أبو و أم عبد الله حوار مصري جداً و عجبني (قميص النوم الأحمر) اللي هو فكر مصري خالص في عودة الأزواج بعد غياب و طبعاً عجبني زوج هيام و هو بيطلب منها تدعي لباباه...تسلم ايدك
و على فكرة بالنسبه لملحوظة خواطر شابه (يهودي) بالمصري معناها بخيل مش ازدرداء أديان و لا حاجه(يعني جيتوا على الغلبان ده)
تحياتي للجميع و في انتظار الحلقه الجايه

حنعيش يعنى حنعيش يقول...

ندى الياسمين
ياريس انت تعمل اللى انت عايزة ... اانت الريس ماحدش يقدر يقولك بم
... شكرا على الكلمتين الجامدين دول

حنعيش يعنى حنعيش يقول...

خواطر شابة
ربنا يبارك لك فى القدرة على الدبلوماسية ... بس انا بقى .. ما ليش فى حكاية ... ساميين ..واولاد العم ...و فيه فرق بين يهود وصهاينة ... اى نعم موافق على اتفاقية السلام ... بس مش طايق ولاد الكلب دول ... وحيفضلوا اعداء وبعلم عيالى كدة ...
ملناش دعوة بالسياسة ... خلينا فى الليالى .. بفرح قوى لما اللى باكتبه بيعجبك ... والاهم بقى ... فين ابو ريان

حنعيش يعنى حنعيش يقول...

شيرين سامى
ربنا يخليكى يارب ... تعليق جامد حدا جدا جدا جدا ...
بالنسبه لموضوع كلمة يهود (يعني جيتوا على الغلبان ده)
( مش كدة والنبى )

Mona Abo - Elso3od يقول...

تسلم ايدك يا دكتور حلقة جامدة جدا
و فعلا انا مع شرين الحوار بين والد عبد الله و والدته مصري صرررررررف فعلا عيلة بسيطة و بيت بسيط في حي شعبي
اما عن خواطر لازم تتفرج علي فيلم مصري قديم ابيض و اسود من بتوع استيفان روستي لما كان يطلع يهودي و هي تفهم قصدك
تحياتي

حنعيش يعنى حنعيش يقول...

منى
اخجلتم تواضعنا ... وبعدين نروح احنا فين من ابداعاتك ... ربنا يخليكى ...

حاجات جوايا يقول...

اكتر حاجة بتعجبنى فى حلقاتك يا دكتور انها مصرية اصييييييييييييييلة
مش عارفة بتجيب التفاصيل الصغيرة دى ازاى
هاااااااايل والله
رائع جدا جدا

عجبنى اوى كمان حجة الحاجة كوثر
مقنعة جدااا ومينفعش معاها ان هانى يهرب
بس هى كده شكلها هتقرف رانيا جامد
عايزين نشوفلها عريس بقى بدل الوحدة اللى بتجيب لها تهيؤات دى ههههههه

موضوع باسم وسمر جميل بس معرفتش مين سلوى ؟
دى كانت حب قديم لباسم ؟
هزعل اوى لو كانت كده
ده معناه ان باسم لو اتجوز سمر هيظلمها لانه هيحب واحدة تانية فى صورتها مش هيحبها هى

الحلقة فى المجمل جميلة جدا ورائعة جدا وتحفة جدا
تسلم الايادى يا دكتور

حنعيش يعنى حنعيش يقول...

حاجات جوايا
يا اخونا انتوا كدة بتحرجونى ...
بالنسبة لباسم .... فعلا سلوى حبة القديم وسبب اكتئابة ... وانا قصدت علشان اعمل شوية صراع كدة ... هوه بالساهل كدة نجوزوا باسم

الكاتب محب روفائيل يقول...

رغم الامتحانات وزنقتها
ورغم حملة أنا ضد الارهاب اللى عملتها
مقدرتش أفوت حلقتك
ومقدرتش معلقش
الحلقة رائعة
دكتور اسلام : زور الحملة لو سمحت
فيه حاجات ممكن تكون تايهة عنى
وأنا عايز الحملة تكون حملة متكاملة وموضوعية
والنداء للمتابعين والزوار برضه
همتكم معانا وآدى اللينك
http://elkatebrofail.blogspot.com/
دمتم بكل الخير

الكاتب محب روفائيل يقول...

رغم الامتحانات وزنقتها
ورغم حملة أنا ضد الارهاب اللى عملتها
مقدرتش أفوت حلقتك
ومقدرتش معلقش
الحلقة رائعة
دكتور اسلام : زور الحملة لو سمحت
فيه حاجات ممكن تكون تايهة عنى
وأنا عايز الحملة تكون حملة متكاملة وموضوعية
والنداء للمتابعين والزوار برضه
همتكم معانا وآدى اللينك
http://elkatebrofail.blogspot.com/
دمتم بكل الخير

reem يقول...

دكتور اسلام

الحلقة رااااائعة
واسفة على التأخير في الكومنت
مع انى تقريبا اول واحدة قريت الحلقة بس كان عندى مشكلة في التعليقات

عاجبنى جدا جدا حوار مامة عبد الله معاه
وعجبنى اوى الجو المصري البسيط في بيتهم
ودا فتح لى مجال انى اعبر عنه بقوة في الحلقة بتاعتى يعنى ببساطة كدا غشيت الفكرة من حضرتك
هههههههههههههه

تسلم يداك وسلم قلمك
وطبعا الكبير كبير يا فندم دايما