الاثنين، 20 ديسمبر 2010

اين انا ... الحلقه الرابعه عشر

الحلقة الرابعة عشرة ... أين انا ؟؟

بقلم : حاجات جوايا

....................

متعودتش عليا ان حد يقولها لأ .. دايما هى اللى بتحدد امتى تشد وامتى تسيب .. هى عايزة شريف .. اختارته من بين ناس كتير كانوا بيجروا وراها ويتمنوا رضاها .. اول ما شافته حست بقلبها بيدق .. من سنين طويلة محستش بالاحساس ده .. ازاى يرفضها بعد كل اللى عملته عشان توصله وتملك مشاعره .. ازاى يقولها لأ ؟؟

عليا مع شريف مكانتش زى عليا مع هانى .. هانى راجل متجوز .. كانت عارفة هو عايز منها ايه ؟.. وهو كمان كان عارف هى عايزة منه ايه ؟.. وقت بيقضوه مع بعض وخلاص .. كلام بيرضى غرور كل واحد فيهم والموضوع بينتهى على كده .. لكن مع شريف الموضوع مختلف تماما

شريف حسسها انها كيان له قيمة .. انثى محبوبة .. مش بس مرغوبة .. انسانة من حقها تبنى حياة وأسرة ويكون لها زوج واولاد وبيت .. وحاجات كتير كانت اعتقدت انها مش هتحسها تانى بعد جوازها الاولانى وطلاقها

قبل شريف .. كانت عايشة لنفسها وبس .. هى قررت كده .. قررت تعمل كل حاجة نفسها فيها وقت ما تحب .. يمكن اسرتها المفككة وجوازها من راجل اكبر منها بكتير واهانته ليها المستمرة كانوا السبب اللى وصلها لكده ..واللى خلاها انسانة مستهترة ملهاش ضابط ولا رابط .. وغناها وجمالها خلوها مطمع للذئاب .. هى كانت سعيدة بكده .. ومستمتعة بلعبة الصياد والفريسة اللى بتلعبها او بتتلعب عليها .. كانت حاجة بترضى غرورها وتزود ثقتها فى نفسها لما تلاقى نفسها محط الانظار ومنتهى الامال ..والرجالة بتتهافت عليها زى تهافت الاطفال على الحلوى

لكن بعد شريف بدات تحس ان كل ده كان وهم و شيء مهين .. كانت مرخصة نفسها وبدل ما تنتقم من ظلم الايام ليها .. وتعيش حياة ترضيها .. انتقمت من نفسها وغرقتها فى الوحل

شريف لما ظهر فى حياتها كان النور اللى نور ظلام حياتها .. والشمس اللى بددت ظلمة ليلها .. صحيح هى تعرفه من فترة قليلة بس كانت كافية انها تغير نظرتها للحياة .. ومش ممكن تتنازل ابدا عن الاحساس اللى حسته وهى جنبه .. احساس الطفلة البريئة .. البنت الصغيرة اللى لسه بضفاير وبتحب لاول مرة فى حياتها

عشان كده لما شريف صرحلها انه مش هيقدر يتجوزها ووضحلها السبب اللى مكانش ابدا يخطرلها على بال وهو علاقتها بهانى جوز اخته وسابها ومشى قررت تعمل اى حاجة عشان متسيبش شريف يضيع منها بعد ما لاقته .. قررت تدخل حرب كل املها انها تكسبها .. حرب عمرها .. حرب هتستخدم فيها كل اسلحتها من ضعف .. ودهاء علمهولها الزمن

.......................

لما رانيا ردت عليها .. عرفتها بنفسها

عليا : انا عليا السيمرى .. صاحبة محل عليا فى مصر الجديدة

رانيا طبعا عرفتها وردت بتحفز هادئ وجواها الف سؤال وسؤال عن سبب المكالمة : اهلا وسهلا مدام عليا

بصت رانيا لهانى اللى كان سامع المكالمة ومتحفز وهى بتسمع عليا اللى معاها عالخط بتقولها :شريف كلمنى على حضرتك كتير وكنت حابة اتعرف عليكى ولقيت فرصة افتتاح المحل فرصة مناسبة لكده .. الافتتاح هيبقى يوم الخميس .. اتمنى تشرفينا

رانيا بشئ من التردد وهى لسه باصة لهانى : اه طبعا .. هحاول ان شاء الله .. الف مبروك

عليا : الله يبارك فيكى.. هستناكى اكيد .. واهى فرصة اعرف رأيك فى ذوق شريف .. ما هوه اللى كان مشرف على كل حاجة .. يعنى انتي صاحبة مكان

بعد تبادل المجاملات والضحكات انتهت المكالمة باتفاق رانيا معاها على الحضور

..............

رانيا قفلت معاها وفضلت ساكتة .. عقلها شغال .. بتفكر ايه اللى يخليها تكلمها فى الوقت ده .. وافتتاح ايه اللى عايزاها تحضره .. يا ترى شريف عمل معاها ايه ..؟.. لسه مكمل ولا ايه ؟؟

هانى قطع تفكيرها بسؤاله وهو بيحاول يخلى صوته طبيعى وغير مبالى : كانت عايزة ايه ؟

رانيا بعد قليل من الصمت : أبدا .. كانت بتعزمنى على الافتتاح

هانى : ليه ؟

رانيا بصتله من غير ما تتكلم بس نظرتها كان معناها .. الله اعلم

وفضلت هادية جدا وساكتة .. مخدتش وادت معاه فى الكلام .. ولا حتى مارست عليه الشكوك الزوجية .. كل اللى عملته انها رجعت للوحتها وفرشها وكملت رسم

................

تانى يوم اتصلت رانيا بشريف فى غياب هانى وحكتله اللى حصل وسألته عاللى حصل بينهم

شريف : أبدا انا عرفتها انى مش هقدر اكمل معاها وقولتلها انى عرفت العلاقة اللى كانت بينها وبين هانى

رانيا اتفاجئت : ايه .. قولتلها .. ليه كده ؟؟

شريف : امال يعنى .. هى فاكرانى صيده ولا ايه ؟.. أنا حبيت اكون واضح معاها وافهمها انى مش بتهرب منها و مكنتش هغير رايى فيها مهما حصل .. لكن انها تكون عندها علاقات قبلى وتخبى عليّ ده شئ انا مقبلوش .. وياريت كمان حد غريب .. ده جوز اختى .. يعنى هيحتكوا ببعض طول الوقت .. ازاى اتجوز واحدة كانت على علاقة بجوز اختى ؟!!

رانيا وجعتها الكلمة رغم معرفتها بيها : وقالتلك ايه ؟

شريف : هتقول ايه يعنى .. المتوقع منها

رانيا باصرار : قالت ايه يعنى ؟

شريف بدا عليه الارتباك .. مكانش عايز يقول لاخته اللى عليا قالته على جوزها عشان ميوقعش بينهم فقرر يغير الكلام : قالت مكانش فيه بينهم حاجة وكانت معرفة سطحية

رانيا بمرارة : اهااا .. متوقع فعلا .. واضح فعلا انها معرفة سطحية عشان كده عرفت تليفون البيت .. طيب دلوقت اللى بينكم انتهى مش كده ؟

شريف : اه خلاص .. من ناحيتى عالاقل

رانيا : طيب تفتكر هى عزمتنى عالافتتاح ليه .. ورايك اروح ولا لأ؟

شريف : انا عارف .. بتسحب ناعم شكلها .. متروحيش طبعا سيبك منها

رانيا : انا برضه بقول كده .. انا ماعرفهاش اصلا .. ومفيش بينى وبينها كلام ممكن يتقال .. هى شكلها عايزة تدخل لك عن طريقى .. يلا كويس انك متعمقتش معاها اكتر من كده ولحقناك من البداية .. ربنا يوفقك بقى فى المرة الجاية ..بس انا مستغربة اصلا ايه اللى وقعك فى واحدة زى دى .. يعنى انت شاب لسه بتبتدى صحيح بس لافف ومدردح .. غريبة اوى انك تقع بسهولة كده

شريف ارتبك : والله منا عارف .. اهو كل شئ قدر ومكتوب .. انا هقوم انزل بقى دلوقت عشان ورايا شغل جديد

رانيا : ماشى يا حبيبى .. ربنا يعينك ويوفقك .. مع السلامة

شريف : مع السلامة

...........

شريف قفل وقام نزل بس عقله لسه مشغول باللى دار فى المكالمة وخصوصا اخر سؤال سألته رانيا .. ايه اللى وقعه فى عليا .. ايه ؟

شريط ذكريات طويل مر قدام عنيه .. افتكر قد ايه كانت عليا رقيقة معاه وذوق لابعد حد .. قد ايه كانت بتخاف على مشاعره .. قد ايه كانت بتهتم بيه وبصحته لو تعب ولو حتى بنزلة برد .. وازاى كانت بتتصل بيه كل شوية لما يكون مسافر تطمن على سلامته وسلامة طريقه .. ولما كانت هى بتسافر مكانتش تنسى ابدا تجيبله معاها هدية عشان تحسسه انها فاكراه دايما .. قد ايه كانت طيبة ودمعتها قريبة وفتحت له قلبها وحكتله على كل مشاكلها .. عن باباها اللى طلق مامتها وهى لسه طفلة .. وكل واحد فيهم اتجوز وعاش حياته ولقت نفسها مشتتة .. مرة مع جوز ام .. ومرة مع مراة اب .. كانت فقيرة .. مكانش فيه حد من اهلها فقير بالعكس .. كان كل واحد فيهم عنده اللى يكفيه ويفيض بس كانوا بيبخلوا عليها ومش بيصرفوا عليها كويس لا مامتها ولا باباها .. كان كل ما حد فيهم يشوفها يفتكر ايامه السودة فى الزيجة الاولى .. وكل واحد يرميها عالتانى ويتهرب من مصاريفها .. لغاية ما قررت تتجوز .. ورغم جمالها الخارق مكانش بيتقدم لها عرسان كتير .. وانسب واحد من اللى اتقدمولها كان اكبر منها بعشرين سنة .. عمر تانى بس ميهمش طالما غنى وهيعيشها كويس.. لانها زهقت من الوحدة وتعبت من التشتت والاحساس الدائم بالغربة والفقر.. وافقت عليه.. وبعد جوازها منه وحلمها بالامان والاستقرار اللى افتقدتهم طول عمرها لقت نفسها وقعت فى بير ملوش قرار .. كان بيعاملها بخشونة وغلظة .. وقلة ذوق ..مكانش بيراعى مشاعرها ابدا وممكن يهزأها ويوبخها لاى سبب وقدام اى حد .. ده غير الغيرة العميا والشك المتواصل .. ومعايرتها طول الوقت انها مكانتش لاقية بيت يلمها وعايشة عالة على باباها ومامتها .. لغاية ما فاض بيها وبيه واتطلقوا .. ورجعت غنية وعندها فلوس كتير

وقف شريف فى الاشارة .. ومن غير ما يحس لقى نفسه بيفتح موبايله وبيدور فى الرسايل .. مكانش مسميها فى الدليل عليا .. لأ .. كان مسميها غاليا عليّ ..

فتح رسايلها وقلب فيهم ببطء .. وحشتنى .. اتأخرت كتير – عايزة اقولك كلمة قلبى بيقولها كل ثانية بس لسانى خايف .. لو قلتها انت .. هقولهالك – الوطن من غيرك غربة و .. و .. و .. الخ

سرح شريف مع الرسايل وهو بيفتكر يوم ما صارحها بمشاعره ..كانوا بيتقابلوا كل يوم .. بس لحظة المصارحة كانت فى التليفون .. مكانش عارف يقولها انه بيحبها وجها لوجه رغم ان لهفة عنيها ورعشة ايديها وابتسامتها كانت بتغريه فى كل لحظة انه ينطق .. كانت بتتوسل اليه يعبر الخط الفاصل اللى بينهم ويهمس بالحب .. مجرد همسة .. ومن يوم ما صارحها من شهر فات مكانش حاسس انه ماشى على الارض .. كان طاير فى السما .. وهى كمان .. كان احلى شهر فى العمر ..واتفقوا عالجواز وبنوا مع بعض بيت فى الخيال حتى اسماء الاولاد اختاروها ... لغاية يوم زيارته لرانيا !

شريف قفل الرسايل وبعد الموبايل .. مش عايز يفكر .. خايف يفكر يرجع يحن .. هو مشافش منها اى حاجة تدينها .. كل معاملاتها قدامه كانت معقولة ومشروعة .. مفيش فيها اى تجاوز .. ولا حتى سمع عنها حاجة وحشة .. معقول يكون هانى بيكدب .. بس ده شاف بنفسه صورته على موبايلها .. يا ترى مين فيهم الصادق ومين الكداب .. يوووووه .. انا شاغل نفسى ليه .. ما انتهينا بقى .. حتى لو كان هانى اللى بيجرى وراها ازاى اتجوزها وهانى جوز اختى وجزء من عيلتى ولازم هيتقابلوا قدامى او من ورايا .. انا اسلم نفسى للشكوك ليه .. البعد عن النار اسلم من الحوم حواليها

قطع تفكيره رنين الموبايل.. بص عالشاشة لقى اسمها .. غاليا عليّ ...مردش ولا كنسل .. هداه تفكيره انه يغير رقم الموبايل لانه لو عمل حظر لرقمها سهل توصله من اى رقم تانى .. ارتاح شريف للفكرة وعزم عليها رغم ألمه......... وفتحت الاشارة

..................

رانيا أكلت جنى وطبخت وخلصت شغل البيت بسرعة بسرعة قبل ما هانى يرجع بكتير..عايزة تفضى لمرسمها ولوحاتها .. ناوية تحترف الرسم ده هدفها دلوقت .. عايزة ترسم لوحات كتير عشان تعرضهم فى ساقية الصاوى يمكن ربنا يفرجها عليها وتبيع لوحاتها فى معرض .. هى كمان تقدر تعمل الاشغال اليدوية .. المفارش .. البراويز .. التكاوى .. الشنط .. الاكسسوارات .. خدت كورسات كتير فى قصر الثقافة وهى طالبة فى ثانوى وفى الجامعة .. وكان ليها صديقات من فنون جميلة علموها تشتغل بايدها عشان كانوا بيحتاجوا مساعدتها فى المشاريع اللى بياخدوا عليها درجات .. هى صحيح بقالها فترة ناسية ومحاولتش تمارس اى نشاط يدوى .. بس اكيد الموضوع مش محتاج وقت عشان تفتكره طالما الموهبة موجودة .. الحاجات دى برضه عايزة مصاريف .. بس هى هتبدأ وحدة وحدة لغاية ما ربنا يفرجها وتعرف تشتغل

واثناء انهماكها فى الرسم جالها تليفون من رحاب صاحبتها وبعد السلام كان الكلام

رحاب : انا طالباكى النهارده يا ستى عشان افجرلك مفاجأة مكانتش عالبال ..

رانيا : خيرررر يارب .. مفاجأة حلوة مش كده

رحاب : تقريبااااا

رانيا : قولى بقى متبقيش غلسة .. اوعى تكونى اتخطبتى

رحاب : للأسف ............... اتخطبت

انفجرت الصديقتان فى الضحك

رانيا : ألف مبروك يا حوبة .. الف مبرووووووووك أخيراااااااااااااا .. ايه اللى حصلك .. اخيرا وافقتى تتخطبى وحنيتى على شاب من شباب البلد ههههههههه

رحاب : يلا بقى اعمل ايه .. صعب عليّ قلت اوافق بقى وخلااااااص واكسب فيه ثواب ههههههههه

رانيا : وده مين اللى مامته داعياله ده .. او داعية عليه يعنى على حسب ههههههه

رحاب بسهوكة : زميلى فى الشغل .. إيهاب

رانيا : قولتيلى .. ده الموضوع لاف ستورى بقى من تحت لتحت

رحاب : أبدا والله .. هو بس شوية اهتمام .. من ناحيته طبعا .. وشوية تسبيل .. من ناحيته طبعا .. وشوية مسدات ومسدجات .. من ناحيته طبعا .. وشوية سندوتشات

رانيا كملت : من ناحيته طبعا ههههههههههه

رحاب : لا لا المرة دى من ناحيتى انا .. الواحد لازم يبقى عنده دم برضه ويساهم باى حاجة ههههههههه

رانيا : هههههههه الف مبروك يا حوبة .. انا فرحانة جدا جدا .. بجد طايرة من الفرحة .. اخيرا جه اليوم اللى همشى فيه فى فرحك ههههههه

رحاب : اه يا مجرمة ومتنسيش تلبسى اسود ... سواريه طبعا ههههههه

رانيا : طيب امتى قولى بسرعة .. حددتى الفرح

رحاب : فرح .. فرح مين .. قولى الخطوبة .. دى لسه قراية فاتحة .. هو انا كنت اقدر اتخطب من غير ما تكونى موجودة .. دى بس قراية فاتحة بدبلتين ولسه الخطوبة الخميس الجاى

رانيا : جمييييييل .. كده اضمن امشى فى فرحك وفى خطوبتك كمان ..

خدت رانيا من رحاب عنوان المكان اللى هتعمل فيها حفلة الخطوبة ووعدتها تروحلها عند الكوافير يوم الحفلة .. والغريب .. الغريب جدا ان الكوافير كان فى مصر الجديدة فى نفس المكان اللى وصفتهولها عليا ...!!!

إلى اللقاء فى الحلقة القادمة

بقلم : ريـــــــــمـ

 

هناك 25 تعليقًا:

ليالي مصرية يقول...

تسلم اديكى يا ست النائبه والله الحلقه جميله جدا
وعجبنى تحليلات الشخصيات بتاعتك اوي خصوصوا علياء

تسلم اديكى

محب روفائيل يقول...

فعلا تحليلها لشخصية عليا حاش عنها أكوام الظلم اللى اتراكمت عليها الحلقات اللى فاتت ماعدا القليل طبعا .
وكمان الحلقة دى بررت وقوع شريف فى المصيدة اللى مطلعتش مصيدة ، لأ دى طلعت حب ( أوعوا تقروها طلعت حرب :))
معالجة قصصية ممتازة
تسلم ايدك

Unknown يقول...

تسلم ايدك الحلقه هايله و بالرغم من اني كنت معتبره عاليه هي الفيلين بتاعة المسلسل لأني بصراحه مبطقش اللي تعمل صداقه مع حد متجوز لكن انتي قدرتي تخليني أتعاطف معاها
بحيكي على وصفك الهايل للشخصيه و توضيحك لقصة الحب الرقيقه اللي جمعتها بشريف
تحياتي لكم جميعاً و في انتظار الجديد

Tota يقول...

خليتينا تعاطفنا مع عليا لانها مش شريرة بطبعها وضحية ظروف .. انا من الاول ماكنتش محملاها ذنب هانى ولا شايفة انها مسئولة عن انفلاته لانه هو كده اصلا بيستسهل كل حاجة و ده متوافق مع شخصيته الغير مسئولة
كمان جامدة اوى قصة الخطوبة اللى جنب المعرض بتاع عليا ده لأن رانيا اكيد كان نفسها تشوف مين عليا دى اللى سرقت قلب شريف وهانى مرة واحدة وياعالم المقابلة دى ممكن تودى لفين؟؟
استاذة بجد وتسلم ايدك وقلبك وعقلك

اسماء عبدالعزيز يقول...

بجد قلمي عاجز عن التعبير
ولكن بجد انا امام كاتبه رائعه بحق
دام الله عليك الابداع والتميز
حاجات جوايا الجميلة استمتعت كثيرا وانا اقرأ سطورك ..
وطبعا ليالى مصرية جميل مدونتك اوى
وبجد يدهشنى طريقة عملكم كفريق ..الله يديم النجاح والود بينكم يارب ..
كونوا بخير جميعا

حاجات جوايا يقول...

ليالى مصرية
.............
تسلمى يا ست الريسة
الله يخليكى يارب
ده بعض ما عندكم
أخجلتم تواضعنا يا فندم
يسلموووووووو

حاجات جوايا يقول...

الكاتب محب روفائيل
..................
أهلا يا فندم
شكرا جزيلا
انا بتعاطف مع الشخصيات الانسانية عموما ومؤمنة ان مفيش حد سيء ولا شرير بطبعه .. والظروف بيكونلها عامل كبير فى تشكيل شخصية الانسان .. ولما الظروف بتتغير الانسان بيتغير معاها ووجهة نظره فى الامور بتختلف

الف شكر يا فندم
نورتنا

حاجات جوايا يقول...

شيرين سامى
...........
أهلا يا قمر
تسلمى حبيبتى
الحمد لله انى وصلتك للتعاطف مع عليا
ده هيخلينا نتوقع احداث جديدة بين عليا وشريف ومنقفلش حكايتهم
ربنا يخليكى يا قمر تسلميلى
منورة يا جميل

حاجات جوايا يقول...

tota
....
أهلا يا جميل
فعلا هانى لو مكنتش عليا موجودة كان هيبقى فيه غيرها
هى مجرد واحدة قابلها فى طريقه
وفى حلقة سابقة ندى الياسمين وضحت انها مكنتش عايزة غير فلوس .. يعنى كان كل همها من الرجالة انها ترفع مستواها وتعوض فقرها

يا جميل انت يا فاهمنى
ههههه
رانيا اكيد طبعا زى اى زوجة مصرية اصيلة نفسها تشوف عليا .. بس الظروف مش سامحالها بكده عشان متورطش شريف معاها ولا هى من النوع اللى تروح تدور عاللى جوزها عرفها عليها فى غيابها
هنشوف بقى يوم الخميس هيحصل ايه
وهتشوف عليا ولا لأ

نورتينا يا توتا

حاجات جوايا يقول...

أسماء عبد العزيز
..................
أهلا بكاتبتنا الجميلة الموهوبة
ده بعض ما عندكم يا سمسم
ربنا يخليكى يا قمر متحرمش منك
ليالى مصرية مدونة مشتركة مش مدونتى لوحدى .. مدونة المشاركين فيها من مؤلفين وقراء
لا اخفى عليكى سرا انى برضه مندهشة ويزيد اندهاشى واعجابى بكل قلم جديد يوم بعد يوم
ربنا يزيد المبدعين والمشاركين دايما يارب

يلا اطلبى حلقة وشاركينا
الحلقات اللى قبل الاخيرة اعتقد مش محجوزة لسه 27-28-29

وتسئل الريسة فى ذلك
اعتقد خواطر حاجزة حلقة هتبقى 26
وندى الياسمين هتختم فى 30 لانها صاحبة الفكرة وفقا للتقليد المتبع فى ليالى مصرية

فى انتظارك يا قمر
منورانــــــــــــــــــــا

Carmen يقول...

حلقة جميلة تسلم ايدك ياجميل
تحياتي

Mona Hekal يقول...

تسلم ايدك بجد
كويس انك ركزتي علي عاليا و تحليل شخصيتها لانها ماخدتش حقها في الحلقات اللي فاتت مع انها شخص مؤثر في الاحداث
وصفك و تحليلك ليها هايل
تحياتي ليكي

أحمد عبد الحميد يقول...

تسلم إيديكى
الكبير كبير والمبدع مبدع
الحلقة حلوة موووووت
بجد واللهليا سؤال واحد هو أخو رانيا التانى لسه عايش؟ هو الناس كلها كارفاه ليه؟
مستنينك يا ريم وبالراحة عليا علشان أنا اللى بعدك

Dr/ walaa salah يقول...

يا ترى ايه اللي هيحصل طالما ان مكان الكوافير قريب من عاليا

انا متابعه معاكم

مشكوره يا حبيبتي

خواطر شابة يقول...

عزيزتي تعرفي اني كنت ناوية اكتب لك ميل اطلب منك فيه انك تهتمي بموضوع عليا وشريف وكنت حأقولك انه لفلاش باك هو الحل لكن بعدبن قلت لا لان هذا سيعتبر حجرا على ابداعك في الحلقة الخاصة بك لكن سعادتي كبيرة عندما وجدت ما تمنيته امامي ارفع لك القبعة عزيزتي لان هذا الخط كان يشكل هاجس بالنسبة لي
الحلقة بالمجمل جميلة واعجبني الرابط الحاصل الان بين الثلاثي رحاب عليا ورانيا تخريجة جميلة للقاء المرتقب بين رانيا وعليا
دمت بكل الود عزيزتي

خواطر شابة يقول...

ابو حميد
بالنسبة لاخو رانيا الكبير ده جزاء اللي دايما قافل عليه اوضته ومش راضي يكلم حد ههه

حنعيش يعنى حنعيش يقول...

ولا احلى ولا اجمل ولااروع من كدة ... استااااذ... حلقة جميلة قوى قوى قوى ... مش عارف الاقى كلمات تعبر عن استمتاعى بالحلقة ... لسه ماخترعوش كلمات توفيكى حقك ... مش مجامله دى الحقيقة ... تسلم ايدك ويسلم عقلك ...

حاجات جوايا يقول...

carmen
.......
أهلا يا جميل
تسلمى يا حبيبتى متحرمش منك
منورانا
تحياتى

حاجات جوايا يقول...

منى أبو السعود
..............
أهلا يا جميل
تسلمى يا قمرى متحرمش منك
عليا فعلا مخدتش حقها واعتقد كده دورها ممكن يبقى اكتر اهمية
البركة فيكو بقى :)
منورانا يا جميل
تحياتى

حاجات جوايا يقول...

أبو حميد
........
أهلا يا فندم
ربنا يكرمك الف شكر
ده بعض ما عندكم بس
:)
اخو رانيا التانى فعلا منسى .. المهم انى كنت ناوية ادخله فى الاحداث ونسيت ههههه
البركة فيكو بقى :)
منور يا فندم
تحياتى

حاجات جوايا يقول...

د. ولاء صلاح
............
أهلا يا قمر
سعيدة بمتابعتك لنا
انا كمان نفسى اعرف والله ايه اللى هيحصل :)
هانت ان شاء الله وهنشوف ريم هتعمل ايه النهارده
نورتينا يا قمر
تحياتى

حاجات جوايا يقول...

خواطر شابة
...........
أهلا يا نوجا
هههههههه عشان تعرفى انى اقدر اقرا افكارك ومن عينيكى اقدر اقولك كل اسرارك ههههههه ( ده مقطع من اغنية دويتو لعبد الوهاب )
الحمد لله انى قدرت احققلك رغباتك فى الحلقة وتلاقى فيها اللى اتمنتيه :)
شكرا يا قمر متحرمش منك
وفى انتظار ما سيحدث ان شاء الله
منورة يا حبيبتى
تحياتى

حاجات جوايا يقول...

هنعيش يعنى هنعيش
...............
اهلا د اسلام
طيب ارد اقول ايه ؟
الف شكر يا فندم
اخجلتم تواضعنا وتواضع الاهل والجيران والمجتمع والناس ههههه
تسلم يا دكتور :)
الحمد لله ان الحلقة عجبتكم
وفى انتظار حلقة ريم ان شاء الله
تحياتى

كلمات من نور يقول...

جميلة الحلقة دي بجد .عذرا عالغياب لظروف خارجة عن إرادتي بس كويس ضمنت حلقتين النهاره (:

حاجات جوايا يقول...

كلمات من نور
..............
اهلا يا قمر
تسلمى يا حبيبتى ربنا يخليكى
افتقدتك فعلا يارب تكون الظروف مرت بسلام وكانت خير :)
منورانا يا قمر
تحياتى ليكى