الاثنين، 10 يناير 2011

اين أنا ؟ الحلقه الحادية والعشرون


الحلقة 21.... اين أنا ؟؟
بقلم سالى حاجات جوايا
............................
باسم اتفق مع مامته وباباه على ميعاد زيارة اهل سمر .. وبلّغ عبدالله اللى فرح ان الموضوع بدأ ياخد خطوات جدية .. عبد الله اول ما رجع البيت بلغ اهله وقبل ما يكمل كلامه كانت مامته رقعت زغروتة من فرحتها رنت فى الحتة كلها وبصت لجوزها بنظرة انتصار فهمها على طول
الحاجة فاطمة لعبد الله : وقالك هيجوا الخميس الساعة كام ؟
عبد الله : بعد المغرب يا حاجة ان شاء الله
الحاجة فاطمة : طب يا ابنى مش كنت تخليهم ييجوا عالغدا .. نتغدى ونتعرف عشان البساط يبقى احمدى
عبد الله : يا حاجة مش لما نشوفهم الاول ونفهم طباعهم .. مش يمكن ...
الحاجة فاطمة : سكت ليه ؟ يمكن ايه ..؟
عبد الله : ابدا ولا حاجة .. انا قصدى دى ناس اول مرة نعرفها .. صحيح باسم طيب وابن حلال .. بس مستوى عيلته المادى كبير ... و ... يعنى نشوف الاول ولما ربنا يتمم بخير نعمل الغدوة يوم الجمعة
الحاجة فاطمة تبص تانى لجوزها الحاج أحمد .. بس المرة دى بنظرة استفهام .. مش عارفة ابنها ماله .. قلقان من ايه ؟ ... بس الحاج أحمد يفهم .. ويقولها يا حاجة انتى زعلانة ليه .. الناس العليوى دى لها طباع غيرنا .. وابنك ادرى .. المهم شدى حيلك انتى والبنات عشان نظهر قدامهم بالشكل اللى يليق لنا
الحاجة فاطمة تسترد حماسها : انت هتوصينى يا حاج .. دى حاجة محتاجة وصية .. ده احنا هنخليلك البيت قصر
ينفض التجمع .. عبد الله دخل يغير هدومه .. والحاج أحمد قعد فى الانتريه يتفرج على التليفزيون والحاجة فاطمة دخلت مع سمرعالمطبخ عشان يغرفوا الاكل .. وهناء تحضر السفرة
هناء فرحانة اوى لاختها ..هى صحيح اكبر منها ولسه متخطبتش ..بس ايه يعنى لما اختها الصغيرة تتجوز قبلها .. المهم ربنا يتمم بخير وحِمل واحدة فيهم ينزاح من البيت .. ومين عارف ما يمكن هى كمان نصيبها يجيلها قريب ويتجوزوا مع بعض .. هى عندها دايما حسن ظن بالله .. وراضية فى كل الاحوال
.........................
رانيا تعبت من الوحدة ... صحيح هى دلوقت اتغيرت عن الاول وبقى عندها حاجات تشغلها .. ده غير جنى شغلها الشاغل .. لكن هى حاسة انها وحيدة .. وحيـــــــــــدة .. يرضى مين تبقى متجوزة وجوزها بعيد عنها بالشكل ده ...كان ممكن اوى تضعف وتميل لغيره بكلمتين حلوين .. هى بشر برضه مش ملاك ومحتاجه تحس بيه جنبها .. كتير بتتعب ومتلاقيهوش .. كتير بتحتاج تحكيله او تشكيله او تطلب مساندته أو تاخد رأيه وتلاقى قدامها فراااااااااغ قاتل .. هو فين منها ؟... صحيح بيطلع يقعد معاهم ويلاعب جنى .. بس هى فى الوقت ده مش بتكون فاضية تتكلم معاه .. يا بتحضر اكل ليهم او لجنى او بتغيرلها او بتسكتها او ... او ... او ... البيت بيكون فى حالة ضجيج مستمرة .. مفيش فرصة تتكلم فيها .. ده غير التليفونات اللى دايما تختار اهدى الاوقات وتررررن .. فين هو لما جنى بتهدى وتنام ... فييين ؟ .. للاسف مش بيكون موجود .. للاسف بتكون وحيدة !!
رانيا قامت فتحت اللاب توب ودخلت على فولدر الاغانى وشغلت اغنية تعالى ارجع تاني
غصب عنها دمعت وهى بتسمعها ..والدموع كترت وصوتها علي فى بكاء شديد ..... ونامت ... نامت والدموع فى عنيها والأغنية شغالة تخلص وتبتدى من جديد
وهى نايمة حست بحركة جنبها قامت مفزوعة وقلبها بيدق جامد .. لقت ايد هانى بتطبطب عليها عشان تهدى ومتتخضش وبيهمس : انا يا رانيا متخافيش
قلب رانيا بدأ يهدى شوية ..وبعدين بصت له وقالتله : خير فى ايه .. طلعت ليه ؟.. عايز حاجة ؟
هانى : سمعتك بتنادينى طلعت
رانيا بتحاول تفتكر : انا نديتلك ؟.. امتى ده ؟
هانى يبتسم بحنان وهو بيمد ايده على عيونها اللى لسه ظاهر فيها اثار البكاء وكأنه بيمسحها ويقولها : عيونك نادتنى .. وقلبك ندانى
رانيا تبص له باستغراب شديد .. وتقول بينها وبين نفسها : ماله ده ؟
يكمل : انا كنت طالع اصلا الحقيقة .. وانا بلم حاجتى سمعت الاغنية من الشباك .. بص فى عنيها وكمل : فجيت جرى
رانيا اتحرجت شوية .. هى صحيح عايزاه يطلع ويبقى جنبها .. بس اتحرجت لما حست انها تسولته .. بس ايا كان المهم انه طلع
سألته : وكنت طالع اصلا ليه ؟
هانى : انزل يعنى مش عايزانى ويعمل انه هيقوم
رانيا مبتسمة تمسك ايده :انا بتكلم جد كنت طالع ليه .. مش انت بتبات عند مامتك الايام دى .. ولا خلاص بقت كويسة
هانى : لا الحقيقة انا قلت لماما انى هسافر قريب سفرية طويلة ....
رانيا بفزع : ايه ؟؟ هتسافر ... ليه ؟؟ ... وفين ؟؟
هانى : اصبرى بس هقولك .. انا قولتلها انى مسافر بره تبع الشغل وهغيب كام شهر .. هى زعلت فى الاول طبعا بس سلمت فى الاخر ودعتلى ربنا يوفقك
رانيا : وبعدين ......؟
هانى : وبعدين قولتلها انى هطلع بقى عشان مسيبكوش لوحدكوا الايام دى طالما انى مسافر وهبعد .. يعنى اعوضكوا عن غيابى شوية
رانيا الغضب ماليها : ووافقت بسهولة كده على سفرك وطلوعك ..الاتنين ؟ .. سبحان مغير الاحوال ..
وكملت بتهكم ثائر: وانت طالع بقى عشان تثبت حضور شوية قبل ما تودعنا .. كتر خيرك والله
ومسافر فين بقى ....؟
هانى بلهجة شعرية : مُسافرٌ في عَينيكِ
رانيا تبص له باستغراب .. عايزة تقوله ما انت فايق ورايق ومش فى دماغك وطالع تتسلى عليا و ... و...و... بس تسكت وتفضل مستغرباه
و ترجع تسأله تانى بهدوء : مسافر فين ؟؟
هانى : مش مسافر يا حياتى
رانيا نفس النظرة وكأنها امام مجنون :يعنى ايه .. مش فاهمة حاجة ؟
هانى : يعنى مش مسافر .. قلت لماما كده عشان امهد لها انى فى لحظة ممكن اسيبها وامشى .. وممكن كمان مكونش موجود خاالص .. ولقيتها تقبلت
رانيا : وبعدين .. ولما تعرف انك كدبت عليها ؟
هانى : هتعرف منين ؟؟ .. لما ييجى وقت السفر هبقى اقولها اتلغى ولا اتاجل ولا اى حاجة .. متقلقيش .. المهم ان الموضوع اتقفل على كده
رانيا لسه بتفكر فى كلامه
هانى : ايييييه .. لسه هتفكرى ...مش هتنامى ولا ايه .. يلا بقى اطفى النور
..........................
عمر جوز هيام اترقى فى شغله وشغل منصب كبير .. وقرر يعمل حفلة يجمع فيها العيلة عشان يخرجهم من حالة الحزن اللى لسه مسيطرة عليهم بعد الوقت ده كله وخصوصا هيام مراته .. هو مش بيحب ابدا يشوفها حزينة ولا تعيسة .. وحشته ضحكتها وخفة دمها وهزارها .. هى مش مقصرة معاه ولا مع الولاد فى حاجة خالص .. ولا حتى مقصرة فى شغلها .. بس حزنها كاسر قلبها ..وقلبه هو كمان ...
فكر انه يعمل عزومة عالعشا فى مكان هادى .. من زمان اوى متجمعوش كلهم .. من زمان مخرجوش ولا غيروا جو .. الحاجة كوثر لما عرفت من هيام باركتلها على ترقية جوزها واعتذرت عن الحضور .. عمر وهيام أصروا وألحوا عليها وقالولها الحزن فى القلب وخروجهم مش معناه انهم نسيوا الحاج محمد لكن ربنا امر بالترويح عن النفس وحلفوا ما يروحوا الا وهى معاهم .. بعد الالحاح الحاجة كوثر وافقت على استحياء ...
الليلة كانت هادية وجميلة والجو كان حلو .. والمزاج كمان كان حلو .. العيلة كلها كانوا بيكلموا بود وألفة افتقدوه من فترة طويلة .. ترقية عمر وسفر هانى كانوا محل الاهتمام .. وخصوصا سفر هانى .. ورانيا اتقنت الدور بحرفية شديدة و بينت أد ايه هى زعلانة ومتأثرة من الموضوع ده .. مش كفاية ان هانى كان غايب عنهم بقاله كتير .. هيسافر كمان
طبعا الكلام كان للجارة اللى جنبها الحاجة كوثر اللى بدورها ردت باستياء : والله منا عارفة يا بنتى ده مش وقته خالص .. بس هنقول ايه امر الله
رانيا وهانى تبادلوا النظر .. وهيام دخلت فى الكلام وسألت بعفوية : وانت يا هانى متقدرش تعتذر عن السفر ده .. هو ضرورى يعنى .. يعنى مينفعش حد تانى مكانك يكون معندوش مسئوليات
هانى : انتى عارفة يا هيام لما رئيسك فى الشغل يختارك انتى بالذات لكفائتك او لثقته فيكى مينفعش تقوليله لأ مهما كانت المشقة
هيام : مممم عندك حق طبعا .. مين عارف .. يمكن ربنا يحلها من عنده
رانيا والحاجة كوثر وهانى وعمر فى وقت واحد : يارب
..............................
تانى يوم كان اليوم المحدد لزيارة اهل باسم لاهل سمر .. باسم طبعا كان كلم رانيا وهانى وعرفهم بالميعاد من يوم ما اتفق مع عبد الله عشان يستعدوا .. وقبل المغرب بساعة كانوا كلهم متجمعيين فى بيت مدام نجاة ...
مدام نجاة طبعا متتوصاش فى الشياكة .. لبست الماظاتها وظبطت نفسها .. هى هتخطب لاى حد .. ده باسم ابنها حبيبها اللى مصدقت انه يخرج من عزلته ولازم تشرفه قدام عيلة عروسته .. وطبعا الحاج كارم كمان لبس اشيك بدله عنده وكأنه رايح فرح مش رايح تعارف .. مهى الانطباعات الاولى ايه ؟؟؟....... تدوووووووم
رانيا وهانى وجنى كانوا لابسين شيك برضه بس من غير تكلف .. أما باسم العريس مكنش عارف يلبس ايه وفضل يلبس ويقلع ويبدل فى كذا قميص وكذا كرافيت وكذا بدلة .. كان متوتر جدا وقلقان جدا وفرحان جدا .. ومفتقد شريف جدا جدا .. لو كان موجود دلوقت كان زمانه خلصه فى ثوانى من الربكة دى كلها .. بس هانى قام بالواجب وساعده فى اختيار الطقم اللى هيروح بيه ورانيا طبعا شاركت فى الاختيار وقعدوا يضحكوا معاه عشان يخففوا التوتر والقلق اللى ماليه ...
لما المغرب أذن صلوا جماعة ودعوا بالخير وامنوا عالدعاء وتوكلوا على الله ونزلوا عشان يروحوا لبيت سمر .....
............................
شريف كان قاعد متضايق اوى فى اوضته .. زعلان انه مش مع باسم فى يوم زى ده .. هو صحيح مش خطوبة ولا فرح .. بس دى اول مرة باسم يدخل بيت عروسة وكان نفسه اوى يكون جنبه .. اتصل بيه عالموبايل عرف انه فى الطريق لبيت عروسته دعاله ربنا يوفقه للخير ووصاه يكلمه اول ما يخلص عشان يطمنه ..
شريف فتح التليفزيون وقعد يقلب فى القنوات مفيش حاجة شدته .. قعد عالكمبيوتر ودخل عالنت ملقاش حد من اصحابه ولا كان له مزاج يشوف حاجة .. قام لبس ونزل راح مول يضيع فيه الوقت ويشرب حاجة ...
المول كبير قوى .. قوى .. قوى .. فيه كل حاجة واى حاجة وكل محل فيهم بدور كامل لمول مصرى .. حياة تانية خالص .. غريبة قوى بقاله هنا كام شهر اهه بس عمره ما دخل مول ولا حتى فكر ..
قعد يتمشى ويتفرج ولقى كافيه قعد وطلب كابيتشينو .. عدى على سوبر ماركت اشترى كاجو وفسدق ومشى يأزأز بس طبعا بيرمى القشر فى كيس مش فى الارض
كان كل تفكيره متركز على باسم وكل شوية يبص عالموبايل ليكون رن ومسمعوش .. المول زحمة أوى .. ودوشة اوى .. وهو ماشى بيتفرج عالفتارين اتخبط فى كتف حد بص عشان يعتذر ... ولدهشته طلعت ............. عليا
.............................
الى اللقاء فى الحلقة القادمة
بقلم : مصطفى ريان

هناك 20 تعليقًا:

shimaa elkholy يقول...

تمام التمام يا سالي

هو انا عندي غير سالي انا خلفت غير ساااااااالي

مرسي بجد على انك كتبتي اصلا الحلقه فجأه

وكمان حلقه جميله بجد عجبتنى اوي اوي

عجبنى ان هاني بدأ يحس انه الوضع غلط وبيحاول كمان يصلحه ومن غير ما يزعل مامته برضه


عجبنى كمان حركة علياء ربنا معاه الى بعدك

الى مش عارفه هايكون مين عشان مش عارفه ريان هايكتب فعلا ولا ايه

ياريت لو كنت شايفنا يا ريان تقول

تسلم اديكى يا جميل

وحد يجهز نفسه من فضلكم فى حال ريان ما كتبش

Unknown يقول...

الحلقه تُحفه بجد جميله أويييي
رجوع هاني بالشكل الرومانسي ده عجبني جداً و أسعدني الحقيقه
و عاليه دي مش هتموت بقى ههههه

كان عندي سؤال هو أنا فعلاً حلقتي 22 فبراير يعني في شهر أجازه و لا ايه؟

لو في مشكله في كتابة الحلقه القادمه أنا في الخدمه
تحياتي للجميع

خواطر شابة يقول...

ندى الياسمين
"هو انا عندي غير سالي انا خلفت غير ساااااااالي " ضحكتيني والله بس بجد فعلا حلقتها انقاذ موقف ومع ذلك هي من أجمل الحلقات

خواطر شابة يقول...

سالي حاجات جوايا
تعرفي انا ارفع لك القبعة من فكرة استماع رانيا للاغنية مع وضع الرابط لها الفكرة بسيطة لكنها مبتكرة وجميلة.
وايه الرومانسية دي عزيزتي ده انتي خليتي هاني ولا روميو زمانه وايضا فكرته ليعود والدته على غيابه جميلة ومنطقية
ايضا جميل جدا رجوع هيام للاحداث كانت غائبة طوال الحلقات الماضية
ايضا ظهور شريف كان غير مقحم وداخل في سياق الاحداث
جو الخطوبة وتحضيرات عائلة سمر وعائلة باسم عيشتينا في اجوائه وشوقتينا لمعرفة ما سيحدث وان كان قلبي حاسس ان نجاة هانم مش حتجيبها البر ههه
ظهور عاليا المفاجئ مسؤولية من بعدك ليبرره ويعطيه سياقا منطقيا
بالمجمل عزيزتي الحلقة روعة روعة روعة أعجبتني جدا وصدقت ندى لما قالت هو أنا خلفت غير سالي ههه
مع ودي عزيزتي

محب روفائيل يقول...

اووووه ايه الاحداث الجامدة دى

تسلم ايدك بجد يا سالى

اكتر حاجة عجبتنى كلمة تتسوله

وبعدين الكيس واللب هنا مش وعظة ولا حاجة ،لا ده كويس جدا ان حضرتك قولتيه وهو عمل بعض الرتوش فى الصورة

حلقة جامدة ويا ريت عاليا تكون اتصلحت وبقيت كويسة علشان شريف يرجعلها ويتلم الشمل

أخيرا هانى بقى عنده دم ، أنا كنت هقتله فى أول كام حلقة .

تحياتى .

Noha Saleh يقول...

بجد الحلقة تحفة

حنعيش يعنى حنعيش يقول...

ماذا اقول بعد كل ماقيل ... ميه ميه ياسالى ... حلقة زى الفل ... واللى عجبنى اكتر الكتف الاخرانى دة ... تسلم ايديكى

ليالي مصرية يقول...

مصطفى ريان ما ظهرش

فى الحقيقه انا ما عرفتش ابلغه بميعاد الحلقه لكن هو كان طلب مني الحلقه فى لقاء البؤجه الشتويه
بالتالي مش عارفه هو فعلا متابع وشافها ولا ايه

ها
مين يشيل الحلقه يا جماعه ؟؟؟؟؟

Unknown يقول...

أنا خلاص بدأت كتابه:)
هبعتها أول ما أخلص

البنفسج الحزين يقول...

بجد بجد برافو يا سالي الحلقه روعه
مررتي الأحداث بسلاسه شديدة ومنطقيه
مع حبه رومانسيه عاليه ...
وبحييكي علي فكرة الأغنيه اللي بتخلص وتتعاد دي اللي هاني رجع لعقله علي صوتها الا بالمناسبه هو مين اللي بيغنيها ههههههه
تسلم ايديكي

shimaa elkholy يقول...

تمام يا شيري
تسلم اديكى

حاجات جوايا يقول...

ندى الياسمين
...............
يسلموووو يا ريسة
تشكرات حظرتكم افندم
لا شكر على واجب يا قمر ده من دواعى سرورى انى اكتب الحلقة :)
هانى كان لازم يحس بقى بقاله عشرين حلقة فى الباى باى ههههه
وعليا كنت هكمل والله وابرر وجودها فى الكويت واوصف الحوار بس زى ما تقولى كده تشيطنت وقفلت الحلقة عشان التشويق هههههه
تسلمى يا جميل ربنا يخليكى متحررررمش

حاجات جوايا يقول...

شريين سامى
...........
تسلميلى يا شيرى متحرمش منك يا قمر
هههههههههههه موتينى من الضحك والله .. بتكرهيها للدرجة دى ... يلا يا ستى ادينى سلمتهالك اهه اعملى فيها ما بدالك هههههههههههههههه
تحياتى ليكى

حاجات جوايا يقول...

خواطر شابة
.............
كنتى مختفية فين يا جميل حمدالله على السلامة
ربنا يخليكى يا نوجا تسلميلى حبيبتى
شكرا يا قمر الحمد لله ان الفكرة عجبتكم .. هى فى دماغى من فترة الحقيقة بس كل شيء باوان
بحب انا اظبط نون النسوة شوية .. هى الستات دى بتتجوز للنكد بس ولا ايييه ههههههه
اااااه نجاة هانم بقى هنشوف هتعمل ايه بالماظاتها دى لما تتفاجيء ههههههه
ربنا يهديها .. مفيش حاجة بعيدة على ربنا
فى انتظار حلقة شيرين ... يا مسهل
تسلميلى يا قمر متحرمش منك يارب
كلنا ولاد الريسة طبعا هههههههههه
تحياتى ليكى

حاجات جوايا يقول...

الكاتب محب روفائيل
....................
الله يكرمك يا محب
شكرا جزيلا
تتسوله بس هى اللى عجبتك ولا ايه ؟؟ ههههههه
لب ..؟ لب ايه ؟
انت هتغلط فى الكاجو والفسدق ولا ايه
شريف فى الكووويت .. هو فى مصررر ؟؟؟
ههههههههههه
كلنا قاعدين اهه مستنين نشوف عليا هتعمل ايه .. ربنا يسهل
هانى طبعا كان لازم يحس بقى بالمسئولية ويخرج من عباءة مامته ويتمرد على الوضع اللى اتحط فيه هو ومراته وبنته
شكرا ليك ولمتابعتك
تحياتى

حاجات جوايا يقول...

نهى صالح
.........
تسلمى يا نهى متحرمش منك يا قمر
جهزى نفسك بقى معانا فى القصة الجاية ان شاء الله
معانا ولا ايه ؟؟؟
تحياتى ليكى

حاجات جوايا يقول...

حنعيش يعنى حنعيش
................
ربنا يخليك يا دكتور
متحرمش منك
الكتف الاخرانى ده كنت بمهدله من قبل ما اكتب الحلقة .. ومع ذلك جه لوحده على غير تخطيطى خالص هههههه زى ما تكون ماشى يمين وفجأة تحود شمال
حاجة غريبة الكتابة دى والله
حتى الكاتب ملوش سلطان عليها ههههههه
بس الحمد لله انها طلعت بالشكل ده
تحياتى ليك

حاجات جوايا يقول...

البنفسج الحزين
...............
ربنا يخليكى يا قمر تسلمى يارب
شكرا حبيبتى ده بعض ما عندكم
تؤتؤتؤتؤتؤ مش عارفة تمورة ولا ايه ؟
وهل يخفى نجم الجيل ؟ هتغلطى فى الطرب الاصيل ولا ايه ؟هههههههه
تسلمى يا قمرى
تحياتى ليكى

Tota يقول...

الحلقة حلوة اوى مليانة رومانسيه وارتياح وانسيابية من غير مطبات.. عاملة كده زى مايكون بتمشي بايديك على حرير طبيعى ساقع فى يوم حر اوى
بجد تسلم ايديكى يا استاذة سالى

حاجات جوايا يقول...

Tota
......
ربنا يخليكى يا قمر
ايه الكلام الجامد ده كله
متحرمش من ذوقك حبيبتى
هتغر كده يا ولاد بشويش عليا هههه
تحياتى ليكى